HIERAPOLIS

[Balaang Siyudad].

Usa ka siyudad sa lalawigan sa Asia. Kini nahimutang sa amihanang tumoy sa Walog sa Lycus sa Asia Minor, mga 10 km (6 mi) sa A sa Laodicea diha sa modernong Pamukkale, Turkey.

Bisan tuod si apostol Pablo lagmit wala gayod makaduaw sa Hierapolis, ang mga epekto sa iyang dugaydugayng buluhaton sa Efeso (sukad sa tingtugnaw sa 52/53 K.P. hangtod human sa Pentekostes sa 55 K.P. [1Co 16:8]) mikaylap sa ‘tibuok nga distrito sa Asia.’ (Buh 19:​1, 10) Ang Kristiyanidad mopatim-awng nakaabot gayod sa Hierapolis pinaagi sa ‘mga paningkamot’ ni Epafras.​—Col 4:​12, 13.

Bisan tuod ang siyudad dili kaayo ilado maylabot sa politika, kini nagmauswagon sa malinawong yugto sa mga Romano ingong usa ka sentro sa pagsimba kang Cybele. Ang pagsimba kang Cybele didto mas milambo tungod sa duha ka talagsaong buhat sa kinaiyahan, ang mineral nga mga tubod ug ang Plutonium, o Charonion, usa ka lawom, hiktin nga liki sa yuta nga nagabuga ug makamatay nga mga aso.