Kapitulo 4
Walay Kasegurohang “Babilonya” Hinukman sa Kalaglagan
KAGUBOT nagtimaan sa kalibotan karon—sa politikal, sosyal, ug relihiyosong paagi. Ang Ingles nga hubad sa Hebreohanong pulong sa Bibliya alang sa kagubot mao ang “babilonya.” Sa Genesis, gihisgotan ang Babilonya ingong Babel, usa ka ngalang nagkahulogang “kagubot.” Ang siyudad nga aduna nianang ngalana gitukod ni Nimrod, usa ka rebelde batok kang Jehova. (Genesis 10:8-10) Didto, ang mga tawo nga gipangunahan sa ambisyosong Nimrod misugod sa pagtukod ug torre nga mipataas sa langit sa paghagit kang Jehova. Gipildi ni Jehova kining nagapasipala sa Diyos nga proyekto pinaagi sa paglahugay kun paggubot sa usa rang pinulongan sa mga magtutukod, aron dili sila makasabot sa usag usa samtang nagtrabaho.—Genesis 11:1-9.
2 Midagan ang mga katuigan tapos niadto, usa ka bag-ong siyudad nga nagdala sa ngalang Babilonya girekord nga naglungtad didto sa Suba sa Euprates. (2 Hari 17:24; 1 Corinto 9:1) Sa 539 W.K.P. napildi ang Babilonyanhong Gahom sa Kalibotan ni Siro nga Bantogan, sa imperador sa Medo-Persia, sa katumanan sa tagna ni Jehova diha sa Isaias 45:1-6. Bisan pag nag-antos ang Babilonya ug dakong kapildihan, gitugotan kini sa paglungtad ingong siyudad. Gitaho kini nga naglungtad bisan sa ulahing katungang bahin sa unang siglo sa atong Komung Panahon. (1 Pedro 5:13) Apan, kanang karaang siyudad, dili mao ang “Babilonyang Bantogan,” nga maoy gihisgotan sa sulat ni apostol Juan diha sa basahon sa Pinadayag kapitulo 17.
3 Ang “Babilonyang Bantogan” sa apokalipsis, gilarawan ingong daotang babaye nga nagkabayo sa “mapulag kolor nga mapintas nga mananap,” nga nagbarog alang sa kalibotang imperyo sa bakak nga relihiyon, lakip sa tanang mga relihiyon sa gitawag nga Kakristiyanohan.a (Pinadayag 17:3-5) Sumala sa gipamulong ni apostol Juan mahitungod kaniya, kining simbolikong organisasyon nakahimog espirituwal nga pakighilawas uban sa tanang politikal nga mga magmamando sa yuta. Ang kalibotang imperyo sa bakak nga relihiyon, ang Babilonyang Bantogan, may dako gihapong impluwensiya.
“Higala sa Kalibotan”—Dili sa Diyos
4 Apan, ang posisyon sa Babilonyang Bantogan walay kasegurohan, ug mao kanay iyang kahimtang sukad sa kataposan sa Gubat sa Kalibotan I. Nianang gubata, siya nakadugang sa iyang mga krimen batok sa tawhanong banay. Ang mga klero sa Kakristiyanohan, nga nag-angkong mga sumusunod ni Jesu-Kristo, nangagda sa mga batan-ong lalaki ngadto sa mga panggubatan. Ang kanhing Si Harry Emerson Fosdick, usa ka iladong klero sa Protestante, mipaluyo sa paningkamot sa gubat apan sa ulahi miadmiter: “Bisan diha sa atong mga simbahan kita nagbutang ug mga bandera sa gubat . . . Sa usa ka bahin sa atong baba atong gidayeg ang Prinsipe sa Pakigdait ug sa pikas bahin atong gihimaya ang gubat.” Ang mga pari ug ubang mga klero sa Kakristiyanohan miampo alang sa mga sundalo diha sa relihiyosong mga tigom, ug sila nag-alagad ingong mga kapilyan sa army, navy, ug sa air force.b
5 Ang Kakristiyanohan, ilalom sa pagtultol niining relihiyosong mga lider, wala mamati sa mga pulong sa Santiago 4:4: “Mga mananapaw, wala ba kamo masayod nga ang pakighigala sa kalibotan maoy pakig-away batok sa Diyos? Busa, bisan kinsa nga buot makighigala sa kalibotan magahimo sa iyang kaugalingon nga kaaway sa Diyos.” Busa ang Kakristiyanohan nagpadayon nga kaaway sa Labing Hataas nga Diyos hangtod karon. Sa matin-aw siya walay panalipod sa Diyos, ug tungod niining hinungdanong katarongan ang iyang paglungtad nagpabiling walay kasegurohan. Ang iyang politikal nga mga higala dili kasaligan, ug ang baha sa batok-relihiyosong direksiyon nagakalig-on. Dili alang kaniya nga ang Diyos nag-ingon: “Ayaw ninyo hilabti ang akong mga dinihogan.”—1 Cronicas 16:22.
