Unsay imong hunahuna? Giuyonan ba sa Diyos ang gubat? Kon mao, kinsay iyang gidapigan karon? Ang pagpangita sa tubag niining mga pangutanaha makaapektar sa imong panglantaw sa gubat. Pananglitan, kon mahibalo ka nga giuyonan sa Diyos ang gubat ug ang imong gidapigan mao sab ang iyang gisuportahan, lagmit mobati kang husto ang imong gibarogan ug masaligon ka nga modaog ang imong gidapigan. Sa laing bahin, unsay imong bation kon masayran nimo nga ang gisuportahan sa Diyos mao ang kaaway nga grupo? Lagmit timbangtimbangon nimo ang imong baroganan.

Duna pay angayng hunahunaon nga mas importante. Ang pagkahibalo kon giunsa pag-isip sa Diyos ang gubat makaapektar sa imong panglantaw kaniya. Kon usa ka sa minilyon nga naapektohan pag-ayo sa gubat, gikinahanglan gyod nimong masayran ang tubag niini: Ang Diyos ba tigpasiugdag gubat, sumala sa gituohan sa uban, ug nagtugot o nagpahinabo pa gani sa pag-antos nga nalangkit niini, o siya ba walay pagpakabana sa mga dinaogdaog?

Tingali masorpresa ka nga lahi ra kaayo ang tubag sa Bibliya kon itandi niana nga mga opinyon. Dugang pa, sukad kaniadto hangtod karon, wala mausab ang panglantaw sa Diyos bahin sa gubat. Tagdon nato ang giingon sa Bibliya kon unsay hunahuna sa Diyos bahin sa gubat sa karaang panahon ug sa unang siglo, dihang si Jesus dinhi pa sa yuta. Kana makatabang nato nga masayran kon giunsa pag-isip sa Diyos ang mga gubat karon ug kon may gubat pa ba sa umaabot.

Kay nakiggubat ang Diyos batok sa mga Ehiptohanon, nagpasabot nga may mga gubat nga iyang giuyonan. Sa ubang higayon, gitugotan niya ang mga Israelitas sa pagpakiggubat. Pananglitan, gisugo niya sila nga makiggubat batok sa mga Canaanhon nga labihan ka daotan. (Deuteronomio 9:5; 20:17, 18) Giingnan niya si Haring David sa Israel nga makiggubat sa daogdaogang mga Filistehanon. Iya pa gani siyang gihatagag taktika aron gyod modaog.—2 Samuel 5:17-25.

Gipakita niana nga mga asoy sa Bibliya nga kon mameligro ang mga Israelitas tungod sa pagkadaotan ug pagpanglupig, uyonan sa Diyos ang pagpakiggubat aron maprotektahan ang iyang katawhan ug ang matuod nga pagsimba. Pero matikdi ang mosunod nga tulo ka punto bahin sa mga gubat nga iyang giuyonan.

1. DIYOS LANG ANG NAGBUOT KON KINSAY MAKIGGUBAT. Dihay panahon nga giingnan sa Diyos ang mga Israelitas: “Dili kamo kinahanglan nga makig-away niining higayona.” Ngano? Kay ang Diyos mismo ang makiggubat para nila. (2 Cronicas 20:17; 32:7, 8) Kadaghan na niya kana himoa, sama sa gihisgotan sa ibabaw. Sa ubang higayon, gisugo sa Diyos ang iyang katawhan sa karaang Israel nga makigbahin sa gubat nga iyang giuyonan, lakip niana ang pagpanag-iya ug pagpanalipod sa Yutang Saad.—Deuteronomio 7:1, 2; Josue 10:40.

2. DIYOS LANG ANG NAGBUOT KON KANUS-A MAKIGGUBAT. Kaniadto, kinahanglang maghulat ang mga alagad sa Diyos sa iyang gitakdang panahon nga makigbatok sa pagpanglupig ug pagkadaotan. Kon dili pa panahon, dili sila puwedeng makiggubat. Dihang misupak sila, nawad-an sila sa iyang pag-uyon. Gani, gipakita sa Bibliya nga sagad pait kaayo ang resulta dihang ang mga Israelitas nakiggubat nga walay pagtugot sa Diyos.a

3. 

