Ang Daotag-Dungog nga Bigaon—Iyang Kalaglagan

“Dayega si Jah, kamo nga katawhan! Ang kaluwasan ug ang himaya ug ang kagahom iya sa atong Diyos, kay ang iyang mga hukom matuod ug matarong. Iyang gikahukman ang dakong bigaon nga mao ang nakapadunot sa yuta pinaagi sa iyang pakighilawas, ug kaniya iyang gikapanimaslan ang dugo sa iyang mga ulipon.”—PINADAYAG 19:1, 2.

1. Sa unsang paagi ang dakong bigaon nakapanapaw uban sa “mga hari sa yuta,” ug unsay misangpot niini?

ANG tanan nga atong gihisgotan seryoso gayod. Apan, maayong atong timan-an nga ang Pinadayag 17:2 naghisgot usab sa pakighilawas sa dakong bigaon uban sa “mga hari sa yuta.” Bisan pa nga nag-antos siya sa pagkapukan, siya suod gihapong higala sa kalibotan, ug siya naningkamot sa pagmaniobra sa mga magmamando sa kalibotan aron makab-ot ang iyang mga tinguha. (Santiago 4:4) Kining espirituwal nga pagpamampam, nga giapilan sa malaw-ayng mga relasyon sa Dakong Babilonya ug sa politikanhong mga magmamando, miresultag wala sa panahong kamatayon sa tinagpulo ka milyong inosenteng mga tawo! Daotan na gani nga nakiglabot pa ang dakong bigaon sa duha ka kiliran sa panag-away diha sa Gubat sa Kalibotan I. Apan ang iyang mga sala may kalabotan sa Gubat sa Kalibotan II sa tinuod “nagtipun-og sungko sa langit”! (Pinadayag 18:5) Nganong nakaingon man kita niana?

2. (a) Sa unsang paagi gitabangan ni Franz von Papen si Adolf Hitler aron mahimong magmamando sa Alemanya, ug sa unsang paagi gibatbat sa kansilyer niadto sa Alemanya ang kabalyero sa papa? (b) Diha sa Konkordat tali sa Estado sa Nazi ug sa Batikano, unsang duha ka kondisyon ang gitago? (Tan-awa ang potnot.)

² Buweno, magkuha kitag usa ka pananglitan, sa unsang paagi ang daogdaogang si Adolf Hitler nahimong kansilyer​—ug diktador​—sa Alemanya? Kadto maoy pinaagi sa intriga sa politika sa usa ka kabalyero sa papa kinsa gibatbat sa nag-unang kansilyer sa Aleman, si Kurt von Schleicher, ingong “traydor nga mas santo pa si Judas Iscariote kon itandi niya.” Kadto mao si Franz von Papen, kinsa mihikay ug Aksiyong Katoliko ug sa mga lider sa industriya sa pagbatok sa komunismo ug sa paghiusa sa Alemanya ilalom kang Hitler. Ingong bahin sa kasabotan, si von Papen gihimong bise-kansilyer. Si Hitler nagpadalag delegasyon nga gipangunahan ni von Papen ngadto sa Roma aron sa paghikay ug konkordat o kasabotan tali sa Estado sa Nazi ug sa Batikano. Si Papa Pio XI misulti sa mga sinugo nga Aleman nga nalipay kaayo siya nga “ang Kagamhanang Aleman karon dunay pangulo niini nga usa ka tawong hugot nga nagabatok sa Komunismo,” ug sa Hulyo 20, 1933, diha sa usa ka maluhong seremoniya sa Batikano, si Kardinal Pacelli (nga sa ulahi nahimong Papa Pio XII) mipirma sa konkordat.a

3. (a) Unsay gisulat sa manalaysay bahin sa Konkordat tali sa Estado sa Nazi ug sa Batikano? (b) Sa panahon sa pagsaulog sa Batikano, unsang pasidungog ang gihatag kang Franz von Papen? (c) Unsang papel ang gidula ni Franz von Papen sa pag-ilog sa Nazi sa Austria?

