DALMACIA

Usa ka dapit sa bukirong rehiyon sa S sa Dagat Adriatiko diha sa Peninsula sa Balkan. Kining ngalana gigamit sa paghubit sa kinatumyang bahin sa habagatan sa Romanhong lalawigan sa Ilirico. Sa katuigan human sa 9 K.P., sa dihang nahimo kining dapita nga usa ka bulag nga lalawigan, ang Dalmacia sagad nga magkabaylong gitawag ug Ilirico ug sa kataposan kining ngalana mao na ang gigamit sa pagtawag sa bag-ong lalawigan. Ang kauban ni Pablo nga si Tito mibiya paingon sa Dalmacia una pa sa kamatayon sa apostol, lagmit niadtong mga 65 K.P. (2Ti 4:6-10) Sa samang bersikulo diin si Demas giingong “mibiya” kang Pablo, si Tito gihisgotan nga miadto sa Dalmacia. Hinunoa, bisan tuod walay tinong giingon kon unsay katuyoan sa pag-adto ni Tito sa Dalmacia, mopatim-aw nga siya miadto nga may pagtugot ni Pablo. Sanglit si Pablo, sa dihang hapit nang matapos ang iyang ikatulong misyonaryong panaw mga siyam ka tuig una pa niana, nag-ingon nga ang iyang sirkito nakaabot hangtod sa Ilirico dapit sa A (Rom 15:19), ang ubang mga eskolar nag-ingon nga si Tito niining higayona gipadala ngadto sa maong rehiyon aron dumalahon ang mga kalihokan sa kongregasyon ug makigbahin sa misyonaryong mga buluhaton. Kon mao kana ang kahimtang, siya mag-alagad diha sa kapasidad nga sama sa iyang gihuptan didto sa Creta. (Tit 1:5) Sa iyang sulat ngadto kang Tito, si Pablo naghangyo kaniya nga mobiya sa Creta (Tit 3:12), ug lagmit nga si Tito kauban sa apostol hangtod nga gipadala siya ngadto sa Dalmacia.