Kapitulo 37

Angay ba Akong Magpabawtismo?

Markahi ang mosunod kon tinuod o bakak:

Ang bawtismo kinahanglanon sa mga Kristohanon.

□ Tinuod

□ Bakak

Ang pangunang katuyoan sa bawtismo mao ang pagpanalipod kanimo batok sa pagpakasala.

□ Tinuod

□ Bakak

Ang bawtismo mahimong makaluwas kanimo.

□ Tinuod

□ Bakak

Kon dili ka bawtismado, dili ka manubag sa Diyos sa imong mga binuhatan.

□ Tinuod

□ Bakak

Kon magpabawtismo ang imong mga higala, mahimo ka na sab nga magpabawtismo.

□ Tinuod

□ Bakak

KON ikaw nagsunod sa mga sukdanan sa Diyos, dunay maayong relasyon kaniya, ug nagpamatuod sa uban bahin sa imong pagtuo, natural lang nga maghunahuna ka na sa pagpabawtismo. Unsaon nimo pagkahibalo kon andam ka nang magpabawtismo? Aron matubag kanang pangutanaha, atong hisgotan ang giingon sa ibabaw.

● Ang bawtismo kinahanglanon sa mga Kristohanon.

Tinuod. Gisugo ni Jesus ang iyang mga tinun-an sa pagpabawtismo. (Mateo 28:19, 20) Gani, si Jesus mismo nagpabawtismo. Aron makasunod kang Kristo, kinahanglang magpabawtismo ka kon hamtong ka na sa paghimo niana nga desisyon ug kon gusto ka na gayod nga magpabawtismo.

● Ang pangunang katuyoan sa bawtismo mao ang pagpanalipod kanimo batok sa pagpakasala.

Bakak. Ang bawtismo maoy publikong pasundayag sa imong pagpahinungod kang Jehova. Ang imong pagpahinungod dili kay usa ka ordinaryong kontrata nga magpugong kanimo sa pagbuhat ug mga butang nga gusto nimong himoon sa tago. Hinunoa, imong gipahinungod ang imong kinabuhi kang Jehova tungod kay buot kang mosunod sa iyang mga sukdanan.

● Ang bawtismo mahimong makaluwas kanimo.

Tinuod. Ang Bibliya nag-ingon nga ang bawtismo maoy usa ka hinungdanong lakang aron makabaton kag kaluwasan. (1 Pedro 3:21) Apan wala kini magpasabot nga ang bawtismo kaamgid sa polisa sa insyurans nga imong paliton aron duna kay seguridad kon ugaling dunay mahitabong daotan kanimo. Ikaw nagpabawtismo tungod kay imong gihigugma si Jehova ug gusto kang moalagad kaniya sa walay kataposan sa bug-os mong kasingkasing.​—Marcos 12:29, 30.

● Kon dili ka bawtismado, dili ka manubag sa Diyos sa imong mga binuhatan.

Bakak. Ang Santiago 4:17 nag-ingon: “Kon ang usa nasayod sa pagbuhat kon unsay maayo apan wala magbuhat niini, siya nakasala”​—bawtismado man o dili. Busa kon nahibalo ka kon unsay husto ug may igong kahamtong sa paghunahuna bahin sa imong kinabuhi, tingali panahon na nga makigsulti ka sa imong ginikanan o sa laing hamtong nga Kristohanon. Nianang paagiha mahibalo ka kon unsay himoon aron mabawtismohan ka.

● Kon magpabawtismo ang imong mga higala, mahimo ka na sab nga magpabawtismo.

Bakak. Ang desisyon nga magpabawtismo kinahanglang kinasingkasing. (Salmo 110:3) Magpabawtismo ka lang kon nahibalo ug nakasabot ka kon unsay gikinahanglan sa pagkahimong Saksi ni Jehova ug kon segurado kang andam ka na sa pagdawat niini nga responsibilidad.​—Ecclesiastes 5:4, 5.

Ang Bawtismo Makausab sa Imong Kinabuhi

Ang bawtismo makausab sa kinabuhi nga motultol ug daghang panalangin. Apan kini nagsangon usab ug bug-at nga responsibilidad​—ang pagtuman sa imong panaad sa pagpahinungod kang Jehova.

Andam ka na bang magpahinungod? Kon mao, may katarongan ka nga magmalipayon. Naghulat kanimo ang kinadak-ang pribilehiyo sa tanan​—ang pag-alagad kang Jehova sa bug-os kasingkasing ug ang pagkinabuhi sa paagi nga nagpakita nga nagpahinungod ka gayod kaniya.​—Mateo 22:36, 37.

TEKSTO

“Itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.”​—Roma 12:1.

SUGYOT

Pinaagi sa tabang sa imong ginikanan, pangitag igsoon diha sa kongregasyon nga makatabang kanimo aron mouswag ka sa espirituwal.​—Buhat 16:1-3.

NAHIBALO KA BA . . . ?

Ang pagpabawtismo maoy hinungdanon kaayong bahin sa “marka,” nga magpaila nga maluwas ka.​—Ezequiel 9:4-6.

ANG AKONG PLANONG HIMOON!

Aron mabawtismohan, akong palamboon ang akong pagsabot sa mosunod nga mga pagtulon-an sa Bibliya ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Nganong hinungdanon ang bawtismo?

