1. Unsa ang katuyoan sa Diyos alang sa yuta?

ANG katuyoan sa Diyos alang sa yuta maoy kahibulongan gayod. Gusto ni Jehova nga ang yuta mapunog malipayon, mahimsog nga katawhan. Ang Bibliya nag-ingon nga ang “Diyos nagtanom ug usa ka tanaman sa Eden” ug nga iyang “gipatubo . . . ang tanang kahoy nga tilinguhaon sa panan-aw ug maayong kan-on.” Human lalanga sa Diyos ang unang lalaki ug babaye, si Adan ug Eva, Iyang gibutang sila nianang maanindot nga puy-anan ug giingnan sila: “Magmabungahon ug magdaghan kamo ug pun-a ang yuta ug gamhi kini.” (Genesis 1:28; 2:8, 9, 15) Busa maoy katuyoan sa Diyos nga ang mga tawo makabaton ug mga anak, magpauswag sa mga utlanan niadtong paraisong puy-anan sa tibuok nga yuta, ug mag-atiman sa kahayopan.

2. (a) Giunsa nato pagkahibalo nga matuman ang katuyoan sa Diyos alang sa yuta? (b) Unsay giingon sa Bibliya bahin sa pagkabuhi sa mga tawo hangtod sa kahangtoran?

² Sa imong hunahuna, matuman ba gayod ang katuyoan ni Jehova nga Diyos nga ang katawhan magpuyo sa usa ka yutan-ong paraiso? “Akong gisulti gayod kini,” nag-ingon ang Diyos, “akong pagabuhaton usab kini.” (Isaias 46:9-11; 55:11) Oo, ang gituyo sa Diyos iya gayong buhaton! Siya nag-ingon nga siya “wala maglalang [sa yuta] sa wala lamay kapuslanan” apan “nag-umol niini aron pagapuy-an.” (Isaias 45:18) Unsang matanga sa katawhan ang gusto sa Diyos nga papuy-on sa yuta? Ug sa unsang gidugayon nga gusto niyang sila mopuyo dinhi? Ang Bibliya nagtubag: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”​—Salmo 37:29; Pinadayag 21:3, 4.

3. Unsang makapasubong mga kahimtang ang naglungtad karon sa yuta, ug unsang mga pangutana ang gipatungha niini?

³ Dayag nga kini wala pa matuman. Ang mga tawo sa pagkakaron masakit ug mamatay; sila mag-away pa gani ug magpinatyanay. May nadaot. Hinuon, dili gayod katuyoan sa Diyos nga ang yuta mahisama sa atong makita karong adlawa! Unsay nahitabo? Nganong wala pa matuman ang katuyoan sa Diyos? Walay basahon sa kasaysayan nga sinulat sa tawo ang makatug-an kanato tungod kay ang suliran nagsugod man sa langit.

ANG SINUGDANAN SA USA KA KAAWAY

4, 5. (a) Kinsay tinuod nga nakigsulti kang Eva pinaagi sa usa ka halas? (b) Sa unsang paagi ang usa ka kanhi maligdong, matinud-anong tawo mahimong kawatan?

⁴ Ang unang basahon sa Bibliya naghisgot bahin sa usa ka magsusupak sa Diyos nga mipatim-aw sa tanaman sa Eden. Gibatbat siya ingong “ang halas,” apan siya dili lamang usa ka hayop. Ang kataposang basahon sa Bibliya nagpaila nga siya “ang usa nga gitawag Yawa ug Satanas, nga nagpahisalaag sa tibuok gipuy-ang yuta.” Siya gitawag usab “ang orihinal nga halas.” (Genesis 3:1; Pinadayag 12:9) Kining gamhanang manulonda o dili-makitang espiritung linalang, migamit ug usa ka halas aron makigsulti kang Eva, sama rang ang usa ka abtik nga tawo makapahimo sa iyang tingog nga daw nagagikan sa duol nga monyeka o kikokiko. Ang maong espiritung persona sa walay duhaduha presente sa dihang ang Diyos nag-andam sa yuta alang sa mga tawo.​—Job 38:4, 7.

⁵ Apan sanglit hingpit ang tanang linalang ni Jehova, kinsay nagbuhat sa maong “Yawa,” sa maong “Satanas”? Sa yanong pagkasulti, ang usa sa gamhanang espiritung mga anak sa Diyos naghimo sa iyang kaugalingon nga Yawa. Sa unsang paagi naposible kini? Ingon nga ato nang nasayran, ang usa ka tawo karong adlawa nga kanhi maoy ligdong ug matinud-anon basin mahimong kawatan. Sa unsang paagi mahitabo kana? Mahimong tugotan sa usa ka tawo nga ang daotang tinguha maugmad diha sa iyang kasingkasing. Kon siya magpadayon sa paghunahuna niana, ang maong daotang tinguha mahimong kusganon kaayo. Unya kon motungha ang higayon, tingali siya molihok sumala sa daotang tinguha nga iyang gihunahuna.​—Santiago 1:13-15.

