May Pribilehiyo Ka ba Kaniadto? Mahimo Ka Bang Mokab-ot Pag-usab?

MAY pribilehiyo ka ba kaniadto sa kongregasyon? Tingali ikaw usa ka ministeryal nga alagad o ansiyano kaniadto. Lagmit nasulayan na nimo ang bug-os-panahong pag-alagad. Sa walay duhaduha imong nasinati ang kalipay ug dakong katagbawan sa imong mga asaynment, apan tungod sa pipila ka hinungdan kinahanglan nimong moundang.

Tingali miluwat ka sa imong pribilehiyo aron atimanon ang imong pamilya. Sa laing bahin, basin ang katigulangon o dili-maayong panglawas maoy hinungdan. Ang maong mga desisyon dili timailhan sa kapakyasan. (1 Tim. 5:8) Sa unang siglo, si Felipe nag-alagad ingong misyonaryo, apan sa ulahi siya mibalhin sa Cesarea, diin siya nag-atiman sa iyang pamilya. (Buh. 21:8, 9) Sa natigulang na si Haring David, iyang gihikay nga ang iyang anak nga si Solomon mopuli sa iyang trono. (1 Hari 1:1, 32-35) Bisan pa niana, si Felipe ug David pareho gihapong gihigugma ug gipabilhan ni Jehova ug sila gitahod sa mga tawo hangtod karong adlawa.

Apan, tingali natangtangan ka kaniadto sa imong pribilehiyo sa pag-alagad. Tungod ba kadto sa dili-maalamong panggawi? O tungod sa mga problema sa pamilya? (1 Tim. 3:2, 4, 10, 12) Lagmit wala ka gani mouyon sa maong desisyon, ug tingali hangtod karon nahiubos ka pa gihapon.

Mahimo Kang Mokab-ot Pag-usab ug mga Pribilehiyo

Ang pagkawala ba sa pribilehiyo sa pag-alagad permanente? Kasagaran, dili. Apan, aron makaalagad pag-usab, kinahanglang maningkamot ka sa pagkab-ot niana. (1 Tim. 3:1) Apan nganong tinguhaon nimo kana? Sa samang rason nga ikaw nagpahinungod sa Diyos—ang gugma kang Jehova ug alang niadtong nag-alagad kaniya. Kon buot nimong ipasundayag kanang gugmaha pinaagi sa pag-alagad pag-usab, gamiton ka ni Jehova, uban sa tanang kasinatian nga imong nabatonan sukad niadtong duna ka pay pribilehiyo.

Hinumdomi ang pasalig nga gihatag ni Jehova sa Israel human kuhaa sa Diyos ang ilang espesyal nga baroganan. Siya miingon: “Ako si Jehova; ako dili mausab. Ug kamo nga mga anak ni Jacob; kamo wala modangat sa inyong kataposan.” (Mal. 3:6) Si Jehova nahigugma sa mga Israelinhon ug siya nagtinguha nga gamiton pa silag dugang. Sa susama, interesado usab si Jehova nga gamiton ka sa umaabot. Unsay imong mahimo sa imong kahimtang karon? Ang pag-alagad sa teokratikanhong intereses mas nagdepende sa imong pagbaton ug maayong relasyon sa Diyos kay sa abilidad. Busa, samtang wala ka pay dugang mga responsibilidad sa kongregasyon, maningkamot sa pagpalig-on sa imong relasyon kang Jehova.

Aron “magmakusganon” sa pagtuo, angay nimong ‘pangitaon si Jehova ug ang iyang kusog.’ (1 Cor. 16:13; Sal. 105:4) Ang kinasingkasing nga pag-ampo maoy usa ka paagi nga imo kining mahimo. Sa dihang sultihan nimo si Jehova sa imong kahimtang, ipahayag ang imong pagbati ug pangayoa ang iyang espiritu. Sa pagbuhat niana, mas masuod ka kang Jehova, ug kana magpalig-on kanimo. (Sal. 62:8; Filip. 4:6, 13) Ang mauswagong pagtuon sa Pulong sa Diyos maoy laing paagi nga mapalig-on ang imong espirituwalidad. Kay diyutay pa lang ang imong responsibilidad sa pagkakaron, hayan mas daghan kag mahimo maylabot sa personal ug pamilyahanong pagtuon, tingali imong mabalik ang rutina sa pagtuon nga lisod mentinahon.