   DILI MALIPAY ANG DIYOS SA KAMATAYON SA MGA TAWO, APIL SA MGA DAOTAN. Si Jehova nga Diyos ang Tinubdan sa kinabuhi ug ang Maglalalang sa tawo. (Salmo 36:9) Busa, di siya gustong dunay mamatay. Pero ikasubo, may mga tawong daotan, daogdaogan, ug mopatay pa ganig isigkaingon. (Salmo 37:12, 14) Aron hunongon kana nga pagkadaotan, nagsugo usahay ang Diyos nga makiggubat. Bisan pa niana, sa katuigan nga iyang gisugo ang mga Israelitas nga makigbahin niana nga mga gubat, siya “maluluy-on” gihapon ug “mahinay sa kasuko” ngadto sa mga nangdaogdaog sa Israel. (Salmo 86:15) Pananglitan, gimando niya nga sa dili pa ang mga Israelitas makiggubat sa usa ka siyudad, ila unang “ipahibalo . . . niini ang mga kinahanglanon sa pakigdait,” aron mahatagag kahigayonan ang mga pumoluyo nga magbag-o, ug makalikay sa gubat. (Deuteronomio 20:10-13) Pinaagi niini, gipakita sa Diyos nga dili siya malipay sa “kamatayon sa tawong daotan, apan nga mobiya ang daotan gikan sa iyang dalan ug mabuhi.”—Ezequiel 33:11, 14-16.b

Dinhi atong masabtan nga sa karaang panahon, giisip sa Diyos ang gubat ingong makataronganong paagi sa pagtapos sa tanang pagpangdaogdaog ug pagkadaotan. Pero Diyos lang ang magbuot, dili ang tawo, kon kanus-a ipahinabo kana nga gubat ug kon kinsay moapil niana. Naghinamhinam ba ang Diyos nga makiggubat aron mobanaw ang dugo? Wala gayod. Sa pagkatinuod, gidumtan gayod niya ang kapintasan. (Salmo 11:5) Nausab ba ang panglantaw sa Diyos bahin sa gubat dihang gisugdan sa iyang Anak, si Jesu-Kristo, ang iyang buluhaton niadtong unang siglo?

Unsay nahitabo? Nganong wala makig-away ang Diyos alang sa mga Hudiyo, sama sa iyang gihimo sa nangagi? O nganong wala man niya sila tugoti nga makiggubat aron makalingkawas sa pagpangdaogdaog? Nausab ba ang panglantaw sa Diyos bahin sa gubat? Wala. Apan ang mga Hudiyo ang nausab. Ilang gisalikway ang anak sa Diyos, si Jesus, ingong ang Mesiyas. (Buhat 2:36) Busa, isip nasod, nawala ang ilang espesyal nga relasyon sa Diyos.—Mateo 23:37, 38.

Wala na panalipdi sa Diyos ang nasod sa Israel ug ang Yutang Saad niini, ug dili na pod makapangangkon ang mga Hudiyo nga sila makapakiggubat nga may pag-uyon o pagpaluyo sa Diyos. Ingon sa gitagna ni Jesus, ang nasod sa Israel wala nay mga panalangin gikan sa Diyos kay gihatag na kini sa bag-ong nasod, usa ka espirituwal nga nasod nga sa ulahi gitawag sa Bibliya ingong ang “Israel sa Diyos.” (Galacia 6:16; Mateo 21:43) Ang kongregasyon sa mga Kristohanon nga dinihogan sa espiritu mao ang espirituwal nga Israel sa Diyos. Sa unang siglo, sila giingnan: “Karon kamo maoy katawhan sa Diyos.”—1 Pedro 2:9, 10.

Sanglit ang unang siglong mga Kristohanon mao na man ang “katawhan sa Diyos,” ang Diyos ba nakig-away para nila aron sila mahigawas sa pagpangdaogdaog sa mga Romano? O gitugotan ba niya sila nga makiggubat sa mga nangdaogdaog nila? Wala. Ngano man? Kay kon bahin sa gubat nga giuyonan sa Diyos, siya lang ang magbuot kon kanus-a himoon kana nga gubat, sumala sa gihisgotan sa nag-unang artikulo. Ang Diyos wala makiggubat para sa unang siglong mga Kristohanon, ni magsugo kanila sa pagpakiggubat. Dayag nga ang unang siglo dili pa panahon sa Diyos nga makiggubat sa mga daotan ug daogdaogan.