“Gumula Kamo Kaniya, Katawhan Ko”
6 Ngadto niining mga dinihogan ug sa ilang mga kauban sa panahon sa konklusyon sa sistema sa mga butang, nga milanog ang panawag sa Diyos: “Gumula kamo kaniya, katawhan ko, kon dili kamo buot makaapil sa iyang kasal-anan.” (Pinadayag 18:4) Oo, gumula sa kalibotang imperyo sa bakak nga relihiyon, ang Babilonyang Bantogan.
7 Kining panawaga nagpalanog sa mga pulong ni Jeremias 50:8 ug 51:6, 45, nga gipunting ngadto sa nanghibilin sa mga Hudiyo nga gihukman ni Jehova sa paggugol ug 70 ka tuig sa pagkadinakpan ug pagkadiyestero sa yuta sa Babilonya. Kadtong mga pulonga aplikado ngadto sa mga Hudiyo nga nag-antos sa Babilonya sa 537 W.K.P., tapos nga ang gitagnang pagmartsa ni Siro nga Bantogan uban sa iyang Medo-Persianhong mga kasundalohan sa nagkahubas nga Suba sa Euprates ug ngadto sa siyudad sa Babilonya.
8 Sa unang tuig sa iyang paghari, si Siro nga Bantogan milihok sa katumanan sa tagna diha sa Isaias 45:1-6. Sa susama, ang usa nga gilandongan ni Imperador Siro, apan mas gamhanan, si Jesu-Kristo, milihok sumala niining matagnaong hulad sa mga butang. Nahitabo kini sa tinudlong panahon tapos nga misulod siya diha sa iyang harianong pagmando sa langit sa tuong kamot ni Jehova nga Diyos, dihang “ang tinudlong panahon sa kanasoran” natapos sa Oktubre 1914-18. (Lucas 21:24) Sa panahon sa unang gubat sa kalibotan sa 1914-18, ang nanghibilin sa espirituwal nga mga Israelitas nakaeksperyensiya sa pagkahimong dinakpan sa mga kamot sa Babilonyang Bantogan ug sa iyang politikal nga mga hinigugma.
9 Pananglitan, sa Tinipong Bansa ang labing ulahing libro nga gipatik sa Watch Tower Society niadtong panahona, ang The Finished Mystery, gibando tungod kay panghulhog daw kini batok sa kagamhanan. Ang duha ka magsusulat sa libro giakusar sa hukmanang pederal sa Brooklyn, New York, ug dili-makataronganong gisentensiyahag 20 ka tuig sa pagkabilanggo sa bilanggoang pederal sa Atlanta, Georgia. Maingon man ang presidente sa magpapatik nga sosyedad, ang sekretaryo-tresurero, ug ang tulo pa ka membro sa hedkuwarter. Ang kaubang maghuhubad gisentensiyahan ug katunga nianang panahona sa bilanggoang pederal.
10 Ug busa sa Hulyo 4, 1918, kining walo ka dedikadong mga Kristohanon gipasakay sa tren paingon sa Atlanta, Georgia, aron bilanggoon didto. Ang mga membro sa hedkuwarter sa Watch Tower Society sa Brooklyn niadto maoy miatiman sa mga butang sumala sa ilang naarangan. Kinsa ang mabasol niining kahimtanga? Ang librong Preachers Present Arms mitubag: “Sa pagtimbangtimbang niining kasoha motultol sa konklusyon nga ang mga iglesya ug ang klero sa sinugdan mao ang nagpaluyo sa kalihokan sa pagwagtang sa Russellites [mga Saksi]. . . . Dihang ang balita sa kawhaan ka tuig nga sentensiya miabot sa mga editor sa relihiyosong mga prensa, halos ang tanan niining mga publikasyona, dagko ug gagmay, nalipay sa hitabo. Wala gayod akoy nakitang pulong sa simpatiya diha sa tanang mga basahon sa ortodoksong relihiyon.”—Ray H. Abrams, panid 183, 184.