³ Ang usa ka manalaysay misulat: “Ang Konkordat [uban sa Batikano] maoy dakong kadaogan alang kang Hitler. Kadto naghatag kaniya sa unang moral nga pagpaluyo nga iyang nadawat gikan sa gawas nga kalibotan, ug kini gikan pa sa labing binayaw nga tuboran.” Sa panahon sa mga selebresyon sa Batikano, gipasidunggan ni Pacelli si von Papen sa hataas nga dekorasyon sa papa nga Grand Cross sa Orden ni Pio.b Si Winston Churchill, diha sa iyang librong The Gathering Storm, gipatik sa 1948, nagsugid kon giunsa ni von Papen paggamit ang “iyang dungog ingong maayong Katoliko” aron makuha ang pagpaluyo sa iglesya sa pag-ilog sa Nazi sa Austria. Niadtong 1938, sa pagpasidungog sa adlawng-natawhan ni Hitler, si Kardinal Innitzer misugo nga kinahanglang magbutang ang tanang Austriano ug banderang swastika, ripekihon ang ilang mga kampana, ug mag-ampo alang sa Nazi nga diktador.

4, 5. (a) Nganong makalilisang ang pagkasad-an sa dugo ang Batikano? (b) Sa unsang paagi ang mga obispo sa Alemang Katoliko mihatag bukas nga pagpaluyo kang Hitler?

⁴ Ang makalilisang nga pagkasad-an sa dugo nasandig sa Batikano! Ingong pangunang bahin sa Dakong Babilonya, kini nakatabag dako sa pagbutang kang Hitler sa gahom ug gihatagan siyag “moral” nga pagpaluyo. Ang Batikano misaylo pa gayod sa hilom nga pag-uyon sa mananapong mga buhat ni Hitler. Sulod sa daghang katuigan sa kabangisan sa Nazi, ang papa sa Roma nagpakahilom samtang ginatos ka libong mga sundalong Katoliko naggubatay ug nangamatay alang sa himaya sa rehimen sa Nazi ug samtang ang milyonmilyon pang ubang mga alaot gipamatay diha sa mga gas chamber ni Hitler.

⁵ Ang mga obispong Katoliko sa Alemanya mihatag pa gani ug bukas nga pagpaluyo kang Hitler. Sa mismong adlaw nga ang Japan, ang kaabay sa Aleman sa panahon sa gubat niadtong panahona, hilom nga miatake sa Pearl Harbor, ang The New York Times mihatag niining taho: “Ang Komperensiya sa Katolikong mga Obispo sa Alemanya nga nagtigom sa Fulda mirekomendar sa paghatag espesyal nga ‘pag-ampo sa gubat’ nga basahon inigsugod ug inigkahuman sa tanang balaang mga serbisyo. Ang pag-ampo nangamuyo sa Diyos nga panalanginan ang mga armas sa Aleman ug kadaogan ug hatagag dakong panalipod ug kahimsog ang mga kinabuhi sa tanang mga sundalo. Dugang gisugo sa mga Obispo ang mga klerong Katoliko sa pagpanalipod ug sa paghinumdom diha sa espesyal nga wali sa Dominggo labing menos kas-a sa usa ka bulan sa mga sundalong Aleman ‘sa yuta, sa dagat ug sa kahanginan.’”

6. Ang kalibotan makalikay unta sa unsang dakong kasakit ug mananapong mga buhat kon wala pay espirituwal nga panapaw ang gihimo sa Batikano ug ang mga Nazi?