6. Sa unsang paagi ang usa ka gamhanang espiritung anak sa Diyos nahimong Satanas nga Yawa?

⁶ Kini nahitabo sa kahimtang ni Satanas nga Yawa. Lagmit nakadungog siya nga ang Diyos nagsugo kang Adan ug Eva nga magbaton ug mga anak ug pun-on ang yuta sa ilang mga liwat. (Genesis 1:27, 28) ‘Aw, kining tanang tawo mahimong magsimba kanako inay sa Diyos!’ si Satanas lagmit naghunahuna. Busa miturok ang daotang tinguha sa iyang kasingkasing. Sa kadugayan, siya milihok sa paglansis kang Eva pinaagi sa pagsulti kaniyag kabakakan bahin sa Diyos. (Genesis 3:1-5) Sa ingong paagi siya nahimong “Yawa,” nga nagkahulogang “Tigbutangbutang.” Sa samang higayon, siya nahimong “Satanas,” nga nagkahulogang “Magsusupak.”

7. (a) Nganong namatay si Adan ug Eva? (b) Nganong ang tanang anak ni Adan matigulang ug mamatay?

⁷ Pinaagi sa pagsultig kabakakan ug paglansis, gipahinabo ni Satanas nga Yawa nga si Adan ug Eva mosupak sa Diyos. (Genesis 2:17; 3:6) Ingong resulta, sila sa kataposan namatay, sumala sa gisulti sa Diyos nga mahitabo kanila kon sila mosupak. (Genesis 3:17-19) Sanglit si Adan nahimong dili hingpit sa dihang siya nakasala, ang tanan niyang anak nakapanunod sa sala gikan kaniya. (Roma 5:12) Ang kahimtang ikailustrar sa usa ka hulmahan nga gigamit sa paglutog tinapay. Kon ang hulmahan adunay lumping, unsay mahitabo sa matag tinapay nga giluto sa maong hulmahan? Ang matag tinapay makabaton usab ug lumping o depekto. Sa susamang paagi, ang matag tawo nakapanunod ug “lumping” sa pagkadili-hingpit gikan kang Adan. Kanay hinungdan nga ang tanang tawo matigulang ug mamatay.​—Roma 3:23.

8, 9. (a) Unsang hagit ang lagmit gihimo ni Satanas? (b) Nganong wala dayon laglaga sa Diyos ang mga rebelde?

⁸ Sa dihang giagak ni Satanas si Adan ug Eva ngadto sa pagpakasala batok sa Diyos, siya sa pagkatinuod nangulo sa usa ka rebelyon. Iyang gisupak ang paagi ni Jehova sa pagmando. Sa pagkatinuod, si Satanas nag-ingon: ‘Dili maayong magmamando ang Diyos. Siya nagsultig kabakakan ug naghikaw ug maayong mga butang gikan sa iyang mga ginsakpan. Ang mga tawo wala magkinahanglan sa Diyos aron magmando kanila. Sila makahukom sa kaugalingon kon unsay maayo ug kon unsay daotan. Ug mahimong mas maayo pa ang ilang kahimtang ubos sa akong pagmando.’ Unsaon pag-atubang sa Diyos ang maong makapainsulto nga akusasyon? Ang pipila naghunahuna nga ang Diyos angay untang magpatay lamang sa mga rebelde. Apan kana ba magtubag sa hagit ni Satanas? Kana ba magpamatuod nga ang paagi sa Diyos sa pagmando maoy matarong?

⁹ Ang hingpit nga pagsabot ni Jehova bahin sa hustisya dili makatugot nga iyang patyon lang dayon ang mga rebelde. Mihukom siya nga gikinahanglan ang panahon aron matubag ang hagit ni Satanas sa makapatagbawng paagi ug mapamatud-ang bakakon ang Yawa. Busa gihukom sa Diyos nga iyang tugotan nga ang mga tawo magmando sa ilang kaugalingon sulod sa taas nga panahon ubos sa impluwensiya ni Satanas. Kon nganong gihimo kadto ni Jehova ug kon nganong iyang gitugotan nga molabay ang taas kaayong panahon una mahusay ang maong mga isyu pagahisgotan sa Kapitulo 11 niining basahona. Hinuon, niining tungora maayong palandongon kini: Husto ba si Adan ug Eva sa pagtuo kang Satanas, kinsa wala makahimog maayo alang kanila? Husto ba sila sa pagtuo nga si Jehova, kinsa naghatag kanila sa tanang butang nga ilang nabatonan, maoy mapintasong bakakon? Kon ikaw pa, unsa kahay imong himoon?

10. Sa unsang paagi makasuportar ka sa kiliran ni Jehova aron matubag ang hagit ni Satanas?

¹⁰ Maayong hunahunaon kining mga pangutanaha tungod kay ang matag usa kanato nag-atubang ug susamang mga isyu karon. Oo, may higayon ka sa pagsuportar sa kiliran ni Jehova aron matubag ang hagit ni Satanas. Makadawat ka kang Jehova ingong imong Magmamando ug makatabang sa pagpakita nga si Satanas maoy bakakon. (Salmo 73:28; Proverbio 27:11) Ikasubo, pipila lamang sa bilyonbilyong tawo niining kalibotana ang naghimo sa maong pagpili. Kini mopatunghag hinungdanong pangutana, Ang Bibliya tinuod bang nagtudlo nga si Satanas mao ang magmamando niining kalibotana?

