MGA BATAN-ON NANGUTANA
Unsay Kinahanglan Nakong Himoon Human sa Bawtismo?—Bahin 2: Pabiling Matinumanon
Ang Bibliya nag-ingon nga “dili ihikaw ni Jehova ang bisan unsang maayo gikan niadtong nagalakaw uban ang integridad.” (Salmo 84:11) Unsay pasabot sa ‘paglakaw uban ang integridad’? Kini nagpasabot nga gipakita nimo sa imong pagkinabuhi nga gituman nimo ang imong saad kang Jehova dihang nagpahinungod ka niya. (Ecclesiastes 5:4, 5) Unsaon nimo paglakaw uban ang integridad, o pagpabiling matinumanon, human sa imong bawtismo?
Niining artikuloha
Ayawg surender bisag naay mga problema
Ang giingon sa Bibliya: “Kita kinahanglang mosulod sa Gingharian sa Diyos pinaagi sa daghang kasakitan.”—Buhat 14:22.
Kahulogan: Ang tinuod, ang tanang Kristohanon makaatubang ug mga problema. Kay Kristohanon ka, tingali bugalbugalan ka sa uban o supakon pa gani. Ang ubang problema, sama sa pinansiyal o sakit, makaapektar sa tanang tawo.
Ang imong madahom: Usahay mausab ang imong kahimtang, ug tingali dili ka ganahan sa maong kausaban. Ang Bibliya nag-ingon nga ang dili maayong mga butang puwedeng mahitabo kang bisan kinsa—Kristohanon man o dili.—Ecclesiastes 9:11.
Ang imong mahimo: Kay nahibalo man ka nga makaatubang kag mga problema, makapangandam ka kon unsay imong himoon. Isipa ang mga problema ingong kahigayonan nga palig-onon ang imong pagtuo ug mas mosalig kang Jehova. (Santiago 1:2, 3) Ug sama kang apostol Pablo, makaingon pod ka: “Naa koy kusog sa pag-atubang sa tanang butang tungod kaniya nga naghatag nakog gahom.”—Filipos 4:13.
TINUOD NGA EKSPERYENSIYA. “Human ko mabawtismohi, miundang sa pag-alagad ang akong mga kuya, nasakit ang akong mga ginikanan, ug nasakit pod ko. Puwede ra pod unta kong moundang sa pag-alagad—nga kalimtan ang akong saad sa Diyos nga himoong pinakaimportante sa akong kinabuhi ang pag-alagad kaniya. Pero ang akong panaad mao mismo ang nakatabang nako nga makaya ang maong mga problema.”—Karen.
Tip: Pagkat-on gikan kang Jose. Mabasa nimo ang estorya sa iyang kinabuhi sa Genesis kapitulo 37 ug 39 hangtod 41. Hunahunaa: Unsang wala damhang mga problema ang giatubang ni Jose, ug unsay iyang gihimo? Giunsa siya pagtabang ni Jehova?
Niay dugang tabang
Basaha:
I-download:
Padayong sukli ang tentasyon
Ang giingon sa Bibliya: “Ang matag usa masulayan dihang siya ginadani ug ginahaylo sa iyang kaugalingong tinguha.”—Santiago 1:14.
Kahulogan: Usahay, naa tay dili maayong mga tinguha, ug kon dili nato ni kontrolahon posibleng makahimo tag daotan.
Ang imong madahom: Bisag bawtismado na ka, naa gihapon ang “mga tinguha sa unod.” (2 Pedro 2:18) Basig matental pa gani ka nga makig-sex sa dili pa magminyo.
Ang imong mahimo: Palig-ona na daan ang imong determinasyon karon—sa dili pa ka matental—aron dili ka makahimog sayop nga desisyon tungod sa dili maayong mga tinguha. Hinumdomi ang giingon ni Jesus: “Walay ulipon nga makaalagad sa duha ka agalon.” (Mateo 6:24) Makapili ka kon kinsay imong agalon. Pilia si Jehova. Bisag lisod tingali kaayong suklan ang sayop nga tinguha, makapili ka nga dili magpadala ana.—Galacia 5:16.
Tip: Ilha ang kaya nimong himoon ug ang imong mga kahuyangan. Pagpilig mga higala nga maayog impluwensiya nimo. Likayi ang mga tawo, lugar, ug situwasyon nga makatental nimo sa paghimog daotan.—Salmo 26:4, 5.
Niay dugang tabang
Basaha:
“Unsaon Nako Pagsukol ang Tentasyon?”
“Unsay Akong Himoon Aron Dili Ko Magsigeg Hunahuna Bahin sa Sekso?”
Mentinaha ang imong kadasig
Ang giingon sa Bibliya: “Magpakitag samang kakugi . . . hangtod sa kataposan, aron dili mo mahimong tapolan.”—Hebreohanon 6:11, 12.
Kahulogan: Kon ang usa dili magpokus sa iyang trabaho, dali ra siyang mawad-ag gana ug mahimong tapolan.
Ang imong madahom: Human sa imong bawtismo, seguradong eksayted ka ug dasig kaayo sa imong pag-alagad. Gimahal kaayo nimo si Jehova. Pero paglabay sa panahon, basig malisdan na ka nga kanunayng sundon si Jehova sa tanang butang. Ug tungod ana, basig maluya ka ug mawad-ag kadasig.—Galacia 5:7.
Ang imong mahimo: Padayong himoa kon unsay husto, bisan pag naay mga panahon nga wala kay gana sa paghimo ana. (1 Corinto 9:27) Paningkamoti nga mas mailhan nimo si Jehova ug kanunayng makig-estorya niya pinaagig pag-ampo, aron mas masuod ka kaniya. Pakigsuod pod kanunay niadtong dasig sa pag-alagad kang Jehova.
Tip: Hinumdomi nga gimahal ka pag-ayo ni Jehova ug andam siyang motabang nimo. Ayawg hunahunaa nga nasuko siya nimo kon naay mga panahon nga nawad-an kag kadasig. Ang Bibliya nag-ingon: “Gihatagan niyag kusog ang gikapoy ug gipalig-on niya pag-ayo kadtong mga walay kusog.” (Isaias 40:29) Seguradong panalanginan ni Jehova ang imong mga paningkamot nga mabalik ang imong kadasig.
Niay dugang tabang
Basaha:
“Mga Batan-on—‘Padayong Panlimbasogi ang Inyong Kaluwasan’”
“Unsay Akong Himoon Aron Magmalipayon Ko sa Pagsimba sa Diyos?”
Tan-awa:
Ang punto: Kon padayon kang magmatinumanon, mapalipay nimo ang kasingkasing ni Jehova! (Proverbio 27:11) Malipay si Jehova nga imo siyang gipili, ug tabangan gyod ka niya nga masuklan ang mga pag-atake ni Satanas.