⁶ Kon wala pa magminahalay ang Batikano ug ang mga Nazi, hayan ang kalibotan dili makaagig kasakit nga mapatyan ug milyonmilyong mga sundalo ug mga sibilyan diha sa gubat, sa unom ka milyong mga Hudiyo nga gipamatay tungod kay dili-Aryan, ug​—labing bililhon sa mga mata ni Jehova​—sa libolibo sa iyang mga Saksi, nga sakop sa dinihogan ug sa “ubang mga karnero” nga nag-antos gikan sa grabeng mananapong mga buhat, uban sa daghang mga Saksi nga nangamatay sa mga kampo konsentrasyon sa Nazi.​—Juan 10:10, 16.

Pagtuki sa Bigaon

7. Sa unsang paagi gibatbat ni apostol Juan ang iyang duol nga pagtan-aw sa dakong bigaon?

⁷ Pagkatukma sa panan-awon ang sunod nga mibuklad sa tagna sa Pinadayag! Dihang paklion ang kapitulo 17, sa mga bersikulo 3 ngadto sa 5, atong makita si Juan nga miingon sa manulonda: “Ug iyang gidala ako diha sa gahom sa espiritu ngadto sa usa ka kamingawan. Ug didto nakita ko ang usa ka babaye nga nagkabayo sa usa ka mapintas nga mananap nga mapula nga nalukop sa mga ngalan nga mapasipad-on ug kini dunay pito ka buok ulo ug napulo ka buok sungay. Ug ang babaye nagbestig purpora ug eskarlata, ug may mga dayandayan nga bulawan ug mga batong hamili ug mga mutya ug sa iyang kamot may gikuptan siya nga usa ka kopa nga bulawan nga napuno sa kangil-aran ug kahugawan sa iyang pagkamakihilawason. Ug diha sa iyang agtang nahisulat ang ngalan, usa ka misteryo: ‘Dakong Babilonya, ang inahan sa mga bigaon ug sa dulumtanang mga butang sa yuta.’”

8. (a) Unsay gidala sa dakong bigaon sa iyang kopa nga bulawan, busa nagpaila sa iyang kaugalingon? (b) Sa unsang paagi ang Dakong Babilonya mahulagwayong “gidayandayanag purpora ug eskarlata” ug gidayandayanag “bulawan ug hamiling bato ug mga mutya”?

⁸ Dinhi nakita ni Juan ang Dakong Babilonya sa duol. Siya iya gayod diha sa kamingawan, taliwala sa mapintas nga mga mananap nga nagpuyo niana. Kining dakong bigaon dayag nga mailhan nianang iyang gikuptan diha sa iyang kopa, bisag kini sa malimbongon hamiling tan-awon sa gawas. Siya nag-inom ug ilimnon nga dulumtanan gikan sa tinamdan sa Diyos. Ang iyang pakighigala sa kalibotan, ang iyang bakak nga mga doktrina, ang iyang moral nga pagkamatinugoton, ang iyang pagbirigbirig sa politikal nga mga gahom​—kining mga butanga gidumtan ni Jehova, “ang Maghuhukom sa tibuok yuta.” (Genesis 18:22-26; Pinadayag 18:21, 24) Oh, pagkatahom sa iyang pagdayandayan sa iyang kaugalingon! Siya ilado sa iyang dagkong mga katedral uban sa ilang matahom nga arkitekura ug sa mga bildong bentanang de-kolor, ang iyang gidayandayanag mga alahas nga mga pagoda ug wats, ang iyang dugay nang gigamit nga mga templo ug mga ampoanan. Sunod sa estilo nga giuso sa dakong bigaon, ang iyang mga pari ug mga monghe gidayandayanag mahalong mga kapa nga eskarlata, purpura, ug orens.​—Pinadayag 17:1.

9. Ang Dakong Babilonya dunay unsang taas nga kasaysayayn sa pagkasad-an sa dugo, ug sa unsang paagi tukmang gitapos ni Juan ang pagbatbat kaniya?

