Ang Dakong Babilonya Gihusay

DIHA sa nagkalainlaing mga kombensiyon sa tibuok kalibotan sa 1988-99, minilyon sa mga Saksi ni Jehova miendorsar ug resolusyon nga nagpahayag sa ilang kasilag sa kagawian sa Dakong Babilonya, ang kalibotanong imperyo sa bakak nga relihiyon​—ilabina sa gihawasan sa Kakristiyanohan. Ang ubang sinserong mga tawo tingali mangutana, Dili ba hingapin ra kana nga baroganan? Dili, dili gayod! Sa dihang atong makita kon unsa ka prangka nga gisaway sa mga propeta sa karaang Israel ang pagsimbag diyosdiyos sa ilang adlaw ug sa masakit nga pinulongan giladlad ni Jesus ang relihiyosong pagkasalingkapaw sa iyang panahon, kami ingong mga Saksi ni Jehova nagtuo nga kining maong baroganan bug-os makataronganon. Kini gisugo pa gayod sa Diyos.​—Isaias 24:1-6; Jeremias 7:16-20; Mateo 23:9-13, 27, 28, 37-39.

Busa unsang basehanan nga atong kasilagan ang paggawi sa Dakong Babilonya? Unsang historikal nga ebidensiya ang atong nabatonan sa kapakyasan sa relihiyon sa pagpasidungog sa matuod Soberanong Ginoo sa uniberso, si Jehova?

Ang Modernong Babilonya Nagdumot sa Ngalan

Ang Soberanong Ginoo sa uniberso dili kay walay ngalan. Iyang gipaila ang iyang kaugalingon duolan sa 7,000 ka besis diha sa Bibliya ingong Jehova. Iyang gipakahamili ang iyang ngalan. Ang ikatulo sa Napulo ka Sugo nag-ingon: “Dili mo pagagamiton ang ngalan ni Jehova nga imong Diyos sa pasipala, kay si Jehova dili mag-isip nga walay sala niadtong nagagamit sa iyang ngalan sa pasipala.” Ug gipasiugda ni Jesus ang ngalan sa iyang Amahan diha sa Pag-ampo sa Ginoo, nga nag-ingon, “Balaana ang imong ngalan.”​—Exodo 20:7; Mateo 6:9.

Ang rekord sa Kakristiyanohan sa pagpasidungog sa ngalan sa Diyos makapasubo. Bisan ang King James Bible sa 1611 migamit sa ngalang Jehova, nga nag-inusara ug sa kombinasyon, pito lamang ka besis.a Ang ubang mga hubad bug-os nga nagwala sa ngalan. Ang kadaghanang mga relihiyon napakyas sa pagpasidungog niana. Hinunoa, ilang gituboy ang ilang “santisima” Trinidad ug, sa daghang kaso, si Maria ang gitawag nga Inahan sa Diyos nga labaw sa Diyos sa Bibliya. Ang hamiling ngalan ni Jehova gipasagdan nga mawala tungod sa pagkawalay gamit.b

Sa pagkadalayegon, giila sa Islam ang usa ka Diyos, kinsa ilang gitawag Allah, sumala sa ilang balaang libro, ang Koran. Apan, wala gamita nila ang iyang ngalan, nga Jehova, sumala sa unang gipadayag diha sa Bibliya labing menos duha ka libo ka tuig sa wala pa motungha ang Koran. Ang mga Hindu nagsimbag milyonmilyong mga diyos ug mga diyosa, apan wala maapil si Jehova kanila.

Ang talagsaong tagsala maylabot sa ngalan sa Diyos mao ang Judaismo. Sulod sa libolibong katuigan, ang mga Hudiyo nag-angkon nga mao ang katawhan nga gitawag sa ngalan sa Diyos, ug tungod sa ilang tradisyon, ilang gipahinabo nga dili na gayod gamiton pa ang ngalan sa Diyos.

Busa, ingong mga saksi sa Soberano Ginoong Jehova, kinahanglang atong ipahayag ang atong kayugot sa pagsalikway sa Dakong Babilonya sa balaang ngalan sa Diyos.

