Salig Kang Jehova ug sa Iyang Pulong
“Kadtong nakaila sa imong ngalan mosalig kanimo.”—SALMO 9:10.
1. Nganong kita makasalig gihapon kang Jehova ug sa iyang Pulong sa atong modernong adlaw?
NIINING modernong kalibotan, ang imbitasyon nga mosalig sa Diyos ug sa iyang Pulong, ang Bibliya, tingali mopatim-aw nga dili praktikal ug dili matinud-anon. Bisan pa niana, ang kaalam sa Diyos napamatud-ang matuod ug praktikal sa taas nga panahon. Ang Maglalalang sa lalaki ug babaye mao ang Tagmugna sa kaminyoon ug sa pamilya, ug mas nasayod siya sa atong mga panginahanglan kay kang bisan kinsa pa. Maingon nga wala mausob ang pasukaranang mga panginahanglan sa tawo, ang pangunang mga paagi usab sa pagtagbaw sa maong mga panginahanglan nagpabiling mao gihapon. Ang maalamong tambag sa Bibliya, bisan pag nasulat kasiglohan kanhi, nagtagana gihapon sa kinamaayohang giya aron molampos sa pagkinabuhi ug sa pagsulbad sa mga suliran. Ang pagpamati niini mosangpot sa dakong kalipay—bisan sa komplikado, siyentipikanhong kalibotan nga atong gipuy-an!
2. (a) Unsang maayong mga bunga ang napatungha sa pagsugot sa mga sugo sa Diyos diha sa mga kinabuhi sa katawhan ni Jehova? (b) Unsa pa ang gisaad ni Jehova alang niadtong masinugtanon kaniya ug sa iyang Pulong?
2 Ang pagsalig kang Jehova ug pagpadapat sa mga prinsipyo sa Bibliya magdalag praktikal nga mga kaayohan sa matag adlaw. Ang pamatuod niini gipasundayag diha sa mga kinabuhi sa minilyong Saksi ni Jehova sa tibuok kalibotan nga nakabaton sa hugot nga pagtuo ug kaisog sa pagpadapat sa tambag sa Bibliya. Alang kanila, ang pagsalig sa Maglalalang ug sa iyang Pulong napamatud-an nga maayong pagkapahimutang. (Salmo 99, 10) Ang pagsugot sa mga sugo sa Diyos naghimo kanila nga mas maayong katawhan kon bahin sa kahinlo, kamaminatud-on, kakugi, pagtahod sa kinabuhi ug mga kabtangan sa uban, ug pagkakasarangan sa pagkaon ug ilimnon. Kini mitultol sa tukmang gugma ug pagbansay sulod sa pamilya—pagkahimong maabiabihon, mapailobon, maluloy-on, ug mapasayloon—ingon man sa daghan pang ubang butang. Sila sa dakong paagi nakalikay sa daotang mga bunga sa kasuko, pagdumot, pagbuno, kasina, kahadlok, katapolan, garbo, pagbakak, pagbutangbutang, kahilayan, ug imoralidad. (Salmo 32:10) Apan labaw pa ang gihimo sa Diyos kay sa pagsaad ug maayong sangpotanan alang niadtong nagasunod sa iyang mga balaod. Si Jesus miingon nga kadtong nagsunod sa Kristohanong dalan makadawat “ug usa ka gatos ka pilo karon niining yugtoa sa panahon, . . . mga inahan ug mga anak ug mga uma, uban ang mga paglutos, ug sa umaabot nga sistema sa mga butang sa kinabuhing walay kataposan.”—Marcos 1029, 30.
Likayi ang Pagsalig sa Kalibotanong Kaalam
3. Sa pagpadayon sa pagbutang ug pagsalig kang Jehova ug sa iyang Pulong, unsang mga suliran ang usahay atubangon sa mga Kristohanon?
