Kapitulo 133
Gihuman ni Jesus ang Tanang Gipabuhat sa Diyos
SA DIHA nga ang Manggugubat-Hari nga si Jesu-Kristo magwagtang kang Satanas ug sa iyang dili-matarong nga kalibotan, pagkadako unya niana nga hinungdan sa pagsadya! Sa kataposan magsugod na ang malinawon nga Usa ka Libo ka Tuig nga Pagmando ni Jesus!
Ubos sa pagdumala ni Jesus ug sa iyang kaubang mga hari, hinloan sa mga maluwas sa Armageddon ang kagun-oban nga gibilin sa maong matarong nga gubat. Lagmit, ang yutan-ong mga maluwas magpatungha usab ug mga anak sa usa ka panahon, ug sila moapil sa kahimut-anang buluhaton sa pagtikad sa yuta aron mahimong matahom kaayo samag-parkeng tanaman.
Sa nahaigong panahon pagulaon ni Jesus ang dimaihap nga milyonmilyon gikan sa ilang mga lubnganan aron magpahimulos niining matahom nga Paraiso. Himoon niya kini ingong katumanan sa iyang kaugalingong pasalig: “Ang takna nagsingabot diin ang tanang atua sa handumanang mga lubnganan . . . manggula.”
Apil sa mga pagabanhawon ni Jesus mao ang kanhing mamumuhat ug daotan nga namatay tupad kaniya sa kahoy sa pagsakit. Hinumdomi nga si Jesus misaad kaniya: “Sa pagkamatuod ako magaingon kanimo karong adlawa, Magauban ka kanako sa Paraiso.” Dili, kadtong tawhana wala dad-a sa langit aron magmando ingong hari kauban ni Jesus, ni si Jesus mahimo na usab nga usa ka tawo ug magpuyo sa Paraisong yuta kauban niya. Hinunoa, si Jesus mahauban sa kanhi mamumuhat ug daotan sa diwa nga Iyang pagabanhawon siya sa kinabuhi sa Paraiso ug magtino nga ang iyang mga panginahanglan, pisikal ug espirituwal, maatiman, sumala sa gihulagway sa sunod nga panid.
Hunahunaa ra gud! Ubos sa mahigugmaong pagtagad ni Jesus, ang tibuok tawhanong pamilya—ang mga maluwas sa Armageddon, ilang mga anak, ug ang libolibong milyong binanhaw nga mga patay nga magasugot kaniya—mouswag hangtod sa tawhanong kahingpitan. Si Jehova, pinaagi sa iyang harianong Anak, si Jesu-Kristo, sa espirituwal mopuyo uban sa katawhan. “Ug,” sumala sa giingon sa tingog nga nadungog ni Juan gikan sa langit, “iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa.” Walay tawo sa yuta ang mag-antos o magsakit.
Sa pagkatapos sa Usa ka Libo ka Tuig nga Pagmando ni Jesus, ang kahimtang unya mahisama gayod sa unang gituyo sa Diyos sa gisugo niya ang unang tawhanong magtiayon, si Adan ug Eva, sa pagsanay ug pagpuno sa yuta. Oo, ang yuta mapuno sa matarong nga banay sa hingpit nga mga tawo. Kini tungod kay ang mga kaayohan sa halad lukat ni Jesus mapadapat na unya sa tanan. Ang kamatayon tungod sa sala ni Adan mawala na!
Busa, matuman na unya ni Jesus ang tanan nga gipabuhat ni Jehova kaniya. Busa, sa pagkatapos sa usa ka libo ka tuig, iyang igatugyan ang Gingharian ug ang nahingpit tawhanong pamilya ngadto sa iyang Amahan. Unya buhian sa Diyos si Satanas ug ang iyang mga demonyo gikan sa bung-aw sa samag-kamatayon nga kawalay kalihokan. Alang sa unsang katuyoan?
Aw, sa pagkatapos sa usa ka libo ka tuig, ang kadaghanan niadtong nagapuyo sa Paraiso mao unya ang mga binanhaw nga wala pa gayod masulayi sa ilang pagtuo. Sa wala pa mamatay, sila wala gayod mahibalo sa mga saad sa Diyos ug busa wala makapasundayag ug pagtuo niana. Dayon, tapos sa pagkabanhaw ug pagkanatudloan sa mga kamatuoran sa Bibliya, sayon alang kanila diha sa Paraiso, nga walay pagsupak, sa pag-alagad sa Diyos. Apan kon si Satanas hatagag higayon sa pagsulay sa pagpugong kanila sa pagpadayon sa pag-alagad sa Diyos, magmaunongon kaha sila ilalom sa pagsulay? Sa pagsulbad sa maong pangutana, pagabuhian si Satanas.
