“Umari Kanako, . . . ug Ako Magapalagsik Kaninyo”

Mga Tigom nga Magdasig Ngadto sa Paghigugma ug sa Maayong mga Buhat

GIKAN sa Toronto ngadto sa Tokyo, gikan sa Moscow ngadto sa Montevideo—pipila ka beses sa usa ka semana, milyonmilyong mga Saksi ni Jehova ug ilang mga higala ang magganayan ngadto sa ilang mga dapit sa pagsimba. Kining mga tawhana naglakip sa kugihan nga mga padre de pamilya, nga lapoy na human sa hagong trabaho sa tibuok adlaw; kugihan nga mga asawa ug mga inahan nga giubanan sa gagmayng mga anak; abtik nga mga batan-on nga migugol ug entero adlaw sa eskuylahan; luyahon nga mga tigulang nga hinay nang molakaw tungod sa kasakit ug kaul-ol; maisogong mga biyuda ug mga ilo; ug mga tawong magul-anon nga nagkinahanglag paghupay.

Kining maong mga Saksi ni Jehova naggamit ug daghang paagi sa pagbiyahe—gikan sa paspas kaayong mga bullet train ngadto sa mga asno, gikan sa naghuot nga mga tren sa subwey ngadto sa mga trak dekarga. Ang uban kinahanglang motabok sa daghag-buaya nga mga suba, samtang ang uban kinahanglang moantos sa makatensiyon pag-ayo nga trapiko diha sa dagkong mga siyudad. Nganong silang tanan naningkamot man pag-ayo?

Sa panguna tungod kay ang pagtambong ug pagpakig-ambit sa Kristohanong mga tigom maoy hinungdanong paagi sa pagsimba kang Jehova nga Diyos. (Hebreohanon 13:15) Gihisgotan ni apostol Pablo ang laing rason sa dihang siya misulat: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, . . . apan magdinasigay sa usag usa, ug ilabina gayod samtang makita ninyo nga ang adlaw nagkaduol na.” (Hebreohanon 10:24, 25) Dinhi gisubli ni Pablo ang gibati ni salmistang David, kinsa miawit: “Nagmaya ako sa pag-ingon nila kanako: ‘Mangadto kita sa balay ni Jehova.’”—Salmo 122:1.

Nganong malipay ang mga Kristohanon nga motambong sa ilang mga tigom? Tungod kay kadtong nanambong dili mga tigpaniid lamang. Hinunoa, ang mga tigom naghatag kanilag mga kahigayonan nga mailaila ang usag usa. Kining maong mga panagkatigom ilabinang nagtagana ug mga higayon sa paghatag, dili lamang sa pagdawat, ug sa pagdasig sa usag usa sa pagpakitag gugma ug sa pagpakig-ambit sa maayong mga buhat. Motabang kini sa paghimo sa mga tigom nga makapadasig nga mga okasyon. Dugang pa, ang Kristohanong mga tigom maoy usa sa mga paagi diin gituman ni Jesus ang iyang saad: “Umari kanako, . . . ug ako magapalagsik kaninyo.”—Mateo 11:28.

Usa ka Dapit sa Kahupayan ug Kahingawa

Ang mga Saksi ni Jehova dunay maayong mga katarongan sa paglantaw sa ilang mga tigom ingong makapalagsik. Sa usa ka bahin, diha sa mga tigom ang espirituwal nga pagkaon gitagana sa hustong panahon sa “matinumanon ug maalamong ulipon.” (Mateo 24:45) Ang mga tigom may hinungdanon usab nga papel sa paghimo sa mga alagad ni Jehova nga hanas ug masiboton nga mga magtutudlo sa Pulong sa Diyos. Dugang pa, diha sa Kingdom Hall, ang usa makakita ug pundok sa mahigugmaon, may kahingawa, ug may pagtagad nga mga higala kinsa andam ug kinabubut-ong motabang ug mohupay sa uban sa panahon sa kagul-anan.—2 Corinto 7:5-7.