Siyempre, ikaw naghawas gihapon kang Jehova ingong usa sa iyang mga Saksi. (Isa. 43:10-12) Ang kinamaayohang pribilehiyo nga puwede natong mabatonan mao ang pagkahimong “isigkamagbubuhat sa Diyos.” (1 Cor. 3:9) Ang paggugol ug dugang panahon diha sa kanataran maoy maayo kaayong paagi sa pagpalig-on sa imong espirituwalidad ug nianang sa mga kauban nimo sa ministeryo.

Pagsagubang sa Imong Pagbati

Mahimong mobati kag kaulaw ug pagmahay sa pagkawala sa imong pribilehiyo. Lagmit pakamatarongon nimo ang imong nabuhat. Apan, komosta man kon human madunggi sa natudlong mga igsoon ang imong mga pangatarongan, sila modesisyon nga dili gihapon ka angayang maghupot ug pribilehiyo? Lagmit maghambin kag kasuko sa maong mga igsoon, nga magpugong kanimo sa pagkab-ot pag-usab ug mga pribilehiyo o sa pagkakat-on gikan sa imong nabuhat nga kasaypanan. Atong hisgotan kon sa unsang paagi ang mga kasinatian ni Job, Manases, ug Jose makatabang sa usa sa pagsagubang sa negatibong mga pagbati.

Si Job naghawas sa uban atubangan kang Jehova ug nag-alagad ingong ansiyano ug maghuhukom sa usa ka patriarkal nga katilingban. (Job 1:5; 29:7-17, 21-25) Dayon, sa labing malamposong yugto sa iyang kinabuhi, nawala ang iyang katigayonan, mga anak, ug maayong panglawas. Gawas pa niana, nawala usab ang iyang maayong dungog. “Sila nagkatawa kanako,” si Job miingon, “sila nga manghod pa kay kanako.”—Job 30:1.

Kay mibati nga siya inosente, gusto ni Job nga mangatarongan sa Diyos. (Job 13:15) Bisan pa niana, si Job andam sa paghulat kang Jehova, ug kini miresultag maayo. Iyang nakat-onan nga kinahanglan gayod siyang badlongon, ilabina sa iyang reaksiyon sa dihang siya nailalom sa pagsulay. (Job 40:6-8; 42:3, 6) Tungod sa pagkamapainubsanon ni Job, siya dagayang gipanalanginan sa Diyos.—Job 42:10-13.

Kon nawad-an kag pribilehiyo tungod sa imong sayop nga binuhatan, tingali maghunahuna ka kon pasayloon ka pa ba ni Jehova ug sa mga igsoon. Buweno, tagda ang kaso ni Haring Manases sa Juda. Siya “nagbuhat sa hingapin kon unsay daotan sa mga mata ni Jehova, aron sa pagpasuko kaniya.” (2 Hari 21:6) Bisan pa niana, si Manases namatay nga matinumanon, nga nagmando ingong hari. Sa unsang paagi nahitabo kana?

Sa ulahi gidawat ni Manases ang disiplina. Human niya isalikway ang mga pasidaan, si Jehova nagpadala sa mga Asiryanhon, nga nagkadena ug nagbihag kaniya sa Babilonya. Didto, “gilukmay [ni Manases] ang nawong ni Jehova nga iyang Diyos ug nagpadayon [siya sa] pagpaubos pag-ayo sa iyang kaugalingon tungod sa Diyos sa iyang mga katigulangan. Ug siya nagpadayon pag-ampo Kaniya.” Tungod sa kinasingkasing nga paghinulsol ni Manases, siya gipasaylo ni Jehova.—2 Cron. 33:12, 13.

Talagsa rang mabalik ug dungan ang tanang pribilehiyo nga nawala. Apan, paglabay sa panahon, mahimong hatagan kag ginagmayng mga responsibilidad. Ang pagdawat niana ug paghimo sa imong kinamaayohan sagad motultol sa paghatag kanimog dugang pang mga asaynment. Apan wala kana magpasabot nga dali ra ang tanan. May mga panahon tingali nga mahigawad ka. Bisan pa niana, ang pagkaandam ug pagkamalahutayon magdalag maayong bunga.

