Atong Kasilagan Kon Unsa ang Tuman-Kadaotan

SI Jehova maoy usa ka balaang Diyos. Sa karaang kapanahonan siya mao “ang Balaang Usa sa Israel,” ug sa ingon iyang gibaod nga ang Israel kinahanglan nga mahinlo, walay buling. (Salmo 89:18) Iyang gisultihan ang iyang piniling katawhan: “Kinahanglan kamong magbalaan, tungod kay ako balaan.” (Levitico 11:45) Si bisan kinsa nga buot “motungas ngadto sa bukid ni Jehova” kinahanglang “walay sala diha sa iyang mga kamot ug mahinlo sa kasingkasing.” (Salmo 24:​3, 4) Nagkahulogan kanag labaw pa kay sa paglikay lamang sa makasasalang mga buhat. Nagkahulogan kana sa “pagdumot kon unsay daotan.”​—Proverbio 8:13.

Sa kamahigugmaon, si Jehova nagpahimutang ug detalyadong mga balaod aron ang nasod sa Israel makaila ug makalikay sa buhat nga daotan. (Roma 7:​7, 12) Kining mga balaora naglakip sa estriktong mga lagda bahin sa moralidad. Ang panapaw, homoseksuwal nga mga buhat, mga panag-unay, ug bestialidad ngatanan maoy di-balaang mga maghuhugaw sa espirituwalidad. (Levitico 18:​23; 20:​10-17) Kadtong sad-an nianang daotang mga buhat gilaglag gikan sa nasod sa Israel.

Sa dihang ang kongregasyon sa dinihogang mga Kristohanon nahimong “ang Israel sa Diyos,” ang susamang mga sukdanan sa moral gipahiluna alang kanila. (Galacia 6:16) Ang mga Kristohanon usab kinahanglang ‘masilag kon unsa ang tuman-kadaotan.’ (Roma 12:9) Ang mga pulong ni Jehova ngadto sa Israel mapadapat usab kanila: “Kinahanglan kamong magmabalaan, tungod kay ako balaan.” (1 Pedro 1:​15, 16) Ang di-balaang mga batasan sama sa pakighilawas, panapaw, homoseksuwal nga mga buhat, bestialidad, ug pag-unay dili angay nga magdaot sa Kristohanong kongregasyon. Kadtong modumili paghunong sa pagbuhat nianang mga butanga dili makasulod sa Gingharian sa Diyos. (Roma 1:​26, 27; 2:​22; 1 Corinto 6:​9, 10; Hebreohanon 13:4) Niining “kataposang mga adlaw,” ang samang mga sukdanan mapadapat ngadto sa “ubang mga karnero.” (2 Timoteo 3:​1; Juan 10:16) Ingong sangpotanan, ang dinihogang mga Kristohanon ug ubang mga karnero gilangkoban sa hinlo ug buotang mga tawo, nga arang makadala sa ngalan sa ilang Diyos ingong mga Saksi ni Jehova.​—Isaias 43:10.

Pagtipig sa Kongregasyon nga Mahinlo

Kasukwahi, ang kalibotan nagkonsentir sa tanang matang sa imoralidad. Bisan pag lahi ang matuod nga mga Kristohanon, angay nga dili sila malimot nga daghan nga nag-alagad karon kang Jehova sa nangagi maoy taga-kalibotan. Adunay daghan si kinsa, sa wala pa sila makaila sa atong balaang Diyos, wala makasabot kon nganong dili tagbawon ang mga tinguha ug mga handurawan sa ilang makasasalang unod, nga naglunang sa “ubos nga lunangan sa pagpatuyang.” (1 Pedro 4:4) Si apostol Pablo, human batbata ang makaluod nga mga buhat sa daotang katawhan sa mga nasod, miingon: “Ingon niana ang pipila kaninyo kaniadto.” Bisan pa niana, siya nag-ingon: “Apan kamo hinlo nang nahugasan, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.”​—1 Corinto 6:11.