KINSAY NAGMANDO NIINING KALIBOTANA?

11, 12. (a) Sa unsang paagi ang usa ka tentasyon kang Jesus nagpadayag nga si Satanas mao ang magmamando niining kalibotana? (b) Unsa pay nagpamatuod nga si Satanas mao ang magmamando niining kalibotana?

¹¹ Si Jesus wala gayod magduhaduha nga si Satanas mao ang magmamando niining kalibotana. Sa usa ka milagrosong paagi, gipakita ni Satanas kanhi kang Jesus “ang tanang gingharian sa kalibotan ug ang ilang himaya.” Unya si Satanas misaad kang Jesus: “Kining tanan nga butang ihatag ko kanimo kon mohapa ka ug mohimog usa ka buhat sa pagsimba kanako.” (Mateo 4:8, 9; Lucas 4:5, 6) Hunahunaa kini. Kadtong tanyaga maoy pagtental ba kang Jesus kon si Satanas dili pa mao ang magmamando niining mga ginghariana? Wala ipanghimakak ni Jesus nga kining tanang gingharian sa kalibotan iya ni Satanas. Seguradong himoon unta kana ni Jesus kon si Satanas dili pa mao ang nagpaluyong gahom niining tanang gingharian.

¹² Siyempre, si Jehova mao ang labing gamhanang Diyos, ang Maglalalang sa kahibulongang uniberso. (Pinadayag 4:11) Bisan pa niana, ang Bibliya wala mag-ingon nga si Jehova nga Diyos o si Jesu-Kristo mao ang magmamando niining kalibotana. Ngani, espesipikong ginganlan ni Jesus si Satanas nga “ang magmamando niining kalibotana.” (Juan 12:31; 14:30; 16:11) Ang Bibliya nagtumong gani kang Satanas nga Yawa ingong “ang diyos niini nga sistema sa mga butang.” (2 Corinto 4:3, 4) Mahitungod niini nga magsusupak o Satanas, ang Kristohanong apostol nga si Juan misulat: “Ang tibuok kalibotan nailalom sa gahom sa usa nga daotan.”​—1 Juan 5:19.

KON SA UNSANG PAAGI PAGAHANAWON ANG KALIBOTAN NI SATANAS

13. Nganong gikinahanglan ang usa ka bag-ong kalibotan?

¹³ Sa paglabay sa matag tuig, ang kalibotan nahimong mas ug mas peligroso. Napuno kinig nagagubatay nga mga kasundalohan, dili-matinud-anong mga politiko, salingkapaw nga relihiyosong mga lider, ug way-konsensiyang mga kriminal. Ang kalibotan sa katibuk-an dili na mabag-o. Gipadayag sa Bibliya nga duol na ang panahon nga pagalaglagon sa Diyos ang daotang kalibotan panahon sa iyang gubat sa Armagedon. Pulihan kinig usa ka matarong nga bag-ong kalibotan.​—Pinadayag 16:14-16.

14. Kinsay napili sa Diyos nga mahimong Magmamando sa Iyang Gingharian, ug sa unsang paagi gitagna kini?

¹⁴ Gipili ni Jehova nga Diyos si Jesu-Kristo nga mahimong Magmamando sa Iyang langitnong Gingharian o kagamhanan. Dugay na kanhi, ang Bibliya mitagna: “Adunay usa ka bata nga natawo alang kanato, adunay usa ka anak nga lalaki nga gihatag kanato; ug ang prinsipenhong pagmando mahipatong sa iyang abaga. Ug ang iyang ngalan pagatawgon nga . . . Prinsipe sa Pakigdait. Sa kadagaya sa prinsipenhong pagmando ug sa pakigdait walay kataposan.” (Isaias 9:6, 7) Mahitungod niining maong kagamhanan, gitudloan ni Jesus ang iyang mga sumusunod sa pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Sumala sa atong makita sa ulahing bahin niini nga basahon, duol nang laglagon sa Gingharian sa Diyos ang tanang kagamhanan niining kalibotana, ug kini mismo ang mopuli nianang tanan. (Daniel 2:44) Human niana ang Gingharian sa Diyos magpatungha sa yutan-ong paraiso.

HADUOL NA ANG USA KA BAG-ONG KALIBOTAN!

15. Unsa ang “bag-ong yuta”?

¹⁵ Ang Bibliya nagpasalig kanato: “Adunay bag-ong mga langit ug usa ka bag-ong yuta nga atong ginapaabot sumala sa . . . saad [sa Diyos], ug niini magpuyo ang pagkamatarong.” (2 Pedro 3:13; Isaias 65:17) Sa dihang ang Bibliya mohisgot usahay bahin sa “yuta,” kini nagpasabot sa katawhang nagpuyo sa yuta. (Genesis 11:1) Busa ang matarong nga “bag-ong yuta” maoy usa ka kapunongan sa katawhan nga giuyonan sa Diyos.

16. Unsa ang bililhon kaayong gasa gikan sa Diyos alang niadtong iyang giuyonan, ug unsay kinahanglan natong buhaton aron makadawat niana?

