Husto bang dahomon ni David nga ang Diyos naghunahuna kaniya? Ang Diyos ba may pagtagad kanimo? Daghan ang nalisdan sa pagtuo nga interesado kanila ang labing gamhanang Diyos. Ngano?

Ang usa ka rason mao nga labaw kaayo ang Diyos sa mga tawo. Gikan sa iyang taas kaayong posisyon, ang mga nasod “sama sa usa ka tinulo gikan sa timba; ug sila giisip ingon nga manipis nga abog sa timbangan.” (Isaias 40:15) Usa ka kritiko sa relihiyon misulat nga “imposibleng dunay diyos nga interesado kaayo sa imong kalihokan.”

Para sab sa uban, dili sila takos sa pagtagad sa Diyos tungod sa ilang panggawi. Pananglitan, matod ni Jim nga mga 50 ang edad: “Pirme kong mag-ampo nga tabangan kong magmakalmado ug makapugong sa kaugalingon, pero kanunay gihapon kong masuko. Sa akong tan-aw, daotan ra kaayo ko ug dili ko matabangan sa Diyos.”

Layo ba kaayo ang Diyos nga dili ta niya mamatikdan? Unsa ba gyoy iyang pagbati sa dili hingpit nga mga tawo? Kon wala pa ipaila sa Diyos ang iyang kaugalingon, walay tawo nga hustong makatubag niining mga pangutanaha. Apan gipasaligan kita sa iyang Pulong, ang Bibliya, nga siya may pagtagad sa tanang tawo. “Sa pagkatinuod,” ang Bibliya nag-ingon nga “siya dili halayo gikan sa matag usa kanato.” (Buhat 17:27) Hisgotan sa sunod nga upat ka artikulo kon unsay gisulti sa Diyos bahin sa iyang pagtagad sa mga tawo ug kon sa unsang paagi siya nagpakitag interes kanimo.

KON NGANONG NAGDUHADUHA ANG UBAN: Base sa bag-ong pagtuon, sa atong galaksiya pa lang duna nay mga 100 ka bilyong planeta. Tungod sa kadako sa atong uniberso, daghan ang nakaingon, ‘Nganong bantayan pa man sa labing gamhanang Maglalalang ang ginahimo sa ubos nga mga tawo sa gamay kaayong planeta?’

KON UNSAY GITUDLO SA PULONG SA DIYOS: Ang Diyos dili kay basta naghatag natog Bibliya ug dayon mawad-an nag interes nato. Hinunoa, si Jehova nagpasalig: “Tambagan ko ikaw ug bantayan.”—Salmo 32:8, NCV.

Tagda si Hagar, usa ka Ehiptohanong babaye sa ika-20ng siglo B.C.E. Wala siyay pagtahod sa iyang agalong si Sarai maong gipakaulawan siya niini, ug siya milayas paingon sa kamingawan. Ang Diyos ba nawad-an nag interes kang Hagar tungod lang kay nasayop siya? Ang Bibliya nag-ingon: “Ang manulonda [o anghel] ni Jehova nakakaplag kaniya.” Si Hagar gipasaligan sa anghel: “Nadungog ni Jehova ang imong kasakitan.” Dayon si Hagar miingon kang Jehova: “[Ikaw] usa ka Diyos nga makakita.”—Genesis 16:4-13, Ang Bag-ong Maayong Balita Biblia.

Ang “Diyos nga makakita” nagbantay usab kanimo. Sa pag-ilustrar: Mas bantayan sa mahigugmaong inahan ang iyang gagmayng anak kay mas nagkinahanglan silag atensiyon sa ginikanan. Sa susama, mas bantayan ta sa Diyos dihang kita maguol ug maluya. Si Jehova nag-ingon: “Sa kahitas-an ug sa balaang dapit ako magapuyo, uban usab sa nahugno ug mapaubsanon sa espiritu, aron buhion pag-usab ang espiritu sa mga mapainubsanon ug aron buhion pag-usab ang kasingkasing sa mga nangahugno.”—Isaias 57:15.