3 Ang usa ka problema sa dili-hingpit nga mga tawo mao nga kalagmitan nga dili nila isipong ugdang o malimtan kon unsay gikinahanglan sa Diyos. Sila daling maghunahuna nga sila labi pang maalamon o nga ang kaalam gikan sa mga utokan niining kalibotana labaw kay sa iya sa Diyos, nga kini labaw nga nunot sa panahon. Ang mga alagad sa Diyos mahimo usab nga makaugmad sa maong tinamdan, kay sila nagpuyo man taliwala niining kalibotana. Busa, sa pagpaabot sa mahigugmaong imbitasyon nga mamati sa iyang tambag, ang atong langitnong Amahan naglakip usab sa nahiangayng mga pasidaan: “Anak ko, ang akong balaod ayaw hikalimti, ug ang akong mga sugo hinaot nga bantayan sa imong kasingkasing, tungod kay ang gidugayon sa mga adlaw ug mga tuig sa kinabuhi ug pakigdait igadugang kanimo. Salig kang Jehova uban sa bug-os mong kasingkasing ug ayaw pagsalig sa imong kaugalingong pagsabot. Sa tanan nimong dalan matikdi siya, ug siya mismo magatul-id sa imong mga alagianan. Ayaw pagpakamaalamon sa imong kaugalingong mga mata. Kahadloki si Jehova ug magpahilayo gikan sa daotan.”—Proverbio 31, 2, 5-7.
4. Unsa ka kaylap “ang kaalam niining kalibotana,” ug nganong kini “kabuangan sa Diyos”?
4 Ang kaalam niining kalibotana mabatonan nga dagaya ug gikan sa daghang tinubdan. Adunay daghang institusyon sa edukasyon, ug “sa paggamag daghang basahon wala ing kataposan.” (Ecclesiastes 12:12) Karon ang gitawag ug information superhighway sa kalibotan sa kompiyuter nagsaad ug walay-limitasyong kasayoran bahin sa halos bisan unsang ulohan. Apan ang pagkaanaa niining tanang kahibalo wala maghimo sa kalibotan nga mas maalamon o magsulbad sa mga suliran niini. Sa kapulihay, ang kahimtang sa kalibotan nahimong mas daotan kada adlaw. Hisabtan, ang Bibliya nagtug-an kanato nga “ang kaalam niining kalibotana maoy kabuangan sa Diyos.”—1 Corinto 319, 20.
5. Unsang mga pasidaan ang gihatag sa Bibliya bahin sa “kaalam niining kalibotana”?
5 Sulod niining kataposang bahin sa kataposang mga adlaw, dahomon lamang nga ang pangulong-limbongan, si Satanas nga Yawa, magpagulag daghan kaayong bakak sa paninguha nga daoton ang pagsalig sa pagkamatinud-anon sa Bibliya. Ang mga kritiko sa balaang kasulatan nagpatunghag daghang mapangagpasong mga basahon nga naglalis sa pagkatinuod ug pagkakasaligan sa Bibliya. Si Pablo nagpasidaan sa iyang kaubang Kristohanon: “O Timoteo, bantayi kon unsay gikapiyal kanimo, nga magpahilayo gikan sa mga sulting walay-pulos nga nagapasipala sa kon unsay balaan ug gikan sa mga pagsumpakiay nianang sa bakak gitawag nga ‘kahibalo.’ Tungod sa pagpagawal nianang maong kahibalo ang pipila nahitipas gikan sa pagtuo.” (1 Timoteo 620, 21) Ang Bibliya dugang nagpasidaan: “Pagbantay kamo: basin ug adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.”—Colosas 2:8.
Pukgoa ang Kiling nga Magduhaduha
6. Nganong ang pagkamabinantayon gikinahanglan sa pagsanta nga makagamot ang mga pagduhaduha diha sa kasingkasing?
6 Ang laing malansisong taktika sa Yawa mao ang pagtanom ug mga pagduhaduha diha sa alimpatakan. Kanunay siyang igmat sa pagkakitag usa ka kahuyangan sa pagtuo ug pahimuslan kini. Si bisan kinsa nga nakasinatig mga pagduhaduha angay mahinumdom nga ang usang nagpaluyo sa maong mga pagduhaduha mao ang usang nag-ingon kang Eva: “Tinuod ba gayod nga ang Diyos miingon nga dili ka magakaon gikan sa matag kahoy sa tanaman?” Sa dihang ang Manunulay nakatanom ug pagduhaduha diha sa iyang alimpatakan, ang sunod nga tikang mao ang pagsulti kaniyag usa ka bakak, nga iyang gituohan. (Genesis 3:1, 4, 5) Sa paglikay nga madaot ang atong pagtuo pinaagi sa pagduhaduha sama kang Eva, kinahanglan nga kita magmabinantayon. Kon ang bisan diyutayng pagduhaduha bahin kang Jehova, sa iyang Pulong, o sa iyang organisasyon nagsugod sa pagpabilin diha sa imong kasingkasing, himoa dayon ang mga tikang sa pagwagtang niini sa dili pa kini mograbe nga mahimong magdaot sa imong pagtuo.—Itandi ang 1 Corinto 10:12.