Pagkamakapahupay kana nga pahayag! Bisan unsa may gibuhat sa usa ka tawo sa kinabuhi sa nangagi, siya nagbag-o sa dihang miepekto na diha sa iyang kasingkasing ang mahimayaong maayong balita mahitungod kang Kristo. Siya nagbutang ug pagtuo ug nagpahinungod sa iyang kaugalingon kang Jehova nga Diyos. Sukad niana siya nagkinabuhi ug maputli sa moral nga kinabuhi, nga gihinloan na sa panan-aw sa Diyos. (Hebreohanon 9:14) Ang mga sala nga iyang nabuhat sa nangagi gipasaylo na, ug siya ‘makapangab-ot sa mga butang sa unahan.’a​—Filipos 3:​13, 14; Roma 4:​7, 8.

Gipasaylo ni Jehova ang mahinulsolong si David sa pagbuno ug panapaw, ug Iyang gipasaylo ang mahinulsolong si Manases sa imoral nga idolatriya ug dakong pag-ulag dugo. (2 Samuel 12:​9, 13; 2 Cronicas 33:​2-6, 10-13) Kita makapasalamat gayod nga andam siyang mopasaylo usab kanato kon kita maghinulsol ug moduol kaniya diha sa katim-os ug pagkamapaubsanon. Sa gihapon, bisan sa pagpasaylo ni Jehova kang David ug Manases, kining duha ka tawo​—ug ang Israel uban nila​—kinahanglang mag-antos sa mga sangpotanan sa ilang makasasalang mga buhat. (2 Samuel 12:​11, 12; Jeremias 15:​3-5) Sa susamang paagi, bisan pag si Jehova magpasaylo sa mahinulsolong mga makasasala, mahimong adunay mga sangpotanan sa ilang mga buhat nga dili malikayan.

Di-Kalikayang mga Sangpotanan

Pananglitan, ang usa ka lalaki nga nagkinabuhing imoral ug natakdan sa AIDS tingali modawat sa kamatuoran ug mohimog kausaban sa iyang kinabuhi hangtod sa punto sa pagpahinungod ug bawtismo. Karon siya sa espirituwal maoy mahinlong Kristohanon nga adunay relasyon uban sa Diyos ug kahibulongang paglaom alang sa umaabot; apan siya duna gihapoy AIDS. Sa ngadtongadto siya mahimong mamatay sa sakit, nga makapasubo apan di-kalikayang resulta sa iyang kanhing paggawi. Alang sa pipila ka Kristohanon ang mga epekto sa kanhing grabeng imoralidad tingali magpabilin sa ubang mga paagi. Sulod sa mga tuig human sa ilang bawtismo, tingali sa nahibilin nilang mga kinabuhi niining sistemaha sa mga butang, sila tingali kinahanglang makigbisog sa mga agda sa ilang unod aron mobalik sa ilang kanhing imoral nga estilo-sa-kinabuhi. Sa tabang sa espiritu ni Jehova, ang daghan molampos sa pagsukol. Apan kinahanglang sila kanunayng makigbisog.​—Galacia 5:​16, 17.

Kana sila dili makasala basta ilang pugngan ang ilang mga agda. Apan kon sila mga lalaki, sila mahimong sa kamaalamon mohukom nga dili ‘mangab-ot’ alang sa responsabilidad diha sa kongregasyon samtang kinahanglan gihapong makigbisog sa kusganong unodnong mga agda. (1 Timoteo 3:1) Ngano? Tungod kay nasayod sila sa pagsalig nga gibutang sa kongregasyon diha sa mga ansiyano. (Isaias 32:​1, 2; Hebreohanon 13:17) Sila nakaamgo nga ang mga ansiyano ginakonsulta bahin sa daghang pribadong mga butang ug kinahanglang maghusay ug sensitibong mga kahimtang. Dili mahigugmaon, maalamon, o makataronganon nga ang usa nga kanunayng nakigbisog sa mahugawng unodnong mga tinguha mangab-ot alang nianang sinaligang katungdanan.​—Proverbio 14:​16; Juan 15:​12, 13; Roma 12:1.

