May Nagpuyo Gayod Didto—Apan Kinsa?

Sa Uropa, usa ka tigulang nga babaye nga may rosaryohan ang mosulod sa simbahan, moluhod ug moampo sa estatwa ni Maria. Sa Aprika, usa ka pamilya ang magbubo ug gin sa may lubnganan sa minahal nga paryente. Sa mga nasod sa Amerika, usa ka batan-ong lalaki ang magpuasa ug mamalandong, nga naglaom nga makaestorya ang iyang gituohang magbalantay nga manulonda. Sa Asia, usa ka pari ang magsunog ug de-kolor nga mga butang nga gama sa papel ug ihalad ngadto sa espiritu sa mga katigulangan.

UNSAY parehong gituohan niining mga tawhana? Silang tanan nagtuo nga may intelihenteng mga persona sa dominyo sa mga espiritu nga ilang masangpit ug makatabang gayod kanila. Tinuod, kining pagtuoha dili bag-o ni makapatingala. Ang makapatingala mao nga daghan kaayong nagkasumpaking mga pagtuo kon kinsa ang nagpuyo sa dominyo sa mga espiritu.

Ang mga Muslim nagsimba kang Allah.a Ang Kakristiyanohan nag-ingon nga ang Diyos maoy Trinidad, nga gilangkoban sa Diyos nga Amahan, Diyos nga Anak, ug Diyos nga Espiritu Santo. Ang mga Hindu nagtuo nga adunay kapin sa usa ka libong diyos ug mga diyosa. Ang ubang mga tawo nag-ingon nga ang mga espiritu nagpuyo sa pipila ka mananap, kahoy, bato ug mga sapa. Ang uban usab naimpluwensiyahan sa mga basahon, salida, ug mga programa sa telebisyon bahin sa mga manulonda ug demonyo, mga multo ug maligno, mga diyos ug diyosa.

Tungod sa nagkalainlain ug nagkasumpaking pagtuo bahin sa mga diyos ug bathala, nagkalainlain ug nagkasumpaki usab ang pagtuo kon unsaon sa pakigkomunikar kanila. Siyempre, dili gayod kita makaingon nga husto ang tanang paagi sa pakigkomunikar kanila. Hunahunaa kini: Sa dili pa ta manawag sa telepono, kinahanglang mahibalo ta kon kinsa ang atong tawgan ug kombinsido ta nga anaa gayod siya ug iya kitang tubagon. Dili gayod makataronganong manawag ta sa usa ka hinanduraw lamang nga tawo. Labaw na kon manawag tag tawong impostor.

Busa, kinsa ba gayod ang nagpuyo sa dominyo sa mga espiritu? Ang Bibliya wala lamang magtubag niining pangutanaha apan nagpatin-aw usab kon kang kinsa kita makigkomunikar ug unsaon niya pagtubag kanato. Padayong basaha ang mosunod nga mga artikulo. Tingali mahingangha ka kon unsay gibutyag sa Bibliya.

[Footnote]

Panan-awon Bahin sa Dominyo sa mga Espiritu

TUTOKI pag-ayo ang langit—makakita ka bag espiritung persona? Paminaw pag-ayo—makadungog ka ba kanila? Dili gayod. Apan, tingali nakaseguro ka nga ang mga espiritu naglungtad. Sila intelihente ug gamhanan kaayo, ug may kaugalingong mga ngalan ug mga personalidad. Ang uban motabang, apan ang uban buot modaot kanato. Silang tanan interesado kanato.

Ang matuod nga Diyos mismo maoy usa ka Espiritu. (Juan 4:24) Siya adunay talagsaong ngalan nga nagpalahi kaniya sa daghang bakak nga mga diyos. Ang iyang ngalan maoy Jehova. (Salmo 83:18) Ang salmista misulat: “Si Jehova dako ug dalayegon uyamot. Siya makalilisang labaw pa sa tanang ubang mga diyos. Kay ang tanang diyos sa mga katawhan maoy walay-bili nga mga diyos; apan si Jehova, siya nagbuhat sa mga langit. Ang dignidad ug kahalangdon anaa sa atubangan niya; ang kusog ug katahom anaa sa iyang sangtuwaryo.”—Salmo 96:4-6.