7. Unsay mahimo sa pagwagtang sa mga pagduhaduha?
7 Unsay mahimong buhaton? Sa makausa pa, ang tubag mao ang pagsalig kang Jehova ug sa iyang Pulong. “Kon kinsa man kaninyo ang nakulangan sa kaalam, papadayona siya sa pagpangayo sa Diyos, kay siya nagahatag nga madagayaon ngadto sa tanan ug sa walay pagpamuyboy; ug ihatag kini kaniya. Apan papadayona siya sa pagpangayo diha sa pagtuo, sa wala gayoy pagduhaduha, kay siya nga nagaduhaduha maoy samag balod sa dagat nga ginahandos sa hangin ug ginapadpad-padpad.” (Santiago 1:5, 6; 2 Pedro 3:17, 18) Busa ang tim-os nga pag-ampo kang Jehova mao ang unang tikang. (Salmo 62:8) Unya, ayaw pagpanuko sa pagpangayog tabang gikan sa mahigugmaong mga magtatan-aw sa kongregasyon. (Buhat 20:28; Santiago 5:14, 15; Judas 22) Tabangan ka nila sa pagsubay sa tinubdan sa imong mga pagduhaduha, nga tingali tungod sa garbo o sa sayop nga panghunahuna.
8. Kasagaran sa unsang paagi magsugod ang apostatang panghunahuna, ug unsa ang sulbad?
8 Ang pagbasa ba o pagpamatig apostatang mga ideya o kalibotanong pilosopiya nagpasulod ug makahilong mga pagduhaduha? Sa kamaalamon, ang Bibliya nagtambag: “Buhata ang kutob sa imong maarangan nga ikapakita ang imong kaugalingon nga inuyonan sa Diyos, usa ka mamumuo nga walay angay ikaulaw, nga sa husto nagagamit sa pulong sa kamatuoran. Apan likayi ang mga sulting walay-pulos nga nagapasipala kon unsay balaan; kay sila magalabi pa gayod sa pagkadili-diyosnon, ug ang ilang pulong mokanap samag ganggrena.” (2 Timoteo 2:15-17) Makaiikag nga daghan nga nahimong mga biktima sa apostasiya nagsugod sa sayop nga direksiyon pinaagi sa pagreklamo sa sinugdan bahin sa paagi nga gibati nila nga sila gitratar diha sa organisasyon ni Jehova. (Judas 16) Ang pagpangitag sayop sa mga tinuohan miabot sa kaulahian. Maingon nga ang usa ka siruhano molihok sa madali aron mapugngan ang ganggrena, lihok dayon sa paglukat gikan sa alimpatakan sa bisan unsang kiling sa pagreklamo, nga dili matagbaw sa paagi sa pagbuhat sa mga butang diha sa Kristohanong kongregasyon. (Colosas 3:13, 14) Wagtanga ang bisan unsa nga magpalambo sa maong mga pagduhaduha.—Marcos 9:43.
9. Sa unsang paagi ang maayong teokratikanhong rutina motabang kanato sa pagpabiling himsog sa pagtuo?
9 Pabiling suod kang Jehova ug sa iyang organisasyon. Sa kamaunongon sundoga si Pedro, kinsa lig-ong mipahayag: “Ginoo, kinsa man ang among adtoan? Anaa kanimo ang mga pamulong sa kinabuhing walay-kataposan.” (Juan 6:52, 60, 66-68) Magbaton ug maayong eskedyul sa pagtuon sa Pulong ni Jehova aron magpabiling lig-on ang imong pagtuo, nga samag usa ka dakong taming, nga makaarang “pagpalong sa tanang nagadilaab nga mga udyong sa tuman-kadaotang usa.” (Efeso 6:16) Magpadayong aktibo sa Kristohanong ministeryo, nga sa mahigugmaon ipaambit ang mensahe sa Gingharian sa uban. Kada adlaw, palandonga nga mapabilhon ang pagpanalangin ni Jehova kanimo. Magmapasalamaton nga ikaw adunay kahibalo sa kamatuoran. Ang pagbuhat niining tanang butang diha sa usa ka maayong Kristohanong rutina mobulig kanimo nga magmalipayon, makalahutay, ug magpabiling nahigawas sa mga pagduhaduha.—Salmo 40:4; Filipos 3:15, 16; Hebreohanon 6:10-12.
