Mga Presentasyon nga Mopainteres
1 Kinahanglan nga kanunay tang magapakitag mainit, personal nga interes sa katawhang atong mahibalag diha sa ministeryo sa kanataran. Ang pagpangayo sa ilang opinyon sa mga butang nagapasundayag sa atong pagtahod sa ilang punto de bista.
2 Sa Oktubre atong itultol ang pagtagad sa magasing Pagmata! diha sa atong pag-alagad sa kanataran. Gahinig panahon ang personal nga pagrepaso sa kinabag-ohang mga gula, ug pilia ang tinong mga puntos nga ikapatugbaw. Ipakita ang tinong mga ulohan ug mga ilustrasyon.
3 Human ikapailang kaugalingon, makaingon ka:
◼ “Ngano sa imong hunahuna nga makaatubang tag daghang mapit-osong mga kahimtang karong adlawa? [Tugoting motubag.] Ang Bibliya miila nga alang sa daghan, ang kinabuhi maoy walay paglaom ug mapakyason. Matikdi kon unsay giingon dinhi sa Ecclesiastes 2:17. [Basaha.] Mouyon ka ba nga tinuod kini karong adlawa? [Tugoting motubag.] Unsa may imong gihunahunang makalipay sa usa ka tawo nga may daghang mga suliran? Aniay usa ka teksto nga nagahatag kanatog usa ka positibong pagpanglantaw sa kinabuhi. [Basahang Salmo 37:39, 40.] Dinhi sa Oktubre 8 nga gula sa Pagmata! may pipila ka sugyot kon unsaon pagbuntog ang kabalaka, kahadlok, ug depresyon.” Unya buksi ang magasin ug ipakita ang mga artikulo sa “Ikaw Mahimong Makabuntog sa Negatibong mga Emosyon.”
4 O makaingon ka:
◼ “Tungod kay si Jesus mitudlo kanato sa pag-ampo nga moabot ang Gingharian sa Diyos ug matuman ang Iyang kabubut-on dinhi sa yuta maingon man sa langit, gihunahuna ba nimong ang kabubut-on sa Diyos pagatumanon gayod dinhi sa yuta?” Tugoting motubag, ug dayon pakliang Isaias 55:10, 11 sa pagpakita kon sa unsang paagi ang tanang mga saad sa Diyos pagatumanon. Unya makaingon ka: “Usa ka kahibulongang tagna maylabot sa kabubut-on sa Diyos alang sa yuta ang ania dinhi sa Pinadayag 21:3-5.” Unya mapakli mo ang panid 7 sa Oktubre 8 nga Pagmata! ug ipakita kon sa unsang paagi ang Gingharian sa Diyos magahimo niining usa ka kamatuoran.
5 Kon ginatanyag mo ang Oktubre 22 nga “Pagmata!”, makaingon ka:
◼ “Kami nagapakigsulti sa among mga silingan bahin sa maayong kagamhanan. Sa hunahuna mo posible kaha nga makabaton ug usa ka kagamhanan nga makatagbaw sa tanan tang panginahanglan ug makasulbad sa tanan tang mga suliran? (Tugoting motubag.] Ang Bibliya, dinhi sa Isaias 65:21-23, nagapakita kon unsaon paghimo kini sa kagamhanan sa Diyos. [Basaha.] Niay akong Oktubre 22 nga gula sa Pagmata! nga nagaulohag ‘Usa ka Bag-ong Kalibotan nga Magatagbaw sa Tanan.’ Buot nakong basahon mo kini.” Dayon ipakitang mga artikulo gikan sa mga panid 3-14, nga nagapili sa tinong mga puntos nga ipakita sa tagbalay.
6 Ang atong tumong dili lamang mopainteres diha sa mensahe sa Gingharian kondili usab aron makasugod ug mga pagtuon sa Bibliya. Pagkamalipayon ta nga nakabaton nianang maayong mga artikulo diha sa Pagmata! sa pagbulig sa pagpukaw sa interes sa kamatuoran. Hinaot nga gamiton ta kinig maayo sa Oktubre.