Kon Unsaon Nimo Pagtubag ang Lagmit mga Tigsumpo sa Panaghisgot
Komento: Ang kalaoman sa katawhan sa kinabuhi nagaagad sa tinamdan nila kang Jehova nga Diyos ug sa iyang Gingharian pinaagi ni Kristo Jesus. Ang mensahe sa Gingharian sa Diyos makalipay, ug kini nagapunting sa bugtong kasaligan nga paglaom sa katawhan. Kini mensahe nga magbag-o sa mga kinabuhi. Buot natong ang tanan makadungog niini. Nasayod kitang diyutay ra ang modawat niining mapabilhon, apan nasayod kita nga labing menos ang katawhan kinahanglang makadungog niini aron mahimo nila ang maalamong pagpili. Apan dili ang tanan mamati, ug dili nato sila pugson. Apan uban ang pagsabot kasagaran posibleng himoon ang lagmit nga mga tigsumpo sa panaghisgot nga kahigayonan sa dugang panaghisgot. Aniay mga pananglitan nga gigamit sa pila ka hanas nga Saksi sa ilang panlimbasog sa pagpangita sa mga tawong takos. (Mat. 10:11) Dili namo isugyot nga sag-ulohon nimo ang maong mga tubag kondili ibutang sa hunahuna ang ideya, ipahayag kana sa kaugalingon nimong mga pulong ug ipahayag kana sa paaging mahipasa ang tinuod nimong interes sa tawong imong gikaestorya. Samtang buhaton nimo kana, makasalig ka nga kadtong may mga kasingkasing nga mahiligon sa pagkamatarong mamati ug mosanong nga mapabilhon sa ginahimo ni Jehova nga ipaduol sila sa iyang mahigugmaong mga tagana sa kinabuhi.—Juan 6:44; Buh. 16:14.
‘DILI AKO INTERESADO’
● ‘Makapangutana ako, Ang imo bang ipasabot mao nga dili ka interesado sa Bibliya, o sa linangkob dili ka interesado sa relihiyon? Ako nangutana niini kay kami nakahibalag ug daghang tawo nga sa usa ka panahon relihiyoso apan dili na mosimba kay nakita nila ang dakong pagkasalingkapaw diha sa mga iglesya (o, ilang gibating ang relihiyon maoy panapi; o, sila dili mouyon sa pag-apil-apil sa relihiyon sa politika; ubp.). Ang Bibliya dili usab mouyon nianang mga buhata ug kini nagatagana sa bugtong pasikaranan nga makalantaw kita sa umaabot nga masaligon.’
● ‘Kon imong gipasabot nga dili ka interesado sa laing relihiyon, nakasabot ako niana. Apan lagmit gayod nga interesado ka sa matang sa umaabot nga atong malaoman tungod sa hulga sa gubat nukleyar (o, sa unsang paagi makapanalipod kita sa atong mga anak batok sa pag-abusar sa droga; o, unsay mahimo bahin sa krimen aron dili na kita mahadlok molakaw sa kadalanan; ubp.). May nakita ka bang paglaom alang sa tinuod nga kasulbaran?’
● ‘Kana tungod ba kay ikaw may relihiyon na? . . . Sultihi ako, Sa imong hunahuna moabot ba ang panahon nga ang tanan mahisakop sa usa ra ka relihiyon? . . . Unsa man ang daw nagababag? . . . Aron kana mahimong makahuloganon, unsang matang sa patukoranan ang kinahanglanon?’
● ‘Makasabot ako niana. Sa pila ka tuig nga miagi kana usab ang akong gibati. Apan may nabasahan ako sa Bibliya nga nakatabang kanako sa pag-isip sa mga butang sa laing kahayag. (Ipakita sa tawo kon unsa kadto.)’
● ‘Interesado ka bang akong ipakita kanimo gikan sa Bibliya nga imong makita pag-usab ang namatay nimong mga minahal (o, kon unsa ang tinuod nga katuyoan sa kinabuhi; o, sa unsang paagi kini makatabang kanato sa paghupot sa atong mga pamilya nga nahiusa; ubp.)?’
