Ang Paagi sa Paggamit sa “Nangatarongan Pinasukad sa Kasulatan”
Ang sumbanang pagasundon sa pagtabang sa uban aron masabtan ang Bibliya gitagana ni Jesu-Kristo ug sa iyang mga apostol. Sa pagtubag sa mga pangutana, si Jesus mikutlog mga kasulatan ug may panahong migamit ug tukma nga mga ilustrasyon sa pag-abag sa mabuot-kasingkasing nga mga tawo nga magmadinawaton sa ginasulti sa Bibliya. (Mat. 12:1-12) Gihimong batasan ni apostol Pablo ang ‘pagpangatarongan pinasukad sa Kasulatan, nga nagpatin-aw ug nagpamatuod pinaagig mga reperensiya’ kon unsa ang iyang gitudlo. (Buh. 17:2, 3) Ang materyal nga ania niining basahona makabulig kanimo sa pagbuhat nga sama niana.
Inay kay itagana ang masangkaron, kasagarang pagkobre sa kada ulohan, ang Nangatarongan Pinasukad sa Kasulatan nagapunting ug dakong pagtagad sa mga suliran nga karong ginasukna sa daghang tawo.
Kining basahona wala andama sa katuyoan nga abagan ang usa aron “makadaog sa mga lantugi” uban sa mga tawo nga walay pagtahod sa kamatuoran. Hinunoa, nagatagana kinig bililhong impormasyon nga ang tuyo mao nga magamit sa pagpangatarongan uban sa mga tawo nga motugot kanimong mopatin-aw. Ang pipila kanila hayan mangutana nga gusto gayod nila ang makapatagbawng mga tubag. Ang uban, sa panahon sa panaghisgot, basin isulti lang nila ang ila mismong mga pagtulon-an ug ibungat nila kana nga may hugot nga pagtuo. Pero sila ba makataronganong mga tawo kinsa mahinangop sa pagpaminaw sa panghunahuna sa uban? Kon mao, imong ikapaambit kanila ang ginaingon sa Bibliya, nga nagapatin-aw niana uban ang hugot nga pagtuo aron makakaplag kana ug maabiabihong pagsanong diha sa mga kasingkasing sa mga mahigugmaon sa kamatuoran.
Unsaon man nimo sa pagkaplag niining maong handbook ang tinong materyal nga imong gikinahanglan? Sagad makaplagan mo kanang dali kaayo pinaagig pagtan-aw diretso sa lintunganayng ulohan nga nagrepresentar sa ulohan nga ginahisgotan. Ubos sa tanang lintunganayng mga ulohan, ang dagkong mga pangutana madali nga ikabulag; kini gipatik nga tataw kaayo nga misangkad paingon sa walang kiliran. Kon dili mo dayon makita ang imong gikinahanglan, tan-awa ang Indise sa likod sa maong libro.
Makaayo kanunay ang abanteng pagpangandam alang sa panaghisgot. Apan kon dili pa ikaw sinati sa tinong mga bahin sa maong basahon, sa gihapon imong magamit kana ug maayo. Sa unsang paagi? Sa makita na nimo ang pangutana nga labing duol nga mahaom sa punto nga gusto mong hisgotan, tan-awa ang bisan unsang mga sub-ulohan ubos niana. Kining maong mga sub-ulohan gipatik sa tataw nga italiko ug adunay kal-ang ubos sa mga pangutana nga kini adunay kalabotan. Kon aduna ka na ing pipila ka kahibalo sa maong ulohan, ang usa ka pagsubli sa maong mga sub-ulohan ug daling pagtan-aw sa pipila ka puntos ubos niana mahimong mao ra ang gikinahanglan mo, sanglit kay kini naglaraw man ug makabulig nga pangatarongan nga mahimong magamit. Ayawg pagduhaduha nga isulti ang mga ideya diha sa imong kaugalingong mga pulong.
