Dili lang si Christopher, Hannah, ug Gina ang mibati niana. Daghang tawo sa tibuok kalibotan ang kombinsido nga giisip sila sa Diyos nga iyang mga higala. Ikaw, mibati ka bang suod sa Diyos? O gusto ba nimong masuod o mas masuod pa kaniya? Tingali maghunahuna ka: ‘Posible ba gyod nga ang ordinaryong tawo makabatog suod nga relasyon sa Labing Gamhanan nga Diyos? Kon mao, sa unsang paagi?’

POSIBLE ANG PAGPAKIGSUOD SA DIYOS

Sumala sa Bibliya, posible nga mahimong suod nga higala sa Diyos. Ang Bibliya nag-ingon nga gitawag sa Diyos si Abraham nga “akong higala.” (Isaias 41:8) Matikdi sab ang mahigugmaong pagdapit sa Diyos diha sa Santiago 4:8: “Duol sa Diyos, ug siya moduol kaninyo.” Busa, tin-aw nga posible gyod nga mahimong suod nga higala sa Diyos. Apan kay dili man makita ang Diyos, sa unsang paagi ka ‘makaduol’ ug makabatog maayong relasyon kaniya?

Aron matubag kana, tagda kon sa unsang paagi magsugod ang panaghigalaay sa mga tawo. Sagad magsugod kana sa ilang pag-ilaila. Dayon, kon sila regular nga mag-estoryahanay, mosulti sa ilang mga hunahuna ug pagbati, mas magkasuod sila. Ug kon mobuhat silag mga butang alang sa usag usa, molig-on ang ilang panaghigalaay. Ingon usab niana ang pagpakigsuod sa Diyos. Atong tan-awon kon sa unsang paagi.

May suod ka bang higala nga wala ka mahibalo sa ngalan? Wala tingali. Husto ang naobserbahan sa babayeng Bulgarian nga si Irina, “Imposible kang masuod sa Diyos kon wala ka mahibalo sa iyang ngalan.” Makapalipay kay gihisgotan sa unang artikulo nga gusto sa Diyos nga masuod ka kaniya. Busa pinaagi sa Bibliya, siya nagpaila sa iyang kaugalingon: “Ako mao si Jehova. Kana ang akong ngalan.”—Isaias 42:8.

Importante ba gyod kang Jehova kon nahibalo ug naggamit ka sa iyang ngalan o wala? Hunahunaa kini: Ang ngalan sa Diyos, nga upat ka konsonante ang pagkasulat sa Hebreohanong pinulongan nga nailhang Tetragrammaton, makita halos 7,000 ka beses sa orihinal nga kopya sa Hebreohanong Kasulatan. Kana daghan kaayo kon itandi sa ubang ngalan diha sa Bibliya. Seguradong pamatuod kini nga gusto ni Jehova nga mahibalo ta sa iyang ngalan ug gamiton kini.a

Apan gibati sa daghan nga sanglit balaan ug labing gamhanan ang Diyos, dili pagpakitag pagtahod ang paggamit sa iyang ngalan. Siyempre sayop gyod kon gamiton ang ngalan sa Diyos sa paagi nga way dignidad, maingon nga dili nimo kana himoon sa imong suod nga higala. Pero kabubut-on ni Jehova nga kadtong nahigugma niya magpasidungog ug magpaila sa iyang ngalan. (Salmo 69:30, 31; 96:2, 8) Hinumdomi nga gitudloan ni Jesus ang iyang mga tinun-an sa pag-ampo: “Amahan namo nga anaa sa mga langit, pagabalaanon unta ang imong ngalan.” Makabalaan sab ta sa ngalan sa Diyos pinaagi sa pagpaila niini sa uban. Kon ato ning buhaton, mas masuod ta niya.—Mateo 6:9.