Tagda pananglitan si Jose nga anak ni Jacob. Sa edad nga 17, gibaligya si Jose sa iyang mga igsoon sa pagkaulipon. (Gen. 37:2, 26-28) Tataw nga dili kini ang matang sa pagtratar nga gidahom niya gikan sa iyang mga igsoon sa amahan. Bisan pa niana, siya andam sa pagtrabaho ubos sa maong mga kahimtang, ug uban sa panalangin ni Jehova siya “nahimong tagdumala sa balay sa iyang agalon.” (Gen. 39:2) Sa ulahi, siya nabilanggo. Apan siya nagmatinumanon, ug si Jehova nag-uban kaniya. Busa sa ngadtongadto siya nahimong sinaligan diha sa bilanggoan.—Gen. 39:21-23.

Wala masayod si Jose nga adunay katuyoan ang iyang pagkabilanggo. Siya nagpadayon lamang sa pagbuhat kutob sa iyang mahimo. Tungod niana, si Jehova naggamit kaniya aron mapreserbar ang linya sa kaliwatan nga motultol sa gisaad nga Binhi. (Gen. 3:15; 45:5-8) Bisan tuod walay usa kanato ang makadahom nga mahatagag pribilehiyo nga sama nianang kang Jose, ang inspiradong asoy nagpakita nga si Jehova nalangkit sa mga pribilehiyo nga madawat sa Iyang mga alagad. Sama kang Jose, magmaandam kanunay sa pagdawat ug mga pribilehiyo.

Pagkakat-on Gikan sa Malisod nga mga Kasinatian

Si Job, Manases, ug Jose nakasinatig makapahugno nga mga kahimtang. Silang tulo midawat sa kon unsay gitugot ni Jehova nga masinatian nila, ug ang matag usa nakakat-on ug hinungdanong leksiyon. Unsa kahay imong makat-onan gikan kanila?

Susiha kon unsay gustong itudlo ni Jehova kanimo. Tungod sa iyang pag-antos, si Job nahimong mahunahunaon sa kaugalingon ug nalimot sa mas hinungdanong mga isyu. Apan tungod sa mahigugmaong pagtul-id ni Jehova, siya naulian sa iyang panimbang, nga miangkon: “Ako misulti, apan wala ako makasabot.” (Job 42:3) Kon nasakitan ka tungod sa pagkawala sa imong pribilehiyo, ‘ayaw paghunahuna ug labaw bahin sa imong kaugalingon kay sa angay nga hunahunaon, kondili maghunahuna sa paagi nga makabaton sa maayong panghunahuna.’ (Roma 12:3) Tingali si Jehova naningkamot nga mapasibo ka sa paagi nga wala pa nimo bug-os masabti.

Dawata ang disiplina. Lagmit sa sinugdan mibati si Manases nga bug-at ra ang disiplina nga iyang nadawat. Apan, siya midawat ra niana, naghinulsol, ug mibiya sa iyang daotang binuhatan. Bisag unsa pay imong bation sa disiplina nga imong nadawat, ‘ipaubos ang imong kaugalingon sa mga mata ni Jehova, ug ikaw iyang pagabayawon.’—1 Ped. 5:6; Sant. 4:10.

Magmapailobon ug magmaandam. Ang mga kasinatian ni Jose mahimo untang magtukmod kaniya sa pagdumot ug pagpanimalos. Hinunoa, naugmad niya ang hait nga salabotan ug kaluoy. (Gen. 50:15-21) Kon nahigawad ka, magpailob. Magpabansay kang Jehova.

May pribilehiyo ka ba sa kongregasyon kaniadto? Hatagig higayon si Jehova sa paghatag kanimog mga pribilehiyo sa umaabot. Palig-ona ang imong espirituwalidad. Magmapailobon ug magmapaubsanon. Magmaandam sa pagdawat ug bisan unsang asaynment nga bukas alang kanimo. Magmasaligon nga “walay bisan unsang maayo nga ihikaw ni Jehova gikan niadtong nagalakaw nga dili salawayon.”—Sal. 84:11.

[Blurb sa panid 30]

Palig-ona ang imong pagtuo pinaagig kinasingkasing nga pag-ampo

[Hulagway sa panid 31]

Ang paggugol ug mas daghang panahon diha sa kanataran maoy maayong paagi sa pagpalig-on sa imong espirituwalidad

[Hulagway sa panid 32]

Hatagig higayon si Jehova sa paghatag kanimog mga pribilehiyo sa umaabot