SA DIHANG mosulti ka sa uban bahin sa mga katuyoan sa Diyos, pribado man o gikan sa plataporma, ang imong paghisgot angayng masentro sa kon unsay anaa sa Pulong sa Diyos. Kasagarang naglangkit kini sa pagbasag mga kasulatan gikan sa Bibliya, nga kinahanglang maayo nga pagkabasa.

Ang Tukmang Pagpasiugda Naglangkit sa Pagbati. Ang mga kasulatan angayng basahon uban ang pagbati. Tagda ang pipila ka pananglitan. Sa dihang imong basahog kusog ang Salmo 37:​11, kinahanglang ipaila sa imong tingog ang malipayon nga pagkahinam sa pakigdait nga gisaad didto. Sa dihang imong basahon ang Pinadayag 21:4 mahitungod sa pagkawala nay pag-antos ug kamatayon, kinahanglang ipabanaag sa imong tingog ang mainitong apresasyon sa kahibulongang kahupayan nga gitagna. Ang Pinadayag 18:​2, 4, 5, uban sa paghangyo niini sa paggula gikan sa punog-sala nga “Dakong Babilonya,” angayng basahon uban ang tono sa pagkadinalian. Siyempre, ang pagbating gipahayag angay nga kinasingkasing apan dili pasobrahan. Ang tukmang gidak-on sa emosyon pagatinoon sa teksto mismo ug sa pagkagamit niini.

Ipasiugda ang Hustong mga Pulong. Kon ang imong mga komento bahin sa usa ka bersikulo gisentro sa usa lang ka bahin niana, angay nga ipatugbaw mo kanang bahina dihang magabasa sa maong teksto. Pananglitan, sa pagbasa sa Mateo 6:​33, ayaw hatagig pangunang pagpasiugda ang “iyang pagkamatarong” o “kining tanang ubang mga butang” kon ang imong tuyo mao ang pag-analisar sa ipasabot sa “pagpangita pag-una sa gingharian.”

Sa usa ka pakigpulong diha sa Tigom sa Pag-alagad, basin imong gihunahuna nga basahon ang Mateo 28:19. Unsang mga pulonga ang angay nimong ipasiugda? Kon buot nimong idasig ang pagkakugihan sa pagsugod ug mga pagtuon sa Bibliya sa balay, ipasiugda ang “paghimog mga tinun-an.” Sa laing bahin, kon imong gihunahuna ang paghisgot sa Kristohanong responsabilidad nga ang kamatuoran sa Bibliya ipaambit sa katawhang imigrante o buot nimong dasigon ang pipila ka magmamantala aron mag-alagad sa dapit nga dako ang panginahanglan, ikapasiugda mo ang “katawhan sa tanang kanasoran.”

Masubsob, ang usa ka kasulatan ipresentar ingong tubag sa pangutana o aron pagsuportar sa usa ka argumento nga giisip sa uban nga lantugionon. Kon ang tanang ideyang gipahayag diha sa teksto hatagan ug parehong pagpasiugda, ang koneksiyon dili masabtan sa imong mamiminaw. Ang punto basin dayag alang kanimo apan dili alang kanila.

Pananglitan, sa pagbasa sa Salmo 83:18 gikan sa usa ka Bibliyang anaa ang balaang ngalan, kon imong ibutang ang bug-os nga pagpasiugda diha sa pamulong “ang Labing Hataas,” ang tagbalay basin dili makasabot sa maorag dayag nga kamatuoran nga ang Diyos adunay personal nga ngalan. Angay nga imong ipasiugda ang ngalang “Jehova.” Bisan pa niana, sa dihang magagamit ka sa samang kasulatan diha sa paghisgot bahin sa pagkasoberano ni Jehova, kinahanglang imong ihatag ang pangunang pagpasiugda diha sa pamulong “ang Labing Hataas.” Mao man usab, sa magagamit sa Santiago 2:24 aron ipakita ang kahinungdanon nga ang pagtuo pagaubanan ug mga binuhatan, ang paghatag ug pangunang pagpasiugda diha sa “igapahayag nga matarong” inay diha sa “binuhatan” basin magpahinabo nga ang pipilang nagpatalinghog kanimo dili makasabot sa punto.