● ‘Kon ipasabot mong dili ka interesadong mopalit sa bisan unsa, ayaw kabalaka. Ako wala mamaligya. Apan mainteres ka kaha sa higayon nga mabuhi sa usa ka paraisong yuta, nga walay sakit ug krimen, uban ang mga silingang tinuod nahigugma kanimo?’
● ‘Kana ba ang imong kasagarang tubag kon moduaw ang mga Saksi ni Jehova? . . . Nakahunahuna ka ba nganong kami nagapadayon sa pagduaw o kon unsay among igasulti? . . . Sa daklit, ang hinungdang ako miduaw kanimo mao nga may nahibaloan ako nga angay usab nimong mahibaloan. Nganong dili ka man mamati bisan kining higayona lamang?’
‘DILI AKO INTERESADO SA RELIHIYON’
● ‘Makasabot ako sa imong gibati. Sa prangka, ang mga relihiyon wala maghimo niining kalibotana nga usa ka mas luwas nga dapit kapuy-an, dili ba? . . . Makasukna ako, Sa nangagi kana ba usab ang imong pagbati? . . . Apan nagtuo kag Diyos?’
● ‘Adunay daghang tawo nga sama nimog hunahuna. Ang relihiyon wala gayod makatabang kanila. Kana ang usa ka hinungdan kami nagaduaw—kay ang mga iglesya wala magtug-an sa katawhan sa kamatuoran mahitungod sa Diyos ug sa iyang kahibulongang katuyoan sa katawhan.’
● ‘Apan segurado ako nga interesado ka sa imong kaugmaon. Nasayod ka bang gitagna sa Bibliya ang mga kahimtang mismong nagalungtad karon sa kalibotan? . . . Ug kini nagapakita kon unsa unya ang sangpotan.’
● ‘Sa nangagi kana ba gayod ang imong gibati? . . . Unsay imong pagbati mahitungod sa umaabot?’
‘DILI AKO INTERESADO SA MGA SAKSI NI JEHOVA’
● ‘Daghang tawo ang nagasulti kanamo niana. Nakahunahuna ka ba gayod nganong ang mga tawong sama nako nagaboluntaryo sa paghimo niining mga pagduawa bisan pag nasayod kaming ang kadaghanang tagbalay dili modawat kanamo? (Ihatag ang unod sa Mateo 25:31-33, nga nagasaysay nga nagakahitabo ang pagbulagbulag sa katawhan sa tanang nasod ug ang ilang sanong sa mensahe sa Gingharian usa ka hinungdanong bahin niini. O ipahayag ang unod sa Ezekiel 9:1-11, nga nagasaysay nga, pinasukad sa sanong sa katawhan sa mensahe sa Gingharian, ang tanan “gipatikan” alang kaha sa kaluwasan sa dakong kasakitan o sa kalaglagan pinaagi sa Diyos.)’
● ‘Makasabot ako niana, kay kana usab ang akong gibati sa nangagi. Apan, aron mahimong dili madapigon, mihukom ako sa pagpamati sa usa kanila. Ug akong nasayrang ako wala tug-ani sa kamatuoran bahin kanila. (Hisgoti ang kasagarang pagbutangbutang ug unya isaysay kon unsay atong pagtuo.)’
● ‘Dili pa dugay gisulti ko kana ngadto sa usa ka Saksing mianha sa among balay. Apan sa dayon niyang lakaw ako nangutana sa usa ka pangutanang natino kong dili niya matubag. Buot ba nimong masayran kon unsa kadto? . . . (Pananglitan: Diin kuhaa ni Cain ang iyang asawa?)’ (Aron gamiton niadtong tinuod nga may ingong kasinatian.)
● ‘Kon relihiyoso ka nga tawo, makasabot ako niana. Pihong ang imong relihiyon bililhon kaayo kanimo. Apan sa akong hunahuna mouyon ka nga kitang duha interesado sa (hisgoti ang usa ka nahiangay nga topiko).’
