“Sunda nga Duol ang Iyang mga Lakang”—Sa Unsang Paagi?

“DILI gayod ako mahingpit sama kang Jesus, bisan pag unsaon nakog ampo o unsaon nakog paningkamot.” Sa mga gisurbi sa U.S. Catholic 89 porsiento miuyon nianang pahayaga. Sa pagkamatuod, ang paglaom sa pagsunod sa mga lakang ni Kristo daw dako kaayo​—ilabina kon imong palandongon ang dagway ni Kristo nga gipaila sa mga iglesya. Matud sa usa ka lalaking Katoliko: “Sa katibuk-an, sa akong hunahuna si Jesus maoy madasigon, mahigugmaon, matinagdanon, matinugotong persona nga wala magdahom ug dako gikan kanako. Apan inigsulod ko sa simbahan, si Jesus gipakadiyos nga ako mawala ug mapaubos tungod sa akong mga pagkadili-hingpit.”

Apan, ang mga talaan sa Ebanghelyo wala ‘magpakadiyos’ kang Kristo. Ginapakita niana nga si Jesus natawo, dili taliwala sa aristokratang mga tawo, kondili ngadto sa banay nga mamumuo. Ang iyang amaama nga si Jose usa ka panday. Bisan tuod diyutay ra ang nasayran bahin sa pagkabata ni Jesus, ang usa ka hitabo mabutyagon. Sa 12 anyos si Jesus, gidala siya sa iyang mga ginikanan sa ilang tinuig nga pagduaw sa Jerusalem alang sa Paskuwa. Niadtong higayona siya nalingaw sa usa ka Kasulatanhong panaghisgot, ug ang iyang pamilya nanglakaw nga wala siya. Nakaplagan siya sa hisabtang nabalakang si Jose ug si Maria tulo ka adlaw sa ulahi sa sulod sa templo, “nga naglingkod taliwala sa mga magtutudlo ug namati kanila ug nagsukitsukit kanila.” Dugang pa, “ang tanang nanimati kaniya sa kanunay nahibulong sa iyang pagsabot ug sa iyang mga tubag.” Tiaw ba, sa 12 anyos lamang sa edad siya wala lamang mangutanag makapukaw-kaisipan, nalangkit-sa-espirituwal nga mga pangutana kondili mihatag usab ug maalamong mga tubag. Tinong gibuligan siya sa pagbansay sa iyang mga ginikanan!​—Lucas 2:41-50.

Kon ikaw batan-on, posible bang mosunod ka sa panig-ingnan ni Kristo? Posible gayod! Kay si Kristo mismo nagbilin kaninyog “usa ka sulundan aron inyong masunod nga duol ang iyang mga lakang.”​—1 Pedro 2:21.

Ang pagkabatan-on maoy maayong panahon aron batonan ang paninugdang kahibalo mahitungod sa Diyos ug sa iyang Pulong. Tinuod, ang ubang imong kaila tingali mag-usik ug daghang panahon sa mga komiks ug sa TV. Apan, nganong dili ka hinuon mosunod sa mga lakang ni Jesus, kinsa ingong batang lalaki nagkalipay sa pagkakat-on mahitungod kang Jehova? Tungod sa iyang gugma sa espirituwal nga mga butang, “si Jesus nagpadayon sa pag-uswag sa kaalam.” (Lucas 2:52) Ikaw makahimo usab sa ingon.

Sa pag-ilustrar: Sa usa ka eskuylahan sa South Africa, gisukna ang usa ka magtutudlo kon siya makapamatuod ba nga matuod ang Bibliya. Siya miangkon nga siya dili makapamatuod. Usa ka batan-ong lalaki, nga usa sa mga Saksi ni Jehova, maisogong miingon: “Ako makapamatuod gayod nga matuod ang Bibliya!” Sa unsang paagi? Gihinumdoman niya ang impormasyong iyang natun-an sa usa ka bag-ong isyu sa Bantayanang Torre. Busa tapos makabatog pagtugot sa pagpahayag, siya misaysay sa kahulogan sa usa ka tagna nga nahitala sa Daniel kapitulo 2. Ang klase nahibulong samtang iyang gipakita nga gitagna ang pagtungha ug pagkapukan sa sunodsunod nga mga gobyerno sa kalibotan ug ang ilang pagkalaglag sa kataposan pinaagi sa Gingharian sa Diyos. Ang maayong panaghisgot misunod nga niana siya nakabatog higayon sa pagtubag sa daghang pangutana.