Ang laing makatabang nga pananglitan makaplagan sa Roma 15:7-13. Kini maoy bahin sa sulat ni apostol Pablo ngadto sa usa ka kongregasyong gilangkoban sa mga Hentil ug sa kinaiyanhong mga Hudiyo. Ang apostol nangatarongan dinhi nga ang ministeryo ni Kristo makahatag ug kaayohan dili lang ngadto sa tinuli nga mga Hudiyo kondili sa katawhan usab sa kanasoran aron “ang mga nasod makahimaya sa Diyos tungod sa iyang kaluoy.” Unya si Pablo mikutlog upat ka kasulatan, nga nagpunting sa pagtagad sa maong kahigayonan alang sa mga nasod. Unsaon nimo pagbasa ang maong mga pangutlo aron ipasiugda ang puntong diha sa hunahuna ni Pablo? Kon ikaw nagamarka sa mga ekspresyon nga ipasiugda, imong ikapasiugda “ang mga nasod” sa bersikulo 9, “kamong mga nasod” sa bersikulo 10, “kamong tanang kanasoran” ug “tanang katawhan” sa bersikulo 11, ug “mga nasod” sa bersikulo 12. Sulayi ang pagbasa sa Roma 15:7-13 uban ang maong pagpasiugda. Samtang imong himoon kana, ang enterong paagi sa pagpangatarongan ni Pablo mas matin-aw ug daling masabtan.

Mga Metodo sa Pagpasiugda. Ang nagdala-sa-ideyang mga pulong nga buot nimong ipatugbaw ikapasiugda sa daghang paagi. Ang paaging imong gamiton angay nga mahiuyon sa kasulatan ug sa tagboanan sa pakigpulong. Aniay pipila ka sugyot.

Pagpasiugda pinaagi sa tingog. Kini naglangkit sa bisan unsang pag-usab sa tingog nga magpalahi sa nagdala-sa-ideyang mga pulong gikan sa ubang bahin sa tudling-pulong. Ang pagpasiugda makab-ot pinaagi sa pag-usab sa gidak-on sa tingog​—pinaagi sa pagpadako o pagpahinay niini. Sa daghang pinulongan, ang pag-usab sa tono makadugang sa pagpasiugda. Bisan pa niana, sa pipila ka pinulongan kana basin bug-os makausob sa kahulogan. Sa dihang ang mas hinay nga paso maoy gamiton alang sa pangunang mga ekspresyon, madugangan ang kabililhon niini. Sa mga pinulongan nga dili mahimo ang pagpasiugda sa tinong mga pulong pinaagi sa pag-usab sa tingog, basin himoon ang bisan unsang naandan sa maong pinulongan aron makab-ot ang gitinguhang mga resulta.

Paghunong. Mahimong himoon kini sa dili pa o human sa pagbasa sa pangunang bahin sa kasulatan​—o nianang duruha ka kahimtang. Ang paghunong sa dayon nimong pagbasa sa pangunang ideya makamugnag kahinam; ang paghunong pagkahuman makapadulot sa impresyon niana. Bisan pa niana, kon ang paghunong daghan ra kaayo, walay ikapalutaw nga ideya.

Pagsubli. Makabutang ka sa pasiugda diha sa linaing punto pinaagi sa pagsalga sa imong kaugalingon ug pag-otrog basa sa pulong o mga pulong. Usa ka metodo nga kasagarang pilion maoy pagkompletog basa sa teksto ug unya pagsubli sa pangunang mga pulong.

Mga kompas. Ang lihok sa lawas ug ekspresyon sa nawong kasagarang makadugang ug emosyon diha sa usa ka pulong o grupo sa mga pulong.