¹⁶ Misaad si Jesus nga sa umaabot nga bag-ong kalibotan, kadtong giuyonan sa Diyos makadawat sa gasa nga “kinabuhing walay kataposan.” (Marcos 10:30) Palihog paklia ang imong Bibliya sa Juan 3:16 ug Juan 17:3, ug basaha kon unsay giingon ni Jesus nga kinahanglan natong buhaton aron makadawat sa kinabuhing walay kataposan. Karon, tagda gikan sa Bibliya ang mga panalangin nga tagamtamon niadtong takos sa maong kahibulongang gasa gikan sa Diyos diha sa umaabot nga yutan-ong Paraiso.

17, 18. Sa unsang paagi makaseguro kita nga aduna unyay pakigdait ug kasegurohan sa bisan diin sa yuta?

¹⁷ Mahanaw na ang pagkadaotan, paggubatay, krimen, ug kapintasan. “Ang daotan mawala na . . . Apan ang mga maaghop magapanag-iya sa yuta.” (Salmo 37:10, 11) Molungtad na unya ang pakigdait tungod kay ‘pahunongon sa Diyos ang mga gubat hangtod sa kinatumyan sa yuta.’ (Salmo 46:9; Isaias 2:4) Unya “molambo ang matarong, ug ang kadagaya sa pakigdait hangtod nga ang bulan mahanaw na”​—ug kana nagpasabot nga ang pakigdait maoy hangtod sa kahangtoran!​—Salmo 72:7.

¹⁸ Ang mga magsisimba ni Jehova magpuyo unya nga may kasegurohan. Samtang ang mga Israelinhon sa panahon sa Bibliya nagsugot sa Diyos, sila may kasegurohan sa kinabuhi. (Levitico 25:18, 19) Pagkakahibulongan gayod unya ang pagtagamtam sa susamang kasegurohan sa Paraiso!​—Isaias 32:18; Miqueas 4:4.

19. Nganong nahibalo kita nga ang pagkaon magmadagayaon sa bag-ong kalibotan sa Diyos?

¹⁹ Wala na unyay mga kanihit sa pagkaon. “Aduna unyay dagayang lugas sa ibabaw sa yuta,” miawit ang salmista. “Sa tumoy sa kabukiran adunay pagsugwak.” (Salmo 72:16) Panalanginan ni Jehova nga Diyos ang iyang mga matarong, ug “ang yuta magapatungha gayod sa iyang bunga.”​—Salmo 67:6.

20. Nganong makaseguro kita nga ang tibuok yuta mahimong usa ka paraiso?

²⁰ Ang tibuok yuta mahimong usa ka paraiso. Pagatukoron unya ang maanindot nga bag-ong mga balay ug maugmad ang mga tanaman diha sa yuta nga kaniadto gidaot sa makasasalang mga tawo. (Isaias 65:21-24; Pinadayag 11:18) Paglabay sa panahon, ang naugmad nang mga bahin sa yuta mokaylap hangtod ang tibuok globo mahimong matahom ug mabungahon sama sa tanaman sa Eden. Ug ang Diyos dili gayod mapakyas sa ‘pagbukhad sa iyang kamot ug pagtagbaw sa tinguha sa tanang buhing butang.’​—Salmo 145:16.

21. Unsay nagpakita nga ang pakigdait molungtad unya tali sa mga tawo ug mga hayop?

²¹ Aduna unyay pakigdait tali sa mga tawo ug mga hayop. Ang ihalas ug anad nga mga hayop magdungan sa pagpanibsib. Bisan ang gamayng bata dili mahadlok sa mga hayop nga maoy peligroso karon.​—Isaias 11:6-9; 65:25.

22. Unsa unyay mahitabo sa sakit?

²² Ang sakit mawala na. Ingong Magmamando sa langitnong Gingharian sa Diyos, ayohon ni Jesus ang mas daghang sakit kay sa dihang dinhi pa siya sa yuta. (Mateo 9:35; Marcos 1:40-42; Juan 5:5-9) Sa maong panahon “walay pumoluyo nga moingon: ‘Ako masakiton.’”​—Isaias 33:24; 35:5, 6.

23. Nganong ang pagkabanhaw makahatag ug kalipay sa atong mga kasingkasing?

²³ Ang namatay nga mga minahal buhion pag-usab uban ang kalaoman nga dili na gayod mamatay. Buhion pag-usab ang tanan nga natulog sa kamatayon nga anaa sa handomanan sa Diyos. Sa pagkatinuod, “aduna unyay pagkabanhaw sa mga matarong ug sa mga dili-matarong.”​—Buhat 24:15; Juan 5:28, 29.

24. Unsay imong pagbati bahin sa pagpuyo sa Paraiso sa yuta?

²⁴ Pagkatalagsaong kaugmaon ang nagpaabot sa mga mipalabi sa pagkakat-on bahin sa atong Dakong Maglalalang, si Jehova nga Diyos, ug sa pag-alagad kaniya! Ang umaabot nga Paraiso sa yuta mao ang gipunting ni Jesus sa dihang siya misaad sa mamumuhat ug daotan nga namatay tapad kaniya: “Ikaw makauban nako sa Paraiso.” (Lucas 23:43) Hinungdanon nga kita dugang makakat-on bahin kang Jesu-Kristo, nga pinaagi kaniya kining tanang panalangin mahimong posible.

