“Mga Gasa nga mga Lalaki” nga Mahinangpong Nagabantay sa Panon sa Diyos
1 Pagkamahigugmaong tagana ang gihimo ni Jehova pinaagi sa iyang Anak sa pagtaganag “mga gasa nga mga lalaki”! (Efe. 4:8, 11, 12) Sila adunay daghang responsabilidad, nga naglakip sa aktibo ug mahinangpong pagbantay sa panon sa Diyos. (1 Ped. 5:2, 3) Kitang tanan makabenepisyo gikan niining gikinahanglan-pag-ayong tagana. Nakasinati man ang uban ug mga kalisdanan, bag-ong nakig-uban sa kongregasyon, adunay pipila ka kahuyangan, o nahisalaag, kining mga tawhana aduna gayoy personal nga interes sa espirituwal nga kaayohan sa tanan.—Filip. 2:4; 1 Tes. 5:12-14.
2 Sa dihang ang makapatugaw nga mga hitabo sa kalibotan makapahinabog kabalaka, kining mga luyoluyong mga magbalantay mapamatud-ang “sama sa usa ka tagoanang dapit gikan sa hangin ug usa ka salipdanang dapit gikan sa bagyo.” Sa dihang kita maluya o mabug-atan ug bation ang panginahanglan alang sa kahupayan, sila magpalagsik kanato, “sama sa mga sapa sa tubig sa usa ka walay-tubig nga yuta” o “sama sa landong sa usa ka dako kaayong bato sa usa ka umaw nga yuta.”—Isa. 32:2.
3 Pagdasig sa mga Di-aktibo: Ang mga ansiyano maghimog linaing paningkamot sa pagdasig niadtong nahimong di-regular o di-aktibo, nga magtabang kanila sa pagbalik ngadto sa regular nga pagpakig-ambit diha sa tanang kalihokan sa kongregasyon. Ang mahigugmaong mga pagduaw isip magbalantay nakatabang sa daghan sa pagtambong nga regular sa mga tigom sa kongregasyon ug napalig-on sa espirituwal hangtod sa punto nga sila nagpakig-ambit na usab diha sa ministeryo sa kanataran. Tanan sa maong mga paningkamot sa bahin sa mga ansiyano nagsumbalik-silaw sa mahigugmaong pag-atiman ni Jehova ug sa aktibong pagpanguna ni Jesu-Kristo. Siya naghatag ug sumbanan sa pagpakita sa maong kabalaka alang sa tanan niyang karnero nga tingali nahisalaag o nawala.—Mat. 18:12-14; Juan 10:16, 27-29.
4 Ang luyoluyong mga magbalantay mangitag mga timailhan nga magpaila sa dihang ang pipila mahimong mokupoy sa espirituwal. Si bisan kinsa nga nagpakitag mga timailhan sa pagkaluya, nahimong di-regular sa pagtambong sa mga tigom, o naghinayhinay sa pag-alagad sa kanataran lagmit nanginahanglan ug espirituwal nga tabang. Ang mga ansiyano mahinangop sa pagtabang kang bisan kinsa nga mosugod sa pagkiling ngadto sa kalibotanong panapot ug pamostura o kinsa nag-ugmad ug hinawayong tinamdan sa kongregasyon. Uban sa tiunayng interes ug malumong pagmahal, ang mabalak-ong mga magtatan-aw kinabubut-ong ‘magpaambit sa ilang kaugalingong mga kalag’ sa pagpaningkamot nga matabangan ang maong mga tawo nga mahaling pag-usab ang ilang gugma kang Jehova.—1 Tes. 2:8.
5 Sa miagi, ang pipila ka dedikadong mga Kristohanon wala nay kontak sa kongregasyon, nga naunlod ngadto sa pagkadi-aktibo sa espirituwal tungod kay sila nabug-atan sa mga problema sa panglawas, kausaban sa ekonomiya, o kabug-at sa pamilya. Nga dili magmahinawayon, ang mga ansiyano malulotong maghatag ug pasalig nga si Jehova nag-atiman sa tanan niyang karnero ug magpalig-on kanila latas sa malisod nga mga panahon. (Sal. 55:22; 1 Ped. 5:7) Ang igmat nga mga magbalantay sa panon makatabang kanila sa pagkaamgo nga kon sila ‘moduol sa Diyos, siya moduol kanila,’ nga magahupay ug magapalagsik.—Sant. 4:8; Sal. 23:3, 4.
6 Pagpabili sa mga May Kakulian: Ang luyoluyo nga mga magbalantay nahingawa usab niadtong mahimong mataligam-an. Nakig-uban sa matag kongregasyon mao ang pipila ka may kakulian, nagpuyo sa mga balay amomahan, o kaha baldado. Ang ilang pagpakig-ambit sa pagmantala sa mensahe sa Gingharian limitado kaayo tungod sa ilang mga sirkumstansiya. Tingali ang ilang kahigayonan sa pagpamatuod mahimong moabot pinaagi lamang sa mga bisita, ubang mga pasyente, o mga tig-atiman. Bisan pa niana, kon unsay maarangan nilang himoon giisip ingong bililhong amot ngadto sa katibuk-ang buluhaton sa pagwali. (Mat. 25:15) Bisan tuod makapamatuod lamang sila ug 15 minutos, angay gayod kining itaho, ug sila padayong isipon ingong regular nga mga magmamantala sa Gingharian.
7 Ang “mga gasa nga mga lalaki” nahibalo gayod sa espirituwal nga mga panginahanglan sa ilang mga igsoon niining panahona sa tuig—panahon sa Memoryal. Pagkamaayong panahon alang sa mga ansiyano nga mohimog linaing paningkamot sa pagtabang sa tanan nga nahisalaag sa pagsinati pag-usab sa kalipay ug kalinaw sa hunahuna nga moabot uban sa mainit nga pagpakig-uban diha sa kongregasyon! Kita nagmaya sa dihang makita nato ang maong mga tawo kinsa “atong kabanay sa pagtuo” nga presente sa mga tigom sa kongregasyon ug mopakig-ambit sa ministeryo, nga naglig-on pag-usab sa ilang pagtuo sa halad lukat.—Gal. 6:10; Luc. 15:4-7; Juan 10:11, 14.