Sama ni Alex, daghan karon ang dili ganahag hago nga trabaho. “Giisip sa daghan nga dili para nila ang ‘ubos’ nga matang sa trabaho,” matod sa mekaniko nga si Aaron. “Ang ilang tinamdan: ‘Hangtod nga wa pay mas maayong kahigayonan magmantenir lang sâ ko ini.’”

Nganong daghan ang dili ganahag hago nga trabaho? Posible nga naimpluwensiyahan sila sa media nga kanunayng nag-anunsiyog hayahay ug luho nga kinabuhi. “Daghan ang naghunahuna nga kon hago ang imong trabaho, dili kaayo ka malamposon,” matod ni Matthew nga tigmentinar ug mga bilding. Mao sab nay namatikdan sa janitor nga si Shane: “Ang mga tawo igo rang modawat ug usa ka adlawng suweldo pero di ganahang motrabahog tibuok adlaw.”

Sa laing bahin, daghang malamposong tawo ang ganahan ug hago nga trabaho. “Makapatagbaw kaayo ang hago nga trabaho, ilabina kon maayo ang imong tumong,” ingon ni Daniel, 25 anyos nga nagtrabaho sa konstruksiyon. Uyon niini ang 23 anyos nga si Andre: “Para nako, ang kalipay ug katagbawan nalangkit sa trabaho. Sa primero, ang gaan nga trabaho makapalipay pero kadugayan makalaay!”

Giunsa pag-ugmad ni Daniel ug Andre ang positibong panglantaw sa trabaho? Ilang gipadapat ang mga prinsipyo sa Bibliya. Wala pakamenosa sa Bibliya ang hago nga trabaho. Gidasig pa gani niini ang pagkakugihan ug pagkamalahutayon. Pero wala lang ta basta giingnan sa Bibliya nga magtrabaho. Gipakita sab niini kon unsaon nga malipay ta sa atong trabaho.

Unsang mga prinsipyo sa Bibliya ang makatabang aron malipay ka sa imong trabaho? Susiha ang pipila niini sa mosunod nga artikulo.

UGMARA ANG POSITIBONG PANGLANTAW SA TRABAHO

Mental man o pisikal ang imong trabaho, hinumdomi nga “sa tanang matang sa pagbudlay adunay bentaha.” (Proverbio 14:23) Unsay bentaha? Kon magkugi ta, matagan-an ang atong materyal nga panginahanglan. Oo, nagpasalig ang Diyos nga motagana siya niadtong sinserong nag-alagad niya. (Mateo 6:31, 32) Pero gidahom sab niya nga maningkamot tang manginabuhi sa hinlo nga paagi.—2 Tesalonica 3:10.

Busa isipon nato ang atong trabaho ingong dungganong paagi sa pagtuman sa atong mga responsabilidad. “Usa na ka kalamposan kon makasuportar ka sa kaugalingon,” matod sa 25 anyos nga si Joshua. “Kon makapalit ka sa imong panginahanglan, nan mapuslanon ang imong trabaho.”

Ang hago nga trabaho makadugang sab sa pagtahod sa kaugalingon. Dili gyod hinuon sayon ang hago nga trabaho. Pero kon atong disiplinahon ang kaugalingon ug magpabilin sa trabaho, bisag laay kini o lisod, magmalipayon gihapon ta kay nagsunod tag taas nga sukdanan. Nabuntog nato ang tendensiya nga magtinapolan. (Proverbio 26:14) Nianang paagiha, ang trabaho makahatag ug katagbawan. “Nindot akong paminaw human sa tibuok adlawng trabaho,” matod ni Aaron nga gihisgotan sa panid 3. “Tinuod nga gikapoy ko ug tingali way nakamatikod sa akong gihimo, pero nahibalo kong naa koy nalampos.”

PANINGKAMOTING MAHANAS SA IMONG TRABAHO

Gidayeg sa Bibliya ang tawong “hanas sa iyang buhat” ug ang babayeng “nagabuhat kon unsay gikahimut-an sa iyang mga kamot.” (Proverbio 22:29; 31:13) Siyempre dili awtomatikong mahanas ang usa ka tawo. Ug pipila ra nato ang ganahag trabaho nga dili nato linya. Tingali kanay rason nga daghan ang way kalipay sa ilang trabaho, kay wala sila maningkamot nga mahanas niini.

Sa pagkatinuod, ang usa ka tawo puwedeng magmalipayon sa bisan unsang trabaho kon husto siyag tinamdan—kon siya maningkamot nga mahanas sa iyang trabaho. “Kon buhaton nimo ang imong kinamaayohan sa trabaho ug makita ang resulta niana, kana makapalipay gayod,” matod sa 24 anyos nga si William. “Dili nimo bation nga nagdalidali ka o wa magtinarong sa trabaho.”

HUNAHUNAA NGA MAKABENEPISYO ANG UBAN SA IMONG TRABAHO

Ayaw pagsigeg hunahuna kon pilay imong suweldo. Hinuon, pangutan-a ang kaugalingon: ‘Nganong importante man ning trabahoa? Unsay mahitabo kon dili nako ni himoon o tarongon? Sa unsang paagi makabenepisyo ang uban sa akong trabaho?’