⁹ Ang labing talamayon, hinunoa, mao ang iyang pagkauhaw-ug-dugo. Dugay nang may hulosayon si Jehova nianang bahina! Siya nagpaluyo sa uhaw ug dugong mga diktador sa modernong mga panahon, ug ang iyang dulumtanang kasaysayan sa pag-ulag dugo balik pa sa kasiglohan, pinaagi sa relihiyosong mga gubat, sa mga Inkisisyon, sa mga Krusada, oo, balik sa pagpatay sa ubang mga apostoles ug sa pagpatay sa kaugalingong Anak sa Diyos, si Ginoong Jesu-Kristo, ug sa una pa niana. (Buhat 3:15; Hebreohanon 11:36, 37) Dugang pa niining tanan mao ang pagpatay nila sa mga Saksi ni Jehova sa dili pa dugayng mga tuig pinaagi sa firing squad, sa pagbitay, sa atsa, sa pagpunggot sa ulo, sa espada, ug sa mananapong pagtratar diha sa mga bilanggoan ug sa mga kampo konsentrasyon. Dili ikahibulong nga gitapos ni Juan ang iyang pagbatbat pinaagi sa pag-ingon: “Ug nakita ko ang babaye nga nahubog sa dugo sa mga balaan ug sa dugo sa mga gipamatay nga mga saksi ni Jesus”!​—Pinadayag 17:6.

‘ANG MISTERYO SA BABAYE UG SA MANANAP’

10. (a) Sa unsang paagi gilutos sa dakong bigaon ang mga Saksi ni Jehova hangtod karong adlawa? (b) Unsang matang sa mga lider ang mga klero sa Dakong Babilonya?

¹⁰ Si Juan “nahibulong ug dako” sa iyang nakita. Karong adlawa, kita nahibulong usab! Sulod sa katuigang 1930 ug 1940, gigamit sa dakong bigaon ang Aksiyong Katoliko ug ang intriga sa politika sa paglutos ug sa pagbando sa matinumanong mga saksi ni Jehova. Hangtod karong adlawa, kon diin gani magamit niya ang iyang impluwensiya, ang Dakong Babilonya mopadayon sa pagbabag, sa pagdili, ug sa pagmisrepresentar sa buluhaton sa mga Saksi ni Jehova, kinsa nagwali sa mahimayaong paglaom sa Gingharian sa Diyos. Pinaagi sa pagpaulipon sa ginatos ka milyon diha sa relihiyosong mga organisasyon sa dakong bigaon, ang iyang mga klero nagsilbi ingong ‘buta nga mga magtutoltol sa buta,’ nga nag-agak kanila paingon sa gahong sa kalaglagan. Dili, dili gayod makaingon kining daotag-dungog nga bigaon uban kang apostol Pablo: “Ipanghimatuod ko kaninyo . . . nga ako hinlo gikan sa dugo sa tanang tawo.”​—Mateo 15:7-9, 14; 23:13; Buhat 20:26.

11, 12. Unsa ang misteryo sa “eskarlatag kolor nga mapintas nga mananap” nga nagpakabayo sa daotag-dungog nga bigaon, ug unsang kadan-agan ang nadawat sa mga Saksi ni Jehova bahin niini nga misteryo sa 1942?

¹¹ Nakamatikod sa kahibulong ni Juan, ang manulonda miingon kaniya: “Nganong nahibulong ka man? Itug-an ko kanimo ang misteryo sa babaye ug sa mapintas nga mananap nga iyang gikabay-an nga may pito ka buok ulo ug napulo ka buok sungay.” (Pinadayag 17:7) Unsa kining maong “mananap”? Kapin sa 600 ka tuig sayo pa niini, ang manalagnang Daniel nakakitag panan-awon sa mga mananap, ug gikasaysay ngadto kaniya nga kini naghawas sa “mga hari,” o politikanhong mga pagmando dinhi sa yuta. (Daniel 7:2-8, 17; 8:2-8; 19-22) Ang nakita ni Juan niini nga panan-awon maoy kombinasyon sa maong pagmando​—“eskarlatag kolor nga mapintas nga mananap.” Kini mao ang hinimog-tawong Liga sa Kanasoran nga mitungha sa talan-awon sa kalibotan sa 1920 apan nahagbong sa gahong sa pagkawalay-kalihokan sa dihang mibuto ang Gubat sa Kalibotan II sa 1939. Apan, komosta, ang bahin sa “misteryo sa babaye ug sa mapintas nga mananap”?

