Bantayi ang Inyong Pagbati sa Pagkadinalian

UNSA ang usa ka segurado, inuyonan-sa-Diyos nga paagi sa pagpadayong mag-alagad kang Jehova nga tibuok-kalag? Mao ang pagbaton ug tinuod nga pagbati sa pagkadinalian diha sa kailadman sa atong mga kasingkasing. Ang pag-alagad sa Diyos sa tibuok-kalag nga paagi nagkahulogan nga alagaron siya uban ang tibuok natong pagkatawo, ug kini nagkinahanglag malugoton, bug-os nga pagkamasinundanon sa tanang gipabuhat niya kanato.

Ang propetang si Moises nagpasiugda niining panginahanglana sa dihang gisugo niya ang nasod sa Israel: “Higugmaon mo gayod si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog.” (Deuteronomio 6:5) Mga siglo sa ulahi ang samang sugo gisubli ni Kristo Jesus: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Si apostol Pablo nagtumong niining samang kinahanglanon sa dihang iyang giingnan ang mga taga-Efeso sa pagbuhat “sa kabubut-on sa Diyos nga tibuok-kalag,” ug sa dihang iyang giawhag ang mga taga-Colosas: “Bisan unsa man ang inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.”​—Efeso 6:6; Colosas 3:23.

Hinunoa, lisod ang pagbutang sa atong kasingkasing ug kalag diha sa atong pag-alagad sa Diyos kon wala kitay pagbati sa pagkadinalian sa atong kahiladman o kon ang pagbati sa pagkadinalian nga atong nabatonan kanhi nabugnaw na​—tingali bug-os nga nahanaw. Karong adlawa, nagkinabuhi kita sa panahon sa pagkadinalian nga wala hitupngi sa bisan unsang yugto sa kasaysayan sa tawo.

Tinong mga Yugto sa Pagkadinalian

Sa una-Kristohanong kapanahonan dihay daghang yugto sa pagkadinalian. Ang adlaw ni Noe ug ang yugto nga mitultol ngadto sa kalaglagan sa Sodoma ug Gomora tinong maoy mga panahon sa tinuod nga pagkadinalian. (2 Pedro 2:5, 6; Judas 7) Ang una-Lunop nga katuigan sa walay duhaduha natugob sa dinaliang kalihokan. Bisan tuod si Noe ug ang iyang pamilya wala masayod sa tukma kon kanus-a magsugod ang Lunop, ang ilang “diyosnong kahadlok” maoy nagseguro nga wala sila maglangaylangay.​—Hebreohanon 11:7.

Sa susama, una pa sa kalaglagan sa Sodoma ug Gomora, ang mga manulonda “nagpadali kang Lot” ug nag-ingon kaniya: “Kalagiw alang sa imong kalag!” (Genesis 19:15, 17) Oo, niadtong panahona usab, ang pagkadinalian nagluwas sa matarong nga mga kinabuhi. Kasiglohan sa ulahi ang Hudiyong mga bihag sa Babilonya giawhag: “Pahilayo kamo, pahilayo kamo, gumula kamo gikan dinha, ayaw paghikap ug butang nga mahugaw; gumula kamo sa iyang taliwala.” (Isaias 52:11) Sa 537 W.K.P., mga 200,000 ka destiyero ang nagdali paggawas sa Babilonya ingong pagsugot nianang dinaliang matagnaong sugo.

Ang pagbati sa pagkadinalian sa matag usa nianang mga kahimtanga misangpot sa tibuok-kalag nga pag-alagad niadtong mibati ug naghupot nga buhi sa hugot nga pagtuo nga sila nagpuyo sa dinaliang kapanahonan.

Pagkadinalian sa Kristohanong Kapanahonan

Ang panginahanglan sa pagkadinalian balikbalik nga gihisgotan sa tibuok nga Kristohanong Gregong Kasulatan. “Padayong magtan-aw,” “padayong magtukaw,” “padayong magbantay,” “pamatud-i ang inyong kaugalingon nga andam”​—kining tanan maoy mga pahayag nga gigamit ni Kristo Jesus sa pagpatisok ug hustong pagbati sa pagkadinalian sa iyang mga sumusunod. (Mateo 24:42-44; Marcos 13:32-37) Dugang pa, ang iyang mga ilustrasyon mahitungod sa napulo ka ulay, sa daotang ulipon, sa mga talanton, ug sa paglain sa mga karnero gikan sa mga kanding ngatanan nag-awhag ug pagpaabot ug nagpatungha ug pagbati sa pagkadinalian.​—Mateo 25:1, 14, 15, 32, 33.