Pag-anhi Aron sa Pagbuhat sa Kabubut-on sa Diyos

Ang patukoranan sa kahibalo ug pagsabot sa Bibliya nga gipahamutang ni Jesus sa pagkabatan-on sa ulahi nagdasig kaniya sa pagkuha sa usa ka maugdang nga lakang. “Si Jesus miadto . . . sa Jordan ngadto kang Juan, aron magpabawtismo kaniya.” Kadto mao na ang gitakdang panahon aron iyang pas-anon ang iyang mga responsabilidad ingong ministro sa Diyos. Ang bawtismo nagkahulogan sa pagpresentar sa iyang kaugalingon aron sa pagbuhat sa kabubut-on sa Diyos.​—Mateo 3:13-15.

Usa ka kinahanglanon usab nga ang mga Kristohanon mosundog kang Kristo pinaagi sa pagpabawtismo. Ang bawtismo usa ka sagradong simbolo, usa ka gawas nga ilhanan sa pagpahinungod. Kon makigsabot kita nga motrabaho alang sa usa ka tawo o kompaniya, ato unang tinoon ang mga kinahanglanon ug mga kondisyon ug kadaghanan sundan kana sa pagpirmag kontrata. Apan kon walay pirma, ang kontrata dili ikapatuman. Mao usab ang bawtismo​—kini mohimo sa atong pagpahinungod sa Diyos nga balido. Sa usa ka diwa, sama kang Jesus kita nagaingon: ‘Tan-awa! Ako mianhi sa pagbuhat sa imong kabubut-on, Oh Diyos.’ (Hebreohanon 10:7) Sa ingon kita mahimong mga alagad sa Diyos, iyang mga ministro!​—2 Corinto 3:5, 6.

Hinuon, sama kang Jesus, kinahanglan unang batonan nimo ang paninugdang kahibalo mahitungod sa Diyos. Ug ang mga Saksi ni Jehova makatabang kanimo​—ug sa imong mga anak​—sa pagbuhat niini pinaagi sa sistematikanhong pagtuon sa Bibliya.

Pag-una sa Ministeryo

Tapos sa pagpabawtismo, si Jesus misulod sa usa ka yugto sa pagpuasa, pamalandong, ug pag-ampo. Pihong kadto nag-andam kaniya alang sa tentasyong iyang sunod nahibalag. Gitanyag kaniya ni Satanas nga Yawa ang pagmando ibabaw “sa tanang gingharian sa kalibotan.” Pagkatalagsaon untang karera ang mabatonan ni Jesus kon gidawat niya ang tanyag sa Yawa! Ugaling, naamgohan ni Kristo nga ang maong karera dili magdugay. Gisalikway niya dihadiha ang Yawa ug hinunoa “misugod sa pagwali ug pag-ingon: ‘Paghinulsol kamo, kamong katawhan, kay ang gingharian sa mga langit haduol na.’” (Mateo 4:2, 8-10, 17) Sa nahibilin niyang kinabuhi sa yuta, si Kristo usa ka bug-os-panahong ministro sa Gingharian sa Diyos.

