KAHON SA IMPORMASYON 19A
Mga Suba sa mga Panalangin Gikan Kang Jehova
Matikdi ang pipila ka lainlaing teksto sa Bibliya nga naggamit sa mga pulong nga “suba” ug “tubig” sa pag-ilustrar sa mga panalangin nga nag-agos gikan kang Jehova. Dihang atong basahon kining tanan, kita madasig pag-ayo sa pagkahibalo kon sa unsang paagi si Jehova nagpanalangin nato. Ngano?
JOEL 3:18 Kini nga tagna nagpakitag tuboran nga nagbugwak gikan sa sangtuwaryo sa templo. Kini nag-agos aron tubigan ang uga nga “Walog sa Mga Kahoyng Akasya.” Busa si Joel ug Ezequiel nakakitag suba nga naghatag ug kinabuhi sa dapit nga way kinabuhi. Sa maong duha ka tagna, ang suba naggikan sa balay, o templo, ni Jehova.
ZACARIAS 14:8 Si propetang Zacarias nakakitag “tubig sa kinabuhi” nga nag-agos gikan sa siyudad sa Jerusalem. Ang katunga sa tubig nagpaingon sa sidlakang dagat, o Patayng Dagat, ug ang katunga nagpaingon sa kasadpang dagat, o Dagat Mediteranyo. Ang Jerusalem mao “ang siyudad sa gamhanang Hari,” si Jehova nga Diyos. (Mat. 5:35) Busa ang paghisgot ni Zacarias sa maong siyudad nagpahinumdom nato sa pagmando ni Jehova sa tibuok yuta sa umaabot nga mga panahon. Dugay na natong nasabtan nga ang mga tubig niini nga tagna nagpakita nga panalanginan ni Jehova sa Paraiso ang duha ka grupo sa matinumanong mga tawo, kadtong makalabang-buhi sa dakong kasakitan ug kadtong banhawon sa ulahi.
PINADAYAG 22:1, 2 Si apostol Juan nakakitag simbolikong suba nga parehas kaayo sa nakita ni Ezequiel. Pero kini naggikan, dili sa templo, kondili sa trono ni Jehova. Busa masabtan nato nga kini nga panan-awon, sama nianang kang Zacarias, nagpasiugda sa mga panalangin sa pagmando sa Diyos panahon sa Milenyo.
Siyempre, wala ra kaayoy kalainan ang mga panalangin gikan sa pagmando ni Jehova ug ang mga panalangin nga girepresentahan sa suba nga nakita ni Ezequiel sa panan-awon. Kining tanang panalangin naggikan kang Jehova ug nag-agos ngadto sa tanang matinumanong katawhan.
SALMO 46:4 Matikdi kon sa unsang paagi kining usa ka bersikulo lagmit naghisgot sa duha ka butang—pagsimba ug pagmando. Kini naghisgot bahin sa suba nga nakapalipay sa “siyudad sa Diyos,” nga lagmit nagtumong sa Gingharian ug sa pagmando, ug naghisgot sab ni sa “balaan nga dakong tabernakulo sa Labing Hataas,” nga lagmit nagtumong sa putling pagsimba.
Sa katibuk-an, kini nga mga bersikulo nagpasalig nato nga panalanginan ni Jehova ang matinumanong katawhan sa duha ka paagi. Makabenepisyo ta hangtod sa hangtod, una, gikan sa iyang pagmando ug, ikaduha, gikan sa iyang kahikayan sa putling pagsimba. Busa magmadeterminado ta karon nga padayong moinom sa “buhi nga tubig” nga gitagana ni Jehova nga Diyos ug sa iyang Anak—ang ilang mahigugmaong mga tagana aron makabaton tag kinabuhing walay kataposan!—Jer. 2:13; Juan 4:10.