Alang sa usa ka lalaki nga tig-among-among ug bata sa wala pa siya mabawtismohi, mahimong adunay laing sangpotanan. Sa dihang makakat-on siya sa kamatuoran, siya maghinulsol ug magbag-o, nga dili magdala nianang mapintas nga sala sa sulod sa kongregasyon. Human niana siya tingali may maayong pag-uswag, nga bug-os nakabuntog sa iyang daotang mga agda, ug mahimong makiling nga ‘mangab-ot’ alang sa usa ka kasaligang katungdanan diha sa kongregasyon. Apan, unsa na man kon wala pa niya mapala ang daotang dungog diha sa komunidad ingong kanhing tig-among-among ug bata? Siya ba kaha “dili salawayon, . . . adunay maayong panghimatuod gikan sa mga tawo sa gawas, . . . [maoy] wala may ikasumbong”? (1 Timoteo 3:​1-7, 10; Tito 1:7) Dili, siya dili ingon niana. Busa, siya dili mahimong kuwalipikado alang sa mga pribilehiyo sa kongregasyon.

Sa Dihang ang Usa ka Dedikadong Kristohanon Makasala

Si Jehova nakasabot nga kita mahuyang ug bisan human sa bawtismo kita tingali mahulog sa sala. Si apostol Juan misulat ngadto sa mga Kristohanon sa iyang adlaw: “Nagasulat ako kaninyo niining mga butanga aron dili kamo makahimo ug sala. Apan, kon aduna may makahimo ug sala, aduna kitay magtatabang uban sa Amahan, si Jesu-Kristo, usa nga matarong. Ug usa siya ka pangpasig-uli nga halad alang sa atong mga sala, apan dili lamang alang sa atoa apan usab alang nianang sa tibuok kalibotan.” (1 Juan 2:​1, 2) Oo, pinasukad sa halad ni Jesus, si Jehova magpasaylo sa bawtismadong mga Kristohanon nga mahulog sa sala​—kon sila tinuod nga maghinulsol ug magbiya sa ilang daotang binuhatan.

Usa ka panig-ingnan niini nakita sa unang-siglong kongregasyon sa Corinto. Si apostol Pablo nakadungog sa usa ka kaso sa pakighilawas nga pag-unayay nianang bag-ong kongregasyon, ug siya mihatag ug mga instruksiyon nga ang lalaking nalangkit ipalagpot. Sa ulahi, ang makasasala naghinulsol, ug si Pablo miawhag sa kongregasyon sa pagpasig-uli kaniya. (1 Corinto 5:​1, 13; 2 Corinto 2:​5-9) Busa, tungod sa makapaayong gahom sa mahigugmaong kalulot ni Jehova ug ang dakong bili sa halad lukat ni Jesus, ang tawo nahinloan sa iyang sala. Ang susamang mga butang mahimong mahitabo karong adlawa. Sa makausa pa, hinunoa, bisan pag ang bawtismadong tawo nga nakahimog seryosong sala maghinulsol ug mapasaylo sa panan-aw ni Jehova, mahimong aduna gihapon ing nagpadayong mga sangpotanan sa iyang sala.​—Proverbio 10:​16, 17; Galacia 6:7.

Pananglitan, kon ang usa ka dedikadong dalaga makahimog pakighilawas, siya tingali sa kapait magbasol sa iyang buhat ug ngadtongadto mapasig-uli sa espirituwal nga kahimsog sa tabang sa kongregasyon. Apan unsa na man kon siya namabdos tungod sa iyang imoralidad? Nan ang tibuok niyang kinabuhi sa tino nausob tungod sa iyang nabuhat. Ang usa ka lalaki nga nakahimog panapaw mahimong maghinulsol ug dili mapalagpot. Apan ang iyang inosenteng kapikas adunay Kasulatanhong mga hinungdan sa pagdiborsiyo kaniya, ug mahimong siya mopalabi sa pagbuhat niana. (Mateo 19:9) Kon siya makigdiborsiyo, ang bana, bisan pag gipasaylo ni Jehova, mahimong mag-antos sa nahibilin niyang kinabuhi sa maong seryosong sangpotanan sa iyang sala.​—1 Juan 1:9.