Gipakita sa Bibliya nga gihigugma sa Diyos kadtong ‘namalandong sa iyang ngalan.’ (Malaquias 3:16) Si Jehova nagsaad: “Panalipdan ko siya tungod kay nakaila siya sa akong ngalan. Magatuaw siya kanako, ug tubagon ko siya. Diha sa kasakit ako magauban kaniya.” (Salmo 91:14, 15) Busa importante gyod nga mahibalo ta ug mogamit sa ngalan ni Jehova kon buot natong masuod kaniya.

Ang suod nga managhigala kanunayng mag-estorya bisag sa telepono, e-mail, video, o sulat. Busa aron masuod sa Diyos, kinahanglan tang makigkomunikar niya kanunay. Sa unsang paagi?

Makakomunikar ta kang Jehova pinaagi sa pag-ampo. Pero dili ni samag pagpakig-estorya lang sa barkada. Atong hinumdoman nga dihang kita mag-ampo, nakig-estorya ta sa atong Maglalalang, ang Labing Hataas sa uniberso. Mao nga angay tang mag-ampo uban ang lalom nga pagtahod ug debosyon. Aron dunggon sa Diyos ang atong mga pag-ampo, may pipila ka kinahanglanon nga angay sab natong himoon. Aniay tulo niana.

Una, kita direktang mag-ampo kang Jehova nga Diyos lamang—dili kang Jesus, sa usa ka “santo,” o sa imahen. (Exodo 20:4, 5) Ang Bibliya klarong nag-ingon: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” (Filipos 4:6) Ikaduha, kita kinahanglang mag-ampo pinaagi sa ngalan ni Jesu-Kristo, ang Anak sa Diyos. Si Jesus mismo miingon: “Walay makaadto sa Amahan kon dili pinaagi kanako.” (Juan 14:6) Ikatulo, ang atong mga pag-ampo kinahanglang uyon sa kabubut-on sa Diyos. Ang Bibliya nag-ingon: “Bisan unsay atong pangayoon sumala sa iyang kabubut-on, siya magpatalinghog kanato.”a—1 Juan 5:14.

Siyempre, dili magdugay ang panaghigalaay kon usa ray magsigeg estorya. Sa susama, kinahanglang mamati sab ta kang Jehova dihang makigsulti siya nato. Nahibalo ka ba kon sa unsang paagi ang Diyos makigsulti nato?

Karon, si Jehova nga Diyos “makigsulti” nato pinaagi sa iyang sinulat nga Pulong, ang Bibliya. (2 Timoteo 3:16, 17) Nganong makaingon ta niana? Ibutang ta nga nagsulat nimo ang imong higala. Human ug basa, tingali eksayted kang mosulti sa uban, “Giingnan ko sa akong higala nga . . . !” Pero wala siya makigsulti nimo sa personal, kondili pinaagig sulat. Sa susama, pinaagi sa pagbasa sa Bibliya, imong gitugotan si Jehova sa pagpakigsulti nimo. Busa si Gina, nga gihisgotan sa unang artikulo, miingon, “Kon gusto nakong isipon ko sa Diyos nga iyang higala, kinahanglan nakong tun-an ang iyang ‘sulat’ para nato—ang Bibliya.” Siya midugang, “Ang pagbasa sa Bibliya kada adlaw maoy nakapasuod nako sa Diyos.” Imo bang gitugotan si Jehova sa pagpakigsulti kanimo kada adlaw pinaagig adlaw-adlawng pagbasa sa iyang Pulong, ang Bibliya? Kini mas makapasuod nimo sa Diyos.

“Isulti lang bisag unsay imong gusto kay akong himoon.” Lagmit dili ka mosulti niana sa tawong di nimo kaila o sa bag-o lang nailaila. Apan tingali sayon ra nimo nang isulti sa suod nga higala. Natural lang sa suod nga managhigala nga mohatag ug pabor para sa usag usa.