¹² Tungod sa pagpaigo sa Diyos, ang mga Saksi ni Jehova nakadawat ug kadan-agan niana nga misteryo sa 1942. Samtang mainit pa kaayo ang panagsangka sa Gubat sa Kalibotan II, daghan ang nagtuo nga moresulta pa kinig Armageddon. Apan si Jehova dunay lahi nga hunahuna! Duna pay daghang buluhaton ang iyang mga Saksi nga pagahimoon! Diha sa ilang New World Theocratic Assembly sa Septiyembre 18-20, 1942, diin ang punoang siyudad sa Cleveland, Ohio, gikonektar sa telepono sa 51 ka lugar sa Tinipong Bansa, si Nathan H. Knorr, presidente sa Watch Tower Society, mihatag ug pakigpulong publiko, “Pakigdait​—Kini ba Molungtad?” Diin diha niana iyang gisobli ang Pinadayag 17:8, nga nag-ingon bahin sa “eskarlatag kolor nga mapintas nga mananap” nga kini “mao ang sa kaniadto, ug dili ang sa karon, ug hapit nang molugwa gikan sa bung-aw sa kahiladman nga walay kinutoban, ug mopadulong sa pagkalaglag.” Iyang gipakita kon sa unsang paagi ang Liga sa Kanasoran mao ang “kaniadto” gikan sa 1920 ngadto sa 1939. Unya miabot ang “dili ang sa karon” nga yugto tungod sa pagkamatay sa Liga. Apan human sa Gubat sa Kalibotan II, kining panagtipon sa kanasoran molugwa gikan sa bung-aw. Kana bang binase sa Bibliya nga tagna natuman? Sa pagkamatuod natuman kadto! Niadtong 1945 ang internasyonal nga “mapintas nga mananap” mitungha gikan sa bung-aw sa pagkawalay-kalihokan ingong Hiniusang Kanasoran.

13. Sa unsang paagi ang Dakong Babilonya nagpadayon sa iyang samag-bigaon nga mga buhat uban sa HK nga “mananap”?

¹³ Ang Dakong Babilonya, bisag napaluya tungod sa iyang pagkapukan, nagpadayon sa iyang samag-bigaon nga mga buhat uban sa HK nga “mananap.” Pananglitan, niadtong Hunyo 1965, ang mga opisyal gikan sa pito ka pangunang mga sanga sa relihiyon sa kalibotan, ang gitawag nga Kristohanon ug dili-Kristohanon, ginaingon nga naghawas sa katunga sa populasyon sa kalibotan, nagtigom sa San Francisco aron sa pagsaulog sa ika-20ng adlawng-natawhan sa HK.c Sa mao gihapong tuig, si Papa Paulo VI nagbatbat sa HK ingon nga “ang kataposang paglaom sa kahusay ug kalinaw,” ug sa ulahi gipahayag ni Papa Juan Paulo II ang iyang paglaom nga “ang Hiniusang Kanasoran magpadayon nga mao ang kinalabwang natad sa pakigdait ug hustisya.” Sa miaging 1986 ang kalibotanong imperyo sa bakak nga relihiyon nanguna sa pagpaluyo sa Internasyonal nga Tuig sa Kalinaw sa HK. Apan miabot ba ang tinuod nga kalinaw ug kasegurohan ingong tubag sa ilang relihiyosong mga pag-ampo? Wala gayod! Dugang ug dugang, ang mga membrong nasod sa HK nagpakita nga sila walay tinuod nga gugma alang sa dakong bigaon.

