Unsang Matang sa Espiritu nga Imong Ginapakita?

¹ Si Pablo naglakip sa iyang sulat ngadto sa kongregasyon sa Filipos uban niining maong pag-awhag: “Ang dili-takos nga kalulot sa Ginoong Jesu-Kristo maanaa uban sa espiritu nga inyong ginapakita.” (Filip. 4:23) Siya nagadayeg kanila sa ilang tiunayng interes sa pagwali sa maayong balita maingon mav sa ilang mainiton, mahigugmaong pagtagad sa kaayohan sa usag usa.​—Filip. 1:3-5; 4:​15, 16.

² Angay gayod nga maoy atong tinguha nga magpakita sa samang espiritu diha sa atong kongregasyon. Kon ang tanan magpakitag kasibot, kalulot, ug kamaabiabihon, kini makamugnag espiritu nga madayag sa mga tigpaniid. Ang positibo ug mahigugmaong espiritu magapahinabog panaghiusa ug espirituwal nga pag-uswag. (1 Cor. 1:10) Ang negatibong espiritu magapatunghag kaluya ug kataphaw.​—Pin. 3:15, 15.

³ Mga Ansiyano Magapanguna: Ang mga ansiyano may kaakohan sa paghupot ug maayo, positibong espiritu taliwala sa ilang kaugalingon ug sulod sa ilang kongregasyon. Ngano man? Tungod kay ang kongregasyon maimpluwensiyahan sa pinaagi sa ilang tinamdan ug panggawi. Atong gipabilhan ang pagbaton ug m ga ansiyano nga masiboton diha sa pag-alagad sa kanataran, kinsa motimbaya kanato uban ang mainitong pahiyom ug malulotong pulong, ug kinsa positibo ug makapalig-on sa ilang tambag, kon kini gihatag man sa pribado o gikan sa plataporma.​—Heb. 13:7.

⁴ Hinuon, kitang tanan angay nga magbuhat sa atong bahin sa paghimo sa kongregasyon nga mahigalaon, maabiabihon, masiboton, ug mahunahunaon sa espirituwal. Sa tinagsa, ikapakita nato ang kainit ug gugma sa atong pagpakig-uban sa uban. (1 Cor. 16:14) Wala gayoy pagpihigpihig sa edad, rasa, edukasyon, o ekonomikanhong mga kahimtang taliwala kanato. (Itandi ang Efeso 2:21.) Tungod sa atong paglaom, atong ikapabanaag ang espiritu sa kalipay, kamanggihatagon, kamaabiabihon, ug kasibot sa ministeryo.​—Roma 12:13; Col. 3:22, 23.

⁵ Ang tanan nga nakig-uban kanato, lakip na ang mga bag-ohan, angayng pabation nga giabiabi ug makasabot sa gugma ug pagkamahinalaron sa panag-igsoonay. Pinaagi sa atong ministeryo ug pinaagig pagpasundayag sa maayong Kristohanong mga hiyas, kita nagahatag ug pamatuod nga ang kongregasyon maoy ”usa ka haligi ug tukod sa kamatuoran.” (1 Tim. 3:15) Kita usab makasinati sa ”kalinaw sa Diyos” nga magabantay sa atong mga kasingkasing ug gahom sa panghunahuna. (Filip. 4:6, 7) Hinaot nga kitang tanan makugihong manlimbasog sa pagpakita sa matang sa espiritu nga magpaseguro kanato sa dili-takos nga kalulot ni Jehova pinaagi kang Ginoong Jesu-Kristo.​—2 Tim. 4:22.