Gipakita sa Bibliya nga kanunayng gihimo ni Jehova kon unsay makapalipay sa iyang mga magsisimba. Pananglitan si Haring David, nga may suod nga relasyon sa Diyos, miingon: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; . . . Daghan pa sila kay sa akong ikabatbat.” (Salmo 40:5) Labaw pa niana, gibuhat ni Jehova kon unsay makapalipay bisan niadtong wala pa makaila kaniya, nga ‘nagbuhong sa ilang mga kasingkasing sa pagkaon ug sa kalipay.’—Buhat 14:17.

Sanglit malipay man si Jehova sa pagbuhat kon unsay ikalipay sa uban, angay lang nga kadtong buot mahimong higala sa Diyos mobuhat sab sa mga butang nga makapalipay sa iyang kasingkasing. (Proverbio 27:11) Apan unsang espesipikong butang ang imong himoon aron malipay ang Diyos? Ang Bibliya mitubag: ‘Ayaw kalimti ang pagbuhat ug maayo ug ang pagpaambit sa mga butang sa uban, kay ang maong mga halad gikahimut-an sa Diyos.’ (Hebreohanon 13:16) Nagpasabot ba ni nga igo na ang pagbuhat ug maayo ug ang pagpaambit ngadto sa uban aron malipay si Jehova?

Matod sa Bibliya, “Kon walay pagtuo imposible ang pagpahimuot [sa Diyos].” (Hebreohanon 11:6) Matikdi nga ayha pa lang si Abraham gitawag nga “higala ni Jehova” human siya magpakitag pagtuo kang Jehova. (Santiago 2:23) Gipasiugda sab ni Jesu-Kristo nga gikinahanglan ang “pagpasundayag ug pagtuo sa Diyos” kon buot nato ang panalangin sa Diyos. (Juan 14:1) Busa unsay imong buhaton aron mabatonan nimo ang pagtuo nga gipangita sa Diyos sa mga tawong iyang gikabig? Ang una mao ang regular nga pagtuon sa Bibliya. Nianang paagiha, ikaw makabatog “tukmang kahibalo sa iyang kabubut-on” ug makakat-on kon unsaon nga ‘bug-os makapahimuot kaniya.’ Dayon, samtang magkadaghan ang imong kahibalo kang Jehova ug sundon ang iyang matarong nga mga sukdanan, molig-on ang imong pagtuo kaniya ug siya mas makigsuod pa kanimo.—Colosas 1:9, 10.

Unsay imong mahimo aron masuod ka sa Diyos? Kini ang pipila ka lakang nga atong nahisgotan aron makabatog suod nga relasyon kaniya:

1. Sayra ug gamita ang ngalan sa Diyos, nga Jehova.

2. Pakig-estorya kanunay niya pinaagi sa pag-ampo ug pagtuon sa iyang Pulong, ang Bibliya.

3. Buhata kanunay kon unsay makapalipay kang Jehova.

Base niining tanan, makaingon ka ba nga ginahimo nimo kon unsay gikinahanglan aron masuod sa Diyos? Gibati ba nimo nga duna ka pay puwedeng pauswagon? Hinuon, nagkinahanglan kinig paningkamot, pero tagda ang mga resulta.

“Di gyod kawang ang mga paningkamot nga masuod sa Diyos,” matod ni Jennifer, sa United States. “Daghag panalangin kon suod ka sa Diyos: mas mosalig ka sa Diyos, mas mailhan nimo siya, ug labaw sa tanan, mas higugmaon ka niya. Wala nay molabaw pa niini!”

Kon gusto nimong masuod sa Diyos, ang mga Saksi ni Jehova malipayng motabang nimo. Mahimo kang magtuon ug Bibliya uban nila nga way bayad. Gidapit sab ka nga motambong sa ilang mga tigom sa Kingdom Hall, diin makauban nimo kadtong nagpabili sa ilang relasyon sa Diyos.a Sa pagbuhat niana, bation sab nimo ang gibati sa salmista: “Bahin kanako, ang pagduol sa Diyos maayo alang kanako.”—Salmo 73:28.