Ang Diyos mismo nagpatin-aw sa kahulogan sa iyang ngalan ngadto sa iyang matinumanong alagad nga si Moises. Sa gipangutana ni Moises ang ngalan sa Diyos, si Jehova mitubag: “Ako mamao kon unsay mamao ako.” (Exodo 3:14) Ang hubad ni Rotherham naghubad nianang mga pulonga: “Ako Mahimong Mao bisan kon unsay akong kahimut-an.” Busa si Jehova mamao bisan kon unsay gikinahanglan aron tumanon ang iyang mga katuyoan.

Pananglitan, kon ikaw may katakos nga mamao ka bisan kon unsay buot nimo nga mamao ka. Unsay himoon nimo alang sa imong mga higala? Kon usa kanila may grabeng sakit, ikaw mahimong hanas nga doktor ug tambalan mo siya. Kon ang laing higala mahapay sa pinansiyal, ikaw mahimong adunahan nga magtatabang ug makasulbad ka sa iyang suliran. Apan ang kamatuoran mao nga limitado ang imong katakos nga ikaw mamao. Kitang tanan limitado gayod kaayo. Samtang ikaw magtuon sa Bibliya, mahingangha ka sa dihang imong masabtan kon sa unsang paagi si Jehova mamao bisag unsay gikinahanglan aron tumanon ang iyang mga saad. Ug mahimuot siya nga mogamit sa iyang gahom alang sa mga tawong nahigugma kaniya. (2 Cronicas 16:9) Kining nindot nga mga bahin sa personalidad ni Jehova dili maila sa mga tawo nga wala makaila sa iyang ngalan.

Tin-aw, ang ngalang Jehova angayng gamiton diha sa Bibliya. Ang pagkahibalo sa kahulogan niini ug paggamit kanunay niini diha sa atong pagsimba maoy dagkong mga tabang aron masuod ngadto sa atong langitnong Amahan, si Jehova.a

ANG manalagnang si Daniel nabuhi kapin ug 500 ka tuig una pa sa pagkatawo ni Jesus. Bisan pa niana, gipadayag ni Jehova kang Daniel ang impormasyon nga magpaposible sa pagtino sa panahon nga si Jesus dihogan o itudlo isip Mesiyas o Kristo. Giingnan si Daniel: “Angay kang mahibalo ug magbaton sa hait nga salabotan nga sukad sa paggula sa sugo sa pagpasig-uli ug sa pagtukod pag-usab sa Jerusalem hangtod sa Mesiyas nga Pangulo, adunay pito ka semana, ingon man kan-umag-duha ka semana.”​—Daniel 9:25.

Aron matino ang panahon sa pag-abot sa Mesiyas, angayng masayran una nato ang sinugdanang punto sa yugto nga mosangko sa Mesiyas. Sumala sa tagna, kini maoy “sukad sa paggula sa sugo sa pagpasig-uli ug sa pagtukod pag-usab sa Jerusalem.” Kanus-a nahitabo kining “paggula sa sugo”? Sumala sa magsusulat sa Bibliya nga si Nehemias, ang sugo sa pagtukod pag-usab sa mga paril libot sa Jerusalem migula “sa ikakawhaan ka tuig ni Artajerjes nga hari.” (Nehemias 2:1, 5-8) Gipamatud-an sa mga historyano nga ang tuig 474 W.K.P. mao ang unang bug-os nga tuig sa pagmando ni Artajerjes. Busa, ang ika-20ng tuig sa iyang pagmando maoy 455 W.K.P. Duna na kitay sinugdanang punto alang sa tagna ni Daniel bahin sa Mesiyas, nga mao, 455 W.K.P.

Gipaila ni Daniel kon unsay gidugayon sa yugto sa panahon nga mosangko sa pag-abot sa “Mesiyas nga Pangulo.” Ang tagna naghisgot ug “pito ka semana, ingon man kan-umag-duha ka semana”​—sa katibuk-an 69 ka semana. Unsay gidugayon niining yugtoa sa panahon? Ang ubay-ubayng hubad sa Bibliya nag-ingon nga kini maoy mga semana sa mga tuig, dili mga semana nga tagpito ka adlaw. Ang buot ipasabot, ang matag semana naghawas sa pito ka tuig. Kining ideya bahin sa mga semana sa mga tuig o tagpito ka tuig nga yunit, sinati sa mga Hudiyo sa karaang kapanahonan. Pananglitan, sila nagbantay ug tuig nga Igpapahulay matag ikapitong tuig. (Exodo 23:10, 11) Busa, ang matagnaong 69 ka semana motumbas sa 69 ka yunit nga tagpito ka tuig ang matag usa, o sa katibuk-an maoy 483 ka tuig.