Dili lang kay naghisgot si Jesus mahitungod sa pagkadinalian kondili gipaluyohan usab niya ang katinuoran sa iyang mga pulong pinaagi sa pagbuhat nga may pagkadinalian. Sa usa ka higayon giingnan niya ang mga panon sa dihang gisulayan nilang hawiran siya: “Usab ngadto sa ubang siyudad kinahanglan kong ipahayag ang maayong balita sa gingharian sa Diyos, tungod kay alang niini ako gipadala.” (Lucas 4:42, 43) Dugang pa, gidasig niya ang iyang mga tinun-an nga mangamuyo sa Agalon sa alanihon nga magpadalag dugang mamumuo ngadto sa Iyang alanihon tungod kay “dako ang anihon, apan diyutay ang mga mamumuo.” (Mateo 9:37, 38) Ang maong mainampoong pangamuyo sa Diyos sa pagkatinuod nagpahayag ug espiritu sa pagkadinalian.

Ang Mao Bang Pagkadinalian Wala sa Lugar?

Ang pipila tingali mopatungha sa makataronganong pangutana, Nganong ang pagbati sa pagkadinalian gikinahanglan niadtong panahona kon ang gitagna nga “dakong kasakitan” maoy kasiglohan pa una moabot?​—Mateo 24:21.

Makatino kita nga dili kadto usa lang ka lansis nga gigamit ni Jesus aron padayong magmapuliki ang iyang mga sumusunod sa pagsangyaw ug pagpanudlo nga buluhaton. Dili, ang gugma ni Kristo sa iyang mga tinun-an, maingon man ang iyang hingpit nga pagsabot sa panglantaw ni Jehova sa panahon, mao ang pasikaranan sa iyang tambag bahin sa pagkadinalian. Oo, si Kristo Jesus nasayod nga ang espiritu sa pagkadinalian gikinahanglan sa pagtuman sa kabubut-on ni Jehova sumala sa katuyoan sa Diyos. Dugang pa, nasayod siya nga ang iyang mga tinun-an makabenepisyo mismo sa espirituwal nga paagi pinaagi sa paghupot ug pagbati sa pagkadinalian hangtod sa iyang pagbalik.

Si Jesu-Kristo tin-awng nagpakita nga dihay tibuok-kalibotang pagsangyawng buluhaton nga tumanon sa limitadong panahon. (Mateo 24:14; Marcos 13:10) Ang nag-uswag nga mga ang-ang niining maong asaynment gibutyag lamang samtang ang buluhaton napadayag. Apan ang pagkadinalian gikinahanglan sa pagtuman sa matag ang-ang. Gipakita ni Jesus ang pag-uswag sa iyang asaynment sa dihang miingon siya: “Kamo mahimong mga saksi nako sa Jerusalem ug sa tibuok Judea ug Samaria ug ngadto sa kinalay-ang dapit sa yuta.” (Buhat 1:8) Ug mao kanay paagi nga ang asaynment gipadayag hangtod sa atong panahon. Nagkahulogan kinig pipila ka sorpresa alang sa mga alagad sa Diyos sa paglabay sa panahon, nga nagkinahanglan usahay ug mga kausaban sa pagsabot sa kapanahonan.

Ang Kristohanong pagbati sa pagkadinalian nag-alagad sa katuyoan ni Jehova. Nakatabang kini sa mga tinun-an ni Kristo sa pagtuman sa pag-uswag sa ilang asaynment sumala sa dili-masayop nga eskedyul ni Jehova. Ug busa karong adlawa, sa paghinumdom sa duolan sa 2,000 ka tuig nga milabay, mas bug-os pa natong nasabtan ang balaang eskedyul.