Tono sa tingog. Sa pipila ka pinulongan, ang mga pulong basin basahon usahay diha sa tono nga makaapektar sa ilang kahulogan ug makapalahi kanila. Dinhi, usab, kinahanglang ipadayag ang kamaalamon, ilabina sa pagkantalita.

Sa Dihang Uban ang Magbasa sa mga Teksto. Sa dihang ang tagbalay magbasag usa ka kasulatan, basin ipasiugda niya ang dili-tukmang mga pulong o walay ipasiugda. Nan unsay himoon nimo? Kasagarang labing maayo nga tin-awon ang kahulogan pinaagi sa imong pagpadapat sa mga teksto. Human sa pagpadapat, ikasentro nimo ang linaing pagtagad nga direkta sa nagdala-sa-ideyang mga pulong diha sa Bibliya.

SA DIHANG magatudlo sa uban, gikinahanglan ang labaw pa kay sa pagbasa lamag mga bersikulo gikan sa Bibliya. Si apostol Pablo misulat sa iyang kaubang si Timoteo: “Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”​—2 Tim. 2:15.

Ang paghimo niini nagpasabot nga ang atong pagpatin-aw sa mga kasulatan nahiuyon gayod sa gitudlo mismo sa Bibliya. Nagkinahanglan kini nga atong tagdon ang konteksto, inay pilion lamang ang mga ekspresyong makadani kanato ug makadugang sa atong kaugalingong mga ideya. Pinaagi sa manalagnang si Jeremias, si Jehova nagpasidaan batok sa mga manalagnang nag-angkon nga nagsulti gikan sa baba ni Jehova apan sa pagkatinuod nagpadayag sa “panan-awon sa ilang kaugalingong kasingkasing.” (Jer. 23:16) Si apostol Pablo nagpasidaan sa mga Kristohanon nga dili hugawan ug tawhanong mga pilosopiya ang Pulong sa Diyos sa dihang siya misulat: “Kami mibiya na sa sinuwitik nga mga butang nga angayng ikaulaw, nga wala magalakaw pinaagig lipatlipat, ni nagasambog sa pulong sa Diyos.” Niadtong mga adlawa ang limbongang mga negosyanteg bino nagsambog sa ilang bino aron kana modaghan ug mas makasapi. Wala kita magsambog sa Pulong sa Diyos pinaagi sa pagsagol nianag tawhanong mga pilosopiya. “Kami dili mga tigbaligya sa pulong sa Diyos ingon sa daghang tawo,” nagpahayag si Pablo, “apan tungod sa katim-os, oo, ingon nga mga pinadala gikan sa Diyos, ilalom sa panan-aw sa Diyos, kauban ni Kristo, kami nagasulti.”​—2 Cor. 2:17; 4:2.

Usahay, ikaw mokutlo tingalig usa ka kasulatan aron ipalutaw ang usa ka prinsipyo. Ang Bibliya punog mga prinsipyo nga makahatag ug maayong giya aron masagubang ang nagkadaiyang mga kahimtang. (2 Tim. 3:​16, 17) Apan kinahanglan nga imong tinoon nga husto ang imong pagpadapat ug dili sayop ang pagkagamit nimo sa usa ka kasulatan, pinaagi sa pagpakitang kana nagsulti kon unsay buot nimong isulti niana. (Sal. 91:​11, 12; Mat. 4:​5, 6) Ang pagpadapat kinahanglang naharmonya sa katuyoan ni Jehova, nga nahiuyon sa enterong Pulong sa Diyos.

