Among mga Magbabasa Nangutana

Nganong ang mga Saksi ni Jehova Dili Mogamit ug mga Imahen sa Ilang Pagsimba?

Sa tibuok kalibotan, ang mga Hindu, Budhista, Katoliko, ug mga membro sa Ortodoksong Iglesya nagtuo nga ang paggamit ug mga idolo, imahen, o mga larawan maoy hinungdanong bahin sa pagsimba. Sa pipila ka dapit sa Aprika, ang mga tawo moyukbo sa mga kinulit nga kahoy o bato nga ilang gituohan nga usa ka diyos o gipuy-an sa espiritu sa diyos.

Sa kasukwahi, ang mga Saksi ni Jehova wala mogamit ug bisan unsang matang sa larawan o imahen sa ilang pagsimba. Kon moduaw ka sa ilang tigomanan nga gitawag ug mga Kingdom Hall, dili ka makakitag mga imahen sa “mga santos” o estatwa ni Jesus ug Maria.a Ngano? Matikdi kon unsay giingon sa Bibliya bahin niini.

Unsay Gisugo sa Diyos sa mga Israelitas?

Human gipagawas ang mga Israelitas sa Ehipto, si Jehova nga Diyos naghatag kanilag tin-awng instruksiyon kon unsaon siya pagsimba. Ang ikaduha sa Napulo ka Sugo nag-ingon: “Dili ka magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka magyukbo kanila ni maaghat sa pag-alagad kanila, tungod kay ako si Jehova nga imong Diyos maoy Diyos nga nagapangayo ug bug-os nga pagkamahinalaron.”—Exodo 20:4, 5.

Sa dihang gihatag sa Diyos ang maong mga sugo kang Moises, ang mga Israelitas naghimog bulawan nga nating baka, lagmit ilang gisundog ang mga Ehiptohanon sa pagsimba sa mga hayop. Wala nila kana tawga sa ngalan sa mga diyos sa Ehipto. Hinuon ila kining gigamit sa pagsimba kang Jehova. (Exodo 32:5, 6) Unsay sanong sa Diyos? Ang iyang kasuko misilaob batok kanila, ug si Moises nagdugmok sa bulawan nga nating baka.—Exodo 32:9, 10, 19, 20.

Sa ulahi, si Jehova nga Diyos nagdetalye sa ikaduhang sugo. Pinaagi kang Moises, siya nagpahinumdom kanila nga kinahanglang dili sila maghimog mga “linilok nga larawan, sa dagway sa bisan unsang simbolo, larawan sa lalaki o sa babaye, larawan sa bisan unsang mananap nga anaa sa yuta, larawan sa bisan unsang langgam nga adunay pako nga nagalupad sa kalangitan, larawan sa bisan unsang nagalihok sa ibabaw sa yuta, larawan sa bisan unsang isda nga anaa sa mga tubig sa ilalom sa yuta.” (Deuteronomio 4:15-18) Busa, ang mga Israelitas wala sugoa sa paggamit ug mga larawan sa bisan unsang dagway o matang sa ilang pagsimba sa Diyos.

Bisan pa niana, sa ulahi sila nagsimba na usab sa mga larawan. Aron tul-iron sila, si Jehova nagpadalag mga propeta aron pasidan-an sila sa umaabot nga silot. (Jeremias 19:3-5; Amos 2:8) Ingong usa ka nasod, ang Israel nagsalikway sa mga pasidaan sa Diyos. Busa, niadtong 607 B.C.E., gitugotan ni Jehova ang mga Babilonyanhon nga laglagon ang Jerusalem ug bihagon ang iyang katawhan.—2 Cronicas 36:20, 21; Jeremias 25:11, 12.

Unsay Paagi sa Pagsimba sa Unang mga Kristohanon?

Sa dihang ang mga dili-Hudiyo nahimong mga Kristohanon sa unang siglo, wala na sila maggamit ug mga larawan sa pagsimba sa Diyos. Matikdi kon unsay giingon sa usa ka platero sa Efeso nga tighimog mga larawan, nga si Demetrio, bahin sa pagsangyaw ni apostol Pablo: “Mga katawhan, kamo nahibalo pag-ayo nga gikan niining negosyoha kita nagmauswagon. Dugang pa, kamo nakakita ug nakadungog kon giunsa niini nga Pablo dili lamang sa Efeso kondili halos sa tanang distrito sa Asia sa pagpangombinsir ug dakong panon sa katawhan ug nagpaliso kanila ngadto sa laing hunahuna, nga nag-ingon nga ang mga hinimog mga kamot dili mga diyos.”—Buhat 19:25, 26.

Gipamatud-an mismo ni apostol Pablo ang akusasyon ni Demetrio. Sa dihang nakigsulti sa mga Grego sa Atenas, si Pablo nag-ingon: ‘Kita dili angayng maghunahuna nga ang Diyos maoy sama ug bulawan o plata o bato, samag butang nga kinulit sa kabatid ug pagkamamugnaon sa tawo. Matuod, gipalabay sa Diyos ang mga panahon sa maong pagkawalay-alamag, apan karon siya nagsugo sa katawhan nga silang tanan sa bisan diin angayng managhinulsol.’ (Buhat 17:29, 30) Bahin sa paggamit ug larawan, si Pablo nagsulat sa mga taga-Tesalonica ug nagdayeg kanila pinaagi sa mga pulong: ‘Kamo miliso ngadto sa Diyos gikan sa inyong mga idolo.’—1 Tesalonica 1:9.

Gawas kang Pablo, si apostol Juan usab nagpasidaan sa mga Kristohanon batok sa paggamit ug mga imahen sa ilang pagsimba. Sa hinapos sa unang siglo, si Juan maisogong miingon: “Pagbantay kamo gikan sa mga idolo.”—1 Juan 5:21.

Ang mga Saksi ni Jehova nagsunod sa tin-awng instruksiyon sa Diyos nga dili mogamit ug bisan unsang mga imahen sa pagsimba kaniya. Ila gayong gisunod ang gisulti ni Jehova nga Diyos: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan.”—Isaias 42:8.

[Footnote]

[Blurb sa panid 31]

“Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan.”—Isaias 42:8