Mga Pangutana Gikan sa mga Magbabasa

Diha sa Hebreohanon 11:26, si Moises ba ang gihisgotan nga mao ‘ang Kristo,’ o siya ba maoy larawan lamang ni Jesu-Kristo?

Sa dihang gihisgotan ang pagtuo ni Moises, si apostol Pablo misulat nga si Moises “nag-isip sa pasipala sa Kristo ingong bahandi nga labi pang bililhon kay sa mga bahandi sa Ehipto; tungod kay iyang gitutokan pag-ayo ang ganti.” (Hebreohanon 11:26) Mopatim-aw nga si Moises ang gipunting ni Pablo ingon nga mao ‘ang Kristo,’ o ang usa nga dinihogan, sa usa ka diwa.

Sa tinuod, sa nagkalainlaing mga bahin si Moises naghatag ug sumbanan alang sa umaabot nga Mesiyas. Bisag si Moises maoy usa ka propeta mismo, siya nagtagna bahin sa umaabot nga mas dakong propeta ‘sama kaniya.’ Daghang Hudiyo nagtuo nga si Jesus mao “Ang Propeta,” nga gipamatud-an sa iyang mga sumusunod. (Deuteronomio 18:15-19; Juan 1:21; 5:46; 6:14; 7:40; Buhat 3:22, 23; 7:37) Si Moises mao usab ang tigpataliwala sa pakigtugon sa Kasugoan, apan si Jesus nakadawat ug “labi pang maayong pagpang-alagad sa katilingban” ingon nga mao “ang tigpataliwala sa mas maayo pa nga pakigtugon,” ang mahimayaon bag-ong pakigtugon. (Hebreohanon 8:6; 9:15; 12:24; Galacia 3:19; 1 Timoteo 2:5) Busa sa pila ka bahin si Moises mahimong ikaingon nga usa ka larawan sa umaabot nga Mesiyas.

Apan, mopatim-aw nga dili kana mao ang pangunang kahulogan sa Hebreohanon 11:26. Walay gipaila nga si Moises nahibalo sa mga detalye bahin sa Mesiyas, nga naghunahuna nga ang iyang naagian sa Ehipto maoy bahin sa mahitabo sa Mesiyas o naghawas Kaniya.

Ang uban nagsugyot nga ang mga pulong ni Pablo sa Hebreohanon 11:26 adunay kahulogan sama sa iyang komento nga ang mga Kristohanon nakaagom ug “mga pag-antos alang sa Kristo.” (2 Corinto 1:5) Ang dinihogang mga Kristohanon nahibalo nga si Jesu-Kristo nag-antos ug nga kon sila ‘duyog nga mag-antos sila duyog nga pagahimayaon’ sa langit. Apan si Moises wala mahibalo nga ang umaabot nga Mesiyas mag-antos, ni may langitnong paglaom si Moises.​—Roma 8:17; Colosas 1:24.

Hinunoa, adunay mas simple nga pagsabot kon nganong si Moises “nag-isip sa pasipala sa Kristo ingong bahandi.”

Sa dihang gisulat ni Pablo “sa Kristo” diha sa Hebreohanon 11:26, iyang gigamit ang Gregong pulong Khri·stouʹ, nga maoy katugbang sa Hebreohanong Ma·shiʹach, kun Mesiyas. Ang “Mesiyas” ug ang “Kristo” nagkahulogang “usa nga dinihogan.” Busa si Pablo nagsulat bahin sa kang Moises nga ‘nag-isip sa pasipala sa usa nga dinihogan.’ Si Moises ba matawag mismo ang “usa nga dinihogan”?

Oo. Sa mga panahon sa Bibliya ang usa ka tawo mahimong ikatudlo diha sa linain nga katungdanan pinaagi sa pagbubo ug lana diha sa iyang ulo. “Unya si Samuel mikuha sa garapa sa lana ug gibubo kini diha sa ulo [ni Saul].” “Unya gikuha ni Samuel ang sungay nga gisudlan sa lana ug gidihogan [si David] sa taliwala sa iyang mga igsoon. Ug ang espiritu ni Jehova mikunsad diha kang David.” (1 Samuel 10:1; 16:13; itandi ang Exodo 30:25, 30; Levitico 8:12; 2 Samuel 22:51; Salmo 133:2.) Bisan pa, ang uban, sama ni propetang Elias ug sa hari sa Syria nga si Hazael, gihisgotan nga “gidihogan” bisag walay ebidensiya nga sila gibuboan ug literal nga lana. (1 Hari 19:15, 16; Salmo 105:14, 15; Isaias 45:1) Busa, ang indibiduwal mahimong “usa nga dinihogan” pinaagi sa pagkahimong napili o linain nga gisugo.

Niini nga diwa nga si Moises mismo mao ang usa nga dinihogan sa Diyos, ug ang ubang mga Bibliya may mga hubad sama sa “Dinihogan sa Diyos” o “ang Usa nga Dinihogan” diha sa Hebreohanon 11:26. Si Moises gisugo ingong hawas ni Jehova ug ang usa nga maoy nangulo sa Israel sa paggawas sa Ehipto. (Exodo 3:2-12, 15-17) Bisag gipadako si Moises diha sa tunga sa bahandi ug himaya sa Ehipto, iyang gipabilhag dako ang iyang sugo, nga iyang gidawat ug gituman. Sa ingon, si Pablo nakasulat nga si Moises “nag-isip sa pasipala sa Kristo ingong bahandi nga labi pang bililhon kay sa mga bahandi sa Ehipto.”