Nganong Among Gikasilagan ang Babilonyanhong mga Doktrina

Milyonmilyon sa mga tawo gigamit ug gihadlok tungod sa Babilonyanhong mga doktrina nga ang tawo dunay dili-mamatay nga kalag. Sukad pa sa karaang panahon, gigamit sa bakak nga relihiyon ang kahadlok nga sakiton ang kalag sa walay kataposan diha sa impiyernong-kalayo inigkamatay. Ang labi pang malalangong pagpino niana nga doktrina mao ang temporaryong pag-antos diha sa mga kalayo sa purgatoryo. Ang sinserong mga tawo mobayad sa mga Misa alang sa patay apan wala gayod mahibalo kon kanus-a nga dili na kinahanglang magabayad pa! Kining mapasipalahong mga doktrina walay basehanan diha sa Bibliya.​—Itandi ang Jeremias 7:31.

Sa pagkamatuod, ang Bibliya nagtudlo nga ang tawo maoy buhi, mamatay nga kalag. Tungod sa iyang pagsupak si Adan wala hukmi sa impiyernong-kalayo o purgatoryo kondili sa kamatayon. Sa yanong pagkasulti, “ang bayad sa sala mao ang kamatayon.” (Roma 6:23; Genesis 2:7, 17; 3:19) Ang Kasulatanhong paglaom sa patay gipasukad, dili sa usa ka dili-mamatay nga kalag, kondili, hinunoa, sa saad sa Diyos sa usa ka pagkabanhaw sa hingpit nga kinabuhi diha sa paraiso sa yuta.​—Juan 5:28, 29; Pinadayag 21:1-4.

Lain pang Babilonyanhong doktrina mao ang “santisima” Trindiad. Kining doktrina sa tulo ka persona sa usa ka Diyos dili gayod bahin sa pagtuo sa karaang mga Hebreohanon. (Deuteronomio 5:6, 7; 6:4) Usa ka Hudiyo mismo, si Jesus wala gayod magtuo o nagtudlo nga siya mao ang Diyos nga labing makagagahom. Siya wala moangkon nga bahin sa tulo ka persona diha sa usa ka Diyos sumala sa gitudlo sa Babilonyanhong doktrina o pagtuo.​—Marcos 12:29; 13:32; Juan 5:19, 30; 14:28; 20:17.

Busa, atong gisalikway ang mapasipalahong mga doktrina sa Babilonya sumala sa gitudlo diha sa bakak nga relihiyon sa kalibotan. Atong gihatag ang atong pagsimba diha sa usa ka matuod nga Diyos, si Jehova, pinaagi sa iyang Anak, kinsa nahimong “halad-pasighiuli” alang sa mga sala dili lamang sa dinihogang mga Kristohanon kondili sa tibuok kalibotan sa katawhan.​—1 Juan 2:2.

Kon Nganong Among Gisalikway ang Batok-Diyos nga mga Pilosopiya

Ang mga papa sa Kakristiyanohan ug mga klero nagbakho sa pagsulbong sa ateyismo, ug daghan migamit niini aron sa pagpakamatarong sa ilang pagsuportar sa right-wing nga politika. Bisan pa, ang pangutana kinahanglang ibangon: Kinsa ang nagpalabay sa mga inhustisya ug panagkadili-angay nga maoy nagpahinabo sa pagdaghan sa ateyismo, ilabina sa kataposang siglo? Kini nahitabo sa tagsaong paagi diha sa gingharian sa Kakristiyanohan. Pananglitan, ang Ortodoksong Iglesya sa Rusya nakigsangga sa mga imperador, si kinsa mapintasong nagdaogdaog sa katawhan. Ang kakulang sa matuod nga mga sukdanang Kristohanon sa kabahin niadtong nagpresentar sa ilang kaugalingon ingong mga hawas sa Diyos nakaamot sa mga kahimtang nga nahimong lugar nga kalamboan sa ateyismo.

Ang mga relihiyon sa Kakristiyanohan midawat usab sa nagapasipala sa Maglalalang nga doktrina sa ebolusyon. Ilang gipahinungod ang kakomplikado ug panaglainlain sa kapin sa usa ka milyong mga porma sa kinabuhi ngadto sa buta nga mga puwersa sa kinaiyahan. Busa, sila nag-ingon nga kining panaglainlain miugmad pinaagi sa sumpaysumpay mapuslanong mga kaw-it. Ang maong pilosopiya naghimo sa Diyos nga dili-kinahanglanon ug ang tawo dili manubag kang bisan kinsa. Ang mga etika nahimong personal nga kagustohan. (Salmo 14:1) Ang usa ka resulta mao nga ang mga paghulog sa gisabak karon midangat sa tinagpulo ka milyon sa usa ka tuig​—diha sa mga nasod nga nagaangkong relihiyoso!