‘Ang paggamit sa pulong sa kamatuoran sa hustong paagi’ naglakip usab sa pagkuha sa diwa sa giingon sa Bibliya. Kini dili “batuta” nga gamiton aron dagmalan ang uban. Ang relihiyosong mga magtutudlo nga nagsupak kang Jesu-Kristo nagkutlo gikan sa Kasulatan, apan gipiyong nila ang ilang mga mata sa mas hinungdanong mga butang​—kadtong naglangkit sa hustisya ug kaluoy ug pagkamatinumanon​—nga gibaod sa Diyos. (Mat. 22:​23, 24; 23:​23, 24) Sa dihang nagtudlo sa Pulong sa Diyos, gibanaag ni Jesus ang personalidad sa iyang Amahan. Ang kadasig ni Jesus alang sa kamatuoran giduyogan sa iyang lalom nga gugma alang sa mga tawo nga iyang gitudloan. Kinahanglang kita maningkamot nga mosunod sa iyang panig-ingnan.​—Mat. 11:28.

Sa unsang paagi makatino kita nga ginapadapat nato sa hustong paagi ang usa ka kasulatan? Ang regular nga pagbasa sa Bibliya makatabang. Kinahanglang atong pabilhan usab ang gitagana ni Jehova nga “matinumanon ug maalamong ulipon,” ang lawas sa dinihogan-sa-espiritung mga Kristohanon nga pinaagi kanila siya nagtaganag espirituwal nga pagkaon alang sa panimalay sa pagtuo. (Mat. 24:45) Ang personal nga pagtuon ingon man regular nga pagtambong ug pagpakigbahin sa mga tigom sa kongregasyon motabang kanato sa pagpahimulos sa pagpanudlo nga gitagana pinaagi nianang matinumanon ug maalamong ulipon nga matang.

Kon adunay libro nga Nangatarongan Pinasukad sa Kasulatan ug nakakat-on ka sa paggamit ug maayo niini, aduna kay dihadihang giya nga imong gikinahanglan alang sa hustong pagpadapat sa ginatos ka kasulatan nga kanunayng gamiton diha sa atong ministeryo. Kon naghunahuna kang mogamit ug dili-sinating kasulatan, ang pagkamakasaranganon magadasig kanimo sa paghimog kinahanglanong pagdukiduki aron inigsulti nimo, ikaw magagamit sa pulong sa kamatuoran sa hustong paagi.​—Prov. 11:2.

Himoang Tin-aw ang Pagpadapat. Sa dihang magatudlo sa uban, tinoa nga sila tin-awng nakasabot sa koneksiyon tali sa ulohang imong gihisgotan ug sa mga kasulatang imong gigamit. Kon paunhan nimog pangutana ang kasulatan, kinahanglang makasabot ang imong mga tigpatalinghog kon giunsa pagtubag sa kasulatan ang maong pangutana. Kon magagamit kag kasulatan isip suportar sa usa ka deklarasyon, tinoa nga tin-awng nakasabot ang estudyante kon sa unsang paagi gipamatud-an sa teksto ang maong punto.

Ang pagbasa lang sa kasulatan​—bisan pag may pagpasiugda—​kasagarang dili igo. Hinumdomi, ang ordinaryong tawo wala masinati sa Bibliya ug lagmit dili makasabot sa imong punto pinaagi sa usa lang ka pagbasa. Ipunting ang pagtagad diha sa bahin sa teksto nga direktang mapadapat sa butang nga imong gihisgotan.

Kasagarang nagkinahanglan kini nga imong ipalain ang pangunang mga pulong, kanang may direktang kalabotan sa puntong gihisgotan. Ang labing yanong metodo mao ang pagpahayag pag-usab nianang nagdala-sa-ideyang mga pulong. Kon nakigsulti ka sa usa ka indibiduwal, makasukna kag mga pangutana nga makatabang kaniya sa pag-ila sa pangunang mga pulong. Sa dihang mopakigpulong nganha sa usa ka grupo, ang pipila ka mamumulong mopalabi sa pagkab-ot sa ilang tumong pinaagi sa paggamit ug susamang mga pulong o pinaagi sa pagpahayag pag-usab sa ideya. Hinuon, kon pilion mo ang paghimo niini, pag-amping nga dili malimtan sa mamiminaw ang koneksiyon tali sa puntong gihisgotan ug sa han-ay sa mga pulong sa kasulatan.