Unsa man ang usa ka bana nga sa pagkadili-mahigugmaon mobulag sa iyang asawa aron makigminyog laing babaye? Tingali sa ngadtongadto siya maghinulsol ug mapasig-uli sa kongregasyon. Sa paglabay sa panahon siya tingali mouswag ug “magpadayon sa pagkahamtong.” (Hebreohanon 6:1) Apan samtang ang iyang unang asawa magpadayong walay kapikas, siya dili kuwalipikadong mag-alagad sa usa ka sinaligang katungdanan sa kongregasyon. Siya maoy dili “bana sa usa ka asawa” tungod kay siya walay Kasulatanhong hinungdan sa pagdiborsiyo sa iyang unang asawa.​—1 Timoteo 3:​2, 12.

Dili ba kini kusganong mga katarongan nga ang usa ka Kristohanon angay nga mag-ugmad sa kasilag kon unsay tuman-kadaotan?

Unsa man Bahin sa Tig-among-among ug Bata?

Unsa man kon ang usa ka bawtismadong hingkod nga Kristohanon manghilabot sa seksuwal nga paagi sa usa ka bata? Ang makasasala ba tuman-kadaotan nga si Jehova dili gayod magpasaylo kaniya? Dili awtomatikong ingon niana. Si Jesus miingon nga ‘ang pagpasipala batok sa balaang espiritu’ maoy dili mapasaylo. Ug si Pablo miingon nga walay halad alang sa mga sala ang nahibilin alang sa usa nga nagbatasan sa sala nga tinuyo bisan pag nasayod sa kamatuoran. (Lucas 12:​10; Hebreohanon 10:​26, 27) Apan ang Bibliya sa bisan asa wala mag-ingon nga dili na mapasaylo ang usa ka hingkod nga Kristohanon nga mag-abusar sa seksuwal nga paagi sa usa ka bata​—kon kaha sa pagpangunay o sa laing paagi. Sa pagkatinuod, ang iyang mga sala mahinloan kon siya maghinulsol nga tim-os gikan sa kasingkasing ug magbag-o sa iyang paggawi. Hinunoa, lagmit kinahanglang makigbisog gihapon siya sa daotang unodnong mga agda nga iyang naugmad. (Efeso 1:7) Ug mahimong adunay mga sangpotanan nga dili niya kalikayan.

Depende sa balaod sa nasod nga iyang gipuy-an, ang tig-among-among ug bata mahimong magsilbi sa usa ka tagal sa pagkabilanggo o mag-atubang ug laing mga silot gikan sa Estado. Ang kongregasyon dili manalipod kaniya batok niini. Dugang pa, ang maong tawo nagpadayag ug seryosong kahuyangan nga sukad nianang panahona pagatagdon. Kon siya dayag nga mahinulsolon, siya mahimong dasigon nga mouswag sa espirituwal, makig-ambit sa pagsangyaw sa kanataran, magbaton pag mga bahin sa Tunghaan sa Teokratikanhong Ministeryo ug sa dili-magatudlo nga mga bahin sa Tigom sa Pag-alagad. Hinunoa, kini wala magkahulogang siya mokuwalipikar nga mag-alagad sa usa ka sinaligang katungdanan sa kongregasyon. Unsa ang Kasulatanhong mga katarongan niini?

Ang usa sa mga katarongan mao nga ang usa ka ansiyano kinahanglang “mapugnganon-sa-kaugalingon.” (Tito 1:8) Tinuod, walay mausa kanato ang adunay hingpit nga pagpugong-sa-kaugalingon. (Roma 7:​21-25) Apan ang usa ka dedikadong hingkod nga Kristohanon nga mahulog sa sala sa seksuwal nga pag-abusar sa bata nagpadayag ug di-kinaiyanhong unodnong kahuyangan. Gipakita sa kasinatian nga ang maong hingkod nga tawo mahimong mag-among-among sa ubang mga bata. Tinuod, dili tanang tig-among-among ug bata ang magsubli sa sala, apan daghan ang nagsubli niana. Ug ang kongregasyon dili makasusi sa mga kasingkasing aron maila kon kinsa ug kinsay dili mag-among-among pag-usab ug mga bata. (Jeremias 17:9) Busa, ang tambag ni Pablo kang Timoteo mapadapat nga may linaing pasiugda sa kaso sa bawtismadong mga hingkod nga tawo nga nag-among-among ug mga bata: “Ayaw gayod sa dinalidali ipatong ang imong mga kamot kang bisan kinsa nga tawo; ni mahimong mag-aambit sa mga sala sa uban.” (1 Timoteo 5:22) Aron kapanalipdan ang atong mga bata, ang usa ka lalaking nasayrang tig-among-among ug bata dili mokuwalipikar alang sa sinaligang katungdanan sa kongregasyon. Dugang pa, dili siya makapayunir o makaalagad sa bisan unsang ubang espesyal, bug-os-panahong pag-alagad.​—Itandi ang prinsipyo sa Exodo 21:​28, 29.

