Mga Pasiuna nga Gamiton sa Ministeryo sa Kanataran

Komento: Sa pagtino sa matang sa pasiuna nga gamiton sa dihang ikaw magpakig-ambit sa ministeryo sa kanataran, tulo ka butang nga angay pagatagdon gayod: (1) Ang mensahe nga kita gisugo nga ipahayag mao “kining maayong balita sa gingharian.” (Mat. 24:14) Bisan pa kon kini dili maoy diretsong atong ginahisgotan, kinahanglang hinumdoman ta ang pagtabang sa katawhan nga makasabot sa panginahanglan alang niana, o tingali ang pagsulbad sa mga babag aron sila mahinangop sa pagtagad niana. (2) Ang dalisay nga kabalaka sa kaayohan sa katawhan nga atong mahibalag mag-abag kanato, sama sa gibuhat ni Jesus, sa pag-abot ug mga kasingkasing. (Mar. 6:34) Ang maong lunsay nga interes mahimong ipakita pinaagig mainitong pahiyom ug mahigalaong taras, kahinangop sa pagpaminaw sa dihang sila mosulti ug unya ipahiuyon gayod niana ang atong mga pulong, usab pinaagi sa atong paggamit ug mga pangutana nga magpadasig kanila sa pagpahayag sa ilang kaugalingon aron atong masabtan nga mas maayo pa ang ilang panghunahuna. Ang 1 Corinto 9:19-23 nagbutyag nga ang apostol nga si Pablo nagpahiangay sa iyang presentasyon sa maayong balita sumala sa mga kahimtang sa mga tawo nga iyang gikasulti. (3) Sa pipila ka bahin sa kalibotan ang mga bisita ginadahom sa pagsunod sa pipila ka pormalidad sa dili pa mosulti sa katarongan kon nganong sila nagaduaw. Sa ubang mga dapit ang tagbalay magdahom nga ang dili dinapit nga bisita mosulti dayon sa iyang tuyo.—Itanding Lucas 10:5.

Ang mosunod nga mga pasiuna nagbutyag kon sa unsang paagi ang pipila ka bansay nga mga Saksi nagasugod ug mga panaghisgot. Kon ang mga pasiuna nga imo na karong gigamit panagsa lang makabukas sa mga panaghisgot, sulayi ang pipila niining mga sugyota. Sa imo kining sulayan buot mo man gayod nga isulti kana diha sa imong kaugalingong mga pulong. Usab, imong makaplagan nga mapuslanon nga mangayog mga sugyot gikan sa ubang mga Saksi diha sa inyong kongregasyon kinsa adunay maayong kalamposan sa pagduol sa mga tawo.

ARMAGEDDON

● ‘Daghan tawo nabalaka bahin sa Armageddon. Nadungog nila ang mga lider sa kalibotan nga nagagamit nianang terminoha nga pinunting sa bug-os nukleyar nga gubat. Unsa ang pagtuo mo sa Armageddon alang sa katawhan? . . . Sa aktuwal, ang ngalang Armageddon gikuha gikan sa Bibliya, ug kini adunay gipasabot nga lahi kaayo sa sagad nga paggamit sa maong pulong. (Pin. 16:14, 16) Nagbutyag usab ang Bibliya nga adunay mga butang nga sa personal atong mabuhat uban sa panglantaw nga makalabang buhi. (Sof. 2:2, 3)’ (Tan-awa usab ang mga panid 51-55, ubos sa lintunganayng ulohang “Armageddon.”)

BIBLIYA/DIYOS

● ‘Haló. Nagduaw ako makadiyot aron ipaambit kanimo ang importanteng mensahe. Palihog matikdi ang gisulti dinhi sa Bibliya. (Basahang teksto, sama sa Pinadayag 21:3, 4.) Unsay hunahuna mo bahin niana? Maayo ba kanang paminawon alang kanimo?’