Mga Panan-awon Bahin sa Matuod nga Diyos

Ang Bibliya nag-ingon: “Walay tawo nga nakakita sa Diyos sa bisan unsang panahon.” (Juan 1:18) Dili nato matukib ang Iyang panagway ug kahalangdon, samang ang kolor dili ikahubit ngadto sa usa nga natawong buta. Apan sama nga ang usa ka maayong magtutudlo nagpatin-aw ug komplikadong mga butang sa mga estudyante sa paaging masabtan, gipatin-aw usab sa Diyos kanato diha sa Bibliya ang dili makitang mga butang pinaagi sa mga butang nga atong makita. Pinaagi sa mga panan-awon nga gipakita ngadto sa matinumanong mga alagad kaniadto, gitabangan ta ni Jehova nga mahanduraw kon unsay anaa sa langit ug masabtan kon sa unsang paagi kita nalangkit sa nagpuyo niana.

Pananglitan, sa panan-awon nga nakita ni Ezequiel, ang himaya ni Jehova gihubit ingong kalayo, kahayag, batong sapiro, ug balangaw. Sa laing panan-awon, nakita ni apostol Juan nga si Jehova naglingkod sa trono ug “may panagway nga sama sa usa ka batong haspe ug sa usa ka bililhong pulag-bulok nga bato,” dugang pa niana “ang trono gilibotan sa usa ka balangaw nga sama ug esmeralda tan-awon.” Kini naghubit kanato nga ang presensiya ni Jehova talagsaon ug nagasidlak sa katahom, maanindot, ug malinawon.—Pinadayag 4:2, 3; Ezequiel 1:26-28.

Ang propetang si Daniel usab adunay panan-awon bahin kang Jehova, diin iyang nakita ang “napulo ka libo ka napulo ka libo [ka manulonda] nga nagbarog diha sa atubangan [ni Jehova].” (Daniel 7:10) Pagkakahibulongan nga talan-awon! Kon mahingangha ka man ugaling nga makakitag usa ka manulonda bisan sa panan-awon, unsa pa kaha kon imong makita ang tinagpulo ka libong hingpit nga mga manulonda!

Sa Bibliya duolag 400 ka beses gihisgotan ang mga manulonda, ug ang ilang mga ranggo naglakip sa mga serapin ug kerubin. Ang Grego ug Hebreohanong pulong nga gihubad ug “manulonda” diha sa Bibliya parehong nagkahulogang “mensahero.” Busa ang mga manulonda makakomunikar sa usag-usa, ug kaniadto sila nakigkomunikar sa mga tawo. Ang mga manulonda dili mga tawo kanhi nga nagpuyo sa yuta. Dugay nang gilalang ni Jehova kining espirituhanong mga persona sa wala pa lalanga ang tawo.—Job 38:4-7.

Sa panan-awon ni Daniel, ang daghang panon sa mga manulonda nagkatigom aron mosaksi sa usa ka hinungdanong panghitabo. Unya nakita ni Daniel ang “sama sa anak sa tawo” nga miduol sa trono ni Jehova ug gihatagag “pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:13, 14) Ang “anak sa tawo,” nga dakog ranggo sa dominyo sa mga espiritu, mao ang nabanhawng si Jesu-Kristo, nga gihatagag katungod sa pagmando sa tibuok yuta. Ang iyang pagmando maoy mopuli sa tanang gobyerno sa tawo ug magtapos sa sakit, kasub-anan, pagdaogdaog, kakabos, ug bisan sa kamatayon.—Daniel 2:44.

Ang pagkahari ni Jesus tinong nakapalipay kaayo sa matinumanong mga manulonda nga nagtinguha sa kaayohan sa katawhan. Apan, ikasubo, dili tanang espirituhanong mga linalang ang mibati niana.