Busa, sama sa mga alagad sa Diyos kaniadto, ang unang siglong mga Kristohanon kinahanglang maghulat sa panahon sa Diyos nga taposon ang pagkadaotan ug pagpangdaogdaog. Sa kasamtangan, wala sila sugoa sa Diyos nga magbuotbuot sa pagpakiggubat sa ilang mga kaaway. Gitin-aw kini ni Jesus diha sa iyang mga pagtulon-an. Pananglitan, wala niya sultihi ang iyang mga sumusunod nga makiggubat, hinunoa giingnan niya sila: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo.” (Mateo 5:44) Dihang gitagna ni Jesus ang pag-atake sa Romanong mga sundalo sa Jerusalem sa unang siglo, gisugo niya ang iyang mga tinun-an nga mokalagiw imbes magpabilin ug makiggubat, ug gituman nila kini.—Lucas 21:20, 21.

Dugang pa, si apostol Pablo misulat: “Ayaw kamo pagpanimalos, . . . kay nahisulat: ‘Akoa ang panimalos; ako magabalos, nag-ingon si Jehova.’” (Roma 12:19) Gikutlo ni Pablo ang dugay na kaayong gipamulong sa Diyos nga narekord sa Levitico 19:18 ug Deuteronomio 32:35. Sa nag-unang artikulo, ang Diyos nanimalos alang sa iyang katawhan sa karaang panahon pinaagi sa pagtabang nila sa pagpakiggubat sa ilang mga kaaway. Busa gipakita ni apostol Pablo nga wala mausab ang panglantaw sa Diyos bahin sa gubat. Sa unang siglo, giisip gihapon sa Diyos ang gubat ingong makataronganong paagi aron manimalos alang sa iyang katawhan ug aron taposon ang tanang pagpangdaogdaog ug pagkadaotan. Pero, sama kaniadto, ang Diyos lang ang magbuot kon kanus-a ug kon kinsay makiggubat.

Tin-aw nga wala tugoti sa Diyos nga makiggubat ang mga Kristohanon sa unang siglo. Apan komosta karon? May grupo ba sa katawhan nga gitugotan sa Diyos nga makiggubat? O karon na ba ang panahon sa Diyos nga molihok ug makiggubat alang sa iyang mga alagad? Unsay panglantaw sa Diyos bahin sa gubat karon? Tubagon kana sa sunod artikulo.

Una sa tanan, mahupay ka niini nga kamatuoran: Nakita sa Diyos ang pag-antos sa kalibotan karon, ug naa siyay himoon bahin niini. (Salmo 72:13, 14) Gisaad niya sa iyang Pulong, ang Bibliya, nga mahupay ra kadtong nag-antos ug kasakitan. Kanus-a man? “Inigpadayag na sa Ginoong Jesus gikan sa langit uban sa iyang gamhanang mga manulonda . . . dihang siya manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tesalonica 1:7, 8) Mahitabo ni sa umaabot ug gitawag kini sa Bibliya nga Armagedon, o ang “gubat sa dakong adlaw sa Diyos nga Labing Gamhanan.”—Pinadayag 16:14, 16.

Nianang gubata, dili mga tawo ang gamiton sa Diyos aron makiggubat sa mga daotan kondili ang iyang Anak, si Jesu-Kristo, ug ang ubang gamhanan nga mga linalang nga espirituhanon. Taposon sa kasundalohan sa langit ang tanang pagpangdaogdaog.—Isaias 11:4; Pinadayag 19:11-16.

Wala gayod mabag-o hangtod karon ang panglantaw sa Diyos bahin sa gubat. Giisip gihapon niya kini nga makataronganong paagi aron taposon ang pagpangdaogdaog ug pagkadaotan. Pero sumala sa kasaysayan, Diyos lang ang may katungod nga magbuot kon kanus-a ug kon kinsay makiggubat. Ug sa ato nang nasayran, nakadesisyon na ang Diyos nga ang gubat nga magtapos sa pagkadaotan ug magsilot niadtong nangdaogdaog mahitabo sa umaabot ug ang iyang Anak, si Jesu-Kristo, ang makiggubat niini. Nagpasabot kini nga ang mga gubat karon wala uyoni sa Diyos, bisan pag daw maayo ang ilang tumong.