Atong gisalikway ang nagabatok sa diyos nga mga pilosopiya ug mga buhat. Atong gisimba si Jehova, “ang Usa nga buhi hangtod sa kahangtoran, nga nagbuhat sa langit ug sa mga butang nga ania niini ug sa yuta ug sa mga butang nga ania niini ug sa dagat ug sa mga butang nga anaa niini.”​—Pinadayag 10:6; 19:6.

Kon Nganong Among Gikasilagan ang Bunga sa Dakong Babilonya

Ang Kakristiyanohan napakyas sa pagpamati sa mga balita sa pasidaan ngadto sa pito ka kongregasyon nga gipahayag diha sa Pinadayag kapitulo 2 ug 3. Kini nagtambag batok sa buhat sa sektaryanismo, pagsimbag mga diyosdiyos, ug pakighilawas, ug batok sa pagkadagaang ug pagpasagad.

Ang pagduaw halos sa tanang dapit sa pagsimba mopadayag kon sa unsang paagi gituboy sa relihiyosong mga tawo ang linalang labaw sa Maglalalang. Sa unsang paagi? Pinaagi sa ilang larawan ug mga rebulto sa pagsimba ug sa ilang pagsimba nga gihatag ngadto sa “mga santo,” sa mga Madonna, ug mga krus.​—Itandi ang Salmo 115:2-8; 2 Corinto 5:7; 1 Juan 5:21.

Diha kanila natuman ang mga pulong ni Pablo: “Kay, bisan sila nanagpakaila sa Diyos, wala nila pasidunggi siya ingon nga Diyos . . . Nangahimo hinoon silang mga buang ug ang himaya sa dili-mamatay nga Diyos giilisan nilag mga larawan nga sama sa larawan sa may kamatayon nga mga tawo ug mga langgam ug mga mananap nga upat ug tiil ug mga binuhat nga nagakamang.”​—Roma 1:21-23.

Kon Nganong Among Gikasilagan ang Imoralidad sa Babilonya

Ang kataposang 20 ka tuig nakakita sa homoseksuwalidad nga giuyonan ug gitugotan ingong kapiliang paagi sa kinabuhi. Milyonmilyong mga homoseksuwal “wala na magtagotago” ug karon nagaparada diha sa kadalanan, nagapasigarbo sa ilang “Garbo sa Pagkabayot.” Unsay paglantaw sa Diyos sa ilang homoseksuwalidad?

Ang Bibliya tin-awng nag-ingon hapit 3,500 ka tuig kanhi: “Dili ka maghigda tipon sa lalaki sama sa paghigda tipon sa babaye. Kini dulumtanan.” (Levitico 18:22) Ug halos 2,000 ka tuig kanhi si Pablo nagpakita nga ang mga sukdanan sa Diyos wala mausab sa dihang siya misulat: “Tungod niining maong hinungdan, gitugyan sila sa Diyos ngadto sa mga pangibog nga makauulaw, kay ang ilang mga kababayen-an nanag-usab sa kagamitan nga tiunay sa ilang pagkababaye nadto sa kagamitan nga supak sa kinaiya; ug sa mao usab nga paagi ang mga lalaki nanagbiya sa ilang tiunayng kalabotan ngadto sa babaye ug nangut-ot diha sa ilang pangibog alang sa usag usa, mga lalaki sa masigkalalaki nanag-unay sa pagbuhat sa makauulaw ug nanagpakaagom diha sa ilang kaugalingon sa balos nga angay sa ilang pagkadaotan.”​—Roma 1:26, 27; 1 Corinto 6:9, 10; 1 Timoteo 1:10.

Bisan pa, daghan kaayong mga klero sa Kakristiyanohan mga bayot nga sa ingon sila dunay gamhanang homoseksuwal nga impluwensiya diha sa daghan dagkong mga relihiyon. Sila namugos nga ang ilang paagi sa kinabuhi dawaton ug nga sila hatagan sa posisyon sa usa ka ministro. Ang kaso nga gihisgotan mao kanang sa labing dakong denominasyon sa Protestante sa Canada, sa United Church sa Canada, kang kinsang mga lider mibotar ug 205 sa 160 sa A

gosto 24, 1988, nga pabor sa pagdawat sa mga homoseksuwal diha sa ministeryo.