● ‘Nan walay duhaduhang ikaw may kaugalingong relihiyon. Mahimo bang masayran unsa kanang relihiyona? . . . Gusto namong makig-estorya sa katawhang may ingong relihiyon. Unsay imong pagbati bahin sa (hisgoti ang inyong ulohang pagahisgotan)?’
● ‘Oo, nakasabot ako. Apan ang hinungdang nagaduaw kami mao nga kami usa ka pamilyang buot motan-aw nga ang katawhan magpuyong nahiusa diha sa pakigdait. Gilaayan ug gipul-an na kami sa balita kada gabii nga may mga taho sa away ug pag-antos. Sa akong hunahuna ikaw mao man usab. . . . Apan unsay makapatunghag gikinahanglang kausaban? . . . Kami nadasig sa mga saad sa Bibliya.’
● ‘Maayo nga imong gipahibalo kanako ang imong gibati. Mahimo bang isulti mo kanako kon unsay dili nimo gusto kanamo? Mao ba ang among ipahayag kanimo gikan sa Bibliya, o ang among pagduaw kanimo?’
‘MAY KAUGALINGON AKONG RELIHIYON’
● ‘Mahimo bang isulti mo kanako, Ang imong relihiyon nagatudlo ba nga moabot ang panahon dihang ang katawhang nahigugma kon unsay matarong mabuhing walay kataposan sa yuta? . . . Kana nindot nga hunahunaon, dili ba? . . . Kini ania mismo sa Bibliya. (Sal. 37:29; Mat. 5:5; Pin. 21:4)’
● ‘Mouyon ako nga bahin niini ang matag tawo magahimo sa iyang kaugalingong paghukom. Apan nahibalo ka ba nga ang Diyos nagapangita sa usa ka matang sa katawhan aron mahimong iyang matuod nga mga magsisimba? Matikdi dinhi sa Juan 4:23, 24. Unsay ipasabot sa pagsimba sa Diyos “uban ang kamatuoran”? . . . Unsay gihatag kanato sa Diyos sa pagtabang kanato sa pagkasayod kon unsay matuod ug dili? . . . (Juan 17:17) Ug matikdi kon unsa ka hinungdanon kini kanato sa personal. (Juan 17:3)’
● ‘Ikaw ba tawong relihiyoso sa tibuok mong kinabuhi? . . . Sa imong hunahuna ang katawhan mahiusa ba gayod sa usa ka relihiyon? . . . Gipalandong ko kana tungod sa nahitala dinhi sa Pinadayag 5:13. . . . Unsay gikinahanglan aron mohaom kita niining hulagwaya?’
● ‘Naglaom akong makakaplag sa tawong sama kanimo nga interesadog espirituwal nga mga butang. Daghan kaayo karong adlawa ang walay interes. Unsay imong pagbati bahin sa saad sa Bibliya nga hanawon sa Diyos ang tanang pagkadaotan ug himoon kining yutaa nga dapit nga pagapuy-an lamang sa katawhang nahigugma sa pagkamatarong? Moangay ka ba niana?’
● ‘Aktibo ka ba gayod sa kahikayan sa simbahan? . . . Ang simbahan kasagaran bang puno alang sa mga serbisyo karong mga adlawa? . . . Nakita ba nimong ang kadaghanang membro nagapakita gayod ug sinserong tinguha sa pagpadapat sa Pulong sa Diyos sa matag-adlaw nga kinabuhi? (O, Imo bang nakitang may panaghiusa sa hunahuna sa mga membro kon bahin sa solusyon sa mga problemang giatubang sa kalibotan?) Among nakitang makatabang ang personal nga instruksiyon sa Bibliya sa balay.’
● ‘Lagmit kontento ka sa imong relihiyon. Apan ang kadaghanan dili kontento sa mga kahimtang sa kalibotan. Tingali matuod usab kana kanimo; dili ba? . . . Asa ba mosangko kining tanan?’
● ‘Ikaw ba nagakalipay sa pagbasa sa Bibliya? . . . Nagabasa ka ba niana nga regular?’