Ang pinadayag nga gihatag kang Juan nagpadayag nga tapos sa Usa ka Libo ka Tuig nga Pagmando ni Jesus, si Satanas mapamatud-ang malamposon sa pagpahilayo sa wala-matinong gidaghanon sa mga tawo gikan sa pag-alagad sa Diyos. Apan unya, sa dihang natapos na ang kataposang pagsulay, si Satanas, iyang mga demonyo, ug tanan si kinsa malamposon niyang nalimbongan pagalaglagon sa walay kataposan. Sa laing bahin, ang bug-os nasulayan, maunongong mga nakalabang magpadayon sa kinabuhi aron sa pagpahimulos sa mga panalangin sa ilang langitnong Amahan hangtod sa kahangtoran.
Tin-aw, si Jesus nagbaton ug bahin, ug magpadayon sa pagbaton ug bililhong bahin sa pagtuman sa mahimayaong mga katuyoan sa Diyos. Pagkatalagsaong kaugmaon ang mahimo natong pahimuslan ingong sangpotanan sa tanang iyang pagahimoon ingong dakong langitnong Hari sa Diyos. Bisan pa niana, kita dili mahikalimot sa tanang iyang gibuhat samtang siya usa ka tawo.
Si Jesus kinabubut-ong mianhi sa yuta ug gitudloan kita mahitungod sa iyang Amahan. Gawas pa niana gihatagan niyag panig-ingnan ang bililhong mga hiyas sa Diyos. Ang atong mga kasingkasing matandog sa dihang atong palandongon ang iyang kinalabwang kaisog ug kalalakin-on, sa iyang way-katupong nga kaalam, iyang kinalabwang katakos ingong magtutudlo, ang iyang maisogong pagpanguna, ug iyang malumong kaluoy ug empatiya. Kon atong hinumdoman kon giunsa niya pag-antos nga dili ikabatbat samtang gitagana niya ang lukat, nga pinaagi lamang niana makabaton kitag kinabuhi, seguradong ang atong mga kasingkasing matandog nga may pagpabili alang kaniya!
Sa pagkamatuod, pagkatalagsaon nga lalaki ang atong nakita niining pagtuon sa kinabuhi ni Jesus! Ang iyang pagkabantogan maoy dayag ug hilabihan. Kita matandog sa pagpalanog sa mga pulong sa Romanong gobernador si Poncio Pilato: “Tan-awa! Ania ra ang tawo!” Oo, tinuod gayod, “Ang tawo,” ang labing bantogang tawo nga nabuhi sukad!
Pinaagi sa pagdawat nato sa tagana sa iyang halad lukat, ang palas-anon nga sala ug kamatayon nga napanunod gikan kang Adan mahanaw gikan kanato, ug si Jesus mahimong atong “Walay-Kataposang Amahan.” Ang tanan nga makaangkon ug kinabuhing walay kataposan kinahanglang magbatog kahibalo dili lamang sa Diyos kondili sa iyang Anak usab, si Jesu-Kristo. Maoy among paglaom nga ang imong pagbasa ug pagtuon niining serye sa mga artikulo bahin sa kinabuhi ug ministeryo ni Jesus makatabang kanimo sa pagbaton nianang nagahatag-ug-kinabuhi nga kahibalo! 1 Juan 2:17; 1:7; Juan 5:28, 29; 3:16; 17:3; 19:5; Lucas 23:43; Genesis 1:28; 1 Corinto 15:24-28; Pinadayag 20:1-3, 6-10; 21:3, 4; Isaias 9:6.
▪ Unsa unya ang makalipay nga pribilehiyo sa mga maluwas sa Armageddon ug ilang mga anak?
▪ Kinsay magpahimulos sa Paraiso gawas pa sa mga maluwas sa Armageddon ug ilang mga anak, ug sa unsang diwa nga si Jesus magauban kanila?
▪ Unsa unya ang kahimtang sa pagkatapos sa usa ka libo ka tuig, ug unsay buhaton unya ni Jesus?
▪ Nganong si Satanas pagabuhian gikan sa bung-aw, ug unsay mahitabo kaniya ug sa tanang mosunod kaniya sa kataposan?
▪ Sa unsang paagi si Jesus mahimong atong “Walay-Kataposang Amahan”?