Pagluwas Diha sa Isla sa Robinson Crusoe

ANG Robinson Crusoe maoy usa sa tulo ka isla sa Dagat Pasipiko nga naglangkob sa kapupud-an nga gitawag ug Juan Fernández, mga 640 kilometros gikan sa baybayon sa Chile.a Ang 93-kilometro-kuwadrado nga isla ginganlan niana tungod sa bantogang ika-18ng-siglo nga nobela nga nag-ulohang Robinson Crusoe, nga gisulat sa Ingles nga awtor nga si Daniel Defoe. Ang nobela dayag nga detalyadong gipasukad sa talagsaong mga kasinatian sa usa ka taga-Scotland, si Alexander Selkirk, kinsa nagpuyong nag-inusara sa isla sulod sa mga upat ka tuig.

Usa ka tablang karatula diha sa isla sa bahin nag-ingon: “Niining dapita, adlaw-adlaw sulod sa kapin sa upat ka tuig, ang taga-Scotland nga sakayanon nga si Alexander Selkirk mabalak-ong nagsuhid sa kapunawpunawan alang sa tigluwas nga barko nga mopalingkawas kaniya gikan sa iyang pag-inusara.” Ngadtongadto, si Selkirk giluwas ug gidala pagbalik sa iyang yutang-natawhan, sa usa ka kalibotan nga wala na magtagbaw kaniya human siya magpuyo sa iyang kaugalingong gamayng paraiso. Gitaho nga miingon siya sa ulahi: “Oh, akong minahal nga isla! Maayo pa lag wala ko mobiya nimo!”

Sa paglabay sa panahon, ang isla gigamit ingong kolonya sa mga binilanggo, gipuy-an sa pipila nga nakahimog “mga krimen sa pagtuo” batok sa Katolikong Iglesya. Pagkadakong kausaban gikan sa samag-paraisong isla nga gipuy-an kanhi ni Selkirk! Ang presenteng-adlawng mga molupyo sa isla, hinunoa, nakatagamtam ug kalinaw nga wala masinati sa daghang bahin sa kalibotan. Ang relaks nga estilo-sa-kinabuhi, nga naandan sa daghang islahanon nga kultura, magpasayon sa pagsugod ug mga pakigkabildohay kang bisan kinsa.

Sa rekord sa gobyerno, ang Robinson Crusoe dunay mga 500 ka molupyo, apan sa dakong bahin sa tuig, mga 400 ka tawo lamang ang nagpuyo sa isla. Sa bahin, ang rason mao nga ang ubang mga inahan ug ilang mga anak nagpuyo sa dakong yuta sa Chile sa tingklase, nga mobalik lamang sa isla sa mga bulan nga tingbakasyon aron mogugol sa panahon uban sa tibuok pamilya.

Bisan pa sa matahom samag-hardin nga palibot sa Robinson Crusoe, ang ubang taga-isla mibati ug espirituwal nga kahaw-ang ug nagpangita sa mga tubag. Gibati sa uban nga daw kinahanglan silang luwason sa espirituwal nga paagi.

Usa ka Espirituwal nga Pagluwas

Ang ingon nianang espirituwal nga buluhatong pagluwas nagsugod sa mga 1979. Usa ka babaye nga nagtuon sa Bibliya uban sa mga Saksi ni Jehova sa Santiago, Chile, mibalhin ngadto sa isla ug misugod pagtudlo sa uban sa iyang nakat-onan. Wala madugay human niadto usa ka ansiyano sa kongregasyon nga miadto sa isla tungod sa sekular nga mga rason natingala sa pagkakaplag ug usa ka gamayng grupo sa mga estudyante sa Bibliya nga nag-uswag sa espirituwal sa tabang nianang babayhana. Sa sunod nga pag-adto sa ansiyano sa isla tulo ka bulan sa ulahi, kining nag-inusarang magtutudlo sa Bibliya ug duha sa iyang mga estudyante andam nang magpabawtismo, busa ang ansiyano maoy nagdumala sa ilang bawtismo. Sa ulahi, usa niining bag-ong nabawtismohan nga mga Kristohanon naminyo ug, duyog sa iyang bana, nagpadayon sa pagpangita sa uban nga kinahanglang luwason sa espirituwal nga paagi. Ang iyang bana maoy nanguna sa pagtukod ug kasarangang Kingdom Hall, nga padayong gigamit sa gamayng grupo diha sa isla. Ngadtongadto, tungod sa kalisod sa ekonomiya, mibiya sila sa Robinson Crusoe ug mibalhin sa usa ka kongregasyon sa sentro sa Chile, diin nagpadayon sila sa pag-alagad nga aktibo kang Jehova.