● Unsa kahay hinungdan nga ang usa ka batan-on maahat sa pagpabawtismo?

● Nganong ang usa ka batan-on magpanuko sa pagpahinungod ug sa pagpabawtismo?

[Blurb sa panid 306]

“Ang pagkabawtismado nakatabang kanako sa paghimog maalamong desisyon ug sa paglikay sa daotang mga buhat nga motultol ug kadaot.”​—Holly

[Kahon/​Hulagway sa panid 307]

Mga Pangutana nga Kasagarang Isukna Bahin sa Bawtismo

Unsay gisimbolohan sa bawtismo? Ang pagtuslob ug paghaw-as gikan sa tubig nagpasabot nga namatay ang imong daang personalidad, ug karon ikaw gihimong buhi sa pagtuman sa kabubut-on ni Jehova.

Unsay kahulogan sa pagpahinungod sa imong kinabuhi kang Jehova? Kini nagpasabot nga dili na ikaw ang tag-iya sa imong kaugalingon, nga nagsaad nga imong unahon ang pagtuman sa kabubut-on sa Diyos. (Mateo 16:24) Angayng ipahinungod una nimo ang imong kinabuhi kang Jehova diha sa pag-ampo sa dili ka pa magpabawtismo.

Unsay angay nimong buhaton una ka pa magpabawtismo? Kinahanglang magkinabuhi ka sumala sa giingon sa Pulong sa Diyos ug magpamatuod sa uban bahin sa imong pagtuo. Kinahanglang makigsuod ka sa Diyos pinaagi sa pag-ampo ug sa pagtuon sa iyang Pulong. Kinahanglang mag-alagad ka kang Jehova tungod kay mao kanay imong gitinguha​—dili kay gipugos ka sa uban.

Duna bay gitakdang edad kon kanus-a ka angayng magpabawtismo? Dili importante kon pilay imong edad. Apan kinahang- lang husto ka nag edad ug hamtong na, nga makasabot sa kahulogan sa pagpahinungod.

Komosta kon gusto ka nang magpabawtismo apan gisultihan ka sa imong gini- kanan nga maghulat una? Tingali gusto nila nga magkinabuhi una ka ingong Kristohanon. Paminaw sa ilang tambag, ug gamita ang maong panahon sa pagpalambo sa imong relasyon kang Jehova.​—1 Samuel 2:26.

[Kahon sa panid 308, 309]

Nagplano Ka Bang Magpabawtismo?

Susiha ang imong pag-uswag pinaagi sa pagtagad sa mga pangutana ug pahayag sa ubos. Basaha gayod ang gisitar nga mga teksto una isulat ang imong mga tubag.

Sa unsang mga paagi imong gipakita ang imong pagsalig kang Jehova?​—Salmo 71:5. ․․․․․

Unsay imong gihimo sa pagpakita nga ang imong gahom sa pagsabot nabansay sa pag-ila sa maayo ug sa daotan?​—Hebreohanon 5:14. ․․․․․

Unsa ka subsob ka mag-ampo? ․․․․․

Unsa ka espesipiko ang imong mga pag-ampo, ug unsay gipadayag niini maylabot sa imong gugma kang Jehova?​—Salmo 17:6. ․․․․․

Isulat kon unsay imong gustong pauswagon maylabot sa imong pag-ampo. ․․․․․

Unsa ka subsob ka magtuon ug Bibliya?​—Josue 1:8. ․․․․․

Unsa pay imong ilakip sa imong pagtuon? ․․․․․

Isulat kon unsa pay gusto nimong pauswagon maylabot sa imong personal nga pagtuon. ․․․․․

Epektibo ka ba sa ministeryo? (Pananglitan: Makapatin-aw ka ba sa pangunang mga pagtulon-an sa Bibliya ngadto sa uban? Imo bang ginabalikan ang interesadong mga tawo? Naningkamot ka ba nga makasugod ug pagtuon sa Bibliya?)

□ Oo □ Dili

Mosangyaw ka ba bisan dili mosangyaw ang imong ginikanan?​—Buhat 5:42.

□ Oo □ Dili

Isulat ang mga tumong nga buot nimong itakda maylabot sa imong ministeryo.​—2 Timoteo 2:15. ․․․․․

Regular ka ba sa pagtambong sa Kristohanong mga tigom?​—Hebreohanon 10:25. ․․․․․

Sa unsang mga paagi nakigbahin ka sa mga tigom? ․․․․․

Motambong ka ba sa mga tigom bisan wala ang imong ginikanan (kon tugotan ka nila)?

□ Oo □ Dili

Makaingon ka ba nga malipay ka gayod sa pagtuman sa kabubut-on sa Diyos?​—Salmo 40:8.

□ Oo □ Dili

Isulat ang espesipikong mga hitabo diin wala ka nagpadala sa pagpamit-os sa uban?​—Roma 12:2. ․․․․․

Unsay imong himoon aron magpabiling lig-on ang imong gugma kang Jehova?​—Judas 20, 21. ․․․․․

Moalagad ka ba gihapon kang Jehova bisan mohunong na sa pag-alagad ang imong ginikanan ug mga higala?​—Mateo 10:36, 37.

□ Oo □ Dili

[Hulagway sa panid 310]

Sama sa kaminyoon, ang bawtismo makausab sa imong kinabuhi​—seryoso kini nga lakang