Ang Hunahuna sa Bibliya

Ang Homoseksuwal Mahimo Bang Ministro sa Diyos?

KADTO Enero 1987, ug si Robert Arpin himalatyon sa AIDS. Kana, sa kaugalingon, dili angay ibalita. Apan si Robert Arpin usa ka pari, usa sa nagkadaghan nagpadayag sa publiko nga paring bayot.

Sa katuigan nga bag-o pa dili lang ang mga homoseksuwal “nanggawas sa aparador” apan nanggawas usab sa mga seminaryo. Ang usa ka estudyante sa Catholic University Theological College sa Tinipong Bansa nagsulti sa National Catholic Reporter: “Akong makalkulo nga 60 ngadto 70 porsiento sa akong klase maoy bayot ug samang numero alang sa seminaryo.” Sa pagkomento bahin sa kiling sa homoseksuwalidad diha sa mga seminaryo, si Anthony Kosnick, editor sa Human Sexuality, miingon: “Labi pang kasagaran kini kay sa akong gihunahuna.”

Nagpahayag ang lainlaing relihiyon sa nagkadaiya kaayong mga hunahuna kon kaha ang usa ka homoseksuwal angay bang mahimong ministro o dili. Hinuon, daghang tawo dili interesado sa mga opinyon nga giumol sa mga kiling karon apan, hinunoa, kon unsay ginaingon sa Bibliya. Nan, unsa ba ang sukdanan sa Diyos alang sa mga ministro? Mahimo bang kuwalipikado ang usa ka homoseksuwal?

Mga Saserdote sa Israel

Sa karaang Israel hataas ang mga sukdanan alang sa mga saserdote ni Jehova nga Diyos. (Levitico, kapitulo 21) Sanglit gihawasan nila ang Labing Balaan, kinahanglang magpabilin silang hinlo sa espirituwal, pisikal, ug sa moral. “Si bisan kinsa nga mohikap sa halaran kinahanglang balaan,” nagsugo ang Diyos. Busa, sa dihang ang unang hataas nga saserdote sa Israel, si Aaron, ug ang iyang mga anak gibutang sa katungdanan ingong mga saserdote, gihimo ang pito-ka-adlaw nga seremonyas sa pagbalaan kanila alang sa ilang sagradong mga buluhaton.—Exodo 29:37.

Ang mga saserdote maoy responsable usab sa pagtudlo sa Kasugoan sa Diyos ug, duyog sa mga maghuhukom, magtan-aw nga kana gipatuman. (Malakias 2:7) Naapil sa maong Kasugoan mao ang tin-aw nga pagbadlong sa homosekuwalidad. Ang Diyos milagda: “Ug sa dihang ang usa ka lalaki mohigda uban sa usa ka lalaki sama sa paghigda uban sa usa ka babaye, silang duha nakabuhat sa usa ka butang dulumtanan. Sila pagapatyon gayod.” (Levitico 20:13) Nga walay pagsumpaki, ang mga saserdote kinahanglang magsunod sa mao mismong Kasugoan.

Sa dihang ang mga saserdote mapakyas sa pagtuboy sa balaang kasugoan, sila pagabadlongon, sama sa kahimtang sa usa ka hataas nga saserdote, si Eli, ug sa iyang duha ka imoral nga mga anak lalaki. (1 Samuel 2:12-35; 4:17, 18) Sa ulahi, sa adlaw sa propetang si Ezekiel, si Jehova miingon: “Ang mga saserdote mismo [sa Israel] nagmapintason sa akong kasugoan, ug sila nagapadayon sa pagpasipala sa akong mga dapit nga balaan.” Tungod niadto, ang Diyos nagsalikway kanila.—Ezekiel 22:26, 31.

Ang Kristohanong Sukdanan

Ang sukdanan niadtong nagapanguna sa pagsimba diha sa Kristohanong kongregasyon hataas usab. Apil sa mga kuwalipikasyon nga gilista diha sa Bibliya, matikdi kini: “dili-salawayon,” “kasarangan sa mga batasan,” “maayo sa hunahuna,” “may katakos sa pagtudlo,” “[nagbaton] ug maayong pamatuod gikan sa mga tawo sa gawas.” (1 Timoteo 3:1-7) Busa, ang usa ka Kristohanong magtatan-aw kinahanglang walay ikasaway. Ang iyang hunahuna kon unsay tukma ug dili-maayong mga buhat kinahanglang ipasukad sa Bibliya, ug ang iyang kaugalingong pamatasan dili magasirado sa mga hunahuna niadtong gitinguha niya nga matudloan. Ang usa ka homoseksuwal ba nakakab-ot sa maong Kasulatanhong mga sukdanan?

