1-3. (a) Nganong si Josue maayong panig-ingnan kanato? (b) Unsay angay natong hinumdoman sa dihang mohimog desisyon?

PAGPILI​—hinungdanon kaayo kini sa kinabuhi. Ang usa makabuot kon unsang direksiyon sa kinabuhi ang iyang pilion. Sa pag-ilustrar: Handurawa ang usa ka tawo nga naglakaw sa dalan. Pag-abot niya sa unahan, misanga kini sa duha ka dalan. Hain niini ang iyang subayon? Kon nahibalo na siya sa iyang adtoan, iyang pilion ang dalan paingon sa iyang destinasyon ug dili kadtong magpahilayo kaniya gikan niana.

² Ang Bibliya naghisgot ug daghang indibiduwal nga nakaatubang ug susamang situwasyon. Pananglitan, si Cain kinahanglang mopili kon magpadaog siya sa iyang kasuko o pugngan kini. (Gen. 4:6, 7) Si Josue kinahanglang mopili kon mosimba siya sa matuod nga Diyos o sa bakak nga mga diyos. (Jos. 24:15) Kay tumong niya nga magpabiling suod kang Jehova, gipili niya ang dalan nga motultol niana. Si Cain walay ingon niana nga tumong, ug gipili niya ang dalan nga nagpahilayo kaniya kang Jehova.

³ Usahay, malisdan kita sa paghimog desisyon. Kon mahitabo kana, hinumdomi ang imong destinasyon, o tumong​—ang paghimaya kang Jehova sa tanan nimong himoon ug ang paglikay sa bisan unsang butang nga magpahilayo kanimo gikan kaniya. (Basaha ang Hebreohanon 3:12.) Niini ug sa sunod nga artikulo, atong hisgotan ang pito ka bahin sa kinabuhi nga dili nato angayng tugotang magpahilayo kanato kang Jehova.

TRABAHO UG KARERA

4. Nganong importante ang pagpanarbaho?

⁴ Obligasyon sa mga Kristohanon nga tagan-an ang ilang kaugalingon ug ang ilang pamilya. Ang Bibliya nag-ingon nga kon ang usa dili buot motagana sa iyang panimalay, siya mas daotan pa kay sa tawong way pagtuo. (2 Tes. 3:10; 1 Tim. 5:8) Tin-aw nga importanteng bahin sa kinabuhi ang pagpanarbaho. Apan kon dili ka magbantay, ang trabaho ug karera magpahilayo kanimo kang Jehova. Sa unsang paagi?

5. Unsay angayng konsiderahon una modawat ug trabaho?

⁵ Pananglit nangita kag trabaho. Kon nihit ang trabaho sa inyong lugar, basin madani ka sa pagdawat sa bisan unsang trabaho nga unang itanyag kanimo. Apan komosta kon ang matang sa trabaho supak sa mga prinsipyo sa Bibliya? O kaha makahurot kini sa panahon nga angay unta nimong igahin sa kongregasyon o sa pamilya? Dawaton ba gihapon nimo kini, nga maghunahunang mas maayo na lang kini kay sa walay trabaho? Hinumdomi, ang pagpili sa sayop nga dalan magpahilayo kanimo kang Jehova. (Heb. 2:1) Nangita ka man o naghunahunang mobalhin ug trabaho, sa unsang paagi ka makahimog maalamong desisyon?

6, 7. (a) Paghatag ug duha ka magkalahing tumong sa pagpanarbaho. (b) Hain niini nga tumong ang magpasuod kanimo kang Jehova, ug ngano?

⁶ Sa nahisgotan na, hinumdomi ang imong tumong. Pangutan-a ang kaugalingon, ‘Nganong nanarbaho man ko?’ Kon ang imong pangunang tumong mao ang pagtagana sa kaugalingon ug sa pamilya aron makaalagad kang Jehova, panalanginan niya ang imong mga paningkamot. (Mat. 6:33) Matabangan ka ni Jehova kon kalit kang mawad-ag trabaho o mahugno ang ekonomiya. (Isa. 59:1) Nahibalo siya “kon unsaon pagluwas sa katawhan nga may diyosnong pagkamahinalaron gikan sa pagsulay.”​—2 Ped. 2:9.

⁷ Sa laing bahin, komosta kon ang imong tumong mao ang pagpadato? Tingali molampos ka. Apan hinumdomi nga ang imong gituohang kalamposan may daotang sangpotanan. (Basaha ang 1 Timoteo 6:9, 10.) Ang sobrang pagpangagpas sa bahandi ug karera magpahilayo lamang kanimo kang Jehova.