Pagsunod sa Pagtultol ni Jehova Diha sa Kaminyoon
10. Nganong hinungdanon ilabina ang pagsalig kang Jehova alang sa giya diha sa Kristohanong kaminyoon?
10 Sa paghikay nga ang lalaki ug babaye mag-ipon sa pagpuyo isip usa ka magtiayon, gituyo ni Jehova nga dili lamang pun-on ang yuta sa hamugaway nga paagi kondili mapausbaw usab ang ilang kalipay. Ugaling, ang sala ug pagkadili-hingpit nagdalag seryosong mga suliran nganha sa panagtiayon. Ang mga Kristohanon wala mahigawas gikan niini, sanglit sila usab maoy dili hingpit ug makasinati sa mga kapit-osan sa modernong-adlaw nga pagkinabuhi. Bisan pa, sa gidak-on nga sila nagsalig kang Jehova ug sa iyang Pulong, ang mga Kristohanon mahimong makabaton ug kalamposan diha sa kaminyoon ug sa pagpadako sa ilang mga anak. Wala ing dapit diha sa Kristohanong kaminyoon ang kalibotanong mga batasan ug kagawian. Ang Pulong sa Diyos nagtambag kanato: “Himoang dungganon ang kaminyoon taliwala sa tanan, ug ang higdaanan sa kaminyoon nga walay kahugawan, kay hukman sa Diyos ang mga makihilawason ug ang mga mananapaw.”—Hebreohanon 13:4.
11. Sa pagsulbad sa mga suliran sa panagtiayon, unsay angay nga ilhon sa duha ka kapikas?
11 Ang kaminyoon nga gitagbaw sumala sa tambag sa Bibliya adunay gugma, pagkakomitido, ug kasegurohan. Ang bana ug asawa nakasabot ug nagtahod sa prinsipyo sa pagkaulo. Sa dihang motungha ang mga suliran, kasagaran kana maoy tungod sa dili pagpadapat sa tambag sa Bibliya. Sa pagsulbad sa usa ka malungtarong suliran, hinungdanon nga ang duha ka kapikas magpunting nga maminatud-on sa kon unsay tinuod nga suliran ug sulbaron ang mga hinungdan inay ang mga simtoma. Kon ang bag-ong mga panaghisgot misangpot sa gamay o walay panag-uyon, ang magtiayon mahimong mangayog dili-madapigong tabang gikan sa usa ka mahigugmaong magtatan-aw.
12. (a) Bahin sa unsang kasagarang mga suliran sa kaminyoon nga ang Bibliya naghatag ug tambag? (b) Nganong gikinahanglan sa bahin sa duha ka kapikas nga buhaton ang mga butang sa paagi ni Jehova?
12 Ang suliran ba may kalabotan sa komunikasyon, pagtahod sa mga pagbati sa matag usa, pagtahod sa pagkaulo, o kon sa unsang paagi gihimo ang mga desisyon? Kini ba may kalabotan sa pagmatuto sa mga anak, o sa pagkatimbang kon bahin sa seksuwal nga mga panginahanglan? O mao ba ang badyet sa pamilya, kalingawan, panagkauban, kon kaha ang asawa angay bang mangempliyo, o kon diin kamo magpuyo? Bisan kon unsa ang suliran, ang Bibliya naghatag ug praktikal nga tambag sa direktang paagi pinaagi sa mga balaod o sa dili-direktang paagi pinaagig mga prinsipyo. (Mateo 19:4, 5, 9; 1 Corinto 7:1-40; Efeso 5:21-23, 28-33; 6:1-4; Colosas 3:18-21; Tito 2:4, 5; 1 Pedro 3:1-7) Sa dihang ang duha ka kapikas maglikay sa pagpamugos nga mahakogon ug itugot nga ang gugma sa bug-os ikapahayag diha sa ilang kaminyoon, mosangpot ang labaw nga kalipay. Kinahanglang adunay dakong tinguha sa bahin sa duha ka kapikas sa kaminyoon sa paghimo sa gikinahanglang mga kausaban, sa pagbuhat sa mga butang sa paagi ni Jehova. “Siya nga nagapakitag salabotan sa usa ka butang makakaplag ug maayo, ug malipayon siya nga nagasalig kang Jehova.”—Proverbio 16:20.