Kay nakapalain na sa pangunang mga pulong, napahiluna mo na ang maayong patukoranan. Karon padayon sa pagsaysay nga uyon niana. Gipaila mo ba ang kasulatan uban ang tin-awng pagpasabot sa imong katarongan sa paggamit sa teksto? Kon mao, ipunting ang kalangkitan sa mga pulong nga imong gipalutaw nganha sa butang nga ang imong mamiminaw giagak nimo sa pagdahom. Ipahayag sa tin-aw kon unsa ang maong koneksiyon. Bisan pag wala ka mogamit ug klarong introduksiyon sa teksto, angay nga adunay pasunod nga katin-awan.

Ang mga Pariseo nangutana kang Jesus sa ilang gihunahuna nga maoy lisod nga pangutana, nga mao: “Subay ba sa balaod nga ang usa ka lalaki makigdiborsiyo sa iyang asawa sa bisan unsang matang sa pasikaranan?” Gibase ni Jesus ang iyang tubag sa Genesis 2:24. Matikding iyang gisentro ang pagtagad diha sa usa lang ka bahin niana, ug unya gihimo ang gikinahanglang pagpadapat. Kay gipunting na nga ang lalaki ug iyang asawa mahimong “usa ka unod,” si Jesus mitapos: “Busa, kon unsay gihiusa pagyugo sa Diyos ayaw ipabulag ni bisan kinsang tawo.”​—Mat. 19:3-6.

Unsa ka dakong katin-awan ang imong himoon aron matin-aw ang pagpadapat sa usa ka kasulatan? Ang kahugpongan sa imong mamiminaw ug ang kahinungdanon sa puntong gihisgotan ang magahukom gayod niana. Himoa nga imong tumong ang kayano ug pagkadirekta.

Pangatarongan Pinasukad sa Kasulatan. Mahitungod sa ministeryo ni apostol Pablo sa Tesalonica, ang Buhat 17:​2, 3 nagtug-an kanato nga siya ‘nangatarongan pinasukad sa Kasulatan.’ Kini usa ka katakos nga paningkamotan gayong ugmaron sa matag alagad ni Jehova. Pananglitan, si Pablo nag-asoy ug tinuod nga mga panghitabo sa kinabuhi ug ministeryo ni Jesus, nagpadayag nga kini gitagna na sa Hebreohanong Kasulatan, ug dayon mihatag ug kusganong konklusyon pinaagi sa pag-ingon: “Kini mao ang Kristo, kining Jesus nga akong ginamantala kaninyo.”

Sa dihang nagsulat ngadto sa mga Hebreohanon, si Pablo subsob nagkutlo gikan sa Hebreohanong Kasulatan. Aron ipasiugda o tin-awon ang usa ka punto, subsob niyang gipalain ang usa ka pulong o mubong prase ug unya gipadayag ang kahulogan niini. (Heb. 12:​26, 27) Sa asoy nga makita sa Hebreohanon kapitulo 3, si Pablo nagkutlo gikan sa Salmo 95:7-11. Unya matikdi nga iyang gipatin-aw ang tulo ka bahin niini: (1) ang paghisgot sa kasingkasing (Heb. 3:​8-​12), (2) ang kahulogan sa ekspresyong “Karong adlawa” (Heb. 3:​7, 13-15; 4:6-11), ug (3) ang kahulogan sa deklarasyon: “Dili sila makasulod sa akong kapahulayan” (Heb. 3:​11, 18, 19; 4:1-11). Paningkamoti nga mosunod sa maong panig-ingnan samtang ikaw magpadapat sa matag kasulatan.

