Atong Gikinahanglan ang Kongregasyon
1 Ang mga anak lalaki ni Kore kanhi nagpahayag sa ilang pagpabili alang sa kongregasyon ni Jehova niining paagiha: “Ang usa ka adlaw sa imong mga sawang labi pang maayo kay sa usa ka libo nga anaa sa laing dapit.” (Sal. 84:10) Alang kanila, ang kalibotan walay ikatanyag sa pagtandi niini. Kon ikaw moambit nianang mga pagbatia, kinahanglang himoon nimo ang kongregasyon nga sentrong butang sa imong kinabuhi.
2 Gikan sa sinugdanan niini ang Kristohanong kongregasyon sa kanunay nagpakita nga kini nakabaton sa panalangin ni Jehova. (Buh. 16:4, 5) Kinahanglang walay mausa kanato nga di-magpabili sa kongregasyon o mobati nga kini usa lamang ka paagi aron tigomon kita sa pisikal. Ang kongregasyon maoy nagapahiusang butang sa mga Saksi ni Jehova sa matag komunidad. Kini nagatagana alang sa nahiusang panag-uban aron nga kita mahimong matudloan ni Jehova ug organisado alang sa kalihokan sa Gingharian.—Isa. 2:2.
3 Ang Kristohanong kongregasyon maoy sukaranang agianan sa pagtudlo kanato sa kamatuoran. (1 Tim. 3:15) Ang mga sumusunod ni Jesus kinahanglang “tanan mahimong usa”—nahiusa uban as Diyos, uban ni Kristo, ug uban sa usag usa. (Juan 17:20, 21; itandi ang Isaias 54:13.) Walay sapayan kon bisan diin kita moadto sa kalibotan, ang atong mga igsoon nagatuo sa mga pagtulon-an ug mga prinsipyo sa Bibliya ug nagagawi sa ilang kaugalingon nga uyon niana.
4 Kita nabansay ug nasangkapan sa pagtuman sa atong mga buluhaton sa paghimog mga tinun-an. Matag bulan, ang Bantayanang Torre, Pagmata!, ug Atong Ministeryo sa Gingharian nagatanyag ug mga sugyot ug makatabang nga impormasyon sa pag-abag kanato sa pagsugod ug Kasulatanhong mga panaghisgot. Ang mga tigom gidesinyo sa pagpakita kanato kon unsaon sa pagkaplag ug pag-ugmad sa interes. Ang pag-uswag nga atong nakita sa tibuok kalibotan nagapamatuod nga kita nakabaton sa langitnong pagpaluyo niining buluhatona.—Mat. 28:18-20.
5 Pinaagi sa kongregasyon, kita makadawat ug matag-adlaw nga pagdasig ‘sa pagpasibot sa paghigugma ug sa maayong mga buhat.’ (Heb. 10:24, 25) Kita napalig-on sa paglahutay sa mga pagsulay nga maunongon. Ang mahigugmaong mga magtatan-aw nagatabang kanato nga makasagubang sa mga kapit-osan ug mga kabalaka. (Eccl. 4:9-12) Ginahatag kanato ang gikinahanglang tambag sa dihang kita anaa sa kapeligrohang mahisalaag. Unsang laing organisasyon ang nagatagana sa maong mahigugmaong pag-atiman?—1 Tes. 5:14.
6 Maoy kabubut-on ni Jehova nga kita magpabiling suod sa iyang organisasyon aron mapatunhay ang atong panaghiusa. (Juan 10:16) Usa ka paagi nga ang kongregasyon nagatabang kanatong mapadayon ang kontak sa matinumanong ulipon nga matang mao ang pagpadalag nagapanawng mga magtatan-aw alang sa atong pagdasig. Ang atong pagsanong sa mahigugmaong pagtultol magpasuod kanato diha sa panaghiusa nga motabang kanato nga magpabiling malig-on sa espirituwal.
7 Ang kongregasyon mahinungdanon sa atong espirituwal nga katunhayan. Maoy imposible ang pag-alagad kang Jehova nga inuyonan nga bulag gikan niini. Nan, himoon ta ang pagpabiling suod sa kon unsay gitagana ni Jehova. Hinaot kita magabuhat nga uyon sa mga tumong niini ug sinserong magapadapat sa tambag nga atong madawat niana. Niining paagiha lamang kita makapakita kon unsa gayod ka hinungdanon ang kongregasyon alang kanato.—Sal. 27:4.