Ang Kristohanong pagkadinalian nakatabang sa mga tinun-an sa paghatag ug bug-os nga pamatuod sa Jerusalem, Judea, Samaria, ug ngadto sa nagkatibulaag nga mga Hudiyo una pa sa 36 K.P. sa dihang ang linaing pabor ngadto sa Israel natapos. (Daniel 9:27; Buhat 2:46, 47) Sa susama, ang Kristohanong pagkadinalian nakaabag sa sayong kongregasyon sa paghatag ug tin-awng pasidaan sa tanang Hudiyo nga sa dili madugay ang ilang sistema matapos. (Lucas 19:43, 44; Colosas 1:5, 6, 23) Ug human kadto kalit nga natapos sa 70 K.P., ang pagkadinalian nakatabang sa unang-siglong mga saksi ni Kristo sa pagpahayag sa langitnong paglaom ngadto sa daghan una pa ang gitagnang apostasiya mopakanap sa makamatay niining kangitngit. (2 Tesalonica 2:3; 2 Timoteo 4:2) Unya, latas sa kasiglohan sa Mangiob nga Katuigan, ang diyutayng samag-trigo nga mga Kristohanon naghupot nga buhi sa paglaom sa Gingharian, sumala sa gitagna ni Kristo Jesus. (Mateo 13:28-30) Sa kataposan, sa iyang gitakdang panahon, si Jehova nagpatindog ug madasigon, modernong-adlaw nga kongregasyon, nga giaghat sa iyang dinaliang mensahe sa paghukom alang niadtong nagkinabuhi niining kataposang kaliwatan.​—Mateo 24:34.

Sama kang Daniel sa karaang kapanahonan, ang matinumanong modernong-adlaw nga mga Saksi sa Diyos dili gayod mangahas sa pagsudya kang Jehova, sa pagpangutana kaniya: “Unsa bay imong ginabuhat?” (Daniel 4:35) Sila masaligon nga si Jehova tukmang nasayod kon unsay gikinahanglan aron matapos ang iyang buluhaton sumala sa eskedyul. Busa inay magduhaduha sa paagi ni Jehova sa paghikay sa mga butang, sila malipayon nga ang Diyos naghatag kanila ug kahigayonan nga mobuhat duyog kaniya niining hinungdanong mga panahon.​—1 Corinto 3:9.

Dugang Pagdasig sa Pagkadinalian

Ang laing katarongan sa pagkadinalian mao ang kakulang nato sa katakos sa pagtino sa eksaktong adlaw ug oras sa kalit nga pagbuto sa dakong kasakitan. Si Kristo Jesus nagtino nga walay tawo dinhi sa yuta nga nasayod sa gitino nang daan nga adlaw ug oras sa pagsugod nianang hinungdanong hitabo. (Mateo 24:36) Sa laing higayon giingnan niya ang iyang mahinamong mga apostol: “Dili inyoha ang pagbatog kahibalo sa mga panahon o mga yugto sa panahon nga gikabutang sa Amahan sa iyang kaugalingong kamandoan.” (Buhat 1:7) Oo, tin-aw ang sangpotanan, apan dili kita angayng masayod sa tanang detalye.

Si apostol Pablo may hustong tinamdan sa pagkadinalian. Lagmit diha sa iyang hunahuna ang mga pulong ni Jesus sa dihang misulat siya sa mga taga-Tesalonica mahitungod sa presensiya ni Kristo: “Karon kon bahin sa mga panahon ug sa mga yugto-sa-panahon, mga igsoon, kamo wala na magkinahanglan ug unsa man nga isulat kaninyo.” (1 Tesalonica 5:1) Siya misulat niining sulata mga 17 ka tuig human si Jesus miingon: “Kamo mahimong mga saksi nako . . . ngadto sa kinalay-ang dapit sa yuta.” (Buhat 1:8) Niadtong panahona walay ikadugang pagsulat tungod kay walay dugang nga gipadayag. Bisan pa niana sila makasalig nga ang adlaw ni Jehova tinong moabot “sama sa usa ka kawatan diha sa kagabhion” sa dihang ang mga Kristohanon dinalian pa gihapong magsangyaw.​—1 Tesalonica 5:2.

