Ang Uban Nag-agad Kanimo

¹ “Ang mata dili makaingon ngadto sa kamot: ‘Wala ako magkinahanglan kanimo.’” Kon ingon niini, unsay magpanalipod sa mata gikan sa kapeligrohan? Mao nga gigamit ni apostol Pablo ang tawhanong lawas uban sa lainlaing mga sangkap niini aron sa pag-ilustrar sa kamatuoran nga kitang tanan nag-agad sa usag usa diha sa kongregasyon. Misulat pa gani siya nga “ang mga sangkap sa lawas nga ginaisip nga mahuyang maoy kinahanglanon.” Oo, kita nag-agad sa uban ug ang uban nag-agad kanato, nga nakabaton ug “samang pagtagad alang sa usag usa” tungod kay “kita mga sangkap nga iya sa usag usa.” (1 Cor. 12:​21-27; Efe. 4:25) Paghunahuna sa pipila ka paagi nga ang imong kalihokan mag-apektar sa uban.

² Diha sa Pamilya: Ang mga bana ug asawa maglig-onay sa usag usa pinaagi sa pagtuo, determinasyon, ug kasibot nga ilang gipasundayag, nga nag-una kanunay sa ilang espirituwal nga mga tumong. Mao man usab, ang tinamdan ug ang panig-ingnan sa mga ginikanan makaimpluwensiya ug dako kon sa unsang paagi lantawon ug makig-ambit ang ilang mga anak sa ministeryo ug Kristohanong mga tigom.​—Jos. 24:15.

³ Diha sa Ministeryo: Ang imong kadasig sa pagsangyaw sa maayong balita sa Gingharian magdasig sa mga isigkamagmamantala sa pagpanlimbasog sa ilang kaugalingon diha sa ministeryo. Ang imong panig-ingnan hinungdanon kaayo, sama sa personal nga tabang nga imong ihatag sa uban nga makig-ambit sa pag-alagad. (2 Tes. 3:9) Dayag nga pabilhan sa mga payunir ang bisan unsang panag-ubanay nga ikatagana nimo kanila diha sa ministeryo. Siyempre, ang interesadong mga tawo nga imong nahimamat sa kanataran magdahom kanimo nga mobalik ug motabang kanila sa pagkaplag sa dalan ngadto sa kinabuhi. Dili nimo buot sila nga mahigawad.

⁴ Diha sa Kongregasyon: Ang imong pagtambong ug pagpakig-ambit sa mga tigom sa kongregasyon maoy tuboran sa tinuod nga pagdasig sa imong mga igsoong lalaki ug babaye. Kon ikaw mapakyas sa pagtambong, dili ikaw ra ang dili makakuhag kaayohan. Ang uban dili makakuhag mga kaayohan gikan sa imong presensiya sa mga tigom. Ang mga ansiyano tinong nag-agad kanimo, sama gayod nga ikaw nag-agad kanila. Ang imong positibong tinamdan ug kinabubut-ong pagpaluyo magpalambo sa ilang buluhaton sa pagbantay sa panon.

⁵ Pinaagi sa pulong ug buhat, atong ‘dasigon ang usag usa sa paghigugma ug sa maayong mga buhat.’ (Heb. 10:24) Si Jehova magpanalangin kanato tungod sa atong pagkakasaligan ug pagkamatinumanon.