Lagmit nakakita ka na nila nga nagsangyaw sa balay ug balay o sa publiko, nga nanghatag ug mga basahon nga binase sa Bibliya, ug nagtanyag ug libreng pagtuon sa Bibliya. Tingali nadawat nimo ning magasina gikan nila. Pero, lagmit nakapangutana ka kon kinsa gyod ang mga Saksi ni Jehova. Tingali nakahunahuna sab kag sama nianang sa ibabaw.

Kon nakapangutana ka niana, asa ka mangitag tubag? Unsay imong himoon aron mahibalo ka kon unsa gyoy gituohan sa mga Saksi ni Jehova, asa gikan ang pondo para sa ilang buluhaton ug mga tigomanan, ug nganong ila kang duawon sa balay ug duolon diha sa publiko?

“Daghan kog nabasahan sa Internet bahin sa mga Saksi ni Jehova,” matod ni Cecilie, nga gihisgotan sa ibabaw. “Nakadungog kog mga tabitabi ug naminaw kog daghang pangdaot bahin nila maong negatibo kog panglantaw sa mga Saksi ni Jehova.” Pero sa ulahi, nakig-estorya siya sa mga Saksi ni Jehova ug natubag ra ang iyang mga pangutana.

Gusto ka bag kasaligang tubag sa imong mga pangutana bahin sa mga Saksi? Pakig-estorya sa mga Saksi ni Jehova mismo, kinsa nag-imprenta niini nga magasin ug mas makatubag nimo. (Proverbio 14:15) Nanghinaot mi nga ang mosunod nga mga artikulo makatabang nimo nga masabtan kon kinsa mi, unsay among gituohan, ug unsa ang among buluhaton.

Usa mi ka internasyonal nga organisasyon nga dili sakop sa laing relihiyon. Bisag ang among world headquarters tua sa United States, ang kadaghanan sa mga Saksi ni Jehova nagpuyo sa ubang nasod. Gani, mga 8 milyones namo ang nagtudlo sa mga tawo bahin sa Bibliya diha sa kapig 230 ka kayutaan, kay among gisunod ang sugo ni Jesus: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.”—Mateo 24:14.

Bisag asa mi magpuyo, gisunod namo pag-ayo ang balaod. Apan naningkamot sab mi nga magpabiling neyutral sa politika kay gituman namo ang sugo ni Jesus para sa mga Kristohanon nga ‘dili makigbahin sa kalibotan.’ Busa, dili mi mag-apil-apil sa mga isyu ug kalihokan sa politika o mosuportar sa gubat. (Juan 15:19; 17:16) Gani, sa Gubat sa Kalibotan II, ang mga Saksi ni Jehova gipriso, gipaantos, ug gipamatay pa gani kay sila neyutral. Usa ka German nga obispo kanhi misulat: “Sila makapangangkon gyod nga sa panahon ni Hitler, sila ra ang hugot nga midumili nga magsundalo.”

Hinuon, wala namo ibulag ang among kaugalingon. Si Jesus miampo sa Diyos bahin sa iyang mga sumusunod: “Naghangyo ako kanimo, dili nga kuhaon sila gikan sa kalibotan.” (Juan 17:15) Busa, lagmit nakita mi nimo diha sa komunidad samtang kami nanarbaho, namalit, ug nangeskuyla.

Gituohan sa mga Saksi ni Jehova nga ang “tibuok Kasulatan inspirado sa Diyos ug mapuslanon.” (2 Timoteo 3:16) Gigamit namo ang Bibliya ingong giya aron makakat-on bahin sa Maglalalang ug makabaton ug makahuloganong kinabuhi.

Ang Bibliya nag-ingon: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” (Salmo 83:18) Busa, si Jehova nga Diyos lang ang among gisimba, ug ingong iyang mga Saksi, gipahibalo namo ang iyang ngalan.—Isaias 43:10-12.

Ingong mga Kristohanon, gituohan namo nga si Jesus, “ang Anak sa Diyos,”a mianhi sa yuta ug nahimong Mesiyas. (Juan 1:34, 41; 4:25, 26) Human siya mamatay, si Jesus gibanhaw sa langit. (1 Corinto 15:3, 4) Sa ulahi siya nahimong Hari sa Gingharian sa Diyos. (Pinadayag 11:15) Kana nga Gingharian maoy tinuod nga gobyerno nga magpasig-uli sa Paraiso sa yuta. (Daniel 2:44) “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait,” matod sa Bibliya.—Salmo 37:11, 29.