Susama karong adlawa, dili itugot sa usa ka Kristohanon nga mahaylo siya sa kalibotan ni Satanas sa paghimo sa dagkog-suweldong mga trabaho ug mga karera nga maoy iyang katuyoan sa kinabuhi. Aw, sa gitawag ni Jesus ang una niyang mga tinun-an, “dihadiha ilang gibiyaan ang ilang mga pukot ug misunod kaniya.” (Marcos 1:17-21) Busa, maalamon bang masikop sa pukot sa kalibotanong mga pangagpas? Gisugo ni Jesus ang iyang mga sumusunod karong adlawa sa ‘pagwali sa maayong balita sa gingharian.’ (Mateo 24:14) Tinuod, ikaw tingali may pamilya o ubang responsabilidad nga atimanon. Mao nga daghang Saksi ni Jehova nagagamit sa mga gabii ug hinapos-sa-semana sa pagtuman sa ilang Kristohanong responsabilidad sa pagwali. Ang pipila makaarang gani sa paghikay sa pagbuhat niana sa bug-os panahon!

Sa South Africa ang usa ka ulitawo nagplano sa pagtungha sa unibersidad sa pagkatapos sa hayskul. Ugaling, tapos sa pagpasimbolo sa iyang pagpahinungod kang Jehova pinaagi sa bawtismo, gibati niyang obligasyon ang pagsulod sa tibuok-panahong ministeryo. Ang iyang amahan, nga dili Saksi, sa sinugdan wala mouyon. Apan tapos ang dakong panaghisgot, siya sa kataposan misugot nga ang iyang anak lalaki mag-alagad sa sangang buhatan sa mga Saksi ni Jehova sa South Africa.

Human sa siyam ka malipayong katuigan didto, siya naminyo ug misulod sa bug-os-panahong buluhatong pagsangyaw uban sa iyang asawa. Sa ulahi nakabaton silag anak. Bisan pa niana, ilang gipangayo ang tabang ni Jehova sa pagtabang kanila sa pagpadayong bug-os-panahong mga ministro. Nahinumdoman nila ang saad ni Jesus nga kon unahon sa usa ang Gingharian sa Diyos, “kining tanang ubang butang [materyal nga mga panginahanglan] igadugang kaninyo.” (Mateo 6:33) Kadto nakitang matuod. “Kami nagkinabuhing madaginoton latas sa katuigan,” matud sa amahan, “apan nahatag namo sa among anak babaye ang maayong panimalay ug natagana ang tanan niyang materyal nga panginahanglan.”

“Malumo ug Mapaubsanon sa Kasingkasing”

“Umari kamo, kamong tanan nga nabudlayan ug nabug-atan,” matud ni Jesus, “ug papahulayon ko kamo. Isangon ninyo ang akong yugo ug magtuon gikan kanako, kay ako malumo ug mapaubsanon sa kasingkasing, ug kamo makakaplag ug pahulay sa inyong mga kalag. Kay ang akong yugo maayo ug ang akong lulan magaan.”​—Mateo 11:28-30.

Dihang mihimog mga milagro, sama sa pagpalagpot sa mga demonyo, wala angkona ni Jesus ang dungog sa iyang kaugalingon kondili dayag miangkong iyang nahimo kadtong mga butanga “pinaagi sa espiritu sa Diyos.” (Mateo 12:28) Ug bisan tuod nakakuha sa pagtagad sa mamiminaw sa paagi nga “sila natingala sa iyang paagi sa pagtudlo,” siya wala magtinguhag himaya alang sa iyang kaugalingon. (Lucas 4:32) Hinunoa, siya moingon: “Ang akong ginatudlo dili ako, kondili iya sa nagpadala kanako.”​—Juan 7:16.

Ang matuod nga mga Kristohanon karong adlawa naningkamot sa pagpakita sa samang pagpaubos. Pananglitan, sa magatudlo sa uban, sila dili modani sa pagtagad sa ilang kaugalingon. Hinunoa, sila daling mohatag sa dungog ngadto kang Jehova ug sa iyang organisasyon alang sa bisan unsang katakos nga ilang nabatonan aron ikapasa ang mensahe sa Pulong sa Diyos. “Unsa ang inyong nabatonan nga wala ninyo madawat?” nangutana si apostol Pablo.​—1 Corinto 4:7.