● ‘Maayo kay imong gisulti kana kanako. Seguradong mouyon ka nga, bisan pag unsa ang atong relihiyosong kagikan, kitang tanan interesado sa pakigdait sa kalibotan (o, mga paagi sa pagpanalipod sa atong mga anak batok sa daotang mga impluwensiya; o, pagbatog silinganan nga niana ang katawhan tinuod nahigugma sa usag usa; o, nagapahimulos sa maayong relasyon sa ubang tawo, ug nianang matigion sa dihang ang tanan mobating gipit-osan).’
● ‘Nalipay ako sa pagkasayod nga mahilig ka sa relihiyon. Daghan karon ang wala mag-isip nga ugdang sa relihiyon. Naghunahuna pa ang pipila nga walay Diyos. Apan, sumala sa gitudlo kanimo, unsang matang sa persona ang Diyos? . . . Matikdi nga ang Bibliya nagahatag kanato sa iyang personal nga ngalan. (Ex. 6:3; Sal. 83:18)’
● ‘Sa gisugo ni Jesus ang iyang mga tinun-an sa pagwali, giingnan niya sila nga moadto sa tanang bahin sa yuta, aron ilang mahibalag ang daghang tawo kansang relihiyon lahi sa ilaha. (Buh. 1:8) Apan siya nasayod nga mamati kadtong gigutom ug giuhaw sa pagkamatarong. Unsa ang linaing mensahe nga iyang giingon igawali sa atong adlaw? (Mat. 24:14) Unsay kahulogan nianang Ginghariana kanato?’
‘MGA KRISTOHANON NA KAMI DINHI’
● ‘Nalipay akong mahibalo niana. Unya tinong nasayod ka nga si Jesus mismo nagbuhat sa buluhatong sama niini, ang pagduaw sa katawhan diha sa ilang kabalayan, ug iyang gisugo ang iyang mga tinun-an sa pagbuhat usab niini. Nahibalo ka ba sa ulohan sa pagwali nga ilang gibuhat? . . . Kana ang among gianhi aron hisgotan karong adlawa. (Luc. 8:1; Dan. 2:44)’
● ‘Nan seguradong pabilhan nimo ang kaseryoso sa gisulti ni Jesus dinhi sa Wali sa Bukid. Siya prangka kaayo apan mahigugmaon usab sa miingon siya . . . (Mat. 7:21-23) Ang pangutanang kinahanglang isukna nato sa atong kaugalingon, diay, mao, Nahibaloan ko ba gayod ang kabubut-on sa langitnong Amahan? (Juan 17:3)’
‘PULIKI AKO’
● ‘Nan dili ra ako magdugay. Miduaw ako aron ipaambit kanimo ang usa ra ka hinungdanong kasayoran. (Ipahayag ang unod sa imong ulohang pagahisgotan sa mga duha ra ka tudling-pulong.)’
● ‘Okey lang. Malipay akong moduaw sa laing panahon, sa dihang ikaw dili okupado. Apan sa dili pa ako molakaw, buot kong basahon ang usa ra ka kasulatan nga hinungdanon natong palandongon.’
● ‘Nakasabot ako. Ingong usa ka inahan (o, depamilya; o, estudyante) ako dunay okupadong eskedyol usab. Busa dili ra ako magdugay. Kitang tanan nagaatubang sa peligrosong kahimtang. Gipakita sa Bibliya nga kita haduol na kaayo sa panahon nga laglagon sa Diyos ang presenteng daotang sistema sa mga butang. Apan aduna unyay mga maluwas. Ang pangutana mao, Unsay buhaton nimo ug nako aron mahiapil kanila? Ang Bibliya nagatubag nianang pangutanaha. (Sof. 2:2, 3)’
● ‘Abi mo, kana gayod ang hinungdang ako nagaduaw. Kitang tanan okupado—puliki kaayong mapasagdan usahay ang tinuod hinungdanong mga butang, dili ba tinuod? . . . Dili ako magdugay, apan segurado kong maikag ka niining usa ra ka teksto. (Luc. 17:26, 27) Walay mausa kanato ang buot mabutang nianang kahimtanga, busa kinahanglang mogahin kitag panahon gikan sa atong okupadong mga kinabuhi sa pagkonsiderar sa ginaingon sa Bibliya. (Itanyag ang basahon.)’