Apan tingali makapangutana ka: ‘Sa unsang paagi man ko gibantayan sa Diyos? Hitsura lang ba ang iyang ginatan-aw, o ang akong tinuod nga pagkatawo? Nakasabot ba gyod siya nako?’

KON NGANONG NAGDUHADUHA ANG UBAN: Gibati sa daghan nga gilantaw lamang sa Diyos ang mga tawo ingong makasasala—hugaw ug way bili. Si Kendra, nga may depresyon, nakonsensiya pag-ayo kay dili niya matuman ang tanang sugo sa Diyos. Busa siya miingon, “Wala na ko mag-ampo.”

KON UNSAY GITUDLO SA PULONG SA DIYOS: Dili lang mga sayop nimo ang gitan-aw ni Jehova kay siya nakaila gyod kon kinsa ka. “Siya nahibalo pag-ayo sa atong pagkaumol,” matod sa Bibliya, “nga nahinumdom nga kita abog.” Dugang pa, bisag makasasala ta, siya maluluy-ong magpasaylo nato kon kita maghinulsol.—Salmo 103:10, 14.

Tagda si David, ang hari sa Israel nga gihisgotan sa unang artikulo niini nga serye. Sa iyang pag-ampo, si David miingon: “Ang imong mga mata nakakita bisan sa binhi pa ako sa tagoangkan, ug ang tanan nga bahin niini nahisulat diha sa imong basahon . . . Oh Diyos, susiha ako, ug hibaloi ang akong kasingkasing.” (Salmo 139:16, 23) Oo, kombinsido si David nga bisag siya nakasala, nga usahay grabe pa, si Jehova nakakita sa iyang mahinulsolong kasingkasing.

Si Jehova mas nakasabot nimo kay ni bisan kinsa. “Ang tawo nagatan-aw sa makita sa iyang mga mata,” matod sa Bibliya, “apan alang kang Jehova, siya nagatan-aw sa kasingkasing.” (1 Samuel 16:7) Ang Diyos nakaila kaayo nimo—nahibalo siya nga ang imong napanunod nga mga kinaiya, gidak-an, palibot, ug personalidad maoy nakaumol sa imong pagkatawo. Iyang nakita ug gipabilhan kon kinsa ka, bisan pag ikaw masayop.

Apan sa unsang paagi gamiton sa Diyos ang iyang pagkaila sa imong ‘tinuod nga pagkatawo’ aron hupayon ka?

KON NGANONG NAGDUHADUHA ANG UBAN: Bisag desperado na kaayo, maikog ang uban nga magpatabang pa sila sa Diyos sa ilang mga problema. “Sa kadaghang tawo sa kalibotan ug sa kabug-at sa ilang mga problema,” matod ni Raquel, “gamay ra kaayo ning akong problema maong di na lang ko mangayog tabang sa Diyos.”

KON UNSAY GITUDLO SA PULONG SA DIYOS: Duna nay talagsaong gihimo ang Diyos aron tabangan ug hupayon ang mga tawo. Ang tanang tawo nakapanunod sa sala. Kanunay tang makalapas sa mga sugo sa Diyos. Apan ang Diyos “nahigugma kanato ug gipadala ang iyang Anak ingong usa ka halad pasig-uli alang sa atong mga sala.” (1 Juan 4:10) Pinaagi sa kamatayon ni Jesus, gipaposible sa Diyos ang kapasayloan sa atong mga sala, hinlong konsensiya, ug ang paglaom nga mabuhi sa walay kataposan sa malinawon ug bag-ong kalibotan.a Pero kana ba nga halad para lang sa mga tawo sa katibuk-an, o nagpakita nga ang Diyos interesado kanimo ingong indibiduwal?