8, 9. Unsay angayng konsiderahon sa mga ginikanan labot sa ilang tinamdan sa trabaho? Ipatin-aw.

⁸ Kon ikaw usa ka ginikanan, hunahunaa kon unsay epekto sa imong panig-ingnan nganha sa imong mga anak. Unsay ilang nakita nga labing importante kanimo​—imong karera o ang imong relasyon kang Jehova? Kon ilang nakita nga ang posisyon, dungog, ug bahandi mao ang labing importante kanimo, dili kaha subayon usab nila ang maong sayop nga dalan? Mamenosan kaha ang ilang pagtahod kanimo ingong ginikanan? Usa ka batan-ong Kristohanon miingon: “Sukad sa bata pa ko, puliki na sa trabaho si Papa. Sa primero, nagkugi siya aron maharuhay ang among kahimtang. Gusto niyang maatiman mi pag-ayo. Apan nausab siya sa ulahi. Sige na lang siyag trabaho, ug mamalit nag mahalong mga butang nga wala kinahanglana. Mao nga ang among pamilya nailhang kuwartahan imbes nga makapadasig sa uban sa espirituwal. Mas pilion pa nako ang espirituwal nga pagpaluyo ni Papa kay sa iyang kuwarta.”

⁹ Mga ginikanan, ayaw ipahilayo ang inyong kaugalingon kang Jehova pinaagi sa paghatag ug sobrang importansiya sa inyong karera. Ipakita sa inyong mga anak nga nagtuo gayod kamo nga ang labing hinungdanong bahandi nga mabatonan maoy espirituwal, dili materyal.​—Mat. 5:3.

10. Unsay angayng konsiderahon sa usa ka batan-on sa dihang mopilig karera?

¹⁰ Kon ikaw usa ka batan-ong naghunahuna kon unsang karera ang pilion, sa unsang paagi ka makahimog hustong desisyon? Sama sa nahisgotan na, kinahanglang nahibalo ka kon unsay imong tumong sa kinabuhi. Ang imo bang gihunahunang kurso ug trabaho makatabang kanimo sa pagpangagpas sa intereses sa Gingharian nga mas bug-os, o magpahilayo na hinuon kanimo kang Jehova? (2 Tim. 4:10) Tumong ba nimo nga mahisama sa mga tawo sa kalibotan, nga ang kalipay nagdepende sa gidaghanon sa ilang kuwarta? O mosalig ka ba kang Jehova sama kang David, kinsa miingon: “Batan-on ako kaniadto, ako natigulang na usab, apan wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay”? (Sal. 37:25) Hinumdomi nga ang usa ka dalan magpahilayo kanimo kang Jehova, samtang ang lain motultol kanimo sa kinamaayohang kinabuhi. (Basaha ang Proverbio 10:22; Malaquias 3:10.) Unsang dalana ang imong pilion?a

LULINGHAYAW UG KALINGAWAN

11. Unsay giingon sa Bibliya bahin sa lulinghayaw ug kalingawan, apan unsay angay natong hinumdoman?

¹¹ Ang Bibliya wala mag-ingon nga sayop ang paglingawlingaw o usik kini sa panahon. “Ang lawasnong pagbansay may diyutayng kapuslanan,” misulat si Pablo kang Timoteo. (1 Tim. 4:8) Miingon pa gani ang Bibliya nga may “panahon sa pagkatawa” ug “panahon sa paglukso,” ug nagdasig kini kanato sa pagbaton ug igong pahulay. (Eccl. 3:4; 4:6) Apan kon dili ka magbantay, ang lulinghayaw ug kalingawan makapahilayo kanimo kang Jehova. Sa unsang paagi? Sagad ang kapeligrohan nalangkit niining duha ka butang​—ang matang sa kalingawan ug ang gidaghanon sa panahon nga imong ginagugol niini.

12. Unsang mga butang ang angay nimong tagdon labot sa imong lulinghayaw ug kalingawan?

¹² Una, tagda ang matang sa kalingawan. Daghang maayong matang sa lulinghayaw ug kalingawan. Apan kadaghanan sa kalingawan karon nagpasiugda sa mga butang nga gidumtan sa Diyos, lakip ang kapintasan, espiritismo, ug imoralidad. Busa kinahanglang susihon nimog maayo ang imong kalingawan. Unsay epekto niini kanimo? Nagdasig ba kini kanimo nga mahimong bayolente, maindigon, o nasyonalistiko? (Prov. 3:31) Nakahurot ba kini sa imong kuwarta? Nakapandol ba kini sa uban? (Roma 14:21) Unsang matanga sa mga tawo ang imong nakauban niini nga kalingawan? (Prov. 13:20) Kini ba nagdani kanimo sa pagbuhat ug daotan?​—Sant. 1:14, 15.

