Ang Pagtagbaw sa Panginahanglan ug mga Kingdom Hall
1 Diha sa 2002 Tinuig nga Basahon sa mga Saksi ni Jehova, mga panid 17-20, usa ka taho ang gihatag bahin sa bag-ong programa sa Sosyedad nga “magtukod ug Kingdom Hall alang sa mga nasod nga limitado ang kahinguhaan.” Nahibulong ka ba kon sa unsang paagi kining programaha magalihok dinhi sa Pilipinas? Pinaagi niini nga pasukip, ipasinati pa gayod namo kaninyo ang maong bag-ong kahikayan.
2 Ang bag-ong programa nagalihok sa tibuok kalibotan, nga sa pagkakaron nag-atiman sa mga panginahanglan sa atong mga igsoon diha sa 92 ka nasod diin linibo ka Kingdom Hall ang pagatukoron. Aron matagan-an ang maong panginahanglan ug magamit ang gigahin nga pondo sa maalamong paagi, ang Nagamandong Lawas naghikay nga kining maong buluhaton dumalahon sa Design/Build Department sa Brooklyn. Lima ka Regional Kingdom Hall Office ang gitukod aron sa pagtagana ug organisasyonal nga tabang. Ang Sanga sa Pilipinas nagalihok ubos sa opisina nga nahimutang sa Sanga sa Australia.
3 Ang Kingdom Hall Construction Desk gitukod diha sa matag sanga aron maoy moorganisar sa pagpanukod. Kining maong opisina motabang sa mga kongregasyon panahon sa proseso sa pagpilig propiedad ug nakaugmad na ug parehog sukdanan nga mga plano pinasukad sa lokal nga mga materyales ug mga paagi sa pagpanukod. Ang katuyoan sa programa mao ang pagtukod ug yano, maligdong, ug di-mahal nga mga Kingdom Hall.
4 Aduna bay panginahanglan niining programaha dinhi sa Pilipinas? Seguradong makatubag kita ug Oo. Sa 2001 ang tanang magtatan-aw sa sirkito nagpil-ap ug mga survey form bahin sa kahimtang sa mga Kingdom Hall sa ilang mga sirkito. Sa dihang nahipos na ang mga taho, kapin sa 1,300 ka bag-o o ayohonon gayod nga mga Kingdom Hall ang gikinahanglan. Sanglit dangtan mag taas nga panahon ang pagtukod ug daghan kaayong mga Kingdom Hall, kinahanglan gayong magmapailobon, tungod kay dili mahimo kining tanan nga dungan. Gawas pa, hinungdanon nga sa kasamtangan huptan ang atong presenteng mga Kingdom Hall diha sa maayong kahimtang.—Sant. 5:7, 8.
Ang Katuyoan sa Kingdom Hall Construction Desk
5 Ang Kingdom Hall Construction Desk sa laktod nagalihok ubos sa superbisyon sa Komite sa Sanga ug sa kooperasyon sa Service Department. Tungod niini mahatagag prioridad ang mga kongregasyon nga may kinadak-ang panginahanglan sa bag-ong Kingdom Hall diha sa dapit diin nagalihok ang Kingdom Hall Construction Group.
6 Mabatonan ang parehog sukdanan nga mga plano sa Kingdom Hall aron ikatagana ang kasarangan nga mga tinukod. Ang maong mga disenyo nagpakunhod sa dakog-trabahong mga detalye apan naggamit gihapon sa lokal nga mga materyales ug mga paagi sa pagtukod. Palihog matikdi ang duha ka hulagway nga ania niini nga pasukip. Ang una nagpakita sa pangunang puthaw nga gambalay nga gigamit sa pagpalig-on sa maong tinukod. Gigama kini sa usa ka lokal nga kompaniya apan gipatindog sa atong mga igsoon sulod lang sa duha ka adlaw. Ang ikaduhang hulagway nagpakita sa nahuman nang Kingdom Hall nga gitukod ubos sa bag-ong programa. Kining maong tinukod nahuman sulod lang sa duha ka bulan.
7 Maoy responsabilidad sa Kingdom Hall Construction Desk ang pagdumala sa tanang bahin sa proyekto sa Kingdom Hall. Naglakip kini sa pagpakigtigom una sa Lawas sa mga Ansiyano, ang pagpili sa disenyo ug gidak-on sa Kingdom Hall, pagpalit ug hustong pagrehistro sa propiedad alang sa maong tinukod, maingon man ang aktuwal nga pagtukod niana. Sa dili pa biyaan ang proyekto, ang pagbansay alang sa pagmentinar ihatag usab aron ang Kingdom Hall magpadayong maayog kahimtang sulod sa daghang tuig nga paggamit.
Kingdom Hall Construction Group
8 Unsaon pagtukod ang Kingdom Hall? Giuyonan sa Nagamandong Lawas ang pagporma ug mga Kingdom Hall Construction Group. Ang maong mga grupo motabang sa mga ansiyano sa kongregasyon sa pagpangandam ug pagtukod sa Kingdom Hall maingon man sa pagdumala sa gasto. Kining mga grupoha gilangkoban sa mga alagad ug mga boluntaryo sa konstruksiyon sa Kingdom Hall. Sa ubos ihatag namo ang mubong kahubitan niining maong mga trabahante ug kon sa unsang paagi makaamot sila sa kalamposan sa proyekto sa pagtukod.