Tagda si apostol Pablo. Siya natandog pag-ayo sa halad ni Jesus nga siya misulat: ‘Nagkinabuhi ko pinaagi sa pagtuo sa Anak sa Diyos, kinsa nahigugma kanako ug nagtugyan sa iyang kaugalingon alang kanako.’ (Galacia 2:20) Tinuod, namatay si Jesus una pa nahimong Kristohanon si Pablo. Pero giisip ni Pablo ang maong halad ingong personal nga gasa sa Diyos kaniya.

Ang halad lukat ni Jesus maoy personal usab nga gasa sa Diyos kanimo, nga nagpakitang gimahal gyod ka sa Diyos. Kini makahatag nimog “walay kataposang paghupay ug maayong paglaom,” mao nga ikaw ‘mapalig-on diha sa tanang maayong buhat ug pulong.’—2 Tesalonica 2:16, 17.

Apan mga 2,000 ka tuig na ang milabay gikan sa paghalad ni Jesus sa iyang kinabuhi. Unsay pamatuod nga ang Diyos nagkabig kanimo karon?

KON NGANONG NAGDUHADUHA ANG UBAN: Daghan ang nagtuog Diyos pero mibating layo kaayo sila kaniya. “Giisip lang nako siya ingong Diyos nga naghimo sa tanang butang,” miangkon si Christina, nga taga-Ireland ug hinimba kada semana. “Pero wala gyod ko makaila niya. Wala ko sukad mobati nga suod niya.”

KON UNSAY GITUDLO SA PULONG SA DIYOS: Bisag mobati ta usahay nga layo ta sa Diyos, siya motabang gihapon kanato. Giilustrar ni Jesus kon unsa ta ka importante sa Diyos: ‘Kon ang usa ka tawo adunay 100 ka karnero ug ang usa niini mahisalaag, dili ba niya biyaan ang 99 diha sa kabukiran ug molakaw sa pagpangita sa usa nga nahisalaag?’ Ang leksiyon? “Sa susama dili tilinguhaong butang sa akong Amahan nga anaa sa langit nga malaglag ang usa niining mga gagmay.”—Mateo 18:12-14.

Bililhon kaayo sa Diyos ang matag “usa niining mga gagmay.” Sa unsang paagi ang Diyos ‘mangita sa usa nga nahisalaag’? Sumala sa teksto sa ibabaw niini nga panid, si Jehova magkabig sa mga tawo ngadto kaniya.

Matikdi ang gihimo sa Diyos aron makabig ang sinserong mga tawo. Sa unang siglo C.E., gisugo sa Diyos ang Kristohanong tinun-an nga si Felipe nga tabangan ang Etiopianhong opisyal nga nagsakayg karo nga masabtan ang kahulogan sa iyang gibasang tagna sa Bibliya. (Buhat 8:26-39) Sa ulahi, gisugo sa Diyos si apostol Pedro nga bisitahon ang Romanong opisyal nga si Cornelio sa iyang balay, kinsa nag-ampo ug gustong mosimba sa Diyos. (Buhat 10:1-48) Gitultolan sab sa Diyos si apostol Pablo ug ang iyang mga kauban nga moadto sa usa ka suba sa gawas sa siyudad sa Filipos. Ilang nakaila didto ang “magsisimba sa Diyos” nga si Lydia, ug ‘gibuksan ni Jehova ang iyang kasingkasing aron maminaw.’—Buhat 16:9-15.

Sa tulo ka kahimtang, giseguro ni Jehova nga mahatagag kahigayonan kadtong gustong makaila kaniya. Kinsa ba karon ang nagaadto sa mga tawo sa ilang balay ug sa publikong mga lugar aron ipahibalo ang mensahe sa Bibliya bahin sa Diyos? Daghan ang motubag, “mga Saksi ni Jehova.” Pangutan-a ang kaugalingon, ‘Gigamit kaha sila sa Diyos aron masuod ko kaniya?’ Gidasig ka namo nga moampo sa Diyos nga tabangan kang mosanong sa iyang mga paningkamot sa pagkabig kanimo ngadto kaniya.a