Mga Batan-on—Pamati sa Pulong sa Diyos
13. Nganong dili sayon nga ang Kristohanong mga batan-on magtubo nga may lig-ong pagtuo kang Jehova ug sa iyang Pulong?
13 Dili sayon sa Kristohanong mga batan-on nga magtubong lig-on sa pagtuo sa dihang ang tuman-kadaotang kalibotan nag-alirong kanila. Usa ka hinungdan mao nga “ang tibuok kalibotan nahiluna sa gahom sa tuman-kadaotang usa,” si Satanas nga Yawa. (1 Juan 5:19) Ang mga batan-on ginaatake niining daotang kaaway nga makapahimo sa daotan nga tan-awong maayo. Ang ako-ang-una nga mga tinamdan, ang mahakogong mga ambisyon, ang mga pangandoy alang sa butang nga imoral ug mapintason, ug ang dili-normal nga pangagpas sa mga kalingawan—kining tanan nagkahiusa nga nahimong usa ka kasagaran, naglabi nga paagi sa panghunahuna nga gibatbat diha sa Bibliya ingong “ang espiritu nga nagalihok karon diha sa mga anak sa pagkadili-masinugtanon.” (Efeso 2:1-3) Si Satanas sa malansison nagpasiugda niining maong “espiritu” diha sa mga basahong-tun-anan sa tunghaan, sa kadaghanan sa mabatonang musika, sa mga esport, ug sa ubang mga matang sa lingawlingaw. Ang mga ginikanan kinahanglang magmaigmat sa pagpukgo sa maong mga impluwensiya pinaagi sa pagtabang sa ilang mga anak nga managko nga nagasalig kang Jehova ug sa iyang Pulong.
14. Sa unsang paagi ang mga batan-on ‘makakalagiw gikan sa mga tinguha nga iya sa pagkabatan-on’?
14 Si Pablo mihatag ug inamahang tambag ngadto sa iyang batan-ong kauban nga si Timoteo: “Kalagiw gikan sa mga tinguha nga iya sa pagkabatan-on, apan tinguhaa ang pagkamatarong, pagtuo, gugma, pakigdait, uban niadtong mga nagatawag sa Ginoo gikan sa usa ka hinlong kasingkasing.” (2 Timoteo 2:22) Bisan tuod dili tanang “tinguha nga iya sa pagkabatan-on” ang daotan sa kaugalingon, ang mga batan-on angay nga ‘mokalagiw gikan’ kanila sa pagkaagi nga dili nila angay nga tugotan kining mga butanga nga mahimong gikalingahan, nga magbilin ug diyutay, kon duna man, ing panahon alang sa diyosnong mga kalihokan. Ang pagpakusgan sa lawas, mga esport, musika, kalingawan, mga pasatiempo, ug pagbiyahe, bisan pag dili sa kaugalingon daotan, mamahimong lit-ag kon kini sila mahimong dagkong mga butang sa kinabuhi. Kalagiw sa bug-os gikan sa walay-tunong nga estoryahay, gikan sa pag-istambay, gikan sa dili-normal nga kaikag sa sekso, gikan sa pagkawalay-gibuhat ug pagkagilaayan, ug gikan sa pagreklamo bahin sa pagkadili-hisabtan sa imong mga ginikanan.
15. Unsang mga butang ang mahimong mahitabo diha sa sulod sa balay nga makaabag ngadto sa pagkinabuhi sa mga batan-on ug dobleng kinabuhi?
