• Ang Bibliya nag-ingon nga ang numero, o ngalan, sa mananap—666—maoy “usa ka numero sa tawo.” (Pinadayag 13:17, 18) Kini nagpaila nga ang mananap sa Pinadayag kapitulo 13 maoy organisasyon sa tawo, dili sa espiritu o demonyo.

Tubag sa Bibliya

Sumala sa kataposang basahon sa Bibliya, ang 666 mao ang numero, o ngalan, sa mapintas nga mananap nga may pito ka ulo ug napulo ka sungay nga migimaw sa dagat. (Pinadayag 13:1, 17, 18) Kini nga mananap nagsimbolo sa politikal nga sistema sa tibuok kalibotan, nga nagmando “sa matag tribo ug katawhan ug pinulongan ug nasod.” (Pinadayag 13:7) Ang ngalang 666 nagpaila nga ang politikal nga sistema pakyas gayod sa panan-aw sa Diyos. Sa unsang paagi?

Labaw pa sa usa ka ngalan. Dunay kahulogan ang mga ngalan nga gihatag sa Diyos. Pananglitan, ang ngalan sa lalaking si Abram nagkahulogang “Ang Amahan Maoy Hataas (Binayaw).” Sa ulahi, gihatagan siya sa Diyos ug bag-ong ngalan nga Abraham, nga nagkahulogang “Amahan sa Panon (Daghan).” Nahitabo kini dihang gisaaran sa Diyos si Abraham nga mahimong “amahan sa panon sa mga nasod.” (Genesis 17:5) Sa susama, ginganlan sa Diyos ang mananap ug 666 ingong haom nga simbolo niini.

Ang numerong sayis nagpasabot ug pagkadili-hingpit. Sa Bibliya, ang mga numero sagad gigamit ingong mga simbolo. Ang pito sagad nagtumong sa pagkakompleto o pagkahingpit. Ang unom, nga kulag usa aron ma-pito, mahimong magtumong sa butang nga dili kompleto o may depekto sa panan-aw sa Diyos. Ug kini mahimong ilangkit ngadto sa mga kaaway sa Diyos.—1 Cronicas 20:6; Daniel 3:1.

Tulo ka beses agig pagpasiugda. Aron ipasiugda ang usa ka butang, usahay tulo ka beses kini balikbalikon ug sulti sa Bibliya. (Pinadayag 4:8; 8:13) Busa ang ngalang 666 tin-awng nagpasiugda sa panglantaw sa Diyos labot sa politikal nga mga sistema, nga kini pakyas gayod. Kini wala makahatag ug dumalayong kalinaw ug kasegurohan—mga butang nga Gingharian sa Diyos lang ang makahimo.