‘Ang Iyang mga Buhat Nahiuban Kaniya’
SA ALAS 8:50 s.b. sa Huwebes, Hulyo 28, 1994, natapos ang yutan-ong kinabuhi ni George D. Gangas. Siya 98 anyos. Usa sa mga dinihogan, si George Gangas nahimong membro sa Nagamandong Lawas sa mga Saksi ni Jehova sukad sa Oktubre 15, 1971.
Ang tanang personal nga nasinati kang Brader Gangas nasayod bahin sa iyang gugma sa pagkamatarong ug pagdumot sa pagkadaotan. Sila mahinumdom pag-ayo sa paagi nga balikbalik niyang gibatbat si Satanas ingong makauulaw, mananapon, tuman-kadaotan, mangil-ad, ug talamayong bakakon. Sa kaatbang, siya naghisgot kang Jehova ingong usa ka mahigugmaon, maluluton, mabination, malumo, ug mahangawaong Amahan. Daghan usab ang nahinumdom sa iyang hilig sa pagsuknag mga pangutana sa Bibliya. Sa bisan unsang panaghisgot, mangutana gayod siya—ang uban niini yano, ang uban niini mas lisod. Sa pagkatinuod, siya nahigugma sa kamatuoran sa Bibliya.
Si Brader Gangas nabawtismohan niadtong Hulyo 15, 1921. Gisugdan niya ang iyang karera diha sa bug-os-panahong pagsangyawng ministeryo (pagpayunir) niadtong Marso 1928. Busa, diha siya sa bug-os-panahong pag-alagad sa gidugayon nga 66 ka tuig. Nahimo siyang membro sa kawani sa hedkuwarter sa Watch Tower Bible and Tract Society sa Brooklyn niadtong Oktubre 31, 1928.
Ang sugilanon sa iyang kinabuhi migula sa Oktubre 15, 1966, nga isyu sa The Watchtower. Kini nagbatbat sa usa ka tinuod nga espirituwal nga tawo sa Diyos. Nianang artikuloha, gihimo niya ang mosunod nga makapadasig nga pahayag: “Buot kong mabuhi ug buot ko nga ang akong mga igsoon makabaton ug kinabuhi. Giisip nako, duyog kang apostol Pablo, ang tanang ubang mga butang ‘ingong kapildihan tungod sa pagkalabawg bili sa kahibalo ni Kristo Jesus.’”—Filipos 3:8.
Gipakita ni Brader Gangas pinaagi sa iyang mga kalihokan nga siya sa pagkatinuod nagmahal sa kinabuhi, ug siya mahinamong nagpakig-ambit sa iyang “kahibalo bahin kang Kristo Jesus” sa uban. Pagahandumon siya, apan pagkadako gayod sa atong pagmaya nga siya karon nakadawat na sa iyang langitnong ganti! Karon, ‘mopahulay siya sa iyang paghago, tungod kay ang iyang mga buhat nahiuban kaniya.’—Pinadayag 14:13, New International Version.