Tan-awa ang pagkaepektibo sa pagpangatarongan ni Jesus pinasukad sa Kasulatan diha sa asoy nga makaplagan sa Lucas 10:25-37. Usa ka lalaking batid sa Balaod nangutana: “Magtutudlo, pinaagi sa pagbuhat sa unsa nga mapanunod ko ang kinabuhing walay kataposan?” Sa pagtubag si Jesus miawhag una sa maong tawo nga ipahayag ang iyang opinyon bahin niana, ug unya gipasiugda ni Jesus ang kahinungdanon sa pagbuhat kon unsay giingon sa Pulong sa Diyos. Sa dihang natin-aw nga wala makasabot ang maong tawo sa punto, gihisgotan pag-ayo ni Jesus ang usa lang ka pulong sa kasulatan​—ang “silingan.” Inay kay yanong ihatag ang kahulogan niini, migamit siyag usa ka ilustrasyon aron tabangan ang tawo nga makadangat sa tukmang konklusyon sa iyang kaugalingon.

Dayag nga sa dihang magatubag ug mga pangutana, si Jesus wala lang mokutlog mga teksto nga mihatag ug direkta, dayag nga tubag. Gianalisar niya kon unsay giingon niini ug unya gipadapat ngadto sa pangutanang gihisgotan.

Sa dihang ang paglaom sa pagkabanhaw gilalis sa mga Saduseo, gisentro ni Jesus ang pagtagad diha sa usa ka espesipikong bahin sa Exodo 3:6. Apan wala siya mohunong human sa pagkutlo sa kasulatan. Nangatarongan siya pinasukad niana aron tin-awng ipakita nga ang pagkabanhaw maoy bahin sa katuyoan sa Diyos.​—Mar. 12:24-27.

Ang pagbatid sa katakos nga mangatarongan sa husto ug epektibong paagi pinasukad sa Kasulatan mao unyay usa ka hinungdanong elemento nga mahimo kang hanas nga magtutudlo.

KON makigsulti ka sa usa ka tawo o sa ubay-ubayng mamiminaw, dili maalamon nga isipong ang imong tigpatalinghog o mga tigpatalinghog interesado sa imong ulohan tungod lang kay ikaw interesado niana. Mahinungdanon ang imong mensahe, apan kon dili nimo himoong tin-aw ang praktikal nga bili niini, lagmit dili ka makahawid ug dugay sa interes sa imong mamiminaw.

Kini matuod bisan sa mamiminaw diha sa Kingdom Hall. Sila tingali mamati kon mogamit kag ilustrasyon o kasinatian nga wala pa nila madungog sa nangagi. Apan sila tingali mohunong sa pagpamati kon maghisgot kag mga butang nga ila nang nahibaloan, ilabina kon mapakyas ka sa pagpatin-aw nga detalyado nianang mga butanga. Kinahanglang imong tabangan sila sa pagsabot kon ngano ug sa unsang paagi makahatag ug tinuod nga kaayohan kanila ang imong ginasulti.

Ang Bibliya nagdasig kanato sa paghunahuna sa praktikal nga mga paagi. (Prov. 3:21) Si Jehova migamit kang Juan Bawtista aron tultolan ang mga tawo ngadto sa “praktikal nga kaalam sa mga matarong.” (Luc. 1:17) Kini maoy kaalam nga nakagamot sa maayog-pasukaranan nga kahadlok kang Jehova. (Sal. 111:10) Kadtong magpabili sa maong kaalam matabangan aron masagubang nga malamposon ang kinabuhi karon ug makapangupot sa tinuod nga kinabuhi, ang walay-kataposang kinabuhi nga umaabot.​—1 Tim. 4:8; 6:19.

