Saulog sa Memoryal sa 1990
1 Ang Martes, Abril 10, 1990, magtimaan sa ika-1,957 nga anibersaryo sa Memoryal sa kamatayon ni Kristo. Sa dihang maghimo sa atong mga plano sa pagtambong, gikinahanglan ta ang paghunahuna sa uban kinsa nagakinahanglan ug imbitasyon o sa atong personal nga bulig sa pipila ka paagi. Karon mao na ang panahon sa pagsugod sa paghimog mga pangandam alang sa Memoryal ug sa paghunahuna nga dapiton ang uban.—Palihog tan-awa ang “Mga Butang Andamon Alang sa Memoryal” sa panid 3.
2 Unsa man ang atong pagtamod sa pagtambong sa Memoryal? Ato gayong isipon kana ingong pribilehiyo ug usa ka higayon nga ipakitang pagpabili sa halad ni Kristo. Kon sayod ka nga makalakaw gikan sa inyong gipasakopan nga kongregasyon, paneguroa nga aduna ka ing adres sa Kingdom Hall sa dapit nga ikaw nagabisita aron ikaw makatambong didto.
GAMITANG ESPESYAL NGA MGA IMBITASYON
3 Mahimong sugdan mo na sa paggamit ang espesyal Memoryal nga mga imbitasyon sa panahon sa espesyal nga pakigpulong publiko sa Marso 25. Hinumdomi nga dili kana gamiton ingong ‘handbills’ kondili igahatag lamang sa personal ngadto sa mga interesado. Tungod kay ang mga tawo sagad man makalimot sa mga petsa ug mga panahon, ginasugyot nga sa kahinlo isulat ta o imakenilya ang adres sa Kingdom Hall ug ang oras sa Memoryal diha sa ubos sa imbitasyon. Ang bag-ohang mga interesado basin magduhaduha nga moadto sa Kingdom Hall sa ilang kaugalingon. Makatanyag ka ba nga ubanan sila o tagboon sila sa gawas sa hawanan? Usab, ang espesyal nga panlimbasog kinahanglang himoon sa pagtabang niadtong sa katuigan nahibalo na sa kamatuoran apan miatras sa pagtambong sa mga tigom nga makanunayon.—Luc. 11:23; Juan 18:37b.
GIKINAHANGLANG MGA PANGANDAM
4 Gusto sa mga ansiyano sa kongregasyon nga paneguroon nga gihimo ang tanang kahikayan alang sa Memoryal nga abante pa. Paneguroa sa pagpili ug takos-kaayo nga mga igsoong lalaki sa pagpasa sa mga emblema. Kining mga igsoona kinahanglang mga ansiyano o ministeryal nga mga alagad, kon mabatonan. Batonan ang igong gidaghanon sa mga igsoong lalaki nga andam sa pagbuhat niini aron ang pagpasa sa mga emblema dili madugay nga wala kinahanglana. Human masilbihi kadtong nanambong, ang mga tigsilbi molingkod sa unang laray sa lingkoranan ug ang mamumulong mosilbi kanila. Sa kataposan, ang usa kanila mosilbi sa mamumulong.
5 Sa paglabay sa kada tuig, kita nagakahaduol sa adlaw sa dihang ang Panihapon sa Ginoo dili na pagasaulogon. Si Jesus misugo nga ang iyang kamatayon pagahinumdoman hangtod ang tanan sa iyang mga igsoon mahiuban kaniya didto sa langit. (Luc. 22:19; 1 Cor. 11:25) Hangtod sa maong panahon kita masinugtanon ug matinumanong magtigom sa matag tuig alang sa selebrasyon sa Memoryal uban sa labing dakong kalipay ug apresasyon.
[Kahon sa panid 3]
Mga Butang Andamon Alang sa Memoryal
(Tan-awang Agosto 15, 1985 nga Bantayanang Torre, panid 19.)
1. Ang tanan ba, apil ang mamumulong, gipahibalo sa oras ug dapit sa selebrasyon? Aduna bay kasakyan ang mamumulong?
2. Gihimo ba ang tinong mga kahikayan sa pagtagana sa mga emblema?
3. Gihimo ba ang mga kahikayan nga adunay magdala sa mahinlong mantil ug ang gikinahanglang gidaghanon sa mga baso ug mga plato?
4. Unsang mga kahikayan ang gihimo sa paghinlo sa tigomanan?
5. Gikatudlo na ba ang ‘attendants’ ug mga tigsilbi? Gieskedyol ba ang usa ka miting uban kanila antes sa Memoryal aron sublion ang ilang mga kaakohan? Kanus-a? Unsang paagi ang pagasundon sa pagpaneguro nga ang tanan sa husto masilbihan?
6. Kompleto ba ang mga kahikayan sa pagtabang sa mga tigulang ug mga baldadong mga igsoon? Gihikay ba ang mga kahikayan sa pagsilbi sa bisan kinsa sa dinihogan nga basin nagsakit ug dili makatambong sa Kingdom Hall?