“Tudloi Kami sa Pag-ampo”
“Usa sa iyang mga tinun-an miingon kaniya: ‘Ginoo, tudloi kami sa pag-ampo.’”—LUCAS 11:1.
1-3. (a) Nganong ang mga tinun-an ni Jesus nangayog instruksiyon bahin sa pag-ampo? (b) Unsang mga pangutana ang mobangon bahin sa pag-ampo?
ANG ubang mga tawo natugahan ug maayong tingog sa pag-awit. Ang uban sa kinaiyanhon maoy maayong mga musikero. Apan aron makab-ot ang labing maayo sa ilang katakos, bisan kini nga mga mag-aawit ug mga musikero nagkinahanglag instruksiyon. Sama usab niini ang pag-ampo. Ang mga tinun-an ni Jesu-Kristo nakaamgo nga sila nagkinahanglag instruksiyon aron dunggon sa Diyos ang ilang mga pag-ampo.
2 Si Jesus kasagarang moduol sa iyang Amahan nga pribado diha sa pag-ampo, sama sa iyang gihimo sa tibuok gabii sa wala pa mipilig 12 ka apostoles. (Lucas 6:12-16) Bisan pag iyang gidasig usab ang iyang mga apostoles nga moampong pribado, sila nakadungog kaniya nga nag-ampo sa publiko ug nakakita nga siya dili sama sa relihiyosong mga maut kinsa nag-ampo aron makita sa mga tawo. (Mateo 6:5, 6) Nan, makataronganon nga ang mga sumusunod ni Jesus gustong mahibalo sa iyang pasiunang instruksiyon bahin sa pag-ampo. Busa, atong mabasa: “Karon sa dihang siya nag-ampo sa usa ka dapit, sa pag-undang niya, usa sa iyang mga tinun-an miingon kaniya: ‘Ginoo, tudloi kami sa pag-ampo, maingon nga gitudloan ni Juan [Bawtista] ang iyang mga tinun-an.’”—Lucas 11:1.
3 Unsay pagsanong ni Jesus? Unsay atong makat-onan gikan sa iyang panig-ingnan? Ug sa unsang paagi kita makabatog kaayohan gikan sa iyang instruksiyon bahin sa pag-ampo?
Mga Pagtulon-an Alang Kanato
4. Nganong kita kinahanglang “moampo sa kanunay,” ug unsay kahulogan sa pagbuhat niana?
4 Daghan kita ug makat-onan gikan sa mga pulong ni Jesus ug panig-ingnan ingong usa ka tawo sa pag-ampo. Ang usa ka pagtulon-an mao nga kon ang hingpit nga Anak sa Diyos kinahanglang mag-ampo nga regular, ang iyang dili-hingpit nga mga tinun-an labi pang nagkinahanglan nga padayong molantaw sa Diyos alang sa giya, paglipay, ug espirituwal nga pagkaon. Busa, kita kinahanglang “moampo sa kanunay.” (1 Tesalonica 5:17) Siyempre, kini wala magpasabot nga kita kinahanglang literal nga moluhod kanunay. Hinunoa, kita angay nga adunay mainampoong tinamdan. Kita kinahanglang molantaw sa Diyos alang sa giya diha sa tanang bahin sa atong kinabuhi aron nga kita makalihok uban ang pagsabot ug kanunay nga makabaton sa iyang pag-uyon.—Proverbio 15:24.