Lagmit dili maghunahuna ang unang-siglong mga Kristohanon nga ang adlaw ni Jehova maoy kasiglohan pa una moabot, kon diha sa ilang hunahuna kining mga pulonga. Tinuod, sila nahibalo sa mga sambingay ni Jesus mahitungod sa hari nga mipanaw sa usa ka layong yuta ug mahitungod sa tawo nga milangyaw. Sila nasayod, usab, nga ang mga sambingay nagpakita nga ang hari mobalik “sa kataposan” ug ang biyahedor “human sa hataas nga panahon.” Apan sa walay duhaduha nalibog sila sa mga pangutana sama sa, Kanus-a ang “sa kataposan”? Ug unsay kahulogan sa “human sa hataas nga panahon”? Napulo ka tuig? Kawhaan ka tuig? Kalim-an ka tuig? O mas dugay pa? (Lucas 19:12, 15; Mateo 25:14, 19) Ang mga pulong ni Jesus padayong molanog sa ilang mga dalunggan: “Kamo usab, magpabiling andam, tungod kay sa takna nga wala ninyo hunahunaang lagmit mao, ang Anak sa tawo moabot.”​—Lucas 12:40.

Positibong Epekto sa Pagkadinalian

Oo, ang gipalihok-sa-Diyos nga pagbati sa pagkadinalian adunay kahibulongan makapadasig nga epekto diha sa unang-siglong mga Kristohanon, nga nagtabang kanila nga magpabiling puliki sa hinungdanon-sa-tanan nga buluhatong pagsangyaw ug pagpanudlo. Kini padayong nagdasig kanato karong adlawa sa daghang paagi. Kini nagpugong kanato nga mahimong tigtagbaw-sa-kaugalingon o ‘kapoyon sa pagbuhat ug maayo.’ (Galacia 6:9, King James Version) Kini manalipod kanato sa hilabihang pagkalangkit sa kalibotan ug sa malimbongon niining materyalismo. Kini magpatumong sa atong hunahuna diha sa “tinuod nga kinabuhi.” (1 Timoteo 6:19) Ang Ginoong Jesus nag-ingon nga ang iyang mga tinun-an mahisama sa “mga karnero taliwala sa mga lobo,” ug siya nasayod nga kinahanglang kita maghupot ug determinado, tinong panglantaw aron mapakigbisogan ang kalibotan. Oo, kita gibantayan, gipanalipdan sa atong Kristohanong pagbati sa pagkadinalian.​—Mateo 10:16.

Si Jehova nga Diyos sa iyang walay-kinutobang kaalam kanunayng naghatag sa iyang mga alagad ug igong impormasyon aron huptan nilang buhi ang ilang pagbati sa pagkadinalian. Maluloton siyang nagpasalig kanato nga kita ania sa “kataposang mga adlaw” niining dunot nga sistema sa mga butang. (2 Timoteo 3:1) Kita padayong gipahinumdoman nga kinahanglan kitang mosidlak ingong mga kahayag hangtod nga ang kaliwatan diin kita nagkinabuhi mahanaw sa dakong kasakitan, nga ang kinatayuktokan niini maoy sa Har–Magedon.​—Filipos 2:15; Pinadayag 7:14; 16:14, 16.

Oo, ang diyosnong pagbati sa pagkadinalian maoy hinungdanong bahin sa tibuok-kalag nga pag-alagad kang Jehova. Kini magsalikway ug motabang sa pagpakgang sa mga paningkamot sa Yawa nga ipahinabong ang mga alagad sa Diyos “kapoyan ug mangaluya ang [ilang] mga kalag.” (Hebreohanon 12:3) Hangtod sa hangtod, ang tibuok-kalag nga debosyon magpahinabo sa mga alagad ni Jehova nga tumanon siya, apan karon, niining una-Armageddon nga mga adlaw, ang usa ka dulot, tinuod nga pagbati sa pagkadinalian maoy importanteng bahin sa tibuok-kalag nga debosyon.

Hinaot nga si Jehova nga atong Diyos motabang kanatong tanan sa pagbantay sa atong pagbati sa pagkadinalian samtang kita padayong nagasubli sa mga pulong ni apostol Juan: “Amen! Umari ka, Ginoong Jesus.”​—Pinadayag 22:20.