Unsay Gipadayag sa Salamin?

TAN-AW diha sa salamin. Unsay imong nakita? Usahay, inigpasiplat diha sa salamin madayag sa imong panagway ang makauulaw nga depekto nga malipay ka sa pagtul-id sa dili pa makamatikod ang uban.

Ang Bibliya sama gayod sa salamin. Kini makatabang kanato nga makabatog matinud-anong paglantaw sa atong kaugalingon, nga magpugong kanato sa paghunahuna ug sobra​—o ubos kaayo—​sa atong bili sa mga mata sa Diyos. (Mateo 10:29-31; Roma 12:3) Dugang pa, ang Bibliya makabutyag ug mga depekto sa atong mga pulong, mga buhat, o mga tinamdan nga kinahanglan natong itul-id. Kon kini mahitabo, dili mo ba tagdon ang gipadayag sa salamin?

Ang magsusulat sa Bibliya nga si Santiago nag-ingon: “Kon ang usa tigpaminaw sa pulong, ug dili usa ka magbubuhat, kini siya sama sa usa ka tawo nga nagatan-aw sa iyang kinaiyanhong nawong diha sa salamin. Kay nagatan-aw siya sa iyang kaugalingon, ug siya molakaw ug dihadiha makalimot kon unsang matanga siya nga tawo.”​—Santiago 1:23, 24.

Sa kasukwahi, gibatbat ni Santiago ang laing tawo, usa “nga nagasud-ong pag-ayo sa hingpit nga balaod nga iya sa kagawasan ug kinsa nagapadayon diha niana.” (Santiago 1:25) Ang Gregong pulong nga gihubad ug “sud-ong” nagpasabot sa pagduko o pagyuko aron sa pagtan-aw. “Dili kini basta daklit nga pagpasiplat lamang,” matud sa Theological Dictionary of the New Testament. Ang pulong nagpasabot ug mainampingong pagtuki sa natagong butang. “Adunay bililhong butang nga buot makita sa tumatan-aw, bisan tuod nga tingali malisod alang kaniya ang pagkakita niini ug pagkasabot dihadiha sa kahulogan,” misulat ang komentarista sa Bibliya nga si R. V. G. Tasker.

Imo bang susihon sa ingon ang imong kaugalingon diha sa salamin sa Pulong sa Diyos ug unya ipahiuyon kon unsay ginapangayo niini? Si Santiago nagpadayon: “Kini nga tawo, tungod kay siya nahimong, dili usa ka malimtanong tigpaminaw, kundili usa ka magbubuhat sa buluhaton, magmalipayon sa iyang pagbuhat niini.”​—Santiago 1:25.