Mga Kaaway sa Diyos ug sa Tawo

Sukad sa pagkalalang sa tawo, usa sa mga manulonda nga nahupngan sa tinguhang pagasimbahon ang mitalikod kang Jehova ug naghimo sa iyang kaugalingon nga Satanas, nga nagkahulogang “Magsusukol.” Si Satanas, ang bug-os nga larawan sa pagkadaotan, nakigbatok kang Jehova, ang labing mahigugmaong persona. Ang ubang mga manulonda nakig-abin kaniya. Ang Bibliya nagtawag kanila ug mga demonyo. Sama kang Satanas, ang mga demonyo nahimong mabangis nga mga kaaway sa tawo. Ug silay hinungdan sa daghang pag-antos dinhi sa yuta—ang inhustisya, sakit, kakabos, ug mga gubat.

Bisag si Satanas wala na hisgoti karon sa daghang simbahan sa Kakristiyanohan, ang basahon sa Job diha sa Bibliya nagpatin-aw kanato kon kinsa siya ug unsay motibo niining rebeldeng manulonda. Kini nag-ingon: “Karon miabot ang adlaw sa dihang ang mga anak sa matuod nga Diyos misulod aron sa pag-atubang kang Jehova, ug si Satanas misulod usab uban kanila.” Sa ilang pagsultihanay, si Satanas mapangahasong nag-akusar nga si Job nag-alagad sa Diyos tungod lamang sa iyang nadawat nga mga kaayohan. Aron pamatud-an kini, gipaantos pag-ayo ni Satanas si Job ug gipatay ang iyang binuhing mga hayop ug ang tanan niyang napulo ka anak. Unya, iyang gihampak si Job ug grabeng mga hubag sa tibuok niyang lawas. Bisan pa niining tanan, si Satanas napakyas.—Job 1:6-19; 2:7.

May maayong mga rason si Jehova kon nganong iyang gitugotan si Satanas nga maglungtad sa taas nga panahon, apan dili kini hangtod sa hangtod. Sa dili madugay hanawon ra si Satanas. Gihimo na ang pasiunang mga lakang ug tin-aw kining gihubit diha sa basahon sa Pinadayag diin gibutyag ang laing hinungdanong panghitabo nga wala gayod nato makita. Atong mabasa: “Ug miulbo ang gubat sa langit: Si Miguel [ang nabanhawng si Jesu-Kristo] ug ang iyang mga manulonda nakiggubat sa dragon [si Satanas], ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.

Matikdi nga si Satanas giingong “nagpahisalaag sa tibuok gipuy-ang yuta.” Siya nagpahisalaag sa mga tawo pinaagig relihiyosong mga kabakakan aron ilang talikdan si Jehova ug ang iyang Pulong. Ang usa ka bakak nga iyang giduso mao nga sa kamatayon ang tanan mopanaw ngadto sa dominyo sa mga espiritu. Nagkadaiya ang pagtuo niini. Pananglitan, sa Aprika ug Asia, daghan ang nagtuo nga inigkamatay ang mga tawo mopanaw sa kalibotan sa mga espiritu nga gipuy-an sa ilang mga katigulangan. Ang mga pagtulon-an bahin sa purgatoryo ug impiyerno gipasukad usab sa ideya nga ang tawo padayong mabuhi human sa kamatayon.

Human Mamatay—Moadto ba sa Langit?

Apan komosta ang gituohan sa minilyong tawo sa tibuok kalibotan nga ang tanang maayong tawo moadto sa langit? Tinuod nga ang pipila ka maayong tawo moadto didto, apan diyutay ra sila kon itandi sa bilyon-bilyong nangamatay. Gibutyag sa Bibliya nga 144,000 ka tawo ang ‘paliton gikan sa yuta’ ug mag-alagad ingong “mga saserdote” ug “mga hari ibabaw sa yuta.” (Pinadayag 5:9, 10; 14:1, 3) Sila ug ang Anak sa tawo, si Jesu-Kristo, ang maglangkob sa langitnong gobyerno, ang Gingharian sa Diyos. Kana nga gobyerno ang maglaglag kang Satanas ug sa iyang mga demonyo ug maghimo sa yuta nga usa ka paraiso. Ang kadaghanan sa mga nangamatay banhawon sa umaabot uban ang paglaom nga mabuhing walay kataposan sa Paraiso sa yuta.—Lucas 23:43.

Busa, daghan ang nagpuyo sa dominyo sa mga espiritu. Ang labing gamhanan kanila mao si Jehova nga Diyos, ang Maglalalang sa kinabuhi. May tinagpulo ka libong manulonda nga matinumanong nag-alagad kaniya. May mga demonyo usab nga gipangulohan ni Satanas nga mirebelde kang Jehova ug nagpahisalaag sa mga tawo. Dugang pa, may pipila ka tawo nga “gipalit” o gipili gikan sa yuta aron hatagag linaing mga responsibilidad didto sa langit. Hinumdoman nato kini samtang atong tagdon karon kon kinsa ang mahimong sangpiton diha sa dominyo sa mga espiritu ug kon angay ba kitang makigkomunikar kanila.

Kinsay Atong Sangpiton sa Dominyo sa mga Espiritu?

ANG Labing Gamhanang Diyos nagdelegar ug mga responsibilidad sa ubang espiritung mga linalang. Pananglitan, ang pagmando sa yuta iyang gidelegar kang Jesu-Kristo, ug siya nagtudlog matinumanong mga manulonda aron motabang sa paggiya sa pagsangyaw sa maayong balita. (Pinadayag 14:6) Apan ang pag-ampo lahi. Wala niya idelegar sa uban ang pagpatalinghog sa mga pag-ampo. Kini kinahanglang ipahayag lamang ngadto sa Diyos.

Si Jehova ang “Tigpatalinghog sa pag-ampo.” (Salmo 65:2) Iya gayong dunggon ang atong mga pag-ampo. Si apostol Juan misulat ngadto sa iyang mga isigkaalagad ni Jehova: “Bisan unsay atong pangayoon sumala sa iyang kabubut-on, [ang Diyos] magpatalinghog kanato. Dugang pa, kon kita nahibalo nga siya magpatalinghog kanato labot sa bisan unsay atong pangayoon, kita nahibalo nga atong mabatonan ang mga butang nga atong gipangayo sanglit gipangayo man nato kini kaniya.”—1 Juan 5:14, 15.

Ang matinumanong mga manulonda wala mag-ingon nga kita mosangpit o moampo kanila. Sila nakasabot ug nagpaluyo sa kahikayan sa Diyos sa pag-ampo, nga usahay direktang naglangkit kanila. Sa unsang paagi? Buweno, sa dihang nag-ampo si Daniel kang Jehova bahin sa pagkalaglag sa Jerusalem, siya gitubag sa Diyos pinaagi sa pagpadala sa manulondang si Gabriel aron dasigon siya.—Daniel 9:3, 20-22.

May mga Mensahe ba Gikan sa mga Patay?

Angay ba kitang makigkomunikar sa mga patay? Daghan tag madungog nga mga estorya bahin sa pagpakigsulti kono sa mga tawo sa mga espiritu sa patay. Pananglitan, usa ka babaye sa Ireland ang gikontak sa usa ka espiritistang babaye kinsa nag-ingon nga sa milabayng gabii nag-estorya kono sila ni Fred, ang bana sa babaye. Apan si Fred namatay pipila na ka semana ang milabay. Ang espiritista nag-asoy kon unsay gisulti ni “Fred” bahin sa mga butang nga sa pagtuo sa asawa ni Fred siya lang ang nahibalo. Daw nakatuo siya nga si Fred buhi diha sa kalibotan sa mga espiritu ug buot makigkomunikar kaniya pinaagi sa maong espiritista. Apan ang maong pagtuo kasumpaki sa kon unsay tin-awng giingon sa Bibliya bahin sa kahimtang sa mga patay.—Tan-awa ang kahon sa ubos.

Nan sa unsang paagi ikapatin-aw kini nga mga panghitabo? Ang usa ka paagi sa panglimbong nga gigamit sa mga demonyo mao ang pagsundog sa hitsura sa usa nga namatay, sama kang Fred. Gihimo nila kini aron ang mga tawo mosalikway sa gitudlo sa Bibliya ug aron mohuyang ang ilang pagtuo ug pagsalig kang Jehova. Si Satanas ug ang mga demonyo nagpahisalaag gayod sa mga tawo pinaagi “sa tanang gamhanang mga buhat ug bakak nga mga ilhanan ug mga tilimad-on ug inubanan sa tanang dili-matarong nga panglimbong alang kanila nga pagalaglagon.”—2 Tesalonica 2:9, 10.