1. Unsang bantogang pag-ampo ang pagasusihon karon?

MILYONMILYONG tawo sa tibuok kalibotan nasinati sa pag-ampo nga gitawag sa daghan ug Amahan Namo, o Pag-ampo sa Ginoo. Kanang duha ka pagtawag nagtumong sa usa ka bantogang pag-ampo nga gihatag ni Jesu-Kristo mismo ingong sulondan. Makahuloganon kaayo ang maong pag-ampo, ug ang paghisgot sa unang tulo ka hangyo niini makatabang kanimo nga mas mahibalo kon unsay tinuod nga gitudlo sa Bibliya.

2. Unsa ang tulo ka butang nga gitudlo ni Jesus nga iampo sa iyang mga tinun-an?

² Sa sinugdanan niining sulondang pag-ampo, gisugo ni Jesus ang iyang mga tigpatalinghog: “Busa, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’” (Mateo 6:9-13) Unsa ang kahulogan sa maong tulo ka hangyo?

3. Unsay kinahanglan natong mahibaloan bahin sa Gingharian sa Diyos?

³ Daghan na kitag nakat-onan bahin sa ngalan sa Diyos, si Jehova. Ug igoigo na ang atong nahisgotan bahin sa kabubut-on sa Diyos​—kon unsay iyang nahimo ug pagahimoon pa alang sa katawhan. Apan, unsay gitumong ni Jesus sa dihang iyang gisugo kita sa pag-ampo: “Paanhia ang imong gingharian”? Unsa ang Gingharian sa Diyos? Sa unsang paagi ang pag-abot niini magabalaan sa ngalan sa Diyos? Ug sa unsang paagi ang pag-abot sa Gingharian nalangkit sa pagbuhat sa kabubut-on sa Diyos?

KON UNSA ANG GINGHARIAN SA DIYOS

4. Unsa ang Gingharian sa Diyos, ug kinsa ang Hari niini?

⁴ Ang Gingharian sa Diyos maoy usa ka kagamhanan nga gitukod ni Jehova nga Diyos nga adunay usa ka Hari nga pinili sa Diyos. Kinsa ang Hari sa Gingharian sa Diyos? Si Jesu-Kristo. Ingong Hari, si Jesus labaw kay sa tanang tawhanong magmamando ug siya gitawag nga ang “Hari sa mga nagmando ingong mga hari ug Ginoo sa mga nagmando ingong mga ginoo.” (1 Timoteo 6:15) Siya adunay gahom sa pagbuhat ug labaw nga kaayohan kay kang bisan kinsa nga tawhanong magmamando, bisan pa ang kinamaayohan nila.

5. Diin gikan magmando ang Gingharian sa Diyos, ug ibabaw sa unsa?

⁵ Diin ba gikan magmando ang Gingharian sa Diyos? Buweno, hain man si Jesus? Makahinumdom ka nga imong nasayran nga siya gipatay diha sa usa ka kahoy sa pagsakit, ug unya siya gibanhaw. Wala madugay human niadto, siya misaka ngadto sa langit. (Buhat 2:33) Busa, atua didto ang Gingharian sa Diyos​—sa langit. Kanay hinungdan gitawag kini sa Bibliya nga usa ka “langitnong gingharian.” (2 Timoteo 4:18) Bisan pag ang Gingharian sa Diyos atua sa langit, kini magmando ibabaw sa yuta.​—Pinadayag 11:15.

6, 7. Unsay nakapahimo kang Jesus nga talagsaong Hari?

⁶ Unsay nakapahimo kang Jesus nga talagsaong Hari? Ang usa ka katarongan mao nga siya dili gayod mamatay. Kon itandi si Jesus sa tawhanong mga hari, ang Bibliya nagtawag kaniya nga “mao lamang ang nagbaton sa pagkawalay-kamatayon, nga nagpuyo sa kahayag nga dili-maduol.” (1 Timoteo 6:16) Nagpasabot kini nga ang tanang maayong butang nga buhaton ni Jesus magmalungtaron. Ug iyang pagabuhaton gayod ang dagko ug maayong mga butang.

⁷ Tagda kining tagna sa Bibliya bahin kang Jesus: “Ang espiritu ni Jehova mopahiluna kaniya, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova; ug siya magkalipay diha sa pagkahadlok kang Jehova. Ug siya dili mohukom sumala sa makita lamang sa iyang mga mata, ni mobadlong sumala sa butang nga nadungog lamang sa iyang mga dalunggan. Ug uban sa pagkamatarong siya magahukom sa mga timawa, ug uban sa katul-id siya magabadlong sa mga maaghop sa yuta.” (Isaias 11:2-4) Kanang mga pulonga nagpakita nga si Jesus mahimong usa ka matarong ug mahangawaon nga Hari ibabaw sa katawhan sa yuta. Buot ba nimo ang usa ka magmamando nga sama niana?