Ingong ilustrasyon, hunahunaa nga dunay duha ka magsoon nga nag-away samtang may gilakaw ang ilang amahan. Gihunong nila kadiyot ang ilang away ug gitawgan ang ilang amahan. Miingon ang usa nga ang iyang igsoon maoy nagsugod sa away, pero nangatarongan pod ang usa nga gidaogdaog siya. Silang duha nagpalaban sa ilang amahan, ug ang matag usa nagdahom nga maoy dapigan. Apan human sila paminawi, miingon ang amahan nga hunongon ang ilang away ug hulaton nga makauli siya aron husayon sila. Ang magsoon naghulat. Pero pagkataudtaod nag-away na pod sila. Pag-uli sa amahan, nasuko siya nilang duha ug pareho silang gisilotan kay wala motuman kaniya.

Karon, ang mga nasod nga naggubatay sagad mangayog tabang sa Diyos. Pero wala siyay gidapigan. Hinunoa, siya klarong nag-ingon diha sa iyang Pulong, ang Bibliya: “Ayaw balosi si bisan kinsa ug daotan tungod sa daotan,” ug, “Ayaw kamo pagpanimalos.” (Roma 12:17, 19) Nag-ingon sab siya nga ang katawhan kinahanglang maghulat nga mapailobon sa iyang paglihok, nga himoon niya sa Armagedon. (Salmo 37:7) Kay ang mga nasod wala maghulat sa Diyos ug naggubatay na hinuon, giisip niya kanang mga gubata ingong mapangahason ug mapintas, ug nasuko siya niana. Busa sa Armagedon, ipadayag sa Diyos ang iyang kasuko ug husayon niya ang mga nasod pinaagi sa pagpahunong sa mga gubat sa tibuok yuta. (Salmo 46:9; Isaias 34:2) Oo, ang Armagedon maoy gubat nga magtapos sa tanang gubat.

Ang pagkahanaw sa gubat maoy usa sa daghang panalangin sa Gingharian sa Diyos. Kini nga gobyerno gihisgotan ni Jesus sa iyang iladong pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Gawas sa gubat, hanawon sab sa Gingharian sa Diyos ang ugat sa panaggubatay, ang pagkadaotan.a (Salmo 37:9, 10, 14, 15) Dili ikatingalang naghinamhinam ang mga sumusunod ni Jesus sa mga panalangin sa Gingharian sa Diyos.—2 Pedro 3:13.

Apan, hangtod kanus-a ta maghulat nga hanawon sa Gingharian sa Diyos ang tanang pag-antos, pagpangdaogdaog, ug pagkadaotan? Ang pagkatuman sa mga tagna sa Bibliya nagpakita nga nagpuyo na kita sa “kataposang mga adlaw” niining sistemaha sa mga butang. (2 Timoteo 3:1-5)b Hapit nang taposon sa Gingharian sa Diyos kining kataposang mga adlaw pinaagi sa gubat sa Armagedon.

Sumala sa nahisgotan na, ang mangamatay niining kataposang gubat mao kadtong ‘dili mosunod sa maayong balita bahin sa atong Ginoong Jesus.’ (2 Tesalonica 1:8) Pero hinumdomi nga dili malipay ang Diyos sa kamatayon ni bisan kinsa, bisan pa sa mga daotan. (Ezequiel 33:11) Busa kay “siya wala magtinguha nga adunay malaglag” sa kataposang gubat, gipaneguro sa Diyos nga ang maayong balita bahin sa atong Ginoong Jesus ‘mawali sa tibuok gipuy-ang yuta ingon nga pagpamatuod ngadto sa tanang kanasoran’ sa dili pa moabot ang kataposan. (2 Pedro 3:8, 9; Mateo 24:14; 1 Timoteo 2:3, 4) Oo, pinaagi sa pagsangyaw sa mga Saksi ni Jehova sa tibuok kalibotan, nahatagag kahigayonan ang mga tawo karon nga makaila sa Diyos, modawat sa maayong balita bahin kang Jesus, ug mabuhi sa panahon nga wala nay gubat.