Paglaglag sa Bigaon

14. Unsang espesyal nga serbisyo ang gihimo sa “mananap” nga HK, ug sa unsang paagi gibatbat kini sa manulonda sa Diyos?

¹⁴ Moabot ang panahon, ang “eskarlatag kolor nga mapintas nga mananap” laglagon. Apan sa dili pa kini mahitabo, ug sa dili pa ang kataposan sa iyang mananapong pag-atake sa katawhan sa Diyos, kanang mananap nga HK dunay linain nga pag-alagad nga himoon. Gibutang ni Jehova ‘ang iyang hunahuna diha sa mga kasingkasing sa mapintas nga mananap ug sa militaryong mga sungay.’ Unsa ang resulta? Ang manulonda sa Diyos mitubag: “Ug ang napulo ka sungay nga imong nakita, ug ang mapintas nga mananap, mao unya ang managdumot sa bigaon ug siya ilang pagalaglagon ug pagahuboan, ug ang iyang unod ilang pagakan-on ug siya ilang pagasunogon pinaagig kalayo.” “Iyang gipasigarbo ang iyang kaugalingon ug nagkinabuhi sa makauulawng kaluho,” apan kining tanan baliskaron. Ang iyang matahom relihiyosong mga tinukod ug dakong katigayonan dili makaluwas niya. Sumala sa gipahayag sa manulonda: “Nan sa usa lamang ka adlaw mangabot ang iyang hampak, ang kamatay ug kasubo ug gutom, ug siya bug-os sunogon pinaagig kalayo, tungod kay gamhanan si Jehova nga Diyos nga naghukom kaniya.”​—Pinadayag 17:16, 17; 18:7, 8.

15. Unsa unyay reaksiyon sa politikanhong mga hinigugma sa bigaon, ug sa mga tawong dagkog-negosyo, sa iyang kamatayon?

¹⁵ Ang iyang mga hinigugma sa politika managbakho sa iyang kamatayon, nga magaingon: “Alaot, alaot, ikaw nga bantogang siyudad, ikaw nga gamhanang siyudad O Babilonya, tungod kay sulod sa usa lamang ka takna nahiabot ang hukom batok kanimo!” Sa susama, ang mga tawong dagkog-negosyo, kinsa nakabatog linimbong nga mga ganansiya uban niya, “managpanghilak ug managbakho, nga magaingon, ‘Alaot, alaot . . . tungod kay sulod sa usa lamang ka takna malaglag kining tanang bahandia!’”​—Pinadayag 18:9-17.

16. Unsay pagsanong sa katawhan sa Diyos bahin sa kalaglagan sa dakong bigaon, ug sa unsang paagi gipamatud-an kini sa Pinadayag?

¹⁶ Apan, unsay pagsanong ang himoon sa katawhan sa Diyos? Ang tanan niini naapil sa mga pulong sa manulonda: “Paghugyaw tungod kaniya, O kalangitan, kamo usab nga mga balaan ug mga apostoles ug mga propeta, kay alang kaninyo gipakanaog sa Diyos ang hukom batok kaniya!” Pinaagi sa kalit nga pagtambog mahulog ang Dakong Babilonya, dili na gayod magapasipala pa sa balaang ngalan ni Jehova. Ang kalaglagan sa dakong bigaon nagkinahanglag selebrasyon ug mga awit sa kadaogan sa pagdayeg kang Jehova. Sa dihang mohugyaw ang una sa sunodsunod nga hallelujah, ang malipayong awit molanog: “Dayega ninyo si Jah, kamo nga katawhan! Ang kaluwasan ug ang himaya ug ang kagahom iya sa atong Diyos, kay ang iyang hukom matuod ug matarong. Iyang gikahukman ang dakong bigaon nga mao ang nakapadunot sa yuta pinaagi sa iyang pakighilawas, ug kaniya iyang gikapanimaslan ang dugo sa iyang mga ulipon.”​—Pinadayag 18:20–​19:3.