Usa ka Kapukanan—Apan Dili Ngadto sa Kalaglagan
11 Apan wala magdugay ang kalipay sa Babilonyang Bantogan. Sa tingpamulak sa 1919, nag-antos ang Babilonyang Bantogan ug makahuloganong pagkapukan, nga tapos niini adunay moabot nga mga hitabo sa relihiyon sa dili pa siya bug-os nga malaglag. Naghunahuna ang Babilonyang Bantogan sa pag-ipit sa mga katawhan ni Jehova ug diha sa pagkahimong dinakpan sa walay kataposan. Apan sa Marso sa 1919 gipugos sa pagbukas ang ganghaan sa bilanggoan alang sa walo ka hawas sa Watch Tower Society, ug sila migula nga gipiyansahan. Sa ulahi, bug-os nga gisibog ang tanang mga sumbong batok kanila.
12 Nawagtang na karon ang kalipay sa Babilonyang Bantogan! Nag-ingon ang librong Preachers Present Arms mahitungod sa desisyon sa hukmanan sa pagpagawas sa mga Saksi: “Walay timik ang mga iglesya sa desisyon.” Apan dako kaayo ang kalipay sa katawhan ni Jehova. Ang ilang tibuok-kalibotang organisasyon giayo. Diha sa ilang kombensiyon sa 1919 sa Cedar Point Ohio, napukaw sa paglihok sa presidente sa Sosyedad ang libolibong tumatambong sa iyang pakigpulong “Ipahayag ang Gingharian.” Ang mga Saksi ni Jehova libre na usab, maisogong nagawali sa Gingharian sa Diyos diha sa katilingban! Ang Babilonyang Bantogan nag-antos sa pagkapukan, apan dili ngadto sa kalaglagan. Gipildi siya sa Dakong Siro, si Jesu-Kristo, ug mihatag kagawasan sa iyang matinumanong mga sumusunod.
13 Busa ang Babilonyang Bantogan gitugotang maluwas human sa gubat. Dihang giplano ang Liga sa Kanasoran ingong lawas sa pagtipig sa kalinaw, ang Federal Council of the Churches of Christ sa Amerika mipaluyo niadto, mipahayag sa katilingban nga ang Liga sa Kanasoran mao “ang politikal nga kapahayagan sa Gingharian sa Diyos sa yuta.” Dihang natukod sa kataposan ang giplanong Liga sa Kanasoran, mikabayo ang Babilonyang Bantogan niini ug busa misugod sa iyang pagsakay niining simbolikong “mapulag kolor nga mapintas nga mananap.”—Pinadayag 17:3.
14 Dihang kining dili-epektibong ahensiya sa pagtipig sa kalinaw nahulog sa bung-aw sa pagkawalay kalihokan sa pagbuto sa Gubat sa Kalibotan II, nawad-an ang Babilonyang Bantogan ug kasakyan. (Pinadayag 17:8) Apan didto siya uban sa 57 ka nasod nga okupado sa Gubat sa Kalibotan II. Ang iyang nabahing pagkamaunongon taliwala sa naggubatayng mga pundok wala makapabalaka kaniya, sama nga wala usab siya mabalaka sa iyang pagkabahinbahin ngadto sa daghang ginatos ka makalibog nga mga sekta sa relihiyon ug mga denominasyon. Dihang ang hinimog-tawo nga ahensiya sa pagtipig sa kalinaw, diha sa porma sa Hiniusang Kanasoran, nga migula gikan sa bung-aw sa pagkawalay kalihokan sa naghinapos ang Gubat sa Kalibotan II, ang Babilonyang Bantogan mikabayo dayon ug misugod sa iyang pag-impluwensiya ibabaw niana.