● ‘Mas kombeniyente ba kon kami mobalik sa mga tunga sa oras, tapos sa among pagduaw sa pipila sa inyong mga silingan?’
● ‘Nan dili ako molangan kanimo. Tingali ako makaduaw sa laing adlaw. Apan una ako molakaw, buot kong hatagan kag higayon nga makakuha niining espesyal nga tanyag. (Ipakita ang tanyag sa bulan.) Kining basahona dunay usa ka kurso sa pagtuon nga makapasinati kanimo sa mga tubag mismo sa Bibliya sa mga pangutana sama sa (hisgoti ang usa o duha kaha).’
● ‘Gikasubo kong naabtan ka sa di-kombeniyenteng gutlo. Sumala sa imo tingaling nasayran, ako usa sa mga Saksi ni Jehova. Buot kong ipaambit kanimo ang usa ka hinungdanong kasayoran gikan sa Bibliya. Apan kay wala ka ing panahon sa pagpamati karon, tingali ikabilin ko kanimo ang among bag-ong mga magasin, nga nagahisgot sa (nganli ang ulohan). Imong mabasa kana kon may panahon ka na. Kana ibilin sa gamayng amot nga . . . ’
● ‘Kana dili lisod sabton. Maorag walay igo gayod nga panahon sa pagbuhat sa tanang butang. Apan nakahunahuna ka ba kon unsa kaha ka lahi ang panahon kon mabuhi ka sa walay kataposan? Nasayod ko nga tingali kana daw katingad-anan. Apan pasagding ipakita ko kanimo ang usa ra ka teksto sa Bibliya nga nagapatin-aw nga posible ang maong butang. (Juan 17:3) Busa, ang gikinahanglan natong buhaton karon mao ang pagkuhag kahibalo sa Diyos ug sa iyang Anak. Kana ang hinungdang among ibilin kining basahona.’
‘NGANONG KAMO KANUNAYNG NAGADUAW?’
● ‘Kay nagtuo kaming nagapuyo kita sa kataposang mga adlaw nga gihisgotan sa Bibliya. Among gibating hinungdanong kitang tanan magpalandong kon unsa unya ang sangpotan sa presenteng mga kahimtang. (Hisgoti ang usa o duha ka bag-ong hitabo o bag-ong mga situwasyon.) Ang pangutana mao, Unsay atong gikinahanglang buhaton aron kita makalabang-buhi sa kataposan niining sistemaha sa mga butang?’
● ‘Kay among gihigugma ang Diyos ug ang among mga silingan. Kana ang gikinahanglang buhaton natong tanan, dili ba?’
‘NAHIBALO NA AKO KAAYO SA INYONG BULUHATON’
● ‘Nalipay ako sa pagkadungog niana. May suod ka bang paryente o higala nga Saksi? . . . Mahimo bang mangutana: Nagtuo ka ba sa ginatudlo namo gikan sa Bibliya, nga mao, nga kita nagapuyo na sa “kataposang mga adlaw,” nga sa dili madugay laglagon na sa Diyos ang mga daotan, ug kining yutaa mahimong paraiso diin ang katawhan mabuhing walay kataposan diha sa hingpit nga panglawas taliwala sa mga silingan nga tinuod nahigugma sa usag usa?’
‘WALA MIY KUWARTA’
● ‘Wala kami mangayog amot. Apan nagatanyag kamig libreng pagtuon sa Bibliya. Usa sa mga ulohang pagahisgotan niini mao (gamita ang usa ka ulohan sa kapitulo sa usa ka bag-ong libro). Mahimo bang ipakita ko kanimo sa pila ka minutos kon unsaon paghimo kini? Kini walay bayad.’
● ‘Lisod ang panahon. Apan kami interesado sa katawhan, dili sa ilang kuwarta. (Ipadayon ang panaghisgot. Human sa pagtanyag ug basahon, sultihi silang nasayod kang sila miingon nga sila walay kuwarta karon. Kon angay, makatanyag ka sa pagbaylo sa abot o sultihi silang malipay kang mopedido sila ug mobalik sa kombeniyenteng panahon.)’