Mao kini ang eksperyensiya ni Phillis, usa ka biyuda nga namatyan ug bana sa dihang ang iyang mga anak nag-edad pag singko ug otso anyos. Naghubit sa makapalagsik nga epekto sa Kristohanong mga tigom diha kaniya ug sa iyang mga anak, siya miingon: “Makapahupay ang pag-adto sa Kingdom Hall tungod kay ang mga isigkamagtutuo kanunayng nagpakita sa ilang gugma ug kahingawa pinaagig paghalog, pagdasig nga binase sa Kasulatan, o pagpig-it sa kamot. Mao kanay dapit nga gusto nakong maanaa kanunay.”—1 Tesalonica 5:14.

Human mailalom si Marie sa dakong operasyon, ang iyang doktor miingon nga dangtag labing menos unom ka semana una maalim ang iyang samad. Sulod sa unang mga semana sa iyang pagpahiuli sa lawas, si Marie dili makatambong sa mga tigom. Namatikdan sa iyang doktor nga dili siya sama ka malipayon sa una. Sa dihang naamgohan sa doktor nga wala na motambong si Marie sa mga tigom, gidasig niya si Marie nga motambong. Mitubag si Marie nga ang iyang bana, nga dili niya parehas ug pagtuo, dili gustong moadto siya sa mga tigom tungod kay nahingawa sa iyang panglawas. Busa ang doktor misulat ug opisyal nga reseta nga “nagbaod” kang Marie sa pag-adto sa Kingdom Hall alang sa pagdasig ug makapalig-ong panag-ubanay. Mihinapos si Marie: “Human motambong ug usa ka tigom, miarang-arang gayod ang akong gibati. Misugod ako pagkaon, nakatulog ako sa tibuok gabii, dili na ko kinahanglang moinom kanunay ug mga painkiller, ug mapahiyomon na usab ako!”—Proverbio 16:24.

Ang mahigugmaong palibot sa Kristohanong mga tigom namatikdan sa mga tagagawas. Usa ka estudyante sa kolehiyo mipili sa pagpaniid sa mga Saksi ni Jehova aron mosulat bahin kanila alang sa iyang klase sa ethnology. Bahin sa atmospera diha sa mga tigom, siya misulat: “Ang mainit nga pag-abiabi nga akong nadawat . . . makapadani gayod. . . . Ang pagkamahigalaon sa mga Saksi ni Jehova maoy tataw kaayong hiyas ug gibati nakong mao ang labing hinungdanong bahin sa tigom.”—1 Corinto 14:25.

Niining gubot nga kalibotan, ang Kristohanong kongregasyon maoy usa ka espirituwal nga dapit dalangpanan. Kini maoy dapit diin anaa ang pakigdait ug gugma. Pinaagi sa pagtambong sa mga tigom, masinati nimo mismo ang kamatuoran sa gipamulong sa salmista: “Tan-awa! Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!”—Salmo 133:1.

[Kahon/Hulagway sa panid 25]

PAGTAGBAW SA USA KA LINAING PANGINAHANGLAN

Sa unsang paagi kadtong dili makadungog makabenepisyo sa Kristohanong mga tigom? Sa tibuok kalibotan, ang mga Saksi ni Jehova nagtukod ug mga kongregasyon nga naggamit ug senyas nga pinulongan. Sulod sa milabayng 13 ka tuig, 27 ka kongregasyon ug 43 ka grupo nga migamit ug senyas nga pinulongan ang gitukod sa Tinipong Bansa. Diha sa labing menos 40 ka ubang mga nasod, duna na karoy mga 140 ka kongregasyon nga naggamit ug senyas nga pinulongan. Ang Kristohanong mga publikasyon giandam diha sa video sa 13 ka senyas nga pinulongan.

Ang Kristohanong kongregasyon nagtanyag sa mga bungol ug kahigayonan nga modayeg kang Jehova. Si Odile, usa ka kanhing Katoliko sa Pransiya nga nag-antos sa pagsugmat-sugmat sa grabeng depresyon ug naghunahunang maghikog, mapasalamaton kaayo sa edukasyon sa Bibliya nga nadawat niya diha sa Kristohanong mga tigom. “Napasig-uli ang akong maayong panglawas ug kalipay sa kinabuhi,” siya miingon. “Apan labaw sa tanan, nakaplagan nako ang kamatuoran. Ang kinabuhi karon aduna nay katuyoan alang kanako.”