● ‘Nagapakigsulti kami sa among mga silingan kon hain makaplagan ang mapuslanong tabang aron sagubangon ang mga suliran sa kinabuhi. Sa nangagi, daghang tawo mikonsulta sa Bibliya. Pero nagapuyo kita sa panahon nga ang mga tinamdan nagakausab. Unsa man ang imong pagbati bahin niana? Nagatuo ba ikaw nga ang Bibliya maoy Pulong sa Diyos o nagabati ka ba nga kini maoy usa lang ka maayong basahon nga gisulat sa mga tawo? . . . Kon kini maoy gikan sa Diyos, sa imong hunahuna unsaon kaha sa usa ka tawo sa pagtino niana?’ (Tan-awang mga panid 74-84, ubos sa lintunganayng ulohang “Bibliya.”)

● ‘Nalipay akong ania ka ra sa balay. Ako nagapaambit sa akong mga silingan ug makapalig-ong punto gikan sa Bibliya (o, ang Balaang Kasulatan). Nahibulong ka ba gayod: . . . ? (Mosuknag usa ka pangutana nga motultol ngadto sa imong ulohan nga mahisgotan.)’

● ‘Kami nagadasig sa mga tawo sa pagbasa sa ilang Bibliya. Ang mga tubag nga gihatag niini sa importanteng mga suliran sagad nagapatingala sa katawhan. Pananglitan:  . . . (Sal. 104:5; o Dan. 2:44; o uban pa).’

● ‘Nagahimo mig mubo lang nga pagduaw sa among mga silingan karon. Ang pipila sa mga tawo nga among gikasulti adunay pagsalig sa Diyos. Ang uban nalisdan sa pagtuo diha kaniya. Unsa man ang imong pagbati? . . . Ang Bibliya nagadasig kanato sa pagtagad sa kahinungdanon sa kinaiyanhong uniberso. (Sal. 19:1) Siya kansang mga balaod nagbuot niining langitnong mga butang nagtagana usab ug bililhong giya alang kanato. (Sal. 19:7-9)’ (Tan-awa usab ang mga panid 141-147, 309-313, ubos sa lintunganayng mga ulohang “Diyos” ug “Paglalang.”)

KRIMEN/KALUWASAN

● ‘Haló. Nagapakigsulti kami sa mga tawo mahitungod sa personal nga kaluwasan. Sa atong palibot nagadagsang ang krimen ug kana nagaapektar sa atong kinabuhi. Sa hunahuna mo moabot ra kaha ang panahon sa dihang ang mga tawo sama kanimo ug kanako makahimo na sa paglakaw sa kadalanan sa magabii ug mobating luwas? (O, Sa pagbati mo aduna kahay si bisan kinsa nga nakahupot sa tinuod nga sulbad sa maong problema?) . . . (Prov. 15:3; Sal. 37:10, 11)’

● ‘Akong ngalan maoy ——. Diha ra ko nagpuyo sa kasilinganan. Sa mianhi ko niining buntaga, akong napanid-an nga ang tanan naghisgot bahin sa (isulti ang di pa dugay nga krimen sa kasilinganan o laing butang nga sa lokal gikabalak-an). Unsa may imong hunahuna bahin niana? . . . Aduna bay gibati mo nga makatabang sa paghimo sa atong kinabuhi nga mas segurado? . . . (Prov. 1:33; 3:5, 6)’

BAG-ONG MGA HITABO SA ADLAW

● ‘Maayong gabii. Ang akong ngalan maoy ——. Ako usa ka silingan gikan sa (ngalan sa kalye o dapit). Nakita mo ba ang balita sa TV kagabii? . . . Ang maong report bahin sa (isulti ang kinabag-ohang balita sa kabalaka)—unsay hunahuna mo bahin niana? . . . Dili talagsaon sa pagkadungog sa mga tawo nga mangutana, Unsa man ang dulnganan niining kalibotana? Kami ingong mga Saksi ni Jehova nagatuo nga kita nagapuyo sa giingon sa Bibliya nga “kataposang mga adlaw.” Matikdi kining detalyadong kabatbatan sa 2 Timoteo 3:1-5.’ (Tan-awa usab ang mga panid 121-130.)

● ‘Imo bang nabasa kini sa mantalaan niining semanaha? (Ipakita ang haom tinabas-mantalaan.) Unsay hunahuna mo . . . ?’