8. Kinsa ang magmando kauban ni Jesus?

⁸ Aniay laing kamatuoran bahin sa Gingharian sa Diyos: Si Jesus dili magmando nga mag-inusara. Aduna siyay kaubang mga magmamando. Pananglitan, si apostol Pablo miingon kang Timoteo: “Kon kita padayong mag-antos, kita usab magmando ingong mga hari uban kaniya.” (2 Timoteo 2:12) Sa pagkatinuod, si Pablo, Timoteo, ug ubang matinumanong mga tawo nga gipili sa Diyos magmando nga kauban ni Jesus diha sa langitnong Gingharian. Pila man ang makabaton sa maong pribilehiyo?

9. Pila man ang magmando kauban ni Jesus, ug kanus-a nagsugod ang Diyos sa pagpili kanila?

⁹ Sumala sa gipaila sa Kapitulo 7 niining basahona, si apostol Juan gihatagan ug usa ka panan-awon diin iyang nakita “ang Kordero [si Jesu-Kristo] nga nagbarog diha sa Bukid sa Zion [iyang harianong posisyon sa langit], ug uban kaniya ang usa ka gatos ug kap-atag-upat ka libo nga nakabaton sa iyang ngalan ug sa ngalan sa iyang Amahan nga nasulat diha sa ilang mga agtang.” Kinsa ba ang 144,000? Si Juan mismo nagtug-an kanato: “Mao kini sila ang nagpadayon pagsunod sa Kordero bisan asa siya moadto. Kini sila gipalit gikan sa katawhan ingong mga unang bunga ngadto sa Diyos ug sa Kordero.” (Pinadayag 14:1, 4) Sa pagkatinuod, sila mao ang matinumanong mga sumusunod ni Jesu-Kristo nga gipili sa linain aron magmando uban kaniya sa langit. Human mabanhaw gikan sa pagkapatay ngadto sa langitnong kinabuhi, “sila magamando ingong mga hari ibabaw sa yuta” kauban ni Jesus. (Pinadayag 5:10) Sukad sa mga adlaw sa mga apostoles, ang Diyos nagpilig matinumanong mga Kristohanon aron mabug-os ang gidaghanong 144,000.

10. Nganong usa ka mahigugmaong kahikayan nga si Jesus ug ang 144,000 magmando sa katawhan?

¹⁰ Mahigugmaon kaayo ang kahikayan nga si Jesus ug ang 144,000 magmando sa katawhan. Ang usa ka katarongan mao nga si Jesus nasinati kon unsay pagkatawhanon ug kon unsay pag-antos. Si Pablo miingon nga si Jesus “dili usa nga dili mobati sa atong mga kaluyahon, kondili usa nga nasulayan sa tanang paagi sama kanato, apan walay sala.” (Hebreohanon 4:15; 5:8) Ang iyang kaubang mga magmamando nag-antos usab ug nag-agwanta ingon nga mga tawo. Dugang pa, sila nakigbisog sa dili-hingpit nga kahimtang ug nag-antos sa tanang matang sa sakit. Segurado nga sila makasabot sa mga suliran nga giatubang sa katawhan!

UNSAY PAGABUHATON SA GINGHARIAN SA DIYOS?

11. Nganong si Jesus miingon nga ang iyang mga tinun-an angayng mag-ampo nga matuman unta ang kabubut-on sa Diyos sa langit?

¹¹ Sa dihang miingon si Jesus nga ang iyang mga tinun-an angayng mag-ampo nga moanhi ang Gingharian sa Diyos, siya miingon usab nga angay silang mag-ampo nga matuman unta ang kabubut-on sa Diyos “maingon sa langit, mao man usab sa yuta.” Ang Diyos anaa sa langit, ug ang iyang kabubut-on kanunayng gibuhat didto sa matinumanong mga manulonda. Ugaling lang, sa Kapitulo 3 niining basahona atong nahibaloan nga ang usa ka daotang manulonda mihunong sa pagbuhat sa kabubut-on sa Diyos ug siya maoy hinungdan nga nakasala si Adan ug Eva. Sa Kapitulo 10, dugang natong mahibaloan ang gitudlo sa Bibliya mahitungod nianang daotang manulonda, kinsa atong nailhang si Satanas nga Yawa. Si Satanas ug ang espiritung mga manulonda nga mipili sa pagsunod kaniya nga gitawag ug mga demonyo gitugotan nga magpabilin kadiyot sa langit. Busa, dili tanan nga didto niadto sa langit nagbuhat sa kabubut-on sa Diyos. Kana mausab ra sa dihang ang Gingharian sa Diyos mosugod na unya sa pagmando. Ang bag-ong naentrono nga Hari, si Jesu-Kristo, makiggubat kang Satanas.​—Pinadayag 12:7-9.