5. Unsay makababag sa panahon nga angay natong igugol sa pag-ampo, ug unsay atong buhaton bahin niini?
5 Niining “kataposang mga adlaw,” daghang butang ang makababag sa panahong angay natong igugol diha sa pag-ampo. (2 Timoteo 3:1) Apan kon ang panimalaynong mga kabalaka, mga pag-atiman sa negosyo, ug ang susama niini nagababag sa regular nga pag-ampo ngadto sa atong langitnong Amahan, kita nabug-atan pag-ayo uban sa mga kabalaka niining kinabuhia. Kana nga kahimtang kinahanglang tul-iron dayon nga walay paglangan, kay ang pagkapakyas sa pag-ampo motultol ngadto sa pagkawala sa pagtuo. O mahimong atong kunhoran ang sekular nga mga obligasyon o timbangon ang mga alatimanon sa kinabuhi uban sa mas matinguhaon ug masubsob nga pagliso sa atong mga kasingkasing ngadto sa Diyos alang sa giya. Kinahanglang kita “managtukaw kon bahin sa mga pag-ampo.”—1 Pedro 4:7.
6. Unsa nga pag-ampo ang atong pagatun-an karon, ug uban sa unsang tumong?
6 Diha sa gitawag sulondang pag-ampo, si Jesus nagtudlo sa iyang mga tinun-an kon unsaon sa pag-ampo, dili sa kon unsay isulti. Ang asoy ni Lucas lahi ug diyutay gikan nianang kang Mateo tungod kay nagkalainlaing mga okasyon ang nalangkit. Atong tun-an kini nga pag-ampo ingong usa ka sumbanan sa kinaiya sa atong mga pag-ampo ingong mga sumusunod ni Jesus ug mga Saksi ni Jehova.
Atong Amahan ug Iyang Ngalan
7. Kinsa ang adunay pribilehiyo sa pagtawag kang Jehova ingong “Amahan namo”?
7 “Amahan namo nga anaa sa mga langit.” (Mateo 6:9; Lucas 11:2) Sanglit si Jehova mao ang Maglalalang sa katawhan ug nagapuyo sa langitnong gingharian, tukma lamang nga sangpiton siya ingong “Amahan namo nga anaa sa mga langit.” (1 Hari 8:49; Buhat 17:24, 28) Ang paggamit sa terminong “namo” nagpasabot nga ang uban usab adunay suod nga relasyon sa Diyos. Apan kinsa ang nakabaton ug walay kondisyon nga pribilehiyo sa pagsangpit kaniya ingong ilang Amahan? Ang mga dedikado, bawtismadong mga tawo lamang sa iyang pamilya sa mga magsisimba. Ang pagsangpit kang Jehova nga “Amahan namo” nagpaila nga kita may pagtuo sa Diyos ug nakaamgo nga ang bugtong basehanan lamang nga mapasig-uli uban niya mao ang bug-os nga pagdawat sa halad lukat ni Jesus.—Hebreohanon 4:14-16; 11:6.
8. Nganong nangandoy kitang mogugol ug panahon sa pag-ampo kang Jehova?
8 Pagkasuod sa atong pagbati ngadto sa atong langitnong Amahan! Ingong mga anak nga dili gayod tak-an sa pagduol sa ilang amahan, kita angay mawili sa paggugol ug hataas nga panahon sa pag-ampo ngadto sa Diyos. Ang halalom nga pagpasalamat alang sa iyang espirituwal ug materyal nga mga panalangin angay mopukaw kanato sa pagpasalamat kaniya sa iyang pagkamaayo. Kita angay mobati sa pagtugyan ngadto kaniya sa mga palas-anon nga nagpabug-at kanato, masaligon nga siya mosapnay kanato. (Salmo 55:22) Kita makatino nga kon kita matinumanon, ang tanan sa ulahi molampos ra tungod kay siya nagatagad kanato.—1 Pedro 5:6, 7.