Ang pipila mahimong mangutana, ‘Dili ba ang uban nakahimog laing mga matang sa sala ug lagmit naghinulsol, nga unya nagsubli sa ilang sala sa ulahi?’ Oo, nahitabo kana, apan adunay ubang mga butang nga pagatagdon. Pananglitan, kon ang usa ka tawo mohimog imoral nga mga pangamoral sa laing hingkod nga tawo, ang hingkod nga tawo makasukol sa iyang mga pangamoral. Ang mga bata labi pang daling lansison, libogon, o hadlokon. Ang Bibliya naghisgot mahitungod sa kakulang ug kaalam sa usa ka bata. (Proverbio 22:​15; 1 Corinto 13:11) Si Jesus migamit sa mga bata ingong panig-ingnan sa mapaubsanong kainosente. (Mateo 18:​4; Lucas 18:​16, 17) Ang pagkainosente sa usa ka bata naglakip sa bug-os nga kakulang sa kasinatian. Kadaghanang bata maoy mapadayganon, ikag nga mopahimuot, ug sa ingon mahuyang sa pag-abusar sa usa ka malinglahong hingkod nga tawo nga ilang kaila ug gisaligan. Busa, ang kongregasyon adunay responsabilidad atubangan ni Jehova sa pagpanalipod sa mga bata niini.

Ang maayong-pagkabansay nga mga bata makakat-on sa pagsugot ug pagpasidungog sa ilang mga ginikanan, sa mga ansiyano, ug ubang hingkod nga mga tawo. (Efeso 6:​1, 2; 1 Timoteo 5:​1, 2; Hebreohanon 13:7) Mahimong makapakurat nga kahiwian kon usa sa maong mga hingkod nga tawong may awtoridad magagamit sa sayop nga paagi sa inosenteng pagkamasaligon sa usa ka bata aron hayloon o pugson siya sa pag-uyon sa seksuwal nga mga buhat. Kadtong gihilabtan sa seksuwal nga paagi sagad nga nakigbisog sa daghang katuigan sa pagpala sa misangpot nga emosyonal nga kasakitan. Busa, ang tig-among-among ug bata makaagom ug grabeng kongregasyonal nga disiplina ug restriksiyon. Ang iyang sinaligang katungdanan dili mao ang angayng hunahunaon kondili, hinunoa, ang walay-buling nga kaputli sa kongregasyon.​—1 Corinto 5:​6; 2 Pedro 3:14.

Kon ang usa ka tig-among-among ug bata tim-os nga maghinulsol, iyang ilhon ang kaalam sa pagpadapat sa mga prinsipyo sa Bibliya. Kon siya makakat-on gayod sa pagkasilag kon unsay tuman-kadaotan, iyang tamayon ang iyang gibuhat ug manlimbasog sa paglikay nga masubli ang iyang sala. (Proverbio 8:​13; Roma 12:9) Dugang pa, pasalamatan gayod niya si Jehova alang sa kadako sa Iyang gugma, nga tungod niana ang usa ka mahinulsolong makasasala, sama kaniya, makasimba gihapon sa atong balaang Diyos ug makalaom nga mahilakip sa “mga matul-id” nga magapuyo sa yuta sa walay kataposan.​—Proverbio 2:21.

[Mga footnote]

[Kapsiyon sa panid 28]

Bisan pag si Jehova magpasaylo sa mahinulsolong mga makasasala, mahimong adunay mga sangpotanan sa ilang mga buhat nga dili malikayan