● ‘Gusto kong mosukna nimog usa ka pangutana. Kon papilion ka, hain sa daghang suliran karon nga naagoman sa kalibotan ang buot mong unang makita nga masulbad? (Human masayri kon unsa ang labing dakong gikabalak-an sa tagbalay, gamita kini ingong pasukaranan sa inyong panaghisgot.)’

PANARBAHO/PAMALAY

● ‘Nahisgotan namo sa imong mga silingan kon unsay mahimo aron paneguroon nga adunay panarbaho ug puy-anan alang sa tanan. Nagatuo ka ba nga makataronganon sa pagdahom nga malampos kini sa tawhanong mga gobyerno? . . . Pero adunay usa nga nasayod kon unsaon sa pagsulbad kining mga problemaha; mao kana ang Maglalalang sa katawhan. (Isa. 65:21-23)’

● ‘Kami nagapaambit sa among mga silingan ug usa ka punto maylabot sa maayong kagamhanan. Kadaghanan sa katawhan gustong makabaton ug matang sa gobyerno nga dili malimbongon, kanang magtaganag panarbaho ug maayong pamalay alang sa tanan. Sa hunahuna mo unsang matang sa kagamhanan ang makahimo nianang tanan? . . . (Sal. 97:1, 2; Isa. 65:21-23)’ (Tan-awa usab ang mga panid 84-89, ubos sa lintunganayng ulohang “Kagamhanan.”)

PAMILYA/KABATAAN

● ‘Kami nagapakigsulti sa mga tawo kinsa interesado kon sa unsang paagi ato gayong masulbad ang mga suliran sa panimalaynong kinabuhi. Kitang tanan nagapanlimbasog sa labing maayong atong maarangan, pero kon adunay paagi nga makatabang kanato sa paghupot ug mas dakong kalamposan, kita interesado man, di ba no? . . . (Col. 3:12, 18-21) Ang Bibliya nagahikyad sa atong atubangan sa usa ka kahibulongang paglaom nga nagatanyag ug tinuod nga kaugmaon alang sa atong mga banay. (Pin. 21:3, 4)’

● ‘Kitang tanan gusto nga ang atong mga anak makabaton ug malipayong kinabuhi. Pero nagahunahuna ka ba nga adunay maligdong nga katarongan sa pagdahom ug malipayong sangpotanan tungod sa kasamok nga naagoman sa kalibotan karon? . . . Busa, unsang matanga man sa kalibotan nga sa hunahuna mo sagubangon sa atong kabataan sa dihang mohamtong na sila? . . . Ang Bibliya nagapakita nga himoon sa Diyos kining yutaa nga usa ka maayo kaayong dapit nga pagapuy-an. (Sal. 37:10, 11) Apan kon ang atong mga anak ba makaambit niana magdepende gayod sa pagpili nga atong pagahimoon. (Deut. 30:19)’

KAUGMAON/SEGURIDAD

● ‘Maayong buntag. Komosta ka? . . . Nagapaninguha kaming ipaambit sa among mga silingan ang positibong panglantaw sa ugma-damlag. Ingon ba usab niana ang imong panglantaw sa kinabuhi? . . . Nakaplagan mo bang ang pipila ka situwasyon magpalisod nianang buhaton? . . . Akong nakaplagan nga ang Bibliya mapuslanon kaayo niining bahina. Sa tininuod nagahubit kana sa mga kahimtang nga nagalungtad sa atong adlaw, pero nagapatin-aw usab kana sa kahulogan niini ug nagatug-an kanato kon unsa ang mahimong sangpotanan niana. (Luc. 21:28, 31)’

● ‘Haló. Ang akong ngalan maoy ——. Unsay imoha usab? . . . Ako nagadasig sa mga batan-on sama kanimo aron tagdon ang dakong kaugmaon nga ginapaabot sa Bibliya nganhi kanato. (Basahang kasulatan, sama sa Pinadayag 21:3, 4.) Maayo ba kanang paminawon alang kanimo?’