9. Ang pag-ampo alang sa pagbalaan sa ngalan sa Diyos maoy usa ka hangyo alang sa unsa?
9 “Balaanon unta ang imong ngalan.” (Mateo 6:9; Lucas 11:2) Ang pulong “ngalan” usahay nagpaila sa tawo mismo, ug ang “pagbalaan” nagkahulogang “paghimong balaan, linain o huptang sagrado.” (Itandi ang Pinadayag 3:4.) Busa, ang pag-ampo sa pagbalaan sa ngalan sa Diyos maoy usa ka hangyo nga molihok si Jehova sa pagbalaan sa iyang kaugalingon. Sa unsang paagi? Pinaagi sa pagwagtang sa tanang pasipala nga gihan-ok diha sa iyang ngalan. (Salmo 135:13) Tungod niana, wagtangon sa Diyos ang pagkadaotan, magahimaya sa iyang kaugalingon, ug ipaila sa mga nasod nga siya mao si Jehova. (Ezekiel 36:23; 38:23) Kon kita nangandoy nga makakita nianang adlawa ug magapabili gayod sa pagkahalangdon ni Jehova, kita sa kanunay moduol kaniya diha sa matinahurong espiritu nga maoy gipasabot sa mga pulong “balaanon unta ang imong ngalan.”
Ang Gingharian sa Diyos ug ang Iyang Kabubut-on
10. Unsay kahulogan sa dihang kita moampo nga moanhi ang Gingharian sa Diyos?
10 “Paanhia ang imong gingharian.” (Mateo 6:10; Lucas 11:2) Ang Gingharian nga gipasabot dinhi mao ang soberanong pagmando ni Jehova, sumala sa gipahayag pinaagi sa langitnon Mesiyanikong kagamhanan diha sa mga kamot ni Jesu-Kristo ug sa iyang mga kauban nga “mga balaan.” (Daniel 7:13, 14, 18, 27; Isaias 9:6, 7; 11:1-5) Unsay kahulogan sa pag-ampo alang niini nga ‘moanhi’? Kini nagpasabot nga kita naghangyo nga ang Gingharian sa Diyos moanhi batok sa tanang yutan-ong mga magsusupak sa balaang pagmando. Human nga ang Gingharian ‘magadugmok ug magaut-ot sa tanang yutan-ong mga gingharian,’ bag-ohon niini ang yuta ngadto sa usa ka tibuok yuta nga paraiso.—Daniel 2:44; Lucas 23:43.
11. Kon kita nangandoy nga makita nga matuman ang kabubut-on ni Jehova sa tibuok uniberso, unsay atong buhaton?
11 “Matuman unta ang imong kabubut-on, sa langit, maingon man usab sa yuta.” (Mateo 6:10) Kini maoy usa ka hangyo nga tumanon sa Diyos ang iyang katuyoan sa yuta, nga naglakip sa pagpapha sa iyang mga kaaway. (Salmo 83:9-18; 135:6-10) Sa pagkamatuod, kini nagpasabot nga kita nangandoy nga makakita sa balaang kabubut-on nga matuman sa tibuok uniberso. Kon anaa kana sa atong kasingkasing, atong buhaton kanunay ang kabubut-on ni Jehova sa labing maayo sa atong katakos. Kita sa tim-os dili makahangyo niana kon kita walay matinguhaong paningkamot sa pagtuman sa kabubut-on sa Diyos sa atong bahin. Kon kita nag-ampo niining paagiha, nan, kinahanglang atong tinoon nga dili kita mobuhat ug mga butang nga supak nianang kabubut-ona, sama sa pagpangulitawo ug dili magtutuo o pagsagop sa kalibotanong mga dalan. (1 Corinto 7:39; 1 Juan 2:15-17) Hinunoa, atong isilsil kanunay sa atong kaisipan ang hunahuna, ‘Unsay kabubut-on ni Jehova bahin niining butanga?’ Oo, kon atong gihigugma ang Diyos sa tibuok natong kasingkasing, atong pangitaon ang iyang pagtultol diha sa tanang kalihokan sa kinabuhi.—Mateo 22:37.
