PAGKAHAMTONG

Ang kahimtang sa bug-os nga pagkahingkod, pagkagulang, pagkakompleto, sumala sa pagtino sa usa ka sukdanan. (Tan-awa ang PAGKAHINGPIT, KAHINGPITAN.) Ang Bibliya nagtagana sa sukdanan sa pagtino kon unsa ang espirituwal nga pagkahamtong (pagkakompleto). Sumala niini nga sukdanan, ang hamtong nga Kristohanon maoy usa nga dili espirituwal nga bata, nga sagad mabalhinon ug daling mapahisalaag o maimpluwensiyahan sa uban maylabot sa doktrina. (Efe 4:11-14) Sanglit ang iyang mga gahom sa pagsabot nabansay, siya makaila sa maayo ug sa daotan. Dili siya kinahanglang tudloan sa paninugdang mga butang. (Heb 5:11–​6:2) Siya gigiyahan, dili sa kalibotanong kaalam, kondili sa espiritu sa Diyos.​—1Co 2:​6, 10-13, ftn sa Rbi8.

Ang Bibliya wala maghisgot bahin sa gidak-on sa espirituwal nga pagkahamtong o pagkaadulto. Hinunoa, maingon nga ang usa ka tawo padayong nagauswag sa kahibalo, kasinatian, ug katakos sa pag-ila human mahimong adulto, ang hamtong nga Kristohanon sa susama padayon nga nagauswag. Ang mga pagsulay nga iyang nasinatian makapalig-on sa iyang pagtuo ug pagkamainantoson. Misulat ang tinun-an nga si Santiago: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay, kay nahibalo kamo nga kining sinulayang kalidad sa inyong pagtuo mosangpot ug pagkamainantoson. Apan ipatapos sa pagkamainantoson ang buluhaton niini, aron nga kamo mahimong bug-os [sa literal, hingpit] ug maayo sa tanang bahin, nga dili makulangan sa bisan unsa.” (San 1:2-4) Sa susama, maingon nga ang mga adulto magkalahi sa pisikal nga mga kahimtang ug sa mental nga mga katakos ug mga talento, sa ingon usab ang hamtong nga mga Kristohanon mahimong magkalahi sa pipila ka hiyas, ang uban ilado sa pipila ka hiyas, sama sa kahibalo, paghukom, kaisog, o pagkamahinatagon; ang uban sa laing mga hiyas. (Itandi ang 1Co 7:7; 12:4-11, 27-31.) Busa, kon bahin sa pagkahamtong, mahinungdanong ibutang sa hunahuna nga ang linaing mga katakos o mga talento dili mao ang basehanan kon ang usa hamtong ba nga Kristohanon o dili.

Ang tibuok kahikayan sa kongregasyon, lakip ang mga apostoles, mga manalagna, mga tig-ebanghelyo, mga magbalantay, ug mga magtutudlo niini, nakatabang sa pagpatunghag hamtong nga mga Kristohanon o espirituwal nga mga adulto. (Efe 4:11-14; itandi ang Col 1:​28, 29; 4:​12, 13.) Busa, dayag nga kadtong mag-alagad ingong mga magbalantay ug mga magtutudlo angay nga mga tawong hamtong sa espirituwal, dili mga bata. Hinunoa, labaw pa sa espirituwal nga pagkaadulto ang gikinahanglan sa usa ka tawo nga itudlo ingong magtatan-aw o ministeryal nga alagad. (1Ti 3:1-9, 12, 13; Tit 1:5-9) Pananglitan, usa sa mga kinahanglanon sa usa ka magtatan-aw mao nga siya kinahanglang “usa ka tawo nga nagdumala sa iyang kaugalingong panimalay sa maayong paagi, nga may mga anak nga nagpasakop uban ang bug-os nga kaugdang.” (1Ti 3:4) Busa, ang usa ka tawo mahimong hamtong sa espirituwal sa pipila ka aspekto apan kon ang iyang mga anak rebelyoso ug dili mapanton, siya dili kuwalipikado sa katungdanan ingong magtatan-aw.