15 Bisan sa sulod sa balay, ang kapeligrohan tingali nagpahipi alang sa mga batan-on. Kon ginatan-aw ang imoral o mapintasong mga salida sa TV ug mga video, ang tinguha sa pagbuhat ug daotang mga butang mahimong ikatanom. (Santiago 1:14, 15) Ang Bibliya nagtambag: “Oh kamong mga maghihigugma ni Jehova, dumti kon unsay daotan.” (Salmo 97:10; 115:11) Si Jehova nahibalo kon adunay nagasulay sa pagkinabuhig dobleng kinabuhi. (Proverbio 15:3) Kristohanong mga batan-on, tan-aw palibot sa inyong kuwarto. Gipasundayag ba ninyo ang mga hulagway sa imoral nga mga bituon sa kalibotan sa mga esport o musika, o gipasundayag ba ninyo ang maayong mga butang nga maoy maayong mga pahinumdom? (Salmo 101:3) Sa inyong panudlanan sa sinina, kamo ba adunay kasarangang sapot, o ang pipila ba sa inyong mga biste nagpabanaag sa hingaping mga estilo sa panapot niining kalibotana? Sa malalangong mga paagi ang Yawa mahimong makalit-ag kaninyo kon kamo mopadaog sa tentasyon nga tilawan kon unsay daotan. Ang Bibliya maalamong nagtambag: “Padayong hupti ang inyong panimuot, magmabinantayon. Ang inyong kontra, ang Yawa, nagasuroysuroy sama sa usa ka leon nga nagangulob, nga nagapangita ug usa nga matukob.”—1 Pedro 5:8.
16. Sa unsang paagi ang tambag sa Bibliya makatabang sa usa ka batan-on sa paghimo sa tanan nga mahinungdanon nga magmapasigarbohon kaniya?
16 Ang Bibliya nagpahimangno kaninyo nga bantayan ang inyong pagpakig-uban. (1 Corinto 15:33) Ang inyong mga kauban kinahanglan mao kadtong nahadlok kang Jehova. Ayaw pagpadaog sa pagpit-os sa isigkaingon. (Salmo 56:11; Proverbio 29:25) Magmasinugtanon sa inyong mahadlokon-sa-Diyos nga mga ginikanan. (Proverbio 6:20-22; Efeso 6:1-3) Salig sa mga ansiano alang sa pagtultol ug pagpalig-on. (Isaias 32:1, 2) Ipunting ang inyong kaisipan ug mga mata sa espirituwal nga mga sukdanan ug mga tumong. Pangitag kahigayonan sa paghimog espirituwal nga kauswagan ug sa pakigbahin sa mga kalihokan sa kongregasyon. Pagtuon sa pagbuhatbuhat pinaagi sa inyong mga kamot. Magdako nga lig-on ug himsog sa pagtuo, ug unya mapamatud-an ninyo nga kamo sa pagkatinuod maoy tawong inila—tawong inila nga takos sa kinabuhi sa bag-ong kalibotan ni Jehova! Ang atong langitnong Amahan magmapasigarbohon kaninyo, ang inyong yutan-ong mga ginikanan magkalipay diha kaninyo, ug ang inyong Kristohanong mga igsoong lalaki ug babaye mapalig-on ninyo. Kana mao ang hinungdanon!—Proverbio 4:1, 2, 7, 8.
17. Unsang mga kaayohan ang moabot niadtong nagsalig kang Jehova ug sa iyang Pulong?
17 Sa balaknong pinulongan ang salmista nadasig sa pagsulat: “Si Jehova mismo dili mopugong sa bisan unsa nga maayo gikan niadtong nagalakaw diha sa pagkawalay-kasaypanan. Oh Jehova sa mga panon, malipayon ang tawo nga nagasalig kanimo.” (Salmo 84:11, 12) Oo, ang kalipay ug kalamposan, dili ang kahigawad ug kapakyasan, mao ang moabot sa tanan niadtong nagsalig kang Jehova ug sa iyang Pulong, ang Bibliya.—2 Timoteo 3:14, 16, 17.
Unsaon Nimo Pagtubag?
◻ Nganong ang mga Kristohanon dili angay nga magbutang sa ilang pagsalig sa “kaalam niining kalibotana”?
◻ Unsay angay nga buhaton kon ang usa nakasinati ug mga pagduhaduha?
◻ Sa unsang paagi ang pagbuhat sa mga butang sa paagi ni Jehova magdalag kalamposan ug kalipay diha sa kaminyoon?
◻ Sa unsang paagi ang Bibliya nagtabang sa mga batan-on nga ‘makakalagiw gikan sa mga tinguha nga iya sa batan-on’?
[Hulagway sa panid 23]
Ang mga Kristohanon nagsalig kang Jehova ug sa iyang Pulong samtang nagsalikway ingong kabuangan sa “kaalam niining kalibotana”
[Hulagway sa panid 25]
Ang mga pamilya nga nagsalig kang Jehova ug sa iyang Pulong nagmalamposan ug nagmalipayon