Kalan-on Namo sa Matag-adlaw
12. Ang pagpangayo lamang ug ‘pagkaon sa matag adlaw’ adunay unsang maayong epekto alang kanato?
12 “Hatagi kami karon sa kalan-on namo niining adlawa.” (Mateo 6:11) Ang asoy ni Lucas mabasa: “Ihatag kanamo sa matag adlaw ang kalan-on nga gikinahanglan sa matag adlaw.” (Lucas 11:3) Ang pagpangayo sa Diyos sa pagtagana sa gikinahanglang kalan-on alang “niining adlawa” nagapalambo sa atong pagtuo sa iyang katakos sa pag-atiman sa atong mga panginahanglan sa adlaw-adlaw. Ang mga Israelinhon gisugo sa pagkuhag mana nga “igo nga bahin niya sa tagsa ka adlaw,” dili alang sa usa ka semana o sobra pa. (Exodo 16:4) Dili kini usa ka pag-ampo nga nagapangayog kinaham nga mga pagkaon ug sobra ka abundang mga tagana kondili sa atong matag adlaw nga mga panginahanglan kon sila motungha. Ang pagpangayo lamang sa matag adlaw nga pagkaon usab motabang kanato nga dili mahimong dalo.—1 Corinto 6:9, 10.
13. (a) Sa halapad nga diwa, unsay kahulogan sa pagpangayog kalan-on sa matag adlaw? (b) Unsay angay natong tinamdan, bisan pag nagkugi kita ug nakabaton ug igo-igo ra nga mabuhi?
13 Sa halapad nga diwa, ang pagpangayog pagkaon sa matag adlaw nagpaila nga wala nato batia nga nagasalig sa kaugalingon kondili kanunay nagalantaw sa Diyos alang sa pagkaon, ilimnon, besti, ug ubang mga kinahanglanon. Ingong dedikadong mga membro sa iyang pamilya sa mga magsisimba, kita nagasalig sa atong Amahan apan dili molingkod nga magtinapolang magapaabot kaniya nga milagrosong motagana kanato. Kita molihok ug mogamit sa bisan unsang mga paagi nga atong nahibaloan aron makabatog pagkaon ug ubang mga kinahanglanon. Apan, kita sa tukma mopasalamat sa Diyos diha sa pag-ampo tungod kay nakita nato luyo niining mga taganaha ang gugma, kaalam, ug gahom sa atong langitnong Amahan. (Buhat 14:15-17; itandi ang Lucas 22:19.) Ang atong kakugi mahimong mosangpot ug kauswagan. Apan bisan pag nagkugi kita ug nakabaton ug igo-igo lamang aron nga mabuhi, kita magmapasalamaton ug magmakontento. (Filipos 4:12; 1 Timoteo 6:6-8) Sa pagkamatuod, ang usa ka tawong diyosnon nga ordinaryo lang ug pagkaon ug pamesti tingali mas malipayon kay sa uban nga mauswagon sa materyal. Busa bisan pag diyutay lamang ang atong nabatonan tungod sa mga sirkumstansiya nga dili nato kapugngan, dili angay nga mawad-a kita ug kadasig. Kita sa gihapon mahimong adunahan sa espirituwal. Sa pagkamatuod, dili angay nga makulangan kita sa pagtuo, paglaom, ug gugma kang Jehova, diin ngadto kaniya mosaka ang atong pagdayeg ug mga pasalamat diha sa kinasingkasing nga pag-ampo.