9 Mga alagad sa pagtukod ug Kingdom Hall: Sa panguna sila maoy espirituwal nga mga lalaki nga may kasinatian sa pagpanukod. Ang pipila sa ilang mga asawa nagtrabaho usab ingong bahin sa mga grupo sa konstruksiyon. Usa ka alagad sa konstruksiyon sa Kingdom Hall mag-alagad ingong magtatan-aw uban sa lain pang kuwalipikado nga igsoong lalaki nga gitudlo ingong iyang katabang. Sila magaeskedyul, magaandam, ug magadumala sa matag proyekto. Ang mga kinahanglanon alang sa maong matang sa pag-alagad mao kini: bawtismado ug labing menos usa ka tuig, makatrabaho sulod sa taas-nga-yugto sa pag-alagad, nag-edad ug tali sa 19 ug 55 anyos, maayog panglawas, makaarang sa pagtrabahog bug-at, pisikal nga buluhaton, gipalabi kon nag-alagad na nga bug-os-panahon ingong payunir, ug nakaalagad na ug labing menos duha ka bulan ingong boluntaryo sa konstruksiyon sa Kingdom Hall. Ang panginahanglan itagana alang sa mga alagad sa konstruksiyon sa Kingdom Hall pareho sa ubang espesyal nga bug-os-panahong mga alagad sama kanilang anaa sa Bethel, nagapanawng mga magtatan-aw, ug mga espesyal payunir.
10 Mga boluntaryo sa konstruksiyon sa Kingdom Hall: Niadtong Nobyembre 2001 gipahibalo ang tanang kongregasyon maylabot niining buluhatona ug nakadawat ug pipila ka porma sa aplikasyon (A-25) nga mahimong pil-apan sa mga indibiduwal nga interesado niining buluhatona. Sa pagkakaron nakadawat na kamig kapin sa 400 sa maong mga aplikasyon ug gipabilhan namo pag-ayo ang interes nga gipakita sa mga igsoong lalaki ug babaye dinhi sa Pilipinas alang niini nga pag-alagad. Ang mga kinahanglanon alang sa mga boluntaryo sa konstruksiyon sa Kingdom Hall pareho ra sa mga kinahanglanon sa mga alagad sa konstruksiyon sa Kingdom Hall. Ang kalainan mao nga ang mga boluntaryo sa konstruksiyon maoy temporaryo, nga mag-alagad lamang sulod sa limitadong yugto sa panahon. Diin posible, sila maggikan nga duol ra sa proyekto aron mamenosan ang mga galastohan sa puy-anan ug transportasyon.
Ang Konstruksiyon sa Kingdom Hall Usa ka Proyekto sa Kongregasyon
11 Ang konstruksiyon sa Kingdom Hall usa ka proyekto gayod sa kongregasyon. Sa pagsugod gayod niana, ang mga ansiyano nalangkit sa pag-ugmad sa kadasig alang sa bag-ong Kingdom Hall. Himoon ang pagpili sa gidak-on sa tukoron ug tinoon sa mga ansiyano kon unsang pagpaluyo ang ikahatag sa kongregasyon pinaagig pinansiyal nga tabang ug pagboluntaryo.
12 Ang tanan diha sa kongregasyon gidasig sa pagpaluyo sa bug-os sa ilang kaugalingong proyekto sa Kingdom Hall. Ang pipila hayan makaboluntaryo matag adlaw hangtod matapos ang proyekto. Ang uban tingali makahimo niana sulod sa usa o duha ka adlaw matag semana. Unsa may ilang buhaton? Makatabang sila sa paghikay ug pagkaon, paglaba alang sa mga nagtrabaho, paghinlo sa dapit nga gitukoran, pagbantay niana sa magabii, ug pagtabang sa aktuwal nga konstruksiyon. Ang mga indibiduwal nga moboluntaryo magtrabaho ubos sa superbisyon sa responsableng mga igsoong lalaki diha sa Kingdom Hall Construction Group. Walay aplikasyon nga kinahanglang pil-apan alang sa mga boluntaryo sa kongregasyon apan sila kinahanglang mga magmamantala nga maayog dungog, labing menos 17 anyos ang edad, ug giaprobahan sa komite sa pag-alagad sa kongregasyon.
Mga Lakang sa Pagtukod ug Bag-ong Kingdom Hall
13 Unsa ang mga lakang nga pagahimoon sa kongregasyon kon buot nilang makabaton ug bag-ong Kingdom Hall? Ang unang pagahimoon mao ang paghangyo sa sangang buhatan pinaagig sulat. Tungod kay nagsugo ang Nagamandong Lawas nga ang mga Kingdom Hall mahimong tukoron alang lamang sa mga kongregasyon nga may 30 o kapin pang mga magmamantala, diha sa pipila ka kahimtang kinahanglan tingaling susihon kon angayan bang makig-uban sa laing kongregasyon diha sa duyog nga proyekto. Diin ang mga Kingdom Hall magamit sa ubay-ubayng mga kongregasyon, kini maoy maalamong paggamit gayod sa limitadong mga kahinguhaan nga atong nabatonan. Unahon ang mga proyekto nga makabenepisyo sa kinadaghanang mga magmamantala. Kon posible ang maong duyog nga proyekto, kini angayng ipahibalo diha sa pasiunang sulat sa hangyo ug ang mga komite sa pag-alagad sa matag kongregasyon nga nalangkit angayng magpirma sa maong sulat sa hangyo.
14 Sa dihang iasayn ang usa ka Kingdom Hall Construction Group sa inyong dapit, ang Kingdom Hall Construction Desk maghikay ug usa ka tigom uban sa lokal nga lawas sa mga ansiyano, uban sa magtatan-aw sa sirkito kon posible, ug uban sa mga lawas sa mga ansiyano nga anaa sa duol kon kapin sa usa ka kongregasyon ang makabenepisyo sa maong proyekto. Ang maong mga hawas mahimