Pagkat-on Gikan sa Pulong sa Diyos

Kinsa ang Diyos?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Kinsa ang Diyos?

Ang tinuod nga Diyos mao ang Maglalalang sa tanang butang. Ang Bibliya nagtawag kaniya nga “Hari nga walay kataposan,” sa ato pa, siya walay sinugdan ug walay kataposan. (Pinadayag 15:3) Sanglit ang Diyos maoy Tuboran sa kinabuhi, kinahanglang kaniya lamang kita mosimba.—Basaha ang Pinadayag 4:11.

2. Unsay dagway sa Diyos?

Wala pay nakakita sa Diyos kay siya Espiritu, nga nagpasabot nga siya dili sama sa unodnong mga linalang nga nagpuyo sa yuta. (Juan 1:18; 4:24) Ang mga hiyas sa Diyos makita diha sa mga butang nga iyang gihimo. Pananglitan, kon atong palandongon ang nagkadaiyang mga prutas ug bulak ug ang disenyo niini, atong makita ang gugma ug kaalam sa Diyos. Madayag usab ang gahom sa Diyos sa kadako sa uniberso.—Basaha ang Roma 1:20.

Makakat-on kita ug dugang sa mga hiyas sa Diyos gikan sa Bibliya. Pananglitan, kini nagbutyag nato kon unsay gusto ug dili gusto sa Diyos, sa unsang paagi siya makiglabot sa mga tawo, ug kon unsay iyang bation sa lainlaing mga kahimtang.—Basaha ang Salmo 103:7-10.

3. Aduna bay ngalan ang Diyos?

Si Jesus nag-ingon: “Amahan namo nga anaa sa mga langit, pagabalaanon unta ang imong ngalan.” (Mateo 6:9) Bisan tuod daghag titulo ang Diyos, siya adunay usa lamang ka ngalan. Sa matag pinulongan, lainlain ang paglitok niini. Sa Cebuano, sagad kita moingong “Jehova” o usahay “Yahweh.”—Basaha ang Salmo 83:18.

Ang ngalan sa Diyos gitangtang sa daghang Bibliya ug giilisdan ug mga titulong Ginoo o Diyos. Apan sa dihang gisulat ang Bibliya, mga 7,000 ka beses makita niini ang ngalan sa Diyos. Gipaila ni Jesus ang ngalan sa Diyos sa dihang iyang gipatin-aw ang Pulong sa Diyos ngadto sa mga tawo. Iyang gitabangan ang mga tawo nga makaila sa Diyos.—Basaha ang Juan 17:26.

4. Si Jehova ba may pagtagad kanato?

Gipakita ni Jehova ang kahingawa kanato pinaagi sa pagpatalinghog sa atong pag-ampo. (Salmo 65:2) Tungod kay daghan ang nag-antos, ikaingon bang ang Diyos wala magtagad kanato? Ang uban miingon nga kita gipaantos sa Diyos aron kita masulayan, apan dili kini tinuod. Ang Bibliya nag-ingon: “Halayo ra sa matuod nga Diyos nga mobuhat sa pagkadaotan.”—Job 34:10; basaha ang Santiago 1:13.

Gihatagan sa Diyos ug dignidad ang tawo pinaagi sa paghatag kaniyag kagawasan sa pagpili. Dili ba nato kini pabilhan aron mag-alagad sa Diyos? (Josue 24:15) Daghan ang nag-antos kay gipalabi sa kadaghanan ang pagbuhat ug daotan sa uban. Sakit alang kang Jehova ang pagtan-aw niini nga inhustisya.—Basaha ang Genesis 6:5, 6.

Sa di madugay, gamiton ni Jehova si Jesus aron hanawon ang pag-antos ug ang nagpahinabo niini. Sa kasamtangan, may maayong katarongan si Jehova sa temporaryong pagtugot sa pag-antos. Ang umaabot nga artikulo magpatin-aw kon nganong gitugotan sa Diyos ang pag-antos.—Basaha ang Isaias 11:4.

5. Unsay gusto sa Diyos nga buhaton nato?

Gilalang kita ni Jehova nga may katakos sa pag-ila ug paghigugma kaniya. Buot niyang kita makakat-on sa kamatuoran bahin kaniya. (1 Timoteo 2:4) Kon kita magtuon sa Bibliya, mailhan nato ang Diyos ingong Higala.—Basaha ang Proverbio 2:4, 5.

Sanglit gihatagan kita ni Jehova ug kinabuhi, kita angayng mahigugma kaniya labaw kay kang bisan kinsa. Atong ikapakita sa Diyos nga ato siyang gihigugma pinaagi sa pag-ampo kaniya ug sa pagbuhat sa iyang kabubut-on. (Proverbio 15:8) Gisugo kita ni Jehova nga higugmaon ang ubang mga tawo.—Basaha ang Marcos 12:29, 30; 1 Juan 5:3.

Alang sa dugang impormasyon, tan-awa ang kapitulo 1 niini nga basahon Unsay Tinuod nga Gitudlo sa Bibliya? nga gipatik sa mga Saksi ni Jehova.

[Hulagway sa panid 17]

Duna bay maayong katarongan nga temporaryong gitugotan ang pag-antos?