Himoang Praktikal ang Usa ka Pakigpulong. Aron mahimong praktikal ang imong pakigpulong, kinahanglang imong hunahunaog maayo dili lamang ang materyal kondili ang mamiminaw usab. Ayawg hunahunaa nga usa lamang ka grupo sila. Ang maong grupo gilangkoban sa mga indibiduwal ug mga pamilya. Tingali adunay mga bata pa kaayo, mga tin-edyer, mga hingkod, ug pipila nga tigulang. Tingali adunay mga bag-ong interesado ingon man kadtong nagsugod sa pag-alagad kang Jehova sa wala ka pa ipanganak. Ang pipila tingali hamtong sa espirituwal; ang uban basin naimpluwensiyahan pag-ayo sa tinong mga tinamdan ug mga buhat sa kalibotan. Suknaa ang imong kaugalingon: ‘Sa unsang paagi ang akong pagahisgotan makahatag ug kaayohan niadtong maminaw? Sa unsang paagi matabangan ko sila nga makasabot sa punto?’ Basin mohukom ka sa paghatag ug pangunang pagtagad sa usa o duha lamang sa mga grupo nga gihisgotan dinhi. Bisan pa niana, ayawg kalimti sa bug-os ang uban.

Unsa na man kon giasayn ka sa paghisgot ug paninugdang pagtulon-an sa Bibliya? Sa unsang paagi imong mahimo ang maong pakigpulong nga makahatag ug kaayohan sa mamiminaw nga nagtuo na nianang pagtulon-ana? Paningkamoti ang pagpalig-on sa ilang pagtuo niana. Sa unsang paagi? Pinaagi sa pagpangatarongan pinasukad sa Kasulatanhong ebidensiya nga nagsuportar niana. Makapalalom ka usab sa ilang pagpabili sa maong pagtulon-an sa Bibliya. Kini mahimo tingali pinaagi sa pagpakita kon sa unsang paagi ang pagtulon-an nahiuyon sa ubang mga kamatuoran sa Bibliya ug sa kaugalingong personalidad ni Jehova. Gamit ug mga pananglitan​—tinuod-kinabuhing mga kasinatian kon mahimo​—nga magpakita kon sa unsang paagi ang pagsabot sa maong linaing pagtulon-an nakahatag ug kaayohan sa mga tawo ug nakaapektar sa ilang panglantaw bahin sa umaabot.

Ayawg hisgoti ang praktikal nga kapadapatan diha lang sa pipila ka mugbong komento sa konklusyon sa imong pakigpulong. Sukad sa sinugdan, ang matag tawo sa imong mamiminaw angayng mobati nga “kini naglangkit kanako.” Kay nakapahiluna na sa maong patukoranan, magpadayon sa paghimog praktikal nga pagpadapat samtang imong han-ayon ang matag usa sa mga pangunang punto sa lawas sa pakigpulong ingon man sa konklusyon.

Sa pagpadapat, tinoa nga himoon kana sa paaging nahiuyon sa mga prinsipyo sa Bibliya. Unsay ipasabot niana? Kana nagpasabot sa paghimo niana sa mahigugmaong paagi ug magpakitag empatiya. (1 Ped. 3:8; 1 Juan 4:8) Bisan sa dihang nagdumala ug lisod nga mga suliran sa Tesalonica, gitino ni apostol Pablo ang pagpasiugda sa positibong mga bahin sa espirituwal nga pag-uswag sa iyang Kristohanong mga igsoong lalaki ug babaye didto. Siya nagpahayag usab ug pagsalig nga sa butang nga gihisgotan niadtong higayona, buot nilang buhaton kon unsay matarong. (1 Tes. 4:1-12) Pagkamaayong sumbanan nga sundogon!

Ang katuyoan ba sa imong pakigpulong mao ang pagdasig sa pagpakigbahin sa buluhatong pagwali ug pagtudlo sa maayong balita ngadto sa uban? Ugmara ang kadasig ug pagpabili sa maong pribilehiyo. Hinuon, samtang nagabuhat niana, ibutang sa hunahuna nga nagkadaiya ang gidak-on sa maarangang pagpakigbahin sa mga indibiduwal, ug kini gitagad sa Bibliya. (Mat. 13:23) Ayaw pabug-ati ang imong mga igsoon sa mga pagbati sa sala. Ang Hebreohanon 10:24 nag-awhag kanato nga ‘magdasig ngadto sa paghigugma ug sa maayong mga buhat.’ Kon kita magdasig ngadto sa paghigugma, ang mga buhat nga gipasukad sa maayong motibo mosunod. Inay tinguhaon ang pagdiktar sa panag-uyonay, ilha nga buot ni Jehova nga kita magpalambo sa “pagkamasinugtanon pinaagi sa pagtuo.” (Roma 16:26) Uban niini sa hunahuna, tinguhaon nato nga palig-onon ang pagtuo​—ang atong kaugalingon ug ang iya sa atong mga igsoon.