Kon Nganong Among Gikasilagan ang Espirituwal nga Pagpanapaw sa Babilonya

Gisaway sa Pinadayag ang pakighilawas sa Babilonya uban sa “mga hari sa yuta,” ang politikanhong mga magmamando niini. Ang bigaon gilarawan nga naglingkod, “sa ibabaw sa daghang katubigan,” nagkahulogan “mga katawhan ug mga panon ug kanasoran ug pinulongan.” (Pinadayag 17:1, 2, 15) Sanglit dunay maayong relasyon uban sa mga magmamando sa politika, ang bakak nga relihiyon sa daghang siglo sa bukas ug sa tago migamit sa impluwensiya niini sa pagpiog ug sa pagpahimulos sa komung mga tawo.

Ang mga pananglitan sa pagkamamandoon niini mao ang mga konkordat, o mga kasabotan, nga gipirmahan sa Batikano uban sa Nazi ug Pasistang mga magmamando niining ika-20ng siglo. Ingong resulta, ang impluwensiya sa iglesya ibabaw sa mga panon mitultol sa bug-os nga pagpasakop ilalom sa mabangis nga mga magmamando. Sa 1929 ang Batikano naghimog usa ka konkordat uban sa Pasistang diktador si Benito Mussolini. Unsay misunod sa Alemanya? Ang Alemang kardinal si Faulhaber, nagpunting sa mosunod nga mga pulong ngadto kang Pio XI, mihatag katin-awan sa kaisipan sa papa bahin kang Hitler: “Ako nalipay; siya mao ang unang dakong tawo sa kagamhanan nga misulti batok sa Bolshevismo.” Si Faulhaber sa ulahi miingon: “Ang akong panaw ngadto sa Roma nagpamatuod sa akong giduhaduhaan nga dugay na kaayo. Sa Roma, ang Nasyonal nga Sosyalismo ug Pasismo giisip nga mao ang bugtong kaluwasan gikan sa Komunismo ug Bolshevismo.”

Ang Katolikong mga obispo sa Alemanya mibatok sa pilosopiya sa Nazi sa wala pa ang 1933. Apan sumala sa gipahayag sa Alemang awtor si Klaus Scholder diha sa iyang libro The Churches and the Third Reich, ang mga obispo gisugo sa embahador sa Batikano ngadto sa Alemanya, nga si Kardinal Pacelli, sa pag-usab sa ilang kaisipan bahin sa Nasyonal nga Sosyalismo. Unsay nakapukaw niini nga kausaban? Kadto mao ang gipaabot nga konkordat tali sa Third Reich ug sa Batikano, nga gitapos sa Hulyo 20, 1933.

Si Klaus Scholder mitaho: “Diha sa eleksiyon ug sa plebisito sa 12 sa Nobyembre [1933] giani ni Hitler ang mga bunga sa konkordat sa Reich pinaagi sa katingalahang hataas nga ‘oo’ nga mga botos, labaw sa tanan diha sa halos Katolikong mga sirkulo sa mga botante.”

Bisan pa dunay pipila ka lider sa Protestante nga mipahayag ug pagbatok sa pag-ilog sa Nazi sa 1933, ang ilang mga tingog sa ulahi nawala diha sa singgit ug nasyonalismo sa masa. Si Scholder misaysay: “Dihay dayag nga nagkadakong pagkaandam sa iglesyang Protestante sa pagtalikod sa panagana nga gihimo sa miagi ug karon sa kataposan nadakpan usab sa nasodnong kasibot. . . . Ang opisyal nga mga pamulong sa iglesya mitungha sa unang higayon nga nagasuportar sa bag-ong Reich sa walay pag-ukon-ukon.” Sa pagkamatuod, gibaligya sa Protestantismo ang iyang kaugalingon ngadto sa Nazi ug nahimong iyang sulogoon, sama sa gihimo sa Katolikong Iglesya.

