Ang Kahinlo Nagapasidungog Kang Jehova
1 Sa dihang ang Israelinhong nahibilin mipauli gikan sa pagkabihag sa Babilonya, sila gisugo: “Pagpabilin kamong hinlo, kamo nga nagdala sa mga galamiton ni Jehova.” (Isa. 52:11) Sanglit kita karon gisaligan sa sagradong buluhaton sa pagmantala sa maayong balita, kita usab nagtinguha sa pagpasidungog kang Jehova pinaagi sa paghupot sa atong kaugalingon, sa atong mga puy-anan, ug sa atong mga Kingdom Hall nga hinlo ug presentable.
2 Diha sa Ministeryo: Sa dihang nag-alagad sa kanataran, ang ato bang panapot, bag sa libro, ug personal nga pamostura hinlo ug presentable, nga dili makapangdol? Mapasidunggan si Jehova kon atong huptan ang atong kaugalingon ug atong panapot nga hinlo pinaagig regular nga pagkaligo ug paglaba. Maayong susihon usab ang atong Bibliya ug mga libro nga regular natong gigamit aron maseguro nga kini dili guba ug hugaw tan-awon. Samtang ang katawhan ni Jehova ingong usa ka grupo nailhan ingong hinlo, bisan pa niana maayo alang sa matag usa kanato nga susihon ang atong kaugalingon niining bahina.
3 Diha sa Atong mga Puy-anan: Komosta ang hitsura sa atong puy-anan? Kini ba makadaot sa mensahe sa Gingharian nga atong gidala? Kon ang atong balay dili hapsay ug ang palibot nagkalamukat, di ba ang uban magduhaduha sa atong katim-os sa dihang kita mosulti bahin sa paghimo sa yuta ngadto sa usa ka paraiso? Kon mao, kini ba ikaingon nga atong naugmad ang “mga panig-ingnan sa kahinlo nga mahatukma sa bag-ong kalibotan ubos sa Gingharian sa Diyos”?—om-CV mga panid 130-1.
4 Diha sa Atong Kingdom Hall: Kasagaran kita maikagon sa pagdapit sa bag-ong interesadong mga tawo sa pagduaw sa atong Kingdom Hall. Kini ilabinang tinuod sa dihang ang Kingdom Hall madanihon ug hinlo, sa sulod ug sa gawas. Ang pagmentinar ug propiedad diha sa hinlong kahimtang nagkinahanglag paningkamot. Tan-awa ug libot ang inyong tigomanan. Ang mga bangko, salog, ug mga bungbong hinlo ba? Ang mga kasilyas hinlo ba ug dili baho? Komosta ang karatula sa Kingdom Hall? Kasagaran kini ang unang butang nga mamatikdan sa mga tawo, mao nga angayng huptan kining napintalan ug hinlo.
5 Nga walay sultisulti, kita makahimaya sa Diyos pinaagi sa atong personal nga panagway ug sa kahinlo sa atong mga puy-anan ug mga Kingdom Hall. Ang atong maayong panig-ingnan dili maghatag ug bisan unsang hinungdan sa pagkapangdol kondili maghatag ug pamatuod nga ang atong pagsimba mahinlo ug matarong.—1 Cor. 10:31, 32; Sant. 1:27.