Pagtabang sa Uban Aron Masabtan ang Punto. Samtang magsangyaw sa uban, ayaw pakyasa ang pagpasiugda sa praktikal nga bili sa maayong balita. Sa paghimo niana kinahanglang imong tagdon kon unsay anaa sa mga hunahuna sa mga tawo diha sa imong teritoryo. Sa unsang paagi imong masusi kana? Pamati sa balita sa radyo o telebisyon. Tan-awa ang unang panid sa mantalaan. Gawas pa, paningkamoti ang pagpakigkabildo sa mga tawo, ug pamati sa dihang sila mosulti. Tingali ikaw makadiskobre nga sila nagapakigbisog sa mga problema nga nagkinahanglag dinaliang pagtagad​—pagkapuwera sa trabaho, pagbayad sa abang sa balay, sakit, pagkamatay sa usa ka membro sa pamilya, kapeligrohan gumikan sa krimen, inhustisya diha sa mga kamot sa usang may awtoridad, panagbulag sa magtiayon, pagkontrolar sa mga anak, ug uban pa. Makatabang ba ang Bibliya kanila? Sa bug-os gayod.

Sa dihang mosugod sa usa ka kabildohay, lagmit aduna kay usa ka ulohan sa hunahuna. Ugaling lang, kon ipaila sa tawo nga siya interesado kaayo sa laing isyu, ayaw pag-ukon-ukon sa paghisgot niana kon makaarang ka, o itanyag nga mobalik ka uban ang makatabang nga impormasyon. Siyempre, molikay kita sa ‘pagpanghilabot sa butang nga wala kitay labot,’ apan kita malipayong makigbahin sa uban sa praktikal nga tambag nga ginahatag sa Bibliya. (2 Tes. 3:11) Dayag na lang, ang labing maangayan sa mga tawo mao ang tambag sa Bibliya nga moapektar sa ilang mga kinabuhi mismo.

Kon ang mga tawo dili makasabot kon sa unsang paagi ang atong mensahe makaapektar kanila sa personal, tingali taposon dayon nila ang kabildohay. Bisan pag ilang itugot nga mosulti kita, ang kapakyasan sa atong bahin sa pagpakita sa praktikal nga bili sa ulohan mahimong magpasabot nga ang atong mensahe gamay ra unya kaayog epekto sa ilang kinabuhi. Sa kasukwahi, kon atong himoong tin-aw ang praktikal nga bili sa mensahe, ang atong paghisgot mahimong mao ang timaan sa dakong kausaban sa kinabuhi sa mga tawo.

Sa dihang magdumalag mga pagtuon sa Bibliya, ipadayon ang pagpasiugda sa praktikal nga kapadapatan. (Prov. 4:7) Tabangi ang mga estudyante sa pagsabot sa Kasulatanhong tambag, mga prinsipyo, ug mga pananglitan nga magpakita kanila kon unsaon paglakaw sa mga dalan ni Jehova. Ipasiugda ang mga kaayohan nga mosangpot sa pagbuhat niana. (Isa. 48:​17, 18) Kini magdasig sa mga estudyante sa paghimog gikinahanglang mga kausaban diha sa ilang mga kinabuhi. Lig-ona diha kanila ang gugma kang Jehova ug tinguha sa pagpahimuot kaniya, ug pasagding ang panukmod sa pagpadapat sa Pulong sa Diyos magagikan sa kahiladman.