13, 14. Unsay angay nimong tagdon bahin sa panahon nga imong ginagugol sa paglingawlingaw?

¹³ Tagda usab ang gidaghanon sa panahon nga imong ginagugol sa lulinghayaw ug kalingawan. Pangutan-a ang kaugalingon, ‘Naggugol ba kog daghan kaayong panahon sa paglulinghayaw nga diyutay na lang ang nahibilin alang sa espirituwal nga mga kalihokan?’ Kon mogugol kag daghang panahon sa lulinghayaw ug kalingawan, kini dili na makapalagsik. Sa pagkatinuod, mas nag-enjoy sa paglulinghayaw kadtong naggugol lang ug igong panahon niini. Ngano? Kay nahibalo sila nga ilang giuna “ang mas hinungdanong mga butang,” busa dili sila makonsensiya dihang maglingawlingaw.​—Basaha ang Filipos 1:10, 11.

¹⁴ Morag makalingaw ang paggugol ug daghang panahon sa paglingawlingaw, apan kini makapahilayo kanimo kang Jehova. Nahitabo kini kang Kim, usa ka 20 anyos nga sister. Matod niya, “Pirme kong naa sa mga parti​—kada Biyernes, Sabado, ug Dominggo. Apan karon, akong nakita nga daghan pang mas importanteng butang nga angayng himoon. Pananglitan, ingong payunir, kinahanglan kong momatag alas 6:00 sa buntag para mosangyaw. Busa dili ko angayng magparti-parti hangtod ala una o alas dos sa kadlawon. Nahibalo ko nga dili daotan ang tanang parti, apan mahimo kining dakong kabaldahan. Sama sa ubang butang, dili kita angayng mogugol ug daghang panahon niini.”

15. Sa unsang paagi ang mga ginikanan makatabang sa ilang mga anak sa pagpilig maayong kalingawan?

¹⁵ Responsabilidad sa mga ginikanan ang pagtagana sa materyal, espirituwal, ug emosyonal nga panginahanglan sa ilang pamilya. Lakip niana ang paglingawlingaw. Kon ikaw usa ka ginikanan, ayaw isipa nga daotan ang tanang kalingawan. Apan pagbantay usab sa dili maayong kalingawan. (1 Cor. 5:6) Kon pilion nimo kinig maayo, makakita kag kalingawan nga tinuod nga makapalagsik sa imong pamilya.b Niining paagiha, ikaw ug ang imong mga anak makasubay sa dalan nga mas magpasuod kaninyo kang Jehova.

RELASYON SA PAMILYA

16, 17. Unsang situwasyon ang nakapaguol sa daghang ginikanan, ug giunsa nato pagkahibalo nga nakasabot si Jehova sa ilang gibati?

¹⁶ Suod kaayo ang relasyon tali sa ginikanan ug anak, mao nga gigamit kini ni Jehova sa pag-ilustrar sa iyang gugma alang sa katawhan. (Isa. 49:15) Busa normal lang nga masubo pag-ayo kon ang usa ka membro sa pamilya mobiya kang Jehova. Usa ka sister nga napalagpot ang anak nga babaye miingon: “Naguol kaayo ko. Ako nakapangutana, ‘Nganong mibiya man siya kang Jehova?’ Nakonsensiya ko ug gibasol nako ang akong kaugalingon.”

¹⁷ Nakasabot si Jehova sa imong gibati. Siya mismo “nasakitan” dihang misupak ang unang membro sa iyang tawhanong pamilya. Naguol usab siya dihang mirebelde ang kadaghanan sa mga tawo sa panahon ni Noe. (Gen. 6:5, 6) Tingali kadtong wala makasinati niini dili bug-os makasabot kon unsa kini ka sakit. Apan dili maalamon nga tugotan nimong mahilayo ka kang Jehova tungod sa sayop nga panggawi sa napalagpot nga membro sa pamilya. Nan, sa unsang paagi nimo masagubang ang kaguol dihang ang usa ka membro sa pamilya mobiya kang Jehova?