Pasayloa Kami sa Among mga Utang
14. Unsang mga utanga nga kita nangayog pasaylo, ug unsay gipadapat sa Diyos alang kanila?
14 “Ug pasayloa kami sa among mga utang, maingon nga kami usab nakapasaylo sa mga nakautang kanamo.” (Mateo 6:12) Ang asoy ni Lucas nagpakita nga kadtong mga utanga maoy mga sala. (Lucas 11:4) Ang napanunod nga pagkamakasasala maoy nagpugong kanato sa pagbuhat sa tanang butang sumala sa hingpit nga kabubut-on sa atong Amahan. Busa, sa usa ka diwa, kining mga kahuyangona mao ang atong mga utang, o mga obligasyon ngadto sa Diyos, sukad nga kita misugod sa ‘pagkinabuhi ug paglakaw diha sa espiritu.’ (Galacia 5:16-25; itandi ang Roma 7:21-25.) Kita nakabaton niining mga utanga tungod kay kita dili-hingpit ug dili na karon makaabot sa bug-os sa mga sukdanan sa Diyos. Tungod sa kapasayloan niining mga salaa nga kita may pribilehiyo sa pag-ampo. Makalilipay, ang Diyos makapadapat sa bili sa halad lukat ni Jesus ngadto niining mga utanga, o mga salaa.—Roma 5:8; 6:23.
15. Unsang tinamdan ang angay natong batonan bahin sa gikinahanglang disiplina?
15 Kon kita nagalaom nga pasayloon kita sa Diyos sa atong mga utang, o kasal-anan, kita kinahanglang maghinulsol ug andam nga modawat sa disiplina. (Proverbio 28:13; Buhat 3:19) Tungod kay si Jehova nahigugma kanato, siya nagahatag sa disiplina nga atong gikinahanglan sa personal aron atong matul-id ang atong mga kahuyangan. (Proverbio 6:23; Hebreohanon 12:4-6) Siyempre, kita magmalipayon kon tungod sa pag-uswag sa pagtuo ug kahibalo ang atong kasingkasing mahiuyon sa bug-os sa mga balaod sa Diyos ug mga prinsipyo nga kita dili gayod makasala nga tinuyo. Apan komosta man kon nakamatikod kita nga tinuyo ang uban natong mga kalapasan? Nan angay nga masakit gayod kita ug angay nga moampo sa kinasingkasing alang sa kapasayloan. (Hebreohanon 10:26-31) Ipadapat ang tambag nga atong nadawat, atong tul-iron dayon ang atong dalan.
16. Nganong mapuslanon ang padayon nga pagpangayo sa Diyos ug pagpasaylo sa atong mga sala?
16 Ang regular nga pagpangayo sa Diyos ug kapasayloan sa atong mga kasal-anan makaayo. Ang pagbuhat niini nagabutang sa atong pagkamakasasala sa atong atubangan ug angay adunay makapaubos nga epekto. (Salmo 51:3, 4, 7) Kita nagkinahanglan nga ang atong langitnong Amahan “mopasaylo kanato sa atong mga utang ug . . . maghinlo kanato gikan sa tanang pagkadili-matarong.” (1 Juan 1:8, 9) Dugang pa, ang paghisgot sa atong mga utang diha sa pag-ampo motabang kanato sa pagpakigbisog sa pakig-away batok niini. Busa kita kanunay nga gipahinumdoman usab sa atong panginahanglan sa lukat ug sa merito sa giulang dugo ni Jesus.—1 Juan 2:1, 2; Pinadayag 7:9, 14.
17. Sa unsang paagi ang pag-ampo alang sa kapasayloan sa sala makatabang kanato sa atong relasyon sa uban?
17 Ang pag-ampo alang sa kapasayloan motabang usab kanato nga magmaluloy-on, mahangawaon, ug mahinatagon ngadto niadtong kinsa tingali nakautang kanato ug dako ug gamayng mga butang. Ang asoy ni Lucas nag-ingon: “Pasayloa kami sa among mga sala, maingon nga kami nagapasaylo man usab sa mga nakautang kanamo.” (Lucas 11:4) Sa pagkamatuod, makabaton lamang kitag kapasayloan sa Diyos kon kita “nakapasaylo sa mga nakautang kanato,” mga tawong nakasala batok kanato. (Mateo 6:12; Marcos 11:25) Si Jesus midugang: “Kay kon inyong gipasaylo ang mga tawo sa ilang mga kasal-anan, ang inyong langitnong Amahan mopasaylo usab kaninyo; apan kon dili ninyo pasayloon ang mga tawo sa ilang mga kasal-anan, dili usab kamo pasayloon sa Amahan sa inyong mga kasal-anan.” (Mateo 6:14, 15) Ang pag-ampo alang sa kapasayloan sa atong mga sala angay mopukaw kanato sa pag-antos sa uban ug magapasaylo kanila. Si apostoles Pablo nagsulat: “Sama nga si Jehova dagayang nagapasaylo kaninyo, mao man usab kamo.”—Colosas 3:13; Efeso 4:32.