PAGTUON SA BIBLIYA SA BALAY

● ‘Nagaduaw ako aron itanyag kanimo ang usa ka walay bayad nga kurso sa pagtuon sa Bibliya. Kon matugotan, buot kong mogugol ug pipila ka minutos lang aron ipasundayag ang paagi nga ang mga tawo sa mga 200 ka kayutaan nagahisgot sa Bibliya diha sa balay ingong mga grupo sa pamilya. Atong magamit ang bisan hain niining mga ulohana ingong pasukaranan sa panaghisgot. (Ipakita ang mga kaundan gikan sa librong tun-anan.) Hain man ang nagapainteres gayod kanimo?’

● ‘Kami nagapakita niini nga tabang sa pagtuon sa Bibliya ngadto sa among mga silingan. (Ipakita kana.) Nakakita ka na ba niini sa miagi? . . . Kon makatugot ka ug pipila lang ka minutos, gusto kong ipasundayag ang paagi nga kini magamit uban sa imong kaugalingong kopya sa Bibliya.’

INHUSTISYA/KASAKITAN

● ‘Napalandong na ba gayod nimo: Ang Diyos ba nagatagad gayod maylabot sa inhustisya ug kasakitan nga naagoman sa katawhan? . . . (Eccl. 4:1; Sal. 72:12-14)’ (Tan-awa usab ang lintunganayng mga ulohang “Kasakitan” ug “Pagpalig-on.”)

GINGHARIAN

● ‘Sa pagpakigsulti sa akong mga silingan, akong napanid-an nga daghan ang nangandoy sa pagpuyo ubos sa kagamhanan nga makasulbad gayod sa dagkong suliran nga atong ginaatubang karon—ang krimen ug mahal nga palitonon (o unsa man ang kinabag-ohan nga anaa sa hunahuna sa daghan). Kana tinguhaonon, di ba mao? . . . Aduna bay kagamhanan nga sama niana karon? . . . Daghang tawo nag-ampo gayod sa usa ka gobyerno nga makahimo unta nianang mga butanga. Sa walay duhaduha ikaw nagaampo alang niana, pero dili daghang tawo naghunahuna niana nga usa ka kagamhanan. (Dan. 2:44; Sal. 67:6, 7; Miq. 4:4)’ (Tan-awa usab ang mga panid 180-189 ug 84-89, ubos sa lintunganayng mga ulohang “Gingharian” ug “Kagamhanan.”)

● ‘Among ginasukna ang among mga silingan sa usa ka pangutana. Among pabilhan ang imong komento niana. Hibalo ka, si Jesus nagtudlo kanato sa pag-ampo nga moabot unta ang Gingharian sa Diyos ug sa Iyang kabubut-on nga pagabuhaton ibabaw sa yuta ingon nga kana natuman didto sa langit. Sa hunahuna mo tubagon ra ba gayod ang maong pag-ampo aron ang kabubut-on sa Diyos matuman gayod dinhi sa yuta? . . . (Isa. 55:10, 11; Pin. 21:3-5)’

● ‘Akong ginahisgotan sa akong mga silingan ang usa ka isyu nga kitang tanan kinahanglang moatubang: Kita ba nagadapig sa kagamhanan sa Diyos, o kita ba nagapili sa tawhanong pagmando? Tungod sa mga kahimtang sa kalibotan karon, gibati mo bang gikinahanglan ta kanang wala pa ikapatungha sa mga tawo? . . . (Mat. 6:9, 10; Sal. 146:3-5)’

KATAPOSANG MGA ADLAW

● ‘Nagaduaw kami aron ipakighisgot ang kahulogan sa mga nagakahitabo sa atong palibot diha sa kalibotan karon. Taliwala sa daghang katawhan adunay pag-us-os sa interes diha sa Diyos ug sa iyang mga sukdanan sa pagkinabuhi nga gilatid diha sa Bibliya. Kini nag-impluwensiya gayod sa tinamdan sa katawhan ngadto sa usag usa. Palihog tugoti akong ipaambit kanimo kining pagpatin-aw nga natala sa 2 Timoteo 3:1-5 ug tug-ani ko kon sa hunahuna mo haom ba kini sa kalibotan karon. (Basaha) . . . Aduna bay maayong katarongan sa pagdahom sa mas maayong mga kahimtang sa umaabot? (2 Ped. 3:13)’

● ‘Daghang tawo nagatuo nga talitapos na gayod ang panahon alang niining kalibotana. Nagahisgot sila sa atong panahon ingong “kataposang mga adlaw.” Apan imo bang naamgohan nga ang Bibliya nagatug-an kanato kon sa unsang paagi makalabang buhi sa kataposan sa presenteng kalibotan ug magkinabuhi ibabaw sa yuta nga pagahimoong paraiso? (Sof. 2:2, 3)’ (Tan-awa usab ang mga panid 121-130, ubos sa lintunganayng ulohang “Kataposang mga Adlaw.”)