18. Nganong dili angayng basolon sa mga ginikanan ang ilang kaugalingon kon ang ilang anak mobiya kang Jehova?

¹⁸ Ayaw basola ang imong kaugalingon sa nahitabo. Si Jehova naghatag ug kapilian sa mga tawo, ug ang matag bawtismadong membro sa pamilya kinahanglang “magpas-an sa iyang kaugalingong luwan.” (Gal. 6:5) Busa ang nakasala maoy manubag kang Jehova, dili ikaw. (Ezeq. 18:20) Ayaw usab basola ang uban. Tahora ang kahikayan ni Jehova sa pagdisiplina. Barog batok sa Yawa​—dili batok sa mga ansiyano kinsa nanalipod sa kongregasyon.​—1 Ped. 5:8, 9.

19, 20. (a) Sa unsang paagi masagubang sa mga ginikanan ang ilang kaguol kon napalagpot ang ilang anak? (b) Unsay hustong laoman sa mga ginikanan?

¹⁹ Sa laing bahin, kon masuko ka kang Jehova, gipahilayo nimo ang imong kaugalingon kaniya. Hinunoa, kinahanglang makita sa imong anak nga gimahal nimo si Jehova labaw kay kang bisan kinsa​—bisan sa imong pamilya. Aron masagubang ang kaguol, padayong palig-ona ang imong espirituwalidad. Ayaw ilain ang imong kaugalingon gikan sa matinumanong mga isigkamagtutuo. (Prov. 18:1) Pag-ampo kang Jehova, ug isulti ang imong gibati. (Sal. 62:7, 8) Ayaw pangitag pasumangil aron makakomunikar sa napalagpot nga membro sa pamilya, pananglitan, pinaagig text o e-mail. (1 Cor. 5:11) Magmapuliki sa espirituwal nga mga kalihokan. (1 Cor. 15:58) Ang sister nga gihisgotan ganina miingon: “Nahibalo ko nga kinahanglan kong magmapuliki sa pag-alagad kang Jehova ug padayong palig-onon ang akong espirituwalidad aron nga kon makabalik na ang akong anak, makatabang ko niya.”

²⁰ Ang Bibliya nag-ingon nga ang gugma “molaom sa tanang butang.” (1 Cor. 13:4, 7) Dili sayop molaom nga mobalik ang imong anak. Matag tuig, daghang napalagpot ang naghinulsol ug mibalik sa organisasyon. Si Jehova dili maghambin ug kasuko niadtong mga mahinulsolon kay siya “andam sa pagpasaylo.”​—Sal. 86:5.

PAGHIMOG MAALAMONG MGA PAGPILI

21, 22. Unsay imong determinasyon labot sa imong kagawasan sa pagpili?

²¹ Gihatagan ni Jehova ang tawo ug kagawasan sa pagpili. (Basaha ang Deuteronomio 30:19, 20.) Apan naglangkit kinig seryosong responsabilidad. Ang matag Kristohanon angayng mangutana: ‘Unsang dalana ang akong gisubay? Ako bang gitugotan ang trabaho ug karera, lulinghayaw ug kalingawan, o relasyon sa pamilya nga magpahilayo kanako kang Jehova?’

²² Walay paglubad ang gugma ni Jehova sa iyang katawhan. Mapahilayo lamang kita kaniya kon atong pilion ang sayop nga dalan. (Roma 8:38, 39) Apan dili kana kinahanglang mahitabo! Paneguroa nga walay makapahilayo kanimo kang Jehova. Ang sunod nga artikulo maghisgot sa upat pa ka bahin sa kinabuhi diin kinahanglan kitang mag-amping sa atong mga pagpili.

1, 2. (a) Unsa ang mga “laraw” ni Satanas? (b) Unsay makatabang kanato nga masuod sa Diyos?

GILALANG ni Jehova ang tawo nga may panginahanglang moduol o makigsuod kaniya. Apan gusto ni Satanas nga atong isipon nga dili nato kinahanglan si Jehova. Kanay bakak nga gipatuo ni Satanas sa mga tawo sukad pa sa iyang paglimbong kang Eva sa tanaman sa Eden. (Gen. 3:4-6) Sukad niadto, daghan ang naghunahuna nga dili nila kinahanglan ang Diyos.