Pagsulay ug ang Daotang Usa
18. Nganong dili gayod nato basolon ang Diyos sa atong mga tintasyon ug mga pagsulay?
18 “Ug ayaw kami itugyan sa pagsulay.” (Mateo 6:13; Lucas 11:4) Kining mga pulonga wala magpasabot nga si Jehova mosulay kanato aron kita makasala. Ang mga Kasulatan usahay nagahisgot ug mga butang nga gihimo o gipahinabo sa Diyos nga iyang gitugotan lamang. (Ruth 1:20, 21; itandi ang Ecclesiastes 11:5.) Apan “ang Diyos dili arang masulayan ug daotan ug walay bisan kinsa nga iyang pagatintalon,” misulat ang tinun-ang Santiago. (Santiago 1:13) Busa, dili gayod nato basolon ang atong langitnong Amahan sa mga tintasyon ug mga pagsulay uban sa daotang mga butang, kay si Satanas mao ang Maninintal kinsa naningkamot sa pagmaniobra kanato nga makasala batok sa Diyos.—Mateo 4:3; 1 Tesalonica 3:5.
19. Unsaon nato sa pag-ampo bahin sa pagsulay?
19 Pinaagi sa hangyo, “Ayaw kami itugyan sa pagsulay,” kita sa ingon nagahangyo kang Jehova sa dili pagtugot kanato nga madaog kon kita pagasulayan o pugson sa pagsupak kaniya. Kita makapangamuyo sa atong Amahan nga tultolan kita sa atong mga lakang aron walay modangat kanato nga pagsulay nga grabe kaayo alang kanato. Niining bahina, si Pablo nagsulat: “Walay pagsulay nga moabot kaninyo nga dili maantos sa mga tawo. Apan ang Diyos kasaligan, ug dili niya itugot nga kamo pagasulayan nga labaw sa inyong maarangan, apan uban sa pagsulay siya motagana usab ug lutsanan sa paglikay aron kamo makaantos niini.” (1 Corinto 10:13) Kita makaampo nga si Jehova motultol kanato aron nga kita dili pagasulayan nga labaw kay sa atong maantos ug nga siya motagana ug paagi sa pag-ikyas kon kita hilabihan nga naguol. Ang mga pagsulay maoy gikan sa Yawa, sa atong makasasalang unod, ug sa mga kahuyangan sa uban, apan ang atong mahigugmaong Amahan makagiya kanato aron nga kita dili madaog.