KON ADUNAY MOINGON, ‘AKO USA KA BUDHISTA’
● Ayaw paghinapos nga ang mga tinuohan sa tawo sama niadtong sa tanang ubang Budhista. Ang mga pagtulon-ang Budhista maoy dili klaro ug ang paghubad nagkadaiya gikan sa usa ka tawo ngadto sa lain. Ang Budhismo sa Hapones lahi sa Budhismo sa Habagatan-silangang Asya. Ang mga indibiduwal, usab, nagkalain kon bahin sa ilang punto de bista. Hinuon, sa malangkobon ang mosunod nga mga punto tingali makatabang: (1) Ang Budhismo dili moila sa usa ka eksternal nga Diyos, usa ka personal nga Maglalalang. Apan daghang Budhista nagasimbag mga imahen ug mga relikyas ni Budha. (2) Si Siddhartha Gautama, kinsa gitagaan sa titulong Budha, giisip nga relihiyosong mithi sa iyang mga sumusunod, nga ilang pagasundogon. Iyang gidasig ang pagbatog kalamdagan pinaagi sa pagtuon sa mga tawo gikan sa tawhanong punto de bista, ang paglugtab usab sa mga gamot sa pag-antos pinaagi sa paggahom sa kaisipan aron sa pagwagtang sa tanang yutan-ong pangibog. Iyang gitudlo nga sa maong paagi ang usa mahidangat sa Nirvana, nga nahigawas sa mga pagkatawo pag-usab sa transmigrasyon. (3) Ang mga Budhista nagasimba sa ilang mga katigulangan, kay ilang giisip sila ingong tinubdan sa ilang kinabuhi.
Mga sugyot alang sa panaghisgot: (1) Kon makigsulti sa mga Budhista, ipasiugdang dili ka bahin sa Kakristiyanohan. (2) Ang mga Budhista may pagtahod sa “balaang mga basahon,” ug kadaghanan sila nagatahod sa Bibliya tungod nianang katarongana. Inay sa paghisgot ug dugay sa Budhistang pilosopiya, itanyag ang positibong mensahe sa Bibliya. Pahibaloa silang ang Bibliya dili yanong tawhanong pilosopiya kondili awtoritatibong Pulong sa Maglalalang sa katawhan, si Jehova nga Diyos. Hangyoa silang matinahoron nga imong ipakita kanila ang usa ka makapaikag nga punto niining balaang basahon, ang Bibliya. (3) Daghang Budhista dulot nga interesado sa pakigdait ug pamilyahanong kinabuhi ug buot magkinabuhi sa maayong mga kinabuhi. Ang panaghisgot sa bisan unsa niining mga butanga kasagarang abiabihon. (4) Ipakita nga ang Bibliya nagapunting sa usa ka matarong langitnong kagamhanan ibabaw sa yuta ingong matuod nga solusyon sa mga sulirang giatubang sa katawhan. Kini nagapatin-aw sa kaugmaon sa yuta ug sa kahibulongang kalaoman sa pagpuyong walay kataposan sa usa ka yutan-ong paraiso. (5) Mahimong imong ipunting nga ang Bibliya nagapatin-aw sa sinugdanan sa kinabuhi, kahulogan sa kinabuhi, kahimtang sa mga patay ug paglaom sa pagkabanhaw, katarongan sa paglungtad sa pagkadaotan. Tungod sa malulutong pagtanyag sa tin-aw nga mga kamatuoran sa Pulong sa Diyos ang mga kasingkasing sa mga karnerohon mosanong nga mapabilhon.
Ang pulyetong In Search of a Father giandam sa linain alang sa kaayohan sa sinserong mga Budhista.
