ONESIFORO

[Tigdalag Kaayohan].

Usa ka Kristohanon nga gihisgotan sa ikaduhang sulat ni Pablo ngadto kang Timoteo. (2Ti 4:19) Dili sama sa uban sa distrito sa Asia nga mipahilayo kang Pablo, si Onesiforo nagpabiling usa ka maunongong tigpaluyo ug, sa dihang didto sa Roma, makugihong nangita kang Pablo bisan pa sa kapeligrohan nga iyang maagoman. Wala niya ikaulaw ang pagkabilanggo ni Pablo apan nag-alagad ug maayo sa apostol, sama sa iyang gibuhat didto sa Efeso. Gipabilhan pag-ayo ni Pablo kini nga pagkamaunongon ug giampo nga si Onesiforo ug ang iyang panimalay makadawat sa kaluoy ni Jehova.​—2Ti 1:15-18.

Tungod kay ang panimalay ni Onesiforo mao man ang gipangomosta ni Pablo inay nga si Onesiforo mismo (2Ti 4:19), wala kini magpasabot nga patay na siya, bisan tuod posible kini. Lagmit wala lamang siya didto uban sa iyang pamilya sa maong panahon o tingali lakip na siya sa katibuk-ang pangomosta alang sa iyang panimalay sa mga magtutuo.