Tan-awa usab ang “Bag-ong mga Hitabo sa Adlaw” niining talaana sa sinugyot nga mga pasiuna.

KINABUHI/KALIPAY

● ‘Kami nagaduaw sa among mga silingan aron kaplagon ang mga tawo nga nabalaka gayod bahin sa kahulogan sa kinabuhi. Kadaghanan sa katawhan nakatagamtam ug pipila ka kalipay. Pero sila usab nagaatubang ug daghang suliran. Samtang kita magakatigulang, atong maamgohan nga ang kinabuhi mubo ra. Ingon ba niana lamang ang kinabuhi? Unsa man ang imong pagbati bahin niana? . . . (Komentohi ang orihinal nga katuyoan sa Diyos ingon sa gibanaag didto sa Eden; dayon ang Juan 17:3 ug Pinadayag 21:3, 4.)’ (Tan-awa usab ang mga panid 130-135, ubos sa lintunganayng ulohang “Kinabuhi.”)

● ‘Karon among ginasukna ang among mga silingan kon unsa ang ilang hunahuna sa dihang nagabasa sa ilang mga Bibliya sa ekspresyong “kinabuhing walay kataposan.” Kana makapainteres kaayo sanglit kay ang maong ekspresyon makita man diha sa Bibliya sa mga 40 ka besis. Unsa kaha ang kahulogan sa maong kinabuhi alang kanato? . . . Unsaon ta man sa pagkab-ot niana? (Juan 17:3; Pin. 21:4)’

● ‘Kami nagapakigsulti sa mga tawo kinsa nabalaka kaayo maylabot sa kalidad sa kinabuhi karon. Kadaghanan kanato malipayon nga buhi ra, pero daghan ang nagaduhaduha, Posible kaha ang kinabuhi nga tinuod nga malipayon? Unsa man ang imong pagbati bahin niana? . . . Unsa may imong ikasulti nga mao ang usa sa labing dakong babag sa kalipay karon? . . . (Sal. 1:1, 2; dugang mga teksto nga ikapatukma sa kabalaka sa tagbalay)’

GUGMA/KALULOT

● ‘Nakaplagan namo nga daghang tawo mabalak-on kaayo sa kakulang sa tinuod nga gugma diha sa kalibotan. Ingon ba usab niana ang imong pagbati? . . . Nganong sa hunahuna mo ingon niini ang kahimtang? . . . Nahibalo ka ba nga ang Bibliya nagtagna niana? (2 Tim. 3:1-4) Kini usab nagapatin-aw sa katarongan niana. (1 Juan 4:8)’

● ‘Akong ngalan maoy ——. Ako usa sa imong mga silingan. Nagahimo ra akog mubong pagduaw aron makighisgot sa akong mga silingan bahin nianang nakapabalaka gayod kanako, ug mapaneguro kong imong namatikdan usab kana. Dili man mahal ang kalulot, pero daw kini nihit kaayo karon. Nahibulong ka ba gayod kon nganong kanang kahimtanga nagalungtad? . . . (Mat. 24:12; 1 Juan 4:8)’

PAGKATIGULANG/KAMATAYON

● ‘Nahibulong ka ba gayod kon nganong kita matigulang ug mamatay? Ang pipila ka pawikan nagakinabuhi man sa ginatos ka katuigan. Ang pipila ka kahoy nabuhi sa linibo ka katuigan. Pero ang mga taho mabuhi lang ug 70 o 80 ka tuig ug unya mamatay. Nahibulong ka ba kon ngano? . . . (Roma 5:12) Mabag-o ra ba gayod ang maong kahimtang? . . . (Pin. 21:3, 4)’