Ang pagpaubos ni Jesus gipadayag usab sa iyang pagkaandam mopanaw sa kaliboang milya, dili sakay sa usa ka karwahe, kondili nga magbaktas ingong nagpanawng magwawali. Sa usa ka higayon siya ug ang iyang mga tinun-an gikapoy kaayo nga sila kinahanglang “mopahulay ug kadiyut.” Apan sa dihang mitungha ang dakong panon, nga gigutom sa espirituwal nga pagdasig, nalimtan ni Jesus ang iyang kakapoy ug “misugod siya sa pagtudlo kanilag daghang butang.”​—Marcos 6:31-34.

Sa Lesotho, Aprika, usa ka nagpanawng ministro sa mga Saksi ni Jehova (gitawag magtatan-aw sa sirkito) ug duha ka kauban, karong bag-o nagpakitag susamang espiritu. Sila mibaktas ug 22 ka oras sa kabukiran sa pagduaw sa pila ka nahilaing kaubang Kristohanon. Ang magtatan-aw sa sirkito, kay gikapoy sa pagbaktas, mihukom sa pagpahulay sa sunod adlaw. Apan ang dakong panon miabot sa pagtimbaya kaniya ug pagpangutana nga, bisan pag siya gikapoy kaayo, siya mibangon ug nagtudlo kanila sa maayong balita sa Gingharian. Ang sanong makapadasig kaayo nga gibati sa gikapoy nga mga magpapanaw nga gibaslan ug dako ang ilang mga paghago.

Sundoga Siya!

Gidasig kita ni apostol Pablo sa “pagtutok pag-ayo sa Pangulong Ahente ug Maghihingpit sa atong pagtuo, si Jesus.” (Hebreohanon 12:2) Kini atong mabuhat pinaagi sa regular nga pagbasa sa mga talaan sa Ebanghelyo ug pagpalandong sa mga paagi nga niana kita makasundog kang Kristo. Pananglitan, si Jesus nagpadayag ug kaisog sa iyang gisaway ang pagkasalingkapaw ug pagpakamatarong-sa-kaugalingon sa relihiyosong mga pangulo, bisan pag nasayran niyang sila nagdumot kaniya ug buot mopatay kaniya. (Mateo 23:1-36; 26:3, 4) Siya nagpabiling kalmado ug mapugnganon-sa-kaugalingon dihang giatake. (1 Pedro 2:23) Sa iyang pagtudlo, iyang gipadayag ang pagkamasinabtanon sa tawhanong kinaiya ug katakos sa pagpahayag sa halalom nga mga kamatuoran sa yanong pinulongan.

Apan ang labing talagsaong hiyas ni Jesus mao ang iyang gugma. “Walay mausa ang may gugma nga labaw kay niini, nga igatugyan sa usa ang iyang kalag alang sa iyang mga higala.” (Juan 15:13) Gidugang pa niya ang bag-ong bahin sa pulong gugma pinaagi sa pagsugo kanato sa paghigugma sa atong mga kaaway.​—Mateo 5:43-48.

Pagkalabaw nga sulundan si Jesus alang kanato! Ang pagsundog kaniya dili sayon, ug tingali kita mapandol matag karon ug unya. Apan dili gayod angay nga kita mosurender. (Galacia 6:9) Kay adunay minilyong malamposong naningkamot sa pagsunod kang Jesus. Aw, ang tawo mismo nga nagdala kanimo niining magasina pihong nahiapil kanila ug labi pang malipay usab sa pagtabang kanimo sa pagsunod sa mga lakang ni Jesus—NGA DUOL!

[Blurb sa panid 5]

Bisan sa pagkabata, si Jesus nagpadayag ug dakong kaikag sa espirituwal nga mga butang. Ikaw nagasunod ba kaniya niining bahina?

[Blurb sa panid 6]

Gisalikway ni Kristo ang kalibotanong karera sa pagpalabi sa ministeryo