Una mosulat sa mga lagda sa ibabaw, si apostol Pablo mipasidaan kang Timoteo mahitungod sa pila ka membro nga buot “mahimong mga magtutudlo sa kasugoan.” Si Timoteo maoy magmando sa maong mga samokan sa pagtuo “nga dili magtudlog lain nga pagtulon-an.” Sunod, siya mipasidaan kang Timoteo mahitungod sa “mga tawo nga malapason ug masupilon, dili-diyosnon ug mga makakasala,” ug dayon gipaila niya sa tino “ang mga lalaki nga mohigda uban sa mga lalaki” ingon nga “masupakon sa maayong pagtulon-an.” (1 Timoteo 1:3-11) Sa pagkamatuod, ang usa nga nagapanguna sa usa ka kongregasyon sa pagsimba angay dili magababag sa mapuslanong mga pagtulon-an sa Bibliya sa pulong kaha o sa paagi sa kinabuhi.—Itandi ang Roma 2:21.

Ang puwersa sa maong tambag hisabtan usab diha sa gisulat ni Pablo kang Tito didto sa Creta. Sa paghatag sa mga kinahanglanon aron “itudlo ang mga ansiano” (King James Version), iyang gilagda nga sila “mahigawas sa sumbong,” “matarong,” “mapugnganon sa kaugalingon,” “nagapangupot nga lig-on sa kasaligang pulong kon mahitungod sa iyang arte sa pagtudlo.” (Tito 1:5-9) Nahiapil nianang “kasaligang pulong” mao ang unang sulat ni Pablo ngadto sa mga Kristohanon nga nagpuyo sa Corinto, nga nag-ingon nga “ang mga lalaki nga mohigda uban sa mga lalaki” dili makapanunod sa Gingharian sa Diyos. (1 Corinto 6:9, 10) Ang pagkupot sa “kasaligang pulong” makapaarang sa ministro sa “pagbadlong niadtong masupakon.” (Tito 1:9) Sa unsang paagi ang homoseksuwal nga ministro makabadlong sa uban sa dihang ang iyang paagi sa kinabuhi mismo nagasupak sa “kasaligang pulong”? Sa kasukwahi, si apostol Pedro miingon mahitungod sa “mini nga mga magtutudlo” nga “daghan ang mosunod sa ilang mga buhat sa malaw-ay nga kagawian.”—2 Pedro 2:1, 2.

‘Isalikway Ko Ikaw’

Palandonga usab kini: Sa usa ka panan-awon, ang propetang si Zacarias sa ikaunom nga siglo W.K.P. nakakita sa hataas nga saserdoteng si Josue nga nabistehan sa hugaw nga mga biste. Sa unsang paagi siya makahinlo niana aron siya makapadayon ingong saserdote? “Kon imong sugton ang akong mga kasugoan ug buhaton ang mga buluhaton nga akong gitudlo kanimo,” ang Diyos miingon, “unya ikaw magpadayon sa pagdumala sa akong Templo.” (Zacarias 3:7, Today’s English Version) Sa mga tawo nga mapakyas sa pagsugot sa balaang mga kasugoan, apil ang mga kasugoan nga nagadili sa homoseksuwal nga mga buhat, ang Diyos nagaingon: “Tungod kay ang kahibalo mao mismo ang imong gisalikway, isalikway ko usab ikaw gikan sa pag-alagad nga usa ka saserdote alang kanako.”—Oseas 4:6.

Busa, ang homoseksuwal ba mahimong ministro ni Jehova nga Diyos? Dili. Ang mga tawo nga dili makuwalipikado sumala sa “maayong pagtulon-an” nga nasulod sa Bibliya dili matuod nga mga ministro sa Diyos.—Tito 2:1; 1 Timoteo 1:10; tan-awa usab ang Roma 1:24-27, 32.

[Letrato sa panid 13]

Sa unsang paagi ang usa ka ministro tukmang makatudlo sa uban sa dihang ang iyang kaugalingong paagi sa kinabuhi nagasupak sa “kasaligang pulong”?