² Hinunoa, malikayan natong mahulog sa lit-ag ni Satanas kay “kita dili kay walay alamag sa iyang mga laraw.” (2 Cor. 2:11) Siya naningkamot sa pagpahilayo kanato gikan kang Jehova pinaagi sa pagtental kanato sa paghimog sayop nga mga desisyon. Apan ingon sa gipakita sa miaging artikulo, makahimo kitag hustong mga pagpili labot sa karera, kalingawan, ug pamilya. Hisgotan niining artikuloha kon sa unsang paagi ang kanunayng pagbutang sa teknolohiya, panglawas, kuwarta, ug garbo sa hustong dapit sa atong kinabuhi makatabang kanato nga masuod sa Diyos.​—Sant. 4:8.

TEKNOLOHIYA

3. Iilustrar kon sa unsang paagi ang teknolohiya mahimong gamiton sa husto o sayop nga paagi.

³ Sa tibuok kalibotan, daghan ang naggamit ug elektronikong mga gadyet. Kon gamiton sa hustong paagi, kini mapuslanon. Apan kon gamiton sa sayop nga paagi, kini magpahilayo kanato sa atong langitnong Amahan. Tagda pananglit ang computer. Ang magasin nga imong ginabasa karon gisulat ug gipatik pinaagig mga computer. Ang computer magamit sa pag-research, sa komunikasyon, ug bisan sa paglingawlingaw. Apan mahimo usab kitang malinga pag-ayo niini, nga makahurot na sa atong panahon. Daghang advertisement ang nagkombinsir sa mga tawo nga angay nilang mabatonan ang kinabag-ohang mga produkto. Gani, usa ka batan-ong lalaki ang sekretong nagbaligya sa iyang usa ka kidney aron lang mapalit ang gusto kaayo niyang computer tablet. Pagkadili-maalamon sa iyang gihimo!

4. Unsay gihimo sa usa ka brader sa iyang sobrang paggamit ug computer?

⁴ Mas makapasubo kon isakripisyo sa usa ang iyang relasyon kang Jehova pinaagig sayop nga paggamit sa teknolohiya o paggugol ug dakong panahon niini. “Nahibalo ko sa giingon sa Bibliya nga angay natong ‘paliton ang nahiangayng panahon’ alang sa espirituwal nga mga butang,” matod ni Jon, brader nga hapit nang mag-30 anyos.a “Pero kon bahin na ganig computer, di na ko kapugong sa akong kaugalingon.” Sagad, maabtag tungang gabii si Jon sa pag-Internet. Miingon sab siya, “Imbes kapoy na kaayo ko, dili na hinuon ko makahunong sa pag-chat o pagtan-awg mugbong mga video​—bisan kadtong dili angayng tan-awon.” Aron mabuntog kining bisyoha, gi-set ni Jon ang iyang computer nga awtomatikong mapalong sa oras nga angay na siyang matulog.​—Basaha ang Efeso 5:15, 16.

5, 6. (a) Unsay responsabilidad sa mga ginikanan ngadto sa ilang mga anak? (b) Sa unsang paagi maseguro sa mga ginikanan nga may maayong kauban ang ilang mga anak?

⁵ Mga ginikanan, dili ninyo kinahanglang kontrolahon ang matag lihok sa inyong anak. Apan kinahanglang imonitor ninyo ang ilang paggamit ug computer. Ayaw sila pasagding moablig mga Web site nga nagpasiugdag imoralidad, espiritismo, ug mapintas nga mga video game, o makighigala sa dili maayong mga kauban diha sa Internet aron lang dili mo maistorbo. Kon inyo silang pasagdan, basin maghunahuna sila, ‘Dili ra tingali ni sayop kay wala ra man magtagad sila Papa ug Mama.’ Ingong mga ginikanan, responsabilidad ninyo nga panalipdan ang inyong mga anak, lakip ang mga tin-edyer, sa bisan unsa nga magpahilayo kanila kang Jehova. Bisan ang mga mananap manalipod sa ilang nati gikan sa kapeligrohan. Handurawa na lang kon unsay himoon sa usa ka inahang oso kon may manghilabot sa iyang mga nati!​—Itandi ang Oseas 13:8.

⁶ Tabangi ang inyong mga anak nga makig-uban sa sulondang mga Kristohanon​—batan-on ug edaran. Ug hinumdomi nga gikinahanglan sa inyong mga anak ang inyong panahon! Busa paggahig panahon alang sa pagkatawa, pagdula, ug pagtrabaho uban nila. Kini makatabang kaninyo nga magpabiling suod sa Diyos.b

PANGLAWAS

7. Nganong buot natong magpabiling himsog?

⁷ “Komosta na imong pamati?” Kining komon nga pangutana nagpadayag sa usa ka makapasubong kamatuoran. Kay gitugotan sa atong unang ginikanan si Satanas nga ipahilayo sila kang Jehova, kitang tanan masakit. Malipay si Satanas dihang kita masakit kay mas malisdan kita sa pag-alagad kang Jehova. Ug kon kita mamatay, dili na gyod kita makaalagad kaniya. (Sal. 115:17) Busa ginahimo nato ang tanan natong maarangan aron magpabiling himsog.c Ug angay usab kitang maghunahuna sa panglawas ug kaayohan sa atong mga igsoon.

