Ayaw Pagkaluya
1 Ang 1991 Yearbook nagabutyag ug kulba-hinam nga kauswagan nga nagakahitabo sa tibuok yuta. Aduna ing bag-ong mga kinatas-ang ihap sa lainlaing kayutaan.
2 Apan komosta man diha sa inyong teritoryo? Ang mga tawo ba dimatinagdanon sa mensahe sa Gingharian? Diyutay ra ba ang nagasanong nga mauyonon? Kon mao, ikaw mapalig-on sa tambag ni Pablo sa Galacia 6:9: “Dili kita mohunong sa pagbuhat kon unsa ang maayo, kay sa igong panahon kita magaani kon kita dili magakaluya.” Ang pagbuhat kon unsa ang mas maayo sa piho nagalakip sa pagwali sa maayong balita sa Gingharian sa pamalaybalay. Kita gayod magpadayon sa pagsangyaw hangtod nga si Jehova moingon nga tapos na ang buluhaton. (Isa. 6:8) Bisan diha sa malisod nga mga teritoryo, ang mga karnerohon sa gihapon makaplagan pa.
3 Unsa may atong mahimo aron dili magakaluya diha sa ministeryo? Ang pagbag-o sa atong paagi o mga pasiuna makatabang. Ang ekselenteng mga sugyot makaplagan diha sa librong Nangatarongan. Imo ba kining gisulayan na? Ang usa ka mubo kaayo apan laktod nga paagi hayan makabutad sa pagtagad sa dugang mga tagbalay. Pahibaloa ang mga tawo nga anaa ka dinha tungod kay ikaw sa personal nga paagi interesado sa ilang kaayohan.
ITANYAG ANG DAANDAANG MGA BASAHON
4 Sa Pebrero atong ipakita ang atong kabalaka alang sa uban pinaagig pagtanyag sa daandaang mga basahon nga mabatonan sa atong pinulongan. Susiha ang Mga Pahibalo sa panid 7 maingon man ang igsoong lalaki nga nagadumala sa literatura sa inyong kongregasyon aron masayran kon unsa ang mabatonan sa lokal. Ang tanan niining mga libroha aduna ing ekselenteng mga puntong igsusulti maylabot sa atong Ulohan nga Mahisgotan bahin sa kalinaw. Pangandam ug maayo nga abante pa aron mabatonan ang tinong mga puntos nga igapasiugda.
5 Sa pagkamatuod kita sa personal nga paagi mapalig-on pinaagig atong pakig-ambit sa pagsangyaw sa Gingharian sa paaging senemana. Dugang pa, ang atong espirituwalidad magmalamboon pinaagig regular nga pagtuon sa Pulong sa Diyos ug sa regular nga pagpakig-ambit sa mga miting sa kongregasyon.—Heb. 10:23-25.
LIG-ONA ANG UBAN UG PADAYON NGA MALIG-ON
6 Matabangan mo ang imong kaugalingon ug mapalig-on ang uban pinaagig duyog nga pagsangyaw diha sa ministeryo sa kanataran. (Gal. 6:10) Nganong dili suknaon ang mga payunir o mga ansiyano kon ikaw ba makakuyog kanila sa pagsangyaw? Usab, kadtong mga diregular o diaktibo mapalig-on man pinaagig imong interes diha sa ilang espirituwal nga kaayohan.
7 Ang tanan kanato kinahanglang mag-antos ug dili maluya sa buluhaton ni Jehova. (Heb. 10:36-39) Pag-ampo kang Jehova alang sa kalig-on. (Isa. 40:29-31) Hangyoa siya sa pagbulig kanimo nga makalahutay ug mahuptan ang positibong tinamdan sa hunahuna. Hinumdomi, kita nagabuhat sa buluhaton sa Diyos. Siya dili malimot kon unsa ang atong ginabuhat diha sa iyang kalihokan. (Heb. 6:10) Busa dili kita maluya! Hinunoa, batonan tang “kadagaya diha sa buluhaton sa Ginoo,” nga nagasalig kang Jehova sa paglig-on kanato.—1 Cor. 15:58.