Siyempre, may mga espiritista ug kadtong mga nalangkit kanila nga nagtuo gayod nga sila nakigkomunikar sa mga tawong patay na. Kon sila nakigkomunikar man ugaling kanila, sa pagkatinuod sila nakigkomunikar sa mga espiritung nagrebelde kang Jehova. Sa susama, may mga tawong nagtuo nga sila nagsimba sa Diyos, apan sila nasayop. Si apostol Pablo giinspirar sa pagsulat niining kusganong pasidaan: “Ang mga butang nga ginahalad sa mga nasod ilang ginahalad ngadto sa mga demonyo, ug dili ngadto sa Diyos.”—1 Corinto 10:20, 21.

Sanglit makaampo man kita sa Labing Gamhanang Diyos nga nahigugma ug nahingawa kanato, nganong moampo pa man ta sa uban? Sa pagkatinuod, ang Bibliya naghatag niini nga pasalig: “Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.”—2 Cronicas 16:9.

[Blurb sa panid 9]

Sanglit makaampo man kita sa Labing Gamhanang Diyos nga nahigugma ug nahingawa kanato, nganong moampo pa man ta sa uban?

[Kahon/Hulagway sa panid 8, 9]

Tinuod ug Tumotumo

TINUOD: SI SATANAS TINUOD NGA PERSONA

“Si Satanas kanunayng naghimo sa iyang kaugalingon nga usa ka manulonda sa kahayag.” —2 Corinto 11:14.

“Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” —1 Pedro 5:8.

“Siya nga nagpadayon sa pagbuhat sa kasal-anan nagagikan sa Yawa, tungod kay ang Yawa nagpakasala sukad pa sa sinugdan.”—1 Juan 3:8.

“Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.”—Santiago 4:7.

Ang “Yawa . . . usa ka mamumuno sa iyang pagsugod, ug siya wala mobarog nga lig-on diha sa kamatuoran, tungod kay ang kamatuoran wala kaniya. Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.”—Juan 8:44.

TUMOTUMO: SA KAMATAYON ANG TANAN MOPANAW NGADTO SA DOMINYO SA MGA ESPIRITU

“Sa singot sa imong nawong ikaw magakaon sa tinapay hangtod nga ikaw mobalik sa yuta, kay gikan niini ikaw gikuha. Kay abog ikaw ug sa abog ikaw mopauli.”—Genesis 3:19.

“Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa, ni sila aduna pay suhol, tungod kay ang ilang handomanan nakalimtan na.”—Ecclesiastes 9:5.

“Ang tanan nga makaplagan sa imong kamot nga buhaton, buhata uban sa imong kusog mismo, kay walay buluhaton ni lalang ni kahibalo ni kaalam sa Sheol [ang lubnganan], ang dapit diin ikaw moadto.”—Ecclesiastes 9:10.

“Mogula ang iyang espiritu, mobalik siya sa iyang yuta; nianang adlawa mahanaw ang iyang mga hunahuna.”—Salmo 146:4.

TINUOD: ANG MATINUMANONG MGA MANULONDA NAHINGAWA KANATO

“Ang manulonda ni Jehova nagkampo libot niadtong nangahadlok kaniya, ug siya nagluwas kanila.”—Salmo 34:7; 91:11.

“Dili ba silang [mga manulonda] tanan mga espiritu alang sa publikong pag-alagad, nga gipadala aron mag-alagad niadtong magapanunod sa kaluwasan?”—Hebreohanon 1:14.

“Akong nakita ko ang laing manulonda nga naglupad sa kinatung-an sa langit, ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang himaya.’”—Pinadayag 14:6, 7.

TUMOTUMO: SI JESUS KATUMBAS SA DIYOS

“Buot ko nga mahibalo kamo nga ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.”—1 Corinto 11:3.

“Sa dihang ang tanang butang mapasakop na ngadto kaniya, niana ang Anak magpasakop usab ngadto sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.”—1 Corinto 15:28.

“Sa pagkatinuod gayod ako magaingon kaninyo, Ang Anak dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginabuhat sa Amahan.”—Juan 5:19.