8, 9. (a) Sa unsang paagi nato malikayan ang paghinobra labot sa panglawas? (b) Unsay kaayohan sa pagpabiling malipayon?

⁸ Apan importanteng likayan ang paghinobra, nga wala nay laing gihunahuna kondili ang panglawas. Ang uban mas masiboton sa paghisgot o pagrekomendar ug mga paagi sa pagdiyeta, pagtambal, o mga produkto kay sa pagsangyaw sa maayong balita sa Gingharian. Tingali tuyo lang nila nga motabang sa uban. Apan dili haom nga mamaligya ug mga health o beauty product o morekomendar sa atong mga ideya labot sa panglawas sa dili pa magsugod o inigkahuman sa tigom sa Kingdom Hall, asembliya, o kombensiyon. Ngano?

⁹ Kita nagatigom aron hisgotan ang espirituwal nga mga butang ug aron madugangan ang atong kalipay, nga bunga sa balaang espiritu sa Diyos. (Gal. 5:22) Sa maong mga okasyon, ang paghatag ug tambag bahin sa panglawas o pagrekomendar ug mga produkto​—gipangutana man kita o wala​—makadaot sa atong katuyoan sa pagtambong sa tigom ug makawala sa kalipay sa uban. (Roma 14:17) Pasagdi ang uban sa pagdesisyon kon unsaon nila pag-atiman ang ilang panglawas. Dugang pa, walay tawong makaayo sa tanang sakit. Bisan ang kinamaayohang doktor matigulang, masakit, ug mamatay. Ug ang sobrang kabalaka bahin sa panglawas dili makalugway sa atong kinabuhi. (Luc. 12:25) Sa laing bahin, “ang kasingkasing nga malipayon maayo nga tambal.”​—Prov. 17:22.

10. (a) Unsang mga hiyas ang matahom kang Jehova? (b) Kanus-a nato mabatonan ang hingpit nga panglawas?

¹⁰ Sa susama, haom lang nga mabalaka kita sa atong hitsura. Apan dili nato kinahanglang papason ang tanang timaan sa pagkatigulang. Kini nga mga timaan maoy ilhanan sa pagkahamtong, dignidad, ug pangsulod nga katahom. Pananglitan, ang Bibliya nag-ingon: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Prov. 16:31) Kanay panglantaw ni Jehova kanato, ug kana usab ang angay natong panglantaw sa atong kaugalingon. (Basaha ang 1 Pedro 3:3, 4.) Busa maalamon bang magpailalom sa wala kinahanglana ug peligrosong mga operasyon sa pagretoke o uban pang pamaagi aron lang mas momaayo ang atong hitsura? ‘Ang pagkalipay kang Jehova’ mao ang tinubdan sa tinuod nga katahom, bisag unsa pay atong edad o kahimtang sa panglawas. (Neh. 8:10) Sa bag-ong kalibotan lang kita makabatog hingpit nga panglawas ug mobalik sa pagkabatan-on. (Job 33:25; Isa. 33:24) Sa pagkakaron, magmaalamon kita sa atong mga desisyon ug magbatog pagtuo sa mga saad sa Diyos. Kini motabang kanato nga magmalipayon sa atong presenteng kahimtang ug magpabiling suod kang Jehova.​—1 Tim. 4:8.

KUWARTA

11. Sa unsang paagi ang kuwarta mahimong lit-ag?

¹¹ Ang kuwarta dili daotan ni sayop ang pagnegosyo. (Eccl. 7:12; Luc. 19:12, 13) Apan ang “gugma sa salapi” magpahilayo kanato kang Jehova. (1 Tim. 6:9, 10) ‘Ang kabalaka niining sistemaha,’ o sobrang kabalaka sa atong mga panginahanglan, makatuok sa atong espirituwalidad. Mao man usab ang epekto sa “malimbongong gahom sa mga bahandi,” o sayop nga pagtuo nga ang bahandi makahatag ug dumalayong kalipay ug kasegurohan. (Mat. 13:22) Giklaro ni Jesus nga “walay usa” nga dungang makaalagad sa Diyos ug sa bahandi.​—Mat. 6:24.