● ‘Nakapangutana ka na ba gayod: Ang kamatayon ba mao na ang kataposan sa tanan? O aduna pa bay lain human sa kamatayon? . . . Ang Bibliya nagapatin-aw sa bisan unsang pagduhaduha ta maylabot sa kamatayon. (Eccl. 9:5, 10) Kini usab nagapakita nga adunay tinuod nga paglaom alang sa mga tawo nga nagahupot ug pagtuo. (Juan 11:25)’ (Tan-awa usab ang mga panid 102-108 ug 314, ubos sa mga ulohang “Kamatayon” ug “Pagpalig-on.”)

GUBAT/KALINAW

● ‘Hapit ang tanan gayod niining mga adlawa nabalaka sa hulga sa nukleyar nga gubat. Sa hunahuna mo ato ba gayong makita ang tinuod nga kalinaw ibabaw niining yutaa? . . . (Sal. 46:8, 9; Isa. 9:6, 7)’

● ‘Akong ginapangita ang mga tawo nga gustong magapuyo diha sa kalibotan nga walay gubat. Niining sigloha lamang adunay mga ginatos ka gubat, apil na ang duha ka gubat sa kalibotan. Karon kita ginaatubang sa hulga sa nukleyar nga kasamok. Sa hunahuna mo unsa ang gikinahanglan kon ang maong gubat ugaling malikayan? . . . Kinsa man ang magpatungha nianang malinawong kalibotan? . . . (Miq. 4:2-4)’

● ‘Among nakaplagan nga hapit ang tanan nagaingon nga gusto niya ang kalinaw sa kalibotan. Mao usab kana ang ginasulti sa kadaghanan sa mga lider sa kalibotan. Nan, nganong malisod kaayo sa pagkab-ot niana? . . . (Pin. 12:7-12)’

SA DIHANG MOINGON ANG KADAGHANAN: ‘ADUNA AKOY KAUGALINGONG RELIHIYON’

● ‘Maayong buntag. Ginaduaw namo ang tanang pamilya sa inyong laray sa kabalayan (o, niining dapita), ug among nakaplagan nga ang kadaghanan kanila adunay ilang kaugalingong relihiyon. Sa walay duhaduha ikaw usab adunay relihiyon. . . . Pero, nga walay pag-isip sa atong relihiyon, kita naapektahan sa daghang samang mga problema—mahal nga palitonon sa panginabuhi, salaod, sakit—di ba mao? . . . Sa hunahuna mo aduna kahay tinuod nga sulbad niining mga butanga? . . . (2 Ped. 3:13; ubp.)’

SA DIHANG MOINGON ANG KADAGHANAN: ‘AKO PULIKI’

● ‘Haló. Nagaduaw kami sa tanan niini nga kasilinganan nga dala ang importanteng mensahe. Tino nga ikaw puliki, mao nga dili ako magdugay.’

● ‘Maayo. Ang akong ngalan maoy ——. Ang katuyoan sa akong pag-anhi mao ang paghisgot uban kanimo sa mga panalangin sa Gingharian sa Diyos ug kon sa unsang paagi kita makaambit niana. Pero akong nakita nga ikaw puliki (o, talilakaw). Ikabilin ko ba kanimo ang mubo lang nga punto?’

SA TERITORYO NGA SAGAD NASANGYAWAN

● ‘Nalipay kong ania ka sa balay. Nagahimo kami sa among senemanang duaw sa kasilinganan, ug aduna kamiy dugang ikapaambit kanimo bahin sa kahibulongang mga butang nga buhaton sa Gingharian sa Diyos alang sa katawhan.’

● ‘Haló. Maayong naghibalag na usab ta. . . . Maayo ra ba ang kahimtang sa panglawas sa tanan sa pamilya? . . . Mihapit ako aron ipaambit kanimo ang usa ka punto maylabot sa . . . ’

● ‘Maayong buntag. Komosta ka? . . . Ako nangandoy ug laing higayon nga ikasulti ka. (Unya ibungat ang tinong ulohan nga gusto mong hisgotan.)’