Politikal nga mga Gahom Mobali Batok sa Babilonya
15 Ang tibuok kalibotan sa katawhan hapit na karong moatubang ug makapukawg katingalang talan-awon. Mahitabo kini dihang mobali ang politikal nga mga gahom batok sa Babilonyang Bantogan, nga may tumong sa pagpapha kaniya gikan sa iyang paglungtad. Daw makapalisang kini sa kasingkasing sa mga tawong sinserong nagtuo nga maayo ang tanang relihiyon. Apan ang Soberano sa Uniberso, si Jehova nga Diyos, nakahukom na nga walay dapit ang Babilonyang Bantogan sa tibuok uniberso ug nga siya nakamansa sa dugay nang panahon sa sakop sa kalalangan. Siya kinahanglan sa mapintason bug-os nga laglagon.
16 Aduna nay gamhanang mga ahensiya nga tugotan sa Diyos sa pagpakanaog sa iyang kalaglagan, nga mao, ang politikal nga mga elemento sa kalibotan. Ang dinasig sa Diyos nga basahon sa Pinadayag nagtagna nga ipahinabo ni Jehova nga mobali batok kaniya ang iyang mga hinigugma, ug pagahuboan siya, iladlad kon unsa gayod siya—usa ka giyawaang limbongan! Ug dayon sila, sa ato pa, magasunog kaniya pinaagi sa kalayo ug himoon siya nga usa ka dapog sa mga abo. Makadawat siyag pagtagad sama sa iyang gihimo ngadto sa walay pagkompromisong mga magsisimba sa tinuod nga Diyos.—Pinadayag 17:15-18; 18:24.
17 Kining mapintas batok-relihiyosong aksiyon sa bahin sa politikal nga mga gahom wala magkahulogan nga sila human niana modangop sa pagsimba kang Jehova nga Diyos. Ang ilang mapintas batok-Babilonyang aksiyon wala magkahulogan nga sila karon mahimong mga higala sa Diyos. Kay kon mao pa dili unta nila buhaton ang ulahing aksiyon sumala sa gipakita sa basahon sa Pinadayag nga maoy ilang himoon. (Pinadayag 17:12-14) Hayan ikalipay nilag dako ang batok-relihiyosong mga kahimoan nga niini gitugotan sila ni Jehova sa pagbuhat, apan padayong gipahisalaag sila sa “diyos niini nga sistema sa mga butang,” si Satanas nga Yawa, ang bug-os, dili molungang magsusupak ni Jehova nga Diyos.—2 Corinto 4:4.
18 Ang Babilonyang Bantogan dili mabuhi sa pagkakita sa dakong kinatayoktokan, ang kabayawan sa unibersal nga pagkasoberano ni Jehova pinaagi sa “Prinsipe sa Pakigdait,” nga karon mao ang “Makagagahom nga Diyos” diha sa tuong kamot sa Usa nga Labing Makagagahom ug Supremong Diyos, si Jehova.—Isaias 9:6.
19 Sa laing bahin, ilalom sa malig-ong panalipod sa Diyos, mao ang mga saksi ni Jehova. (Isaias 43:10, 12) Ilalom sa pagmando gikan sa matarong nga kalangitan, sila sa masugtanon migawas sa Babilonyang Bantogan. (Pinadayag 18:4) Ang ilang matarong nga kalipay dili-hitupngan sa ila unyang masaksihan. Sila tapos niana mahimong mga saksi ni Jehova sa walay kataposan maylabot sa iyang kabayawan ibabaw sa Babilonyang Bantogan.—Pinadayag 19:1-3.
a Alang sa detalyadong impormasyon, tan-awa ang librong “Babylon the Great Has Fallen!” God’s Kingdom Rules!, panid 468-500, gipatik sa Watchtower Bible and Tract Society of New York Inc.
b Usa ka detalyadong diskusyon mahitungod sa pagpaluyo sa mga klero sa Gubat sa Kalibotan I gipadayag diha sa librong Preachers Present Arms, ni Ray H. Abrams (New York, 1933). Ang libro nag-ingon: “Ang mga klerigo mihatag sa gubat ug mainiton espirituwal nga kahulogan ug panukmod. . . . Ang gubat mismo maoy balaang gubat aron sa pagtuboy sa Gingharian sa Diyos dinhi sa yuta. Ang paghalad sa kinabuhi alang sa iyang nasod maoy paghalad niini alang sa Diyos ug sa Iyang Gingharian. Ang Diyos ug nasod nahimong managsama. . . . Ang mga Aleman ug ang mga Allies managsama niining bahina. Ang matag kiliran nagtuo nga midapig kanila ang Diyos . . . Ang kadaghanang mga teologo wala maglisod sa pagbutang kang Jesus diha mismo sa pangunahan sa baga nga panaggubat nga nangulo sa iyang mga kasundalohan ngadto sa kadaogan. . . . Busa ang iglesya nahimong bahin sa sistema sa gubat. . . . Ang mga lider sa [iglesya] wala mag-usik ug panahon sa bug-os nga pag-organisar binase sa panahon sa gubat. Sulod sa kawhaan ug upat ka oras tapos nga gideklarar ang gubat, ang Federal Council of the Churches of Christ sa Amerika mihimog mga plano sa bug-os nga kooperasyon. . . . . Daghan sa mga iglesya mihimog sobra kay sa gihangyo diha kanila. Sila nahimong mga estasyonan sa pagreklutag mga sundalo.”—Panid 53, 57, 59, 63, 74, 80, 82.