17. Human malaglag ang dakong bigaon, sa unsang paagi ang mga buhat sa paghukom sa Diyos taposon dayon?

¹⁷ Ang mga buhat sa paghukom sa Diyos taposon dayon sa dihang ang “Hari sa mga hari ug ang Ginoo sa mga ginoo,” si Kristo Jesus, motamak sa “pigsanan sa bino sa mabangis nga kapungot sa Diyos nga Makagagahom” sa Armageddon. Didto iyang laglagon ang daotang mga magmamando ug ubang mga nanghibilin sa organisasyon ni Satanas sa yuta. Kaonon sa manunukob nga mga langgam ang ilang patayng mga lawas. (Pinadayag 16:14, 16; 19:11-21) Pagkamalipayon nato nga haduol na ang tinudlong panahon sa Diyos sa pagpapha diha sa atong matahom nga yuta sa tanang butang nga dili-balaan, mahugaw, ug makadunot!

18. Unsa ang dakong kinatayoktokan sa basahon sa Pinadayag?

¹⁸ Mao ba kana ang kinatayoktokan sa basahon sa Pinadayag? Dili, dili pa! Kay inigkatapos sa pagbanhaw sa tanang 144,000 ngadto sa langit, ang kasal sa Kordero himoon. Ang iyang “pangasaw-onon,” nga gidayandayanan alang sa iyang pamanhonon, palingkoron sa trono diha sa “usa ka bag-ong langit,” ug gikan didto siya manaog, sa mahulagwayon, ingong katabang sa iyang Pamanhonon sa pagpatuman sa katuyoan ni Jehova sa ‘pagbag-o sa tanang butang.’ Ang espirituwal nga katahom sa pangasaw-onon mao ang balaang siyudad, ang Bag-ong Jerusalem, diin si Jehova nga Diyos nga Labing Makagagahom modan-ag sa iyang himaya, ug ang Kordero mao ang iyang suga. (Pinadayag 21:1-5, 9-11, 23) Busa dinhi ang Pinadayag modangat sa iyang dakong kinatayoktokan, uban sa napabalaan nga ngalan ni Jehova ug sa Kordero, si Kristo Jesus, apil sa iyang pangasaw-onon, ang Bag-ong Jerusalem, nga mopadayon sa pagpanalangin sa matinumanong katawhan ug kinabuhing dayon diha sa Paraiso sa yuta.

19. (a) Gawas sa paggula gikan sa Dakong Babilonya, unsa pa ang hinungdanon alang sa kaluwasan? (b) Unsang dinaliang imbitasyon ang bukas gihapon, ug unsa ang angay natong buhaton?

¹⁹ Ikaw ba nakamata sa pagkalimbongan sa bakak nga relihiyon ug nakagula sa Dakong Babilonya? Ug ikaw ba nakahimog dugang lakang sa pagdangop kang Jehova nga Diyos, pinaagi kang Kristo Jesus, diha sa bug-os nga pagpahinungod nga motultol sa bawtismo? Kini usab hinungdanon alang sa kaluwasan! Sanglit ang tinudlong panahon ni Jehova sa pagpakanaog sa kataposang paghukom duol na, ang panapit gipalanog uban ang maawhagong pagkadinalian: “Ang espiritu ug ang pangasaw-onon nagaingon: ‘Umari ka!’” Hinaot nga ang tanang namati niana nga panawag magpahinungod sa ilang mga kinabuhi kang Jehova ug magmadasigon sa pag-ingon “Umari ka!” ngadto sa uban. Oo, “ang giuhaw paaria; ang may tinguha paimna sa walay bayad nga tubig.” (Pinadayag 22:17) Ang imbitasyon bukas gihapon. Malipay ka gayod kon mobarog ka ug magpabilin niana nga baroganan sa atubangan sa trono sa Diyos ug sa Kordero ingong usa sa dedikado, bawtismadong katawhan ni Jehova. Ang tinudlong panahon duol na kaayo kay sa imong gihunahuna! Oo, ang dakong kinatayoktokan sa Pinadayag duol na!