KON ADUNAY MOINGON, ‘AKO USA KA HINDU’
● Angay nimong masayrang ang Hindung pilosopiya komplikado kaayo ug wala mahiuyon sa kasagarang katarongan. Imong makitang makatabang ang paghinumdom sa mosunod nga mga punto: (1) Ang Hinduismo nagatudlo nga ang diyos nga si Brahman nagaapil sa tulo ka dagway—si Brahma ang Maglalalang, si Vishnu ang Magtitipig, ug si Siva ang Maglalaglag. Apan ang mga Hindu wala maghunahuna sa usa ka personal nga diyos nga may indibiduwal nga paglungtad. (2) Ang mga Hindu nagtuong ang tanang kinaiyanhong butang dunay kalag nga dili gayod mamatay, nga masinati sa kalag ang halos di-matapos nga tuyok o ‘cycle’ sa reinkarnasyon, nga ang mga dagway nga niana kini matawo pag-usab pagatinoon sa mga binuhatan (Karma), nga ang pagkagawas gikan niining “di-matapos nga ligid” posible lamang pinaagi sa pagpukgo sa tanang lawasnong pangibog, ug kon kini makab-ot, ang kalag motapo sa unibersohanong espiritu. (3) Sa linangkob, ang mga Hindu nagatahod sa ubang relihiyon. Ang mga Hindu nagtuo nga, bisan pag sila nagatudlo sa nagkasumpaking mga doktrina, ang tanang relihiyon mosangko sa samang kamatuoran.
Inay sa pagsulay sa paghisgot sa mga komplikadong punto sa Hindung pilosopiya, ipahayag ang makapatagbawng mga kamatuoran nga makaplagan diha sa Balaang Bibliya. Ang mahigugmaong mga tagana ni Jehova alang sa kinabuhi maoy bukas sa tanang matang sa katawhan, ug ang tin-aw nga mga kamatuoran diha sa iyang Pulong makaabot sa mga kasingkasing niadtong gigutom ug giuhaw sa pagkamatarong. Ang Bibliya lamang ang nagataganag tinuod maayog-pasikaranang paglaom sa umaabot; ang Bibliya lamang ang nagahatag sa tinuod makapatagbawng mga tubag sa hinungdanong mga pangutana nga giatubang sa tanang tawo. Hatagi silag higayon nga makadungog nianang mga tubaga. Makapaikag nga ang Hindu nga balaang alawitong Rig-Veda, 10. 121, nag-ulohang “Alang sa Diyos nga Wala Hiilhi.” Sa pila ka kahimtang imo tingaling makitang nahiangay ang paghisgot niini sa paaging susama sa pagtumong ni apostol Pablo sa halarang “Alang sa Diyos nga Wala Hiilhi” sa Atenas. (Buh. 17:22, 23) Makaiikag, ang ngalan sa Hindung diyos si Vishnu, nga wala ang digamma, maoy Ish-nuh, nga sa Kaldeanhon nagkahulogang “ang tawong si Noe.” Ipunting ang ginaingon sa Bibliya mahitungod sa kahulogan sa tibuok-yutang Lunop sa mga adlaw ni Noe. Kadtong naguol sa palaabotong di-matapos nga mga reinkarnasyon basin mabuligan sa materyal sa mga panid 360, 361, ubos sa lintunganayng ulohang “Reinkarnasyon.”
Ang mga pulyetong The Path of Divine Truth Leading to Liberation ug From Kurukshetra to Armageddon—And Your Survival naundag impormasyon nga mapuslanon kaayo sa sinserong mga Hindu.
KON ADUNAY MOINGON, ‘AKO USA KA HUDIYO’
● Nahauna, tinoa kon unsay pag-isip sa tawo sa iyang kaugalingon ingong Hudiyo. Diyutay ra ang relihiyoso. Alang sa daghan, ang pagka-Hudiyo maoy yanong etnikong ngalan.
