Leksiyon 7
Pagpaduol sa Diyos Pinaagi sa Pag-ampo
Nganong hinungdanon nga mag-ampo nga regular? (1)
Kang kinsa kita angayng moampo, ug sa unsang paagi? (2, 3)
Unsa ang angayng mga ulohan sa pag-ampo? (4)
Kanus-a ka angayng mag-ampo? (5, 6)
Mamati ba ang Diyos sa tanang pag-ampo? (7)
1. Ang pag-ampo maoy mapainubsanong pagpakigsulti sa Diyos. Angay kang mag-ampo nga regular ngadto sa Diyos. Sa ingon mahimong bation nimo ang pagkasuod kaniya sama sa usa ka minahal nga higala. Si Jehova maoy dako ug gamhanan kaayo, apan siya mamati sa atong mga pag-ampo! Regular ka bang nag-ampo ngadto sa Diyos?—Salmo 65:2; 1 Tesalonica 5:17.
2. Ang pag-ampo maoy bahin sa atong pagsimba. Busa, angay nga kita moampo ngadto lamang sa Diyos, si Jehova. Sa dihang si Jesus dinhi sa yuta, siya kanunayng nag-ampo ngadto sa iyang Amahan, dili ngadto sa lain. Angay nga ato usab kanang buhaton. (Mateo 4:10; 6:9) Ugaling, ang tanan natong pag-ampo kinahanglang ipahayag sa ngalan ni Jesus. Nagpakita kining gitahod nato ang posisyon ni Jesus ug nga kita adunay pagtuo sa iyang halad lukat.—Juan 14:6; 1 Juan 2:1, 2.
3. Sa dihang kita magaampo angay nga kita makigsulti sa Diyos gikan sa atong kasingkasing. Dili angay nga sag-ulohon nato ang atong mga pag-ampo o basahon kana gikan sa usa ka basahon sa pag-ampo. (Mateo 6:7, 8) Makaampo kita sa bisan unsang matinahurong posisyon, sa bisan unsang oras, ug sa bisan unsang dapit. Ang Diyos makadungog bisan sa hilom nga mga pag-ampo nga gilitok diha sa atong kasingkasing. (1 Samuel 1:12, 13) Maayo nga makakaplag ug usa ka hilom nga dapit nga layo sa ubang mga tawo aron makalitok sa atong personal nga mga pag-ampo.—Marcos 1:35.
4. Unsang mga ulohan ang imong ikaampo? Bisan unsa nga mahimong mag-apektar sa imong pagpakighigala kaniya. (Filipos 4:6, 7) Ang sulundang pag-ampo nagpakita nga kita angay mag-ampo mahitungod sa ngalan ug katuyoan ni Jehova. Kita makahangyo usab nga ang atong materyal nga mga panginahanglan itagana, nga mapasaylo ang atong mga sala, ug tabangan sa pagsukol sa tentasyon. (Mateo 6:9-13) Ang atong mga pag-ampo angay nga dili mahakogon. Angay nga kita mag-ampo lamang alang sa mga butang nga nahiuyon sa kabubut-on sa Diyos.—1 Juan 5:14.
5. Ikaw makaampo sa dihang ang imong kasingkasing magpalihok kanimo sa pagpasalamat o sa pagdayeg sa Diyos. (1 Cronicas 29:10-13) Angay nga mag-ampo ka sa dihang ikaw adunay mga suliran ug ang imong pagtuo ginasulayan. (Salmo 55:22; 120:1) Haom ang pag-ampo sa dili ka pa mokaon sa imong mga pagkaon. (Mateo 14:19) Si Jehova nagdapit kanato nga mag-ampo “sa tanang higayon.”—Efeso 6:18.
6. Ilabina nga kinahanglang kita mag-ampo kon kita nakahimog seryosong sala. Sa maong mga panahon angayng mangaliyupo kita alang sa kaluoy ug pagpasaylo ni Jehova. Kon isugid nato ang atong mga sala ngadto kaniya ug buhaton ang atong labing maarangan nga dili kana usbon pagbuhat, ang Diyos “andam nga magpasaylo.”—Salmo 86:5; Proverbio 28:13.
7. Si Jehova mamati lamang sa mga pag-ampo sa mga tawong matarong. Aron pamation sa Diyos ang imong mga pag-ampo, kinahanglang maningkamot ka pag-ayo sa pagkinabuhi sumala sa iyang mga balaod. (Proverbio 15:29; 28:9) Kinahanglang mapainubsanon ka sa dihang ikaw nag-ampo. (Lucas 18:9-14) Kinahanglang magbuhat ka nga nahiuyon sa imong giampo. Sa ingon imong mapamatud-an nga ikaw adunay pagtuo ug tiunay gayod ang imong gipamulong. Nianang panahona lamang nga si Jehova mamati sa imong mga pag-ampo.—Hebreohanon 11:6.