Gibati mo bang dugang pa ang imong gikinahanglan—hayan ang aktuwal nga mga teksto, ang pangatarongan nga gamiton maylabot sa maong mga teksto, pipila ka ilustrasyon sa pagbulig kanimo nga mahimong matin-aw ang pagkamakataronganon sa ginaingon sa Bibliya, ug uban pa? Kon mao, basin gusto mo nga ipakita sa tawo nga imong gikasulti kon unsa ang imong punto nga anaa sa maong basahon ug dayon duyog nga basahon ang bahin nga nagahisgot sa suliran nga iyang gipatungha. Bisan pa kon wala ka makatuon nga abante sa maong materyal, imong magamit kini sa paghatag ug makatagbawng tubag. Ang tanan ania dinhi niining libroha, nga yanong pagkahisgot ug sa minubo.
Ibutang sa hunahuna nga kining basahona maoy tabang lamang. Ang Bibliya mao ang awtoridad. Mao kanay Pulong sa Diyos. Kon ang mga pangutlo sa libro gikuha gikan sa Bibliya, isilsil kining puntoha kanila nga imong gikasulti. Kon posible, hangyoa sila nga kuhaon ang ilang Bibliya ug tan-awon ang mga kasulatan aron ilang makita nga ang imong ginasulti anaa gayod sa ilang kaugalingong kopya sa Kasulatan. Kon ang pipila ka iladong gigamit nga mga hubad sa Bibliya naghubad sa yawing mga bahin sa pipila ka teksto diha sa laing paagi, ang pagtagad niini sagad gibutyag, ug ang mga hubad gikan sa lainlaing mga hubad gitagana alang sa pagtandi.
Uyon sa panig-ingnan nga gipahimutang sa apostol nga si Pablo sa pagtumong sa halaran “Ngadto sa Diyos nga Wala Hiilhi” ug sa pagkutlo sa pipila kasagarang dinawat nga mga tinubdan sa dihang nagsangyaw ngadto sa mga taga-Atenas (Buh. 17:22-28), kining basahona limitado ra ang paggamit sa mga pangutlo gikan sa kalibotanong kasaysayan, mga ensiklopediya, relihiyosong reperensiyang mga basahon, ug Bibliya-linguwahe nga mga diksiyonaryo. Busa, inay kay mohimog mga paglaban bahin sa sinugdanan sa bakak relihiyosong mga buhat, ang kaugmaran sa pipila ka doktrina, ug ang mga kahulogan sa Hebreo ug Gregong mga termino, ang maong basahon nagapakita sa mga rason sa mga pahayag nga gihimo. Apan, kana nagapatagad ngadto sa Bibliya ingong mao ang pasukaranang tinubdan sa kamatuoran.
Ingong dugang mga tabang sa pagbukas sa dalan aron ipaambit ang kamatuoran sa uban, ang unang mga seksyon niining basahona nagtagana ug talaan sa “Mga Pasiuna nga Gamiton sa Ministeryo sa Kanataran” ug usa ka hugpong sa mga sugyot maylabot sa “Kon Unsaon Nimo Pagtubag ang Lagmit mga Tigsumpo sa Panaghisgot.” Daghang ubang lagmit nga “mga tigsumpo sa panaghisgot” may kalabotan sa tino nga mga pagtulon-an, ug kini gitagad diha sa kataposan sa kada usa sa lintunganayng mga bahin nga naghisgot sa maong mga pagtulon-an. Dili maoy tumong nga imong sag-ulohon kining mga tubaga, pero sa walay duhaduha imong makaplagan nga kini makatabang sa pag-analisar kon nganong nakaplagan sa uban nga kini epektibo; dayon isulti ang ideya diha sa imong kaugalingong mga pulong.
Ang paggamit niini nga handbook makaabag kanimo sa pag-ugmad sa katakos sa pagpangatarongan gikan sa Kasulatan ug sa paggamit niana nga epektibo sa pagbulig sa uban nga makakat-on maylabot sa “kahibulongang mga butang sa Diyos.”—Buh. 2:11.