Aniay pila ka puntong mapuslanong ibutang sa hunahuna: (1) Ang relihiyosong mga Hudiyo nagaisip sa paglitok sa ngalan sa Diyos ingong gidili. (2) Daghang Hudiyo nagahunahunang “ang Bibliya” maoy Kristohanong basahon, apan kon hisgotan nimo “ang Hebreohanong Kasulatan,” “ang Kasulatan,” o “ang Torah,” dili motungha kanang problemaha. (3) Ang tradisyon maoy sentral nga bahin sa ilang pagtuo ug giisip sa daghang relihiyosong Hudiyo nga samag awtoridad sa Kasulatan. (4) Mahimong ilangkit nila si Jesu-Kristo sa mabangis nga paglutos nga naagoman sa mga Hudiyo sa mga kamot sa Kakristiyanohan sa ngalan ni Jesus. (5) Sila kadaghanan nagtuo nga gibaod sa Diyos nga bantayan sa mga Hudiyo ang Igpapahulay, nga ang maong pagtuo nagaapil sa paglikay sa pagkupot ug kuwarta nianang adlawa.
Aron ikapahimutang ang puntong gikahiusahan, ikaw makaingon: (1) ‘Pihong mouyon ka nga, bisan pa sa atong kagikan, giatubang natong tanan ang daghan sa samang mga suliran sa kalibotan karong adlawa. Nagtuo ka ba nga aduna gayoy malungtarong solusyon sa dagkong mga suliran nga giatubang niining kaliwatana? (Sal. 37:10, 11, 29; Sal. 146:3-5; Dan. 2:44)’ (2) ‘Kami dili bahin sa Kakristiyanohan ug wala magtuo sa Trinidad kondili nagasimba sa Diyos ni Abraham. Kami interesado ilabina sa relihiyosong kamatuoran. Mahimo bang mangutana kami kanimo kon sa unsang paagi pagatinoon nimo kon unsay matuod, ilabina tungod sa kamatuorang dunay dagkong mga kalainan sa mga tinuohan sa mga Hudiyo? . . . (Deut. 4:2; Isa. 29:13, 14; Sal. 119:160)’ (3) ‘Kami dulot nga maikagon sa saad sa Diyos kang Abraham nga pinaagi sa iyang binhi ang katawhan sa tanang kanasoran pagapanalanginan. (Gen. 22:18)’
Kon ipahayag sa tawo ang kawalay pagtuo sa Diyos, pangutana kon kana ba ang iyang pagbati sa nangagi. Unya tingali imong ihisgot kon nganong ang Diyos nagtugot sa pagkadaotan ug sa pag-antos. Tungod sa mga nahinumdoman bahin sa Nazi nga katalagman daghang Hudiyo naghunahuna bahin niini.
Kon imong hisgotan ang kahinungdanon sa paggamit sa ngalan sa Diyos, susiha una kon unsay pagbati bahin niini sa maong tawo. Ipunting nga ang Exodo 20:7 nagadili sa paggamit sa ngalan sa Diyos sa kawang nga paagi, apan kana wala magdili sa paggamit niana uban ang pagtahod. Unya pangatarongan pinasukad sa mga teksto sama sa Exodo 3:15 (o Salmo 135:13); 1 Hari 8:41-43; Isaias 12:4; Jeremias 10:25; Malaquias 3:16.
Kon imong hisgotan ang Mesiyas: (1) Hisgoti una ang umaabot nga mga panalangin ilalom sa iyang pagmando, inay kay ang iyang ilhanan. (2) Unya pangatarongan pinasukad sa mga teksto nga nagapunting sa personal nga Mesiyas. (Gen. 22:17, 18; Zac. 9:9, 10; Dan. 7:13, 14) (3) Basin kinahanglang hisgotan nimo ang duha ka pag-anhi sa Mesiyas. (Itandi ang kalainan sa Daniel 7:13, 14 sa Daniel 9:24-26.) (4) Kon magatumong kang Jesus, hisgoti siya sa konteksto nga nagapasiugda sa mauswagong kinaiya sa katuyoan sa Diyos. Hisgoti nga sa nanudlo si Jesus, ang panahon niadto nagsingabot nga gitugotan sa Diyos nga malaglag ang ikaduhang templo, nga dili na gayod matukod pag-usab. Apan gipasiugda ni Jesus ang pagkatuman sa Kasugoan ug sa mga Manalagna ug ang mahimayaong kaugmaon nga niana itumong ang mga tawong may pagtuo.