Ingong panapos sa Pagtuon sa Bantayanang Torre karong semanaha, ipabasa sa tagdumala sa pagtuon ang mosunod nga Resolusyon ug soblia kini uban sa tabang sa mga pangutana nga gihatag. Mao kini ang Resolusyon nga gipresentar sa tibuok-kalibotan diha sa “Balaang Hustisya” Distritong Kombensiyon sa mga Saksi ni Jehova sa 1988, diha sa kataposan sa pakigpulong “Ang Daotag-Dungog nga ‘Bigaon’​—Iyang Pagkapukan ug Kalaglagan.”

[Mga Footnote]

[Kahon sa panid 11]

ANG PAGPAKAHILOM SA PAPA

Diha sa iyang librong Franz von Papen—His Life and Times, gipatik sa 1939, gibatbat ni H. W. Blood-Ryan nga detalyado ang mga intriga diin gihatod niadtong maong kabalyero sa papa si Hitler sa gahom ug maoy naghikay sa konkordat sa Batikano uban sa mga Nazi. Maylabot sa makalilisang nga mga pamatay, diin apil ang mga Hudiyo, mga Saksi ni Jehova, ug ang uban, ang awtor miingon: “Nganong si Pacelli [Papa Pio XII] nagpakahilom? Tungod kay diha sa plano ni von Papen alang sa usa ka Balaang Imperyong Romanhon sa Kasadpang mga Aleman iyang nakita sa umaabot ang mas lig-ong Katolikong Iglesya, uban ang Batikano nga mabalikan sa lingkoran sa kalibotanong gahom . . . Kanang mao gihapong Pacelli karon may gahom sa espirituwal nga pagkadiktador ibabaw sa milyonmilyong mga kalag, apan wala gayoy timik ang gibangon bahin sa gihimo ni Hitler nga pag-atake ug paglutos. . . . Samtang gisulat ko kining mga pulonga, tulo ka adlaw sa pagpamatay ang milabay na ug wala gayoy pag-ampo ang miabot gikan sa Batikano alang sa mga kalag sa mga magsasangka, diin katunga kanila mga Katoliko. Makalilisang unya ang panudya sa dihang kining mga tawhana, mahukasan sa tanan nilang yutan-ong mga impluwensiya, moatubang sa ilang Diyos, Si kinsa maningil. Unsay ilang ipangatarongan? Wala!”

[Kahon sa panid 15]

NALANGKIT ANG BATIKANO

Ang The New York Times sa Marso 6, 1988, mitaho nga naglaom ang Batikano ug dakong depisit nga $61.8 milyones sa badyet alang sa tuig 1988. Ang mantalaan miingon: “Ang usa ka puhonan nga gigasto tingali nalangkit sa saad nga gihimo sa 1984 nga hatagan ug hapit $250 milyones ang mga nagpautang sa Banco Ambrosiano. Tuman nga nalangkit ang Batikano sa bangko sa Milan sa wala pa kini mahapay niadtong 1982.” Tuman nga nalangkit niining iskandaloha, ang Batikano midumili sa pagtugyan ngadto sa mga awtoridad sa tulo ka dagkog ranggong mga opisyal sa Batikano, apil sa usa ka Amerikanong orsobispo, aron sa pag-atubang ug husay sa hukmanang Italyano!

[Mga hulagway sa panid 12]

Ang Batikano nakaambit sa makalilisang nga pagkasad-an sa dugo uban kang von Papen ug Hitler

[Mga Kapsiyon]

UPI/Bettmann Newsphotos

UPI/Bettmann Newsphotos

[Mga hulagway sa panid 15]

Imbes ipasiugda ang Gingharian sa Diyos, gideklarar sa mga papa ang HK nga mao ‘ang kataposang paglaom sa kalinaw’

[Kapsiyon]

Mga sinal-ot: UN photos