Sa tibuok kasiglohan, ang rekord sa kasaysayan nagpakita, nga ang bakak nga relihiyon nakigsangga sa gamhanan hamiling mga grupong nagamando ug nagpadako sa ilang kadungganan sa kadaot sa komung mga tawo. Ang ‘kaisipan ni Kristo’ wala ipabanaag sa mga lider sa relihiyon, kinsa gutom nga nagapangitag gahom, katigayonan, ug bahandi. Ingong mga Saksi ni Jehova, among gikasilagan ang maong espirituwal nga pagpanapaw.​—Juan 17:16; Roma 15:5; Pinadayag 18:3.

Kon Nganong Among Gidumtan ang Pagkasad-an sa Dugo sa Babilonya

Diha sa libro sa Pinadayag, ang Dakong Babilonya giakusar nga dako ang pagkasad-an sa dugo: “Ug nakita ko ang babaye nga nahubog sa bino sa mga balaan ug sa dugo sa mga gipamatay nga mga saksi ni Jesus. Diha kaniya hingkaplagan ang dugo sa mga propeta ug mga balaan ug sa tanan nga gipamatay diha sa yuta.”​—Pinadayag 17:6; 18:24.

Ang kasaysayan sa bakak nga relihiyon maoy usa sa pagdumot ug pag-ulag-dugo, diin ang Kakristiyanohan mao ang labing pangunang sad-an sa dugo. Ang duha ka gubat sa kalibotan gisugdan diha sa gingharian sa gitawag nga Kristohanong mga nasod, ang “Kristohanon” nga mga lider sa politika midangop sa armas sa 1914 ug 1939, ug ang mga klero diha sa tanang nag-awayay nga mga nasod mihatag sa ilang panalangin. Ang The Columbia History of the World nag-ingon bahin sa Gubat sa Kalibotan I: “Ang kamatuoran walay-bili sama sa kinabuhi, wala gayoy tingog ang gibangon sa pagprotesta. Ang mga tigbantay sa pulong sa Diyos nanguna diha sa koro sa gubat. Ang bug-os nga gubat nagkahulogang bug-os nga pagdumot.” (Italiko amoa.) Ang mga kapilyan sa kasundalohan nagdasig sa ilang mga sundalo sa nasodnong pagmahal samtang ang mga batan-on sa duha ka kiliran nahimong mga bala sa kanyon. Ang mao gihapong libro sa kasaysayan nag-ingon: “Ang sistematikong paghilo sa mga hunahuna sa mga tawo pinaagi sa pagbati sa nasyonalismo . . . dugang nakababag sa pangpangitag pakigdait.”

Ang bakak nga relihiyon sa tibuok-kalibotan nagpadayon sa pagtisok ug pagdumot samtang ang mga away nagpadayon tali sa Hudiyo ug sa mga Muslim, Hindu ug Sikh, Katoliko ug Protestante, Muslim ug Hindu, Buddhista ug Hindu. Oo, ang bakak nga relihiyon padayon sa pag-amot sa pinatyanay “sa tanan nga gipamatay diha sa yuta.”​—Pinadayag 18:24.

Tungod sa tanang pamatuod nga gipadayag sa ibabaw, ang mga Saksi ni Jehova nagtuo nga ang resolusyon sa kombensiyon sa 1988 angay ug tukma sa panahon. Sumala sa angay, among gihukman ang bakak nga relihiyon nga mao ang bigaon nga sad-an sa dugo, ang Dakong Babilonya. Among gipahayag ngadto sa kalibotan ang bugtong matuod nga paagi sa pakigdait ug matuod nga pagsimba​—sa pagdangop sa Soberanong Ginoo sa uniberso, si Jehova nga Diyos, pinaagi sa Usa nga iyang gipadala sa yuta, ang Kristo, o Mesiyas, si Jesus. Kini nagkahulogan sa pagdawat sa Gingharian sa Diyos ingon nga matarong, walay kataposang kagamhanan nga mao lamang ang makatagbaw sa mga panginahanglan sa katawhan. Ug kini nagkahulogan usab nga karon na ang panahon sa pagsunod sa sugo: “Gumula kamo kaniya [Dakong Babilonya], katawhan ko, kon kamo dili buot makaapil sa iyang kasal-anan, ug kon kamo dili buot makadawat sa iyang mga hampak.”​—Pinadayag 18:4; Daniel 2:44; Juan 17:3.

[Mga Footnote]