Gituohan sa mga Saksi ni Jehova nga ang mga prinsipyo sa Bibliya makahatag ug kaayohan sa mga tawo bisan karon. (Isaias 48:17, 18) Busa, gisunod namo pag-ayo kini nga mga prinsipyo. Pananglitan, dili mi manigarilyo o magdroga kay gipasidan-an man ta sa Bibliya nga likayan ang bisan unsa nga makahugaw sa atong hunahuna ug lawas. (2 Corinto 7:1) Gilikayan usab namo ang mga binuhatan nga gidumtan sa Bibliya sama sa paghuboghubog, seksuwal nga imoralidad, ug pagpangawat.—1 Corinto 6:9-11.

Kada tuig, nag-imprenta mi ug nanagtag ug ginatos ka milyong Bibliya ug mga basahong binase sa Bibliya. Sa tibuok kalibotan, nagtukod mi ug nagpalakaw ug mga branch office ug imprentahanan. Linibo ka kongregasyon ang magtigom diha sa simple pero nindot nga mga dapit sa pagsimba, nga gitawag ug Kingdom Hall. Diin kuhaa ang among panggasto para niini?

Ang among buluhaton gisuportahan ug boluntaryong mga amot. (2 Corinto 9:7) Niadtong 1879, ang ikaduhang gula niini nga magasin miingon: “Gituohan sa ‘Zion’s Watch Tower’ [nga maoy pagtawag niini kaniadto] nga si JEHOVA ang nagsuportar niini, maong dili gayod mi magpakilimos o mangayog pinansiyal nga tabang gikan sa mga tawo.” Kana gihapon ang among gibarogan.

Ang mga donasyon direktang ipadala sa usa sa among mga branch office o ihulog sa donation box diha sa among mga Kingdom Hall. Pero kami walay ihatag nga ikapulo, dili mangolekta, o magpabayad sa among serbisyo o mga publikasyon. Wala mi suweldohi para magsangyaw, magtudlo sa kongregasyon, o magtukod sa among mga dapit sa pagsimba. Sa pagkatinuod, si Jesus miingon: “Nadawat ninyo nga walay bayad, ihatag nga walay bayad.” (Mateo 10:8) Walay suweldo ang tanang membro nga naa sa among mga branch office ug sa world headquarters, apil na ang mga membro sa Nagamandong Lawas sa mga Saksi ni Jehova.

Ang mga donasyon gigamit usab alang sa mga hinabang panahon sa katalagman. Gikalipay sa unang mga Kristohanon ang pagtabang sa mga nanginahanglan. (Roma 15:26) Kami sab motabang sa mga biktima sa katalagman pinaagi sa pagtukod sa ilang mga balay ug dapit sa pagsimba, ug pagtaganag pagkaon, sinina, ug mga tambal.

Tingali nailhan kaayo mi tungod sa among kuging pagsangyaw sa balay ug balay, sa publiko, ug bisan asa nga dunay tawo. Nganong gihimo ni namo?

Ang mga Saksi ni Jehova mosangyaw aron madayeg ang Diyos ug mailhan ang iyang ngalan. (Hebreohanon 13:15) Gusto sab namong sundon si Kristo Jesus, kinsa nagsugo: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

Dugang pa, gihigugma namo ang among silingan. (Mateo 22:39) Siyempre, nasayod mi nga kadaghanang tawo dunay relihiyon ug nga dili tanan interesado sa among mensahe. Pero, nagtuo mi nga ang mga pagtulon-an sa Bibliya makaluwas ug kinabuhi. Tungod niana kami dili “mohunong sa pagpanudlo ug sa pagpahayag sa maayong balita bahin kang Kristo,” sama sa unang mga Kristohanon.—Buhat 5:41, 42.

Kadaghanang magbabasa sa among basahon dili mga Saksi ni Jehova. Ug lainlaig relihiyon ang minilyon sa nagtuon ug Bibliya uban namo. Apan mapasalamaton silang bisitahon sa mga Saksi ni Jehova.

Tingali, naa kay uban pang pangutana bahin sa mga Saksi ni Jehova. Giawhag ka namo nga sayron ang tubag pinaagi sa

• Pagpangutana sa usa sa mga Saksi ni Jehova.

• Pagbisita sa among website, ang www.pr418.com.

• Pagtambong sa among mga tigom, nga walay bayad ug para sa tanan.