Maayong hunahunaon ilabina ang kataposang pangutana, kay makapalipay ang trabaho kon atong makita nga nakabenepisyo ang uban niini. Si Jesus mismo miingon: “Adunay labaw nga kalipay sa paghatag kay sa pagdawat.” (Buhat 20:35) Gawas pa niadtong direktang nakabenepisyo sa atong trabaho, sama sa mga kustomer ug amo, duna pay uban nga makabenepisyo. Lakip kanila ang atong pamilya ug kadtong nanginahanglan.

Pamilya. Kon ang ulo sa pamilya magkugi sa pagtagana sa iyang panimalay, siya makahatag ug benepisyo kanila. Una, maseguro niyang duna silay pagkaon, besti, ug puy-anan. Nianang paagiha matuman niya ang responsabilidad nga gihatag sa Diyos kaniya, nga “magtagana alang sa mga iya.” (1 Timoteo 5:8) Ikaduha, ikapakita niya ang kahinungdanon sa pagkakugihan sa trabaho. “Ang akong amahan maoy maayong ehemplo sa pagbaton ug maayong tinamdan sa trabaho,” matod ni Shane, gihisgotan sa unang artikulo. “Siya matinud-anon ug kugihan sa tibuok niyang kinabuhi ingong panday. Akong nakat-onan kaniya ang kahinungdanon sa manomano nga trabaho, ang paghimog mga butang nga mapuslan sa uban.”

Mga nanginahanglan. Gitambagan ni apostol Pablo ang mga Kristohanon nga “maghago . . . aron [sila] adunay ikahatag sa nanginahanglan.” (Efeso 4:28) Oo, kon magkugi ta aron matagan-an ang atong kaugalingon ug ang atong pamilya, makatabang sab ta niadtong nanginahanglan. (Proverbio 3:27) Pinaagi sa hago nga trabaho, makasinati tag labaw nga kalipay sa paghatag.

PAGHIMOG LABAW PA

Sa iyang gibantog nga Wali sa Bukid, si Jesus miingon: “Kon ang tawong may awtoridad magpugos kanimo sa pag-alagad ug usa ka milya, ubani siya ug duha ka milya.” (Mateo 5:41) Unsaon nimo pagpadapat kining prinsipyoha sa imong trabaho? Imbes nga basta lang motrabaho, pangitag paagi nga mohimog labaw pa sa gikinahanglan. Pagtakda ug mga tumong; paningkamoti nga mahanas o mas paspas kang motrabaho. Himoang pulido bisan ang ginagmayng detalye sa imong trabaho.

Kon mas labaw pa ang imong himoon, posible gyong magmalipayon ka sa imong trabaho. Ngano? Kay ikaw ang nagkontrol sa imong mga lihok. Imong gihimo ang mas labaw pa kay gusto nimo, dili tungod kay gipugos ka. (Filemon 14) Mahinumdom ta niini sa prinsipyo sa Proverbio 12:24: “Ang kamot sa mga kugihan mao ang magamando, apan ang taspokan nga kamot mahiagom sa pinugos nga trabaho.” Tinuod nga dili tanan nato ang literal nga naulipon o nailalom sa pinugos nga trabaho. Apan kon ang usa mohimo kon unsa ray gikinahanglan, mobati tingali siyang naulipon sa mga sugo sa uban. Pero kon ang usa motrabahog labaw pa tungod kay gusto niya, mobati siya nga kontrolado niya ang iyang kinabuhi. Siyay nagbuot sa iyang mga lihok.

HUPTI ANG BALANSENG PANGLANTAW SA TRABAHO

Dalayegon ang hago nga trabaho, apan hinumdoman nato nga duna pay mas importante kay sa pagtrabaho lang. Gidasig ta sa Bibliya nga magkugi. (Proverbio 13:4) Apan wala ni magpasabot nga magsige na lang tag trabaho. “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin,” matod sa Ecclesiastes 4:6. Unsay punto? Ang tawong nagsige na lag trabaho di gyod makapahimulos sa resulta sa iyang paghago kay nahurot na ang iyang panahon ug kusog sa trabaho. Busa ang iyang trabaho nahimo nang way pulos, samag “paggukod sa hangin.”

Ang Bibliya makatabang nato nga maugmad ang balanseng panglantaw sa trabaho. Bisag nag-ingon kini nga magkugi ta, nagtambag sab kini nga ‘tinoon ang mas hinungdanong mga butang.’ (Filipos 1:10) Unsa ang mas hinungdanong mga butang? Lakip niini ang paggahin ug panahon uban sa pamilya ug mga higala. Mas hinungdanon pa gyod ang espirituwal nga kalihokan, sama sa pagbasa sa Bibliya ug pagpamalandong niini.

Lagmit mas malipayon sa ilang trabaho kadtong balanse ang kinabuhi. “Duna koy amo kaniadto nga maayong ehemplo sa pagkabalanse sa trabaho,” matod ni William, nga gihisgotan na. “Siya kugihan, ug maayog relasyon sa iyang mga kliyente kay maayo siyang motrabaho. Apan pagkahuman sa iyang trabaho sa tibuok adlaw, biyaan na niya kini ug magpokus na sa iyang pamilya ug sa pagsimba. Ug abi nimo, usa siya sa malipayon kaayong tawo nga akong nailhan!”