12. Unsang mga lit-ag labot sa kuwarta ang komon karon, ug unsaon nato paglikay niana?

¹² Ang dili hustong panglantaw sa kuwarta mahimong motultol sa sayop nga binuhatan. (Prov. 28:20) Kay gusto dayong madato, daghan ang namalit ug tiket sa lotto, miapil ug multilevel nga mga negosyo, ug nang-recruit pa ganig mga igsoon sa kongregasyon. Ang uban usab nailad ug namuhonan kay nagtuo nga makakuwartag dako. Likayi ang kahakog aron dili mailad. Gamita ang maayong panghunahuna. Kon nindot kaayo ang tanyag ug morag dili katuohan, lagmit dili kini tinuod.

13. Sa unsang paagi lahi ang panglantaw ni Jehova sa kuwarta kon itandi nianang sa kalibotan?

¹³ Kon atong unahon ang ‘gingharian ug ang iyang pagkamatarong,’ panalanginan ni Jehova ang atong mga paningkamot sa pagtagana sa atong mga panginahanglan. (Mat. 6:33; Efe. 4:28) Dili niya gustong makatulog kita sa tigom tungod sa kakapoy sa sobrang pagtrabaho o mabalaka bahin sa kuwarta samtang naa sa Kingdom Hall. Daghan sa kalibotan karon ang nagtuo nga makabaton lang silag maayong kaugmaon ug haruhayng kinabuhi kon magpokus sila sa pagpadato. Sagad pugson nila ang ilang mga anak nga magbaton usab niining materyalistikong tumong. Gipakita ni Jesus nga dili makataronganon ang maong panghunahuna. (Basaha ang Lucas 12:15-21.) Kini magpahinumdom kanato kang Gehazi, nga naghunahunang ang iyang kahakog dili makaapektar sa iyang relasyon kang Jehova.​—2 Hari 5:20-27.

14, 15. Nganong dili kita angayng mosalig sa pinansiyal nga mga sistema sa panalapi alang sa kasegurohan? Paghatag ug pananglitan.

¹⁴ Dunay mga agila nga nalumos kay dili gustong buhian ang bug-at ra kaayong isda nga ilang nadakpan. Posible bang mahitabo sa usa ka Kristohanon ang susama niini? “Daan na kong daginotan,” miingon ang ansiyanong si Alex. “Kon madaghan nakog bubo ang shampoo, ginabalik ko kini sa sudlanan.” Apan nadani siyang moapil sa stock market kay naghunahuna nga kon makakuwarta siyag dako, moresayn siya sa trabaho ug magpayunir. Gitun-an niya kinig maayo ug gigamit ang iyang tinigom ug giutang nga kuwarta sa pagpamalit ug mga stock nga dali konong mosaka ang bili. Apan mius-os pag-ayo ang bili niini. “Gusto nakong mabalik ang akong kuwarta,” matod ni Alex. “Nagtuo ko nga kon magpaabot ko, mosaka rag balik ang bili sa mga stock.”

¹⁵ Sulod sa pipila ka bulan, wala nay laing gihunahuna si Alex. Dili siya makapokus sa espirituwal nga mga butang, ug wala nay maayong tulog. Apan wala na gyod misaka ang bili sa mga stock. Nahurot ang tinigom ni Alex, ug kinahanglan niyang ibaligya ang ilang balay. “Nasakitan pag-ayo ang akong pamilya sa akong nahimo,” siya miingon. Apan nakakat-on siyag importanteng leksiyon. “Karon nahibalo na ko nga mahigawad gyod kadtong mosalig sa sistema ni Satanas.” (Prov. 11:28) Sa pagkatinuod, kon ibutang nato ang atong pagsalig sa atong mga tinigom, negosyo, o abilidad nga makakuwarta niining sistemaha, kita misalig sa “diyos niini nga sistema,” si Satanas. (2 Cor. 4:4; 1 Tim. 6:17) Sukad niadto, gipasimple ni Alex ang iyang kinabuhi alang “sa maayong balita.” Matod niya nga siya ug ang iyang pamilya karon mas malipayon ug mas suod kang Jehova.​—Basaha ang Marcos 10:29, 30.