Sa hinayhinay, ang gamayng grupo diha sa isla nagpadayon sa pagdaghan samtang ang uban giluwas gikan sa bakak nga relihiyon. Hinunoa, sanglit ang mga estudyante kinahanglang mobalhin ngadto sa dakong yuta aron moeskuyla sa hayskul, ang grupo mius-os ngadto sa duha ka bawtismadong mga igsoong babaye ug usa ka batang babaye. Ang grupo modaghan sa tingbakasyon sa dihang ang ubang mga inahan mamalik sa isla. Makapadasig kini sa tulo ka nahilain nga mga Kristohanon nga magpabilin didto sa tibuok tuig. Tungod sa kakugi niining mga igsoong babaye, ang mga Saksi ni Jehova ilado kaayo sa Robinson Crusoe. Tinuod, ang ubang mga taga-isla misupak sa ilang buluhaton ug misulay sa pagpit-os sa uban nga isalikway ang mensahe sa Gingharian. Bisan pa niana, ang mga binhi sa kamatuoran sa Bibliya nga natisok diha sa sinserong mga kasingkasing nagpadayon pagturok.

Pagpalig-on Niadtong Naluwas Na

Kas-a sa usa ka tuig usa ka nagapanawng magtatan-aw ang moadto sa isla. Sama sa unsa ang pagduaw sa pipila ka Saksi diha sa usa ka hilit nga isla? Usa ka magtatan-aw sa sirkito naghubit sa iyang unang pag-adto sa Robinson Crusoe:

“Kining biyahea maanindot kaayo. Nagsugod kini sa alas 7:00 s.b. sa dihang mibiya kami sa Valparaiso aron mopaingon sa Cerrillos nga Erport sa Santiago sakay sa kotse. Misakay kami sa usa ka gamay pitoy-pasahero nga ayroplano. Human sa 2 ka oras ug 45 minutos nga biyahe, nakita namo sa layo ang usa ka tumoy sa bukid nga misaylo sa mga panganod. Samtang nagkaduol kami, ang isla nakita na—usa ka maanindot nga dakong bato diha sa tunga sa dagat. Daw naglutaw kini sa katubigan, sama sa usa ka barko nga napadpad sa hangin.

“Human motugpa ang ayroplano, usa ka baroto ang nagdala kanamo ngadto sa balangay. Ang nahadiindiin nga mga bato nga nanuybo sa dagat nagpormag gagmayng mga isla nga nagsilbing pahulayanan sa mga fur seal sa Juan Fernández. Ang mga fur seal maoy gipanalipdang espisye tungod kay ang ilang gidaghanon mius-os pag-ayo. Sa kalit lang, dihay milupad ubay sa baroto una pa mahanaw pag-usab diha sa dagat. Bangsi kadto, kansang pinilopilo nga mga silik morag mga pako tan-awon. Daw nalingaw kini sa pagluksolukso gikan sa tubig aron manakop ug mga insekto. Siyempre, usahay ang mananakop madakpan usab; ang pagluksolukso niini mahimong makadani sa pagtagad sa ubang mga manunukob nga andam nga mosubad niini samtang magtimpasaw kini.

“Sa kataposan, miabot kami sa balangay sa San Juan Bautista. Dihay daghang taga-isla nga nagtindog sa pantalan, kaha naghulat sa ilang mga bisita o maukiton lamang kon kinsay nangabot niining panahona. Nakadayeg kami sa maanindot nga talan-awon—ang matahom ug sagangsangon nga bukid nga gitawag ug El Yunque (Ang Puthawng Salsalan), nga morag gihanigag alpombra sa lugom-berde nga hunolhunol, ug sa likod, usa ka walay-dag-om, asul nga langit nga anaa sa daplin niini ang mga pundok sa puting panganod.

“Sa wala madugay namatikdan namo ang usa ka grupo sa among Kristohanong mga igsoong babaye ug ilang mga anak nga naghulat kanamo diha sa pantalan. Tingbakasyon kadto, busa ang grupo mas dako kay sa naandan. Human magbayloanay ug mainitong mga timbaya, gidala kami ngadto sa usa ka maanindot nga payag nga among tawgong among puy-anan sulod sa usa ka semana.

“Usa kadto ka linain gayod nga semana, ug among naamgohan nga dali ra kining molabay. Kinahanglang gamiton namo sa maayong paagi ang among panahon. Niana gayong adlawa, human dayon sa paniudto, giduaw namo ang usa ka estudyante sa Bibliya nga sa wala madugay nahimong among espirituwal nga igsoong babaye ug bahin sa espirituwal nga paraiso sa Diyos. Malipayon kaayo siya apan medyo ginerbiyos usab. Ang iyang dugay-nang-gipaabot nga tumong nga magpabawtismo nagkaduol na. Among gikonsiderar ang pipila ka hinungdanong impormasyon uban kaniya aron mokuwalipikar siya ingong magmamantala sa maayong balita. Pagkasunod adlaw, miduyog siya sa buluhatong pagsangyaw sa unang higayon. Sa ikatulong adlaw, gisugdan namo pagkonsiderar uban kaniya ang mga kinahanglanon alang sa pagpabawtismo. Sa wala pa matapos ang semana, siya nabawtismohan.