12. Unsang duha ka hinungdanong mga hitabo ang gibatbat sa Pinadayag 12:10?

¹² Ang mosunod nga matagnaong mga pulong nagbatbat kon unsay mahitabo: “Nadungog ko ang usa ka makusog nga tingog didto sa langit nga nag-ingon: ‘Ania na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo, tungod kay ang magsusumbong sa atong mga igsoon [si Satanas] gitambog na, kinsa nagsumbong kanila adlaw ug gabii atubangan sa atong Diyos!’” (Pinadayag 12:10) Imo bang namatikdan ang duha ka hinungdanon kaayong mga hitabo nga gibatbat nianang bersikuloha sa Bibliya? Una, ang Gingharian sa Diyos ubos kang Jesu-Kristo nagsugod na sa pagmando. Ikaduha, si Satanas gipalagpot na gikan sa langit ug gitambog nganhi sa yuta.

13. Unsay sangpotanan sa pagpalagpot kang Satanas gikan sa langit?

¹³ Unsay mga sangpotanan nianang duha ka hitabo? Mahitungod sa nahitabo sa langit, atong mabasa: “Tungod niini, paglipay kamong kalangitan ug kamong nanagpuyo niini!” (Pinadayag 12:12) Sa pagkatinuod, ang matinumanong mga manulonda sa langit naglipay tungod kay sa pagkawala ni Satanas ug sa iyang mga demonyo, ang tanan sa langit maoy matinumanon kang Jehova nga Diyos. Adunay bug-os, way-bugto nga kalinaw ug panag-uyon didto. Sa pagkakaron ang kabubut-on sa Diyos ginatuman na sa langit.

14. Unsay nahitabo tungod kay si Satanas gitambog na nganhi sa yuta?

¹⁴ Apan, komosta man ang yuta? Ang Bibliya nag-ingon: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” (Pinadayag 12:12) Si Satanas nasuko tungod kay siya gipalagpot gikan sa langit ug tungod kay siya aduna na lamay hamubong panahon. Sa iyang kasuko siya nagpahinabog kasakitan o ‘kaalaotan’ sa yuta. Dugang natong mahibaloan ang maong ‘kaalaotan’ sa sunod kapitulo. Apan tungod sa maong mga panghitabo, kita makasukna, Sa unsang paagi ipatuman sa Gingharian ang kabubut-on sa Diyos dinhi sa yuta?

15. Unsa ang kabubut-on sa Diyos alang sa yuta?

¹⁵ Ania, hinumdomi kon unsay kabubut-on sa Diyos alang sa yuta. Kana imong nahibaloan sa Kapitulo 3. Sa Eden, gipakita sa Diyos nga ang iyang kabubut-on mao nga kining yutaa mahimong paraiso nga napunog dili-mamatay, matarong nga katawhan. Si Adan ug Eva nakasala tungod ni Satanas, ug kana nakalangan sa pagkatuman sa kabubut-on sa Diyos alang sa yuta apan kana wala makapausab niana. Katuyoan gihapon sa Diyos nga “ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Ug kana pagatumanon sa Gingharian sa Diyos. Sa unsang paagi?

16, 17. Unsay gipadayag kanato sa Daniel 2:44 bahin sa Gingharian sa Diyos?

¹⁶ Hunahunaa ang tagna nga anaa sa Daniel 2:44. Atong mabasa dinha: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” Unsay ginapadayag niini kanato bahin sa Gingharian sa Diyos?

¹⁷ Una, kini nagpadayag kanato nga ang Gingharian sa Diyos pagatukoron ‘sa mga adlaw niadtong mga haria,’ o samtang naglungtad pa ang ubang mga gingharian. Ikaduha, kini nagpadayag kanato nga ang Gingharian molungtad hangtod sa hangtod. Kini dili mabuntog ug dili pulihan sa laing kagamhanan. Ikatulo, atong masabtan nga aduna unyay gubat tali sa Gingharian sa Diyos ug sa mga gingharian niining kalibotana. Gingharian sa Diyos ang makadaog. Sa kataposan, kini na unya ang bugtong kagamhanan ibabaw sa katawhan. Dayon ang mga tawo magpahimulos sa labing maayong pagmando nga ilang masinati sukad.

18. Unsa ang ngalan sa kataposang gubat tali sa Gingharian sa Diyos ug sa mga kagamhanan niining kalibotana?

¹⁸ Daghan ug impormasyon ang Bibliya bahin nianang kataposang gubat tali sa Gingharian sa Diyos ug sa mga kagamhanan niining kalibotana. Pananglitan, kini nagtudlo nga samtang nagsingabot ang kataposan, ang daotang mga espiritu magpakaylap ug mga bakak aron limbongan ang “mga hari sa tibuok nga gipuy-ang yuta.” Unsay katuyoan? “Aron sa pagtigom kanila [sa mga hari] ngadto sa gubat sa dakong adlaw sa Diyos nga Labing Gamhanan.” Ang mga hari sa yuta pagatigomon sa “dapit nga gitawag sa Hebreohanon ug Har–​Magedon.” (Pinadayag 16:14, 16) Tungod sa gipadayag nianang duha ka bersikulo, ang kataposang panag-away tali sa tawhanong mga kagamhanan ug sa Gingharian sa Diyos gitawag ug gubat sa Armagedon.

19, 20. Unsay nakapugong sa pagkatuman sa kabubut-on sa Diyos sa yuta karon mismo?