Ang buhaton na lang nato karon mao ang pag-ihap. Kon mag-ihap kita ug 483 ka tuig sukad sa tuig 455 W.K.P., kita modangat sa tuig 29 K.P. Kana mao ang eksaktong tuig nga si Jesus nabawtismohan ug nahimong Mesiyas!a (Lucas 3:1, 2, 21, 22) Dili ba ang katumanan sa tagna sa Bibliya maoy talagsaon ug makapalig-on sa pagtuo?

ARON tabangan kita sa pag-ila sa Mesiyas, si Jehova nga Diyos nag-inspirar ug daghang manalagna sa Bibliya aron isulat ang mga detalye bahin sa pagkatawo, ministeryo, ug pagkamatay nianang sinaad nga Manluluwas. Natuman kang Jesu-Kristo kining tanang tagna sa Bibliya. Katingalahan ang katukma ug kadetalyado sa maong mga tagna. Aron ikailustrar kini, hisgotan nato ang pipila ka tagna bahin sa mga panghitabo nga nalangkit sa pagkatawo ug pagkabata sa Mesiyas.

Gitagna sa manalagnang si Isaias nga ang Mesiyas maoy kaliwat ni Haring David. (Isaias 9:7) Si Jesus natawo gayod sa banay ni David.​—Mateo 1:1, 6-17.

Si Miqueas, ang laing manalagna sa Diyos, mitagna nga kining bataa mahimong magmamando ug matawo sa “Betlehem Eprata.” (Miqueas 5:2) Panahon sa pagkatawo ni Jesus, dihay duha ka lungsod sa Israel nga ginganlan ug Betlehem. Ang usa nahimutang duol sa Nasaret sa amihanang rehiyon sa nasod, ug ang lain, duol sa Jerusalem sa Juda. Ang Betlehem duol sa Jerusalem gitawag kaniadto nga Eprata. Si Jesus natawo sa maong lungsod, nga eksakto kaayo sumala sa gitagna!​—Mateo 2:1.

Ang laing tagna sa Bibliya nag-ingon nga ang Anak sa Diyos pagatawgon “gikan sa Ehipto.” Ang batang si Jesus gidala ngadto sa Ehipto. Siya gidalag balik sa pagkamatay na ni Herodes, sa ingon natuman ang tagna.​—Oseas 11:1; Mateo 2:15.

Sa tsart sa panid 200, ang mga teksto nga nalista ubos sa ulohang “Tagna” naundan ug mga detalye mahitungod sa Mesiyas. Palihog itandi kini sila sa mga teksto nga nalista ubos sa ulohang “Katumanan.” Ang paghimo niana dugang magpalig-on sa imong pagtuo nga tinuod gayod ang Pulong sa Diyos.

Samtang imong susihon kining mga tekstoha, hinumdomi nga kadtong mga tagnaa gisulat gatosan ka tuig una pa sa pagkatawo ni Jesus. Si Jesus miingon: “Ang tanang butang nga nahisulat diha sa balaod ni Moises ug sa mga Manalagna ug sa mga Salmo bahin kanako kinahanglang matuman.” (Lucas 24:44) Maingon nga imong mapamatud-an diha sa imong kaugalingong kopya sa Bibliya, kini sila natuman gayod​—ang matag detalye!

ANG mga tawo nga nagtuo sa pagtulon-an sa Trinidad nag-ingon nga ang Diyos gilangkoban ug tulo ka persona​—ang Amahan, ang Anak, ug ang Balaang Espiritu. Matag usa nianang tulo ka persona giingon nga sama sa uban, labing gamhanan, ug walay sinugdanan. Busa, sumala sa doktrina sa Trinidad, ang Amahan maoy Diyos, ang Anak maoy Diyos, ug ang Balaang Espiritu maoy Diyos, apan adunay usa lamang ka Diyos.

Ang daghan nga nagtuo sa Trinidad moangkon nga sila dili makapatin-aw niini nga pagtulon-an. Bisan pa niana, sila tingali nagtuo