20. Nganong mag-ampo alang sa kaluwasan gikan sa “daotang usa”?
20 “Apan luwasa kami gikan sa daotang usa.” (Mateo 6:13) Ang Diyos sa pagkatinuod makasanta kang Satanas, “ang daotang usa,” gikan sa pagbuntog kanato. (2 Pedro 2:9) Ug wala pa sukad nga adunay mas dako nga panginahanglag kaluwasan gikan sa Yawa kay sa karon, tungod kay ‘siya adunay dakong kasuko, nga nahibalo nga hamubo na lamang ang iyang panahon.’ (Pinadayag 12:12) Kita dili ignorante sa mga laraw ni Satanas, ug siya nahibalo usab sa atong mga kahuyangan. Busa, kita angayng moampo nga ipahilayo kita ni Jehova gikan sa mga kuko sa samag-liyon nga Kaaway. (2 Corinto 2:11; 1 Pedro 5:8, 9; itandi ang Salmo 141:8, 9.) Pananglitan, kon kita gustong magminyo, kita makahangyo kang Jehova nga ilikay kita gikan sa mga laraw ni Satanas ug sa pagsulay nga makaugmad ug kalibotanong mga relasyon nga motultol ngadto sa imoralidad o sa paglapas sa Diyos pinaagi sa pakigminyo ug dili-magtutuo. (Deuteronomio 7:3, 4; 1 Corinto 7:39) Kita ba nangandoy ug mga bahandi? Nan ang pag-ampo tingali gikinahanglan aron matabangan kita nga makasukol sa mga pagsulay sa pagsugal o paglimbong. Maikagong modaot sa atong relasyon kang Jehova, si Satanas mogamit ug bisan unsang hinagiban diha sa iyang mga armas sa mga pagsulay. Busa hinaot nga kita padayong moampo sa atong langitnong Amahan, kinsa dili gayod motalikod sa matarong diha sa pagsulay ug kinsa nagataganag kaluwasan gikan sa daotan.
Pag-ampo Magatukod sa Pagtuo ug Paglaom
21. Sa unsang paagi kita nakabenepisyo gikan sa pag-ampo alang sa Gingharian?
21 Ang atong langitnong Amahan, kinsa nagaluwas kanato gikan sa daotang usa, malipay sa paghatag panalangin kanato nga madagayaon. Apan, nganong siya sa dugay na nga panahon nagtugot sa iyang minahal nga katawhan sa pag-ampo, “Paanhia ang imong gingharian”? Buweno, sulod sa daghang katuigan, ang pag-ampo niining paagiha nagapauswag sa atong tinguha ug pagpabili sa Gingharian. Kana nga pag-ampo nagapahinumdom kanato sa dakong panginahanglan alang niining mabination langitnong kagamhanan. Kini usab nagabutang diha sa atong atubangan sa paglaom sa kinabuhi ilalom sa pagmando sa Gingharian.—Pinadayag 21:1-5.
22. Unsang tinamdan ang angay natong huptan kanunay bahin sa pag-ampo ngadto sa atong langitnong Amahan, si Jehova?
22 Ang pag-ampo sa walay-duhaduha nagatukod ug pagtuo diha kang Jehova. Ang atong bugkos uban kaniya molig-on sa dihang iyang tubagon ang atong mga pag-ampo. Busa, dili gayod nato tugotang matak-an kita sa pagdangop kaniya sa adlaw-adlaw uban ang pagdayeg, pagpasalamat, ug pangamuyo. Ug hinaot nga kita magmapasalamaton alang sa matinabangong tubag ni Jesus sa hangyo sa iyang mga tinun-an: “Ginoo, tudloi kami sa pag-ampo.”
Nakahinumdom Ka Ba?
◻ Unsang mga pagtulon-an ang atong makat-onan gikan sa mga pulong ni Jesus ug panig-ingnan ingong usa ka tawo sa pag-ampo?
◻ Alang sa unsa nga kita moampo maylabot sa atong langitnong Amahan ug sa iyang ngalan?
◻ Unsay atong gihangyo sa dihang kita moampo nga moanhi ang Gingharian ug matuman ang iyang kabubut-on dinhi sa yuta?
◻ Atong gihangyo ang unsa sa dihang mag-ampo alang sa atong kalan-on sa matag adlaw?
◻ Unsay kahulogan sa dihang kita moampo alang sa kapasayloan sa atong mga utang?
◻ Nganong hinungdanon nga moampo bahin sa pagsulay ug kaluwasan gikan kang Satanas, ang daotang usa?
[Hulagway sa panid 16]
Ang mga tinun-an ni Jesus naghangyo kaniya nga tudloan sila kon unsaon sa pag-ampo. Nahibalo ka ba kon sa unsang paagi kita makabenepisyo gikan sa iyang mga instruksiyon bahin sa pag-ampo?