¹⁹ Unsay malampos sa Gingharian sa Diyos pinaagi sa Armagedon? Hunahunaa pag-usab kon unsa ang kabubut-on sa Diyos alang sa yuta. Ang katuyoan ni Jehova nga Diyos mao nga ang yuta mapunog matarong, hingpit nga katawhan nga mag-alagad kaniya sa Paraiso. Unsay nakapugong sa pagkahitabo niana karon mismo? Una, kita makasasala, ug kita masakit ug mamatay. Ugaling lang, atong nahibaloan sa Kapitulo 5 nga si Jesus namatay alang kanato aron kita mabuhi hangtod sa hangtod. Lagmit nga imong nahinumdoman ang mga pulong nga natala diha sa Ebanghelyo ni Juan: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”​—Juan 3:16.

²⁰ Ang laing suliran mao nga daghang tawo nagbuhat ug daotang mga butang. Sila mamakak, manglimbong, ug mohimog imoralidad. Dili nila gustong mobuhat sa kabubut-on sa Diyos. Ang mga tawo nga nagbuhat ug daotang mga butang pagalaglagon panahon sa gubat sa Diyos sa Armagedon. (Salmo 37:10) Apan ang laing hinungdan nga ang kabubut-on sa Diyos wala pa matuman sa yuta mao nga ang mga kagamhanan wala magdasig sa katawhan sa pagbuhat niana. Daghang kagamhanan maoy mahuyang, mapintas, o dili matarong. Ang Bibliya prangkang nag-ingon: “Ang tawo nagmando sa tawo alang sa iyang kadaotan.”​—Ecclesiastes 8:9.

21. Sa unsang paagi ipatuman sa Gingharian ang kabubut-on sa Diyos dinhi sa yuta?

²¹ Human sa Armagedon, ang katawhan mailalom sa usa lamang ka kagamhanan, ang Gingharian sa Diyos. Ang maong Gingharian magbuhat sa kabubut-on sa Diyos ug mohatag ug daghang panalangin. Pananglitan, kini maghanaw kang Satanas ug sa iyang mga demonyo. (Pinadayag 20:1-3) Ang epekto sa halad ni Jesus ipadapat aron ang matinumanong mga tawo dili na masakit ug mamatay. Hinunoa, ubos sa pagmando sa Gingharian sila mabuhi hangtod sa hangtod. (Pinadayag 22:1-3) Ang yuta mahimong paraiso. Sa maong paagi ipatuman sa Gingharian ang kabubut-on sa Diyos sa yuta ug kini magbalaan sa ngalan sa Diyos. Unsay ipasabot niini? Kini nagpasabot nga ilalom sa Gingharian sa Diyos ang tanang buhi sa kataposan magpasidungog na sa ngalan ni Jehova.

KANUS-A MOLIHOK ANG GINGHARIAN SA DIYOS?

22. Nganong nahibalo kita nga ang Gingharian sa Diyos wala pa moabot sa dinhi si Jesus sa yuta o human dayon sa iyang pagkabanhaw?

²² Sa dihang gisugo ni Jesus ang iyang mga sumusunod sa pag-ampo, “Paanhia ang imong gingharian,” tin-aw nga ang Gingharian wala pa moabot niadtong panahona. Kana ba miabot na sa dihang si Jesus mikayab ngadto sa langit? Wala, tungod kay si Pedro ug Pablo miingon nga sa pagkabanhaw ni Jesus, ang tagna sa Salmo 110:1 natuman diha kaniya: “Ang giingon ni Jehova sa akong Ginoo mao: ‘Lingkod sa akong tuong kamot hangtod nga ibutang ko ang imong mga kaaway nga tumbanan sa imong mga tiil.’” (Buhat 2:32-35; Hebreohanon 10:12, 13) Diha pay usa ka yugto sa pagpaabot.

23. (a) Kanus-a nagsugod sa pagmando ang Gingharian sa Diyos? (b) Unsay hisgotan sa sunod kapitulo?

²³ Unsa ka dugay? Panahon sa ika-19 ug sa sayong bahin sa ika-20 nga siglo, anam-anam nga nasabtan sa sinserong mga estudyante sa Bibliya nga ang yugto sa pagpaabot matapos sa 1914. (Mahitungod niining petsaha, tan-awa ang Apendise, mga panid 215-18.) Ang mga panghitabo sa kalibotan nga nagsugod sa 1914 nagpamatuod nga husto ang pagsabot sa maong sinserong mga estudyante sa Bibliya. Ang pagkatuman sa tagna sa Bibliya nagpakita nga sa 1914, si Kristo nahimong Hari ug ang langitnong Gingharian sa Diyos nagsugod na sa pagmando. Busa, kita nagkinabuhi na sa ‘hamubong panahon’ nga nahibilin kang Satanas. (Pinadayag 12:12; Salmo 110:2) Segurado nga kita makasulti nga sa dili na madugay ang Gingharian sa Diyos molihok aron ipatuman ang kabubut-on sa Diyos dinhi sa yuta. Kini ba talagsaong balita alang kanimo? Nagtuo ka ba nga kini tinuod? Ang sunod kapitulo makatabang kanimo sa pagsabot nga ang Bibliya tinuod nga nagtudlo niining mga butanga.