[Mga Pangutana nga Pagatun-an]
1. (a) Unsay kahulogan sa pulong “babilonya,” ug kinsa ang nagtukod sa siyudad nga nagdala nianang ngalana? (b) Unsang proyekto sa pagtukod ang gihimo sa ambisyosong si Nimrod, ug unsay resulta?
2. (a) Unsay nahitabo sa gahom sa kalibotan nga Babilonya sa 539 W.K.P., ug kadto ba nahimong kataposan sa siyudad nga nagdala nianang ngalana? (b) Unsa ang wala mapamatud-i sa karaang siyudad sa Babilonya?
3. Unsa ang tinuod nga ilhanan sa Babilonyang Bantogan?
4. Sa panahon sa Gubat sa Kalibotan I, sa unsang paagi nakadugang ang Babilonyang Bantogan sa iyang mga krimen batok sa tawhanong banay?
5. (a) Unsang mga pulong sa Santiago 4:4 nga wala sunda sa Kakristiyanohan? (b) Unsa ang paghukom sa Diyos batok kaniya?
6, 7. (a) Unsang dinalian nga panawag ang gipalanog diha sa Pinadayag 18:4, ug ngadto kang kinsa kini gipunting? (b) Kanus-a ang mas sayo apan samang panawag nagsugod sa pag-aplikar diha sa mga nag-antos sa karaang Babilonya?
8. (a) Sa unsang paagi natuman ni Siro nga Bantogan ang Isaias 45:1-6? (b) Nganong ang usa nga gilandongan ni Siro nga Bantogan kinahanglang molihok sumala niining matagnaong hulad sa mga butang?
9, 10. (a) Unsang aksiyon ang gihimo batok sa walo ka membro sa hedkuwarter sa Sosyedad? (b) Unsay ebidensiya nga ang Babilonyang Bantogan mao ang nagpaluyo sa kalihokan sa pagpahunong sa buluhaton sa katawhan ni Jehova?
11, 12. (a) Unsay giplanong buhaton sa Babilonyang Bantogan? (b) Sa unsang paagi nag-antos siya ug makahuloganong pagkahulog, bisan ug dili ngadto sa kalaglagan? (c) Unsay epekto niini diha sa nakagawas nga katawhan ni Jehova?
13. Dihang mitungha sa talan-awon ang Liga sa Kanasoran, unsay gihimo sa Babilonyang Bantogan?
14. (a) Sa panahon sa Gubat sa Kalibotan II, unsay gihimo sa Babilonyang Bantogan? (b) Dihang ang hinimog-tawo nga ahensiya sa pagtipig sa kalinaw migawas sa bung-aw tapos sa Gubat sa Kalibotan II, unsay gihimo sa Babilonyang Bantogan?
15, 16. (a) Unsang talan-awon nga makapukawg katingala ang atubangon karon sa katawhan? (b) Desidido sa pagbuhat ug unsa ang Labing Makagagahom nga Diyos, sumala sa Pinadayag 17:15-18.
17. Ang batok-Babilonyanhong mga kahimoan sa politikal nga mga gahom mopadangop ba kanila sa pagsimba kang Jehova nga Diyos, ug sa unsang paagi nahibalo kita?
18, 19. (a) Kinsa ang dili-maluwas sa pagkakita sa kabayawan sa pagkasoberano ni Jehova sa uniberso pinaagi sa “Prinsipe sa Pakigdait”? (b) Apan kinsa ang walay kataposang mga saksi sa kabayawan ni Jehova ibabaw sa Babilonyang Bantogan?