“Ang mga tigom nga gipahigayon sulod sa semana gisuportahan pag-ayo, nga dunay kinadaghanang nanambong nga 14. Kada adlaw dihay mga kahikayan alang sa pagsangyaw sa kanataran, pagbalik-duaw, pagtuon sa Bibliya, ug pagduaw isip magbalantay. Pagkamakapadasig alang sa mga igsoong babaye nga mao ray mohimo sa maong buluhaton sa tibuok tuig!”

Mas lisod alang sa mga lalaki diha sa isla sa pagsanong sa kamatuoran, tingali tungod sa naghingaping mga panginahanglan sa ilang sekular nga trabaho. Ang pangunang trabaho mao ang pagpanikop ug mga banagan, nga nagkinahanglag dakong panahon. Ang pagpihig may bahin usab sa negatibong reaksiyon sa daghan. Bisan pa niana, gidahom nga mas daghang taga-isla, mga lalaki ug mga babaye, ang mosanong sa umaabot.

Hangtod karon, napulo ka tawo ang naluwas diha sa isla pinaagi sa pagkadangat sa kahibalo sa kamatuoran ug sa mga katuyoan ni Jehova nga Diyos. Ang uban kanila dugay nang namiya sa isla tungod sa lainlaing mga katarongan. Apan magpabilin man sila o dili, ang pagkaluwas nila sa espirituwal nga paagi napamatud-ang mas hinungdanon pa kay sa pagluwas kang Alexander Selkirk. Sa pagkakaron nakatagamtam sila ug espirituwal nga paraiso bisan asa tingali sila magpuyo. Ang mga igsoong babaye nga nagpuyo pa gihapon sa isla ug ang ilang mga anak nakatagamtam ug samag-hardin nga palibot, apan labaw pa gani niana, sila adunay paglaom nga mabuhi sa dihang ang tibuok yuta mahimong tinuod nga paraiso sa bug-os nga diwa sa maong pulong.

Nagpadayon ang Buluhatong Pagluwas

Kon sa nahimutangan, kining gamayng grupo sa mga Saksi ni Jehova sa Robinson Crusoe nagpuyo nga halayo kaayo gikan sa uban nilang espirituwal nga mga igsoong lalaki ug babaye. Bisan pa niana, wala sila mobating biniyaan, sama sa taga-Scotland nga si Selkirk. Pinaagi sa kanunayng pag-abot sa teokratikanhong literatura, mga video sa mga asembliya ug mga kombensiyon nga gipadala kanila gikan sa sangang buhatan sa Watch Tower Society sa Chile katulo sa usa ka tuig, ug sa tinuig nga pagduaw sa magtatan-aw sa sirkito, duna silay suod nga pakigkontak sa organisasyon ni Jehova. Busa padayon silang nahimong aktibong bahin sa ‘tibuok kapunongan sa mga igsoon sa kalibotan.’—1 Pedro 5:9.

[Footnote]

[Mga mapa/Hulagway sa panid 9]

(Alang sa aktuwal nga pagkahan-ay, tan-awa ang publikasyon)

CHILE

Santiago

ISLA SA ROBINSON CRUSOE

San Juan Bautista

El Yunque

DAGAT PASIPIKO

ISLA SA SANTA CLARA

[Hulagway]

Sa dihang makita na ang isla, ang usa makakita ug maanindot nga dakong bato diha sa tunga sa dagat

[Credit Line]

Mapa sa Chile: Mountain High Maps® Copyright © 1997 Digital Wisdom, Inc.

[Hulagway sa panid 8, 9]

Ang matahom sagangsangon nga bukid nga gitawag ug El Yunque (Ang Puthawng Salsalan)

[Hulagway sa panid 9]

Ang balangay sa San Juan Bautista (St. John the Baptist)

[Hulagway sa panid 9]

Ang gagmayng mga isla nagsilbing mga pahulayanan sa mga fur seal ug leyon sa dagat

[Hulagway sa panid 10]

Misakay kami sa usa ka gamayng ayroplano gikan sa Santiago, Chile

[Hulagway sa panid 10]

Ang naglikolikong baybayon sa Isla sa Robinson Crusoe

[Hulagway sa panid 10]

Ang kasarangang Kingdom Hall diha sa isla