GARBO

16. Sa unsang paagi maayo ug dili maayo ang garbo?

¹⁶ Ang pagpasigarbo sa hustong mga butang makaayo. Pananglitan, angay natong ipasigarbo nga kita mga Saksi ni Jehova. (Jer. 9:24) Tungod niini, kita maningkamot sa paghimog hustong mga desisyon ug sa pagsunod sa taas nga mga sukdanan sa Diyos. Apan ang sobrang paghatag ug importansiya sa atong opinyon o posisyon magpahilayo kanato kang Jehova.​—Sal. 138:6; Roma 12:3.

17, 18. (a) Paghatag ug pananglitan sa mapainubsanon ug garbosong mga tawo sa Bibliya. (b) Unsay gihimo sa usa ka brader aron dili mahilayo kang Jehova tungod sa garbo?

¹⁷ Ang Bibliya naghisgot ug mga tawong garboso ug mapainubsanon. Si Haring David mapainubsanong nagpagiya kang Jehova, ug siya gipanalanginan. (Sal. 131:1-3) Apan gipaubos ni Jehova ang garbosong mga hari nga si Nabucodonosor ug Belsazar. (Dan. 4:30-37; 5:22-30) May mga situwasyon usab karon nga magsulay sa atong pagkamapainubsanon. Si Ryan, usa ka 32 anyos nga ministeryal, mibalhin ug kongregasyon. “Abi nakog irekomendar dayon ko ingong ansiyano,” matod niya, “pero milabay na lang ang usa ka tuig, wala gihapoy nahitabo.” Masuko ba si Ryan sa mga ansiyano kay wala siya irekomendar? Mohunong ba siya sa pagtambong sa mga tigom ug tugotan ang garbo nga magpahilayo kaniya kang Jehova ug sa kongregasyon? Kon ikaw si Ryan, unsay imong himoon?

¹⁸ “Nag-research ko sa atong mga publikasyon bahin sa hustong tinamdan kon dili mahitabo ang gilaoman,” nahinumdom si Ryan. (Prov. 13:12) “Nakita nako nga kinahanglan kong magpailob ug magpaubos. Gikinahanglan nako ang pagbansay ni Jehova.” Imbes magsigeg hunahuna sa kaugalingon, nagpokus si Ryan sa pagtabang sa uban​—sa kongregasyon ug sa kanataran. Wala madugay, daghan na siyag mauswagong mga pagtuon sa Bibliya. “Human sa usa ka tuig ug tunga, nasorpresa ko dihang natudlo ko ingong ansiyano,” siya miingon. “Nawala na to sa akong hunahuna kay lingaw kaayo ko sa akong ministeryo.”​—Basaha ang Salmo 37:3, 4.

PABILING SUOD KANG JEHOVA!

19, 20. (a) Sa unsang paagi nato maseguro nga ang mga butang nga gihisgotan niining mga artikuloha dili magpahilayo kanato kang Jehova? (b) Paghatag ug mga panig-ingnan niadtong nagpabiling suod kang Jehova.

¹⁹ Ang pito ka butang nga gihisgotan niining duha ka artikulo dili ra sayop kon ibutang sa hustong dapit sa atong kinabuhi. Husto nga atong ipasigarbo nga kita mga alagad ni Jehova. Ang malipayong pamilya ug maayong panglawas maoy gasa ni Jehova. Atong nasabtan nga importante ang trabaho ug kuwarta aron matagan-an ang atong mga panginahanglan. Nasayod kita nga makapalagsik ang paglingawlingaw, ug makatabang kanato ang teknolohiya. Apan kon kita dili balanse sa bisan hain niini ug tugotan kining makabalda sa atong pag-alagad, kini magpahilayo kanato kang Jehova.

²⁰ Siyempre, kanay gustong mahitabo ni Satanas. Apan duna kay mahimo aron ikaw ug ang imong pamilya dili malit-agan niini! (Prov. 22:3) Duol kang Jehova, ug pabiling suod kaniya. Makakat-on kita gikan sa daghang panig-ingnan sa Bibliya labot niini. Si Enoc ug Noe “naglakaw uban sa matuod nga Diyos.” (Gen. 5:22; 6:9) Si Moises “nagpabiling lig-on nga daw nakakita sa Usa nga dili-makita.” (Heb. 11:27) Si Jesus padayong gipaluyohan sa Diyos kay siya kanunayng nagsunod sa iyang langitnong Amahan. (Juan 8:29) Sundoga ang maong mga panig-ingnan. “Pagmaya sa kanunay. Pag-ampo nga walay-hunong. Pagpasalamat sa tanang butang.” (1 Tes. 5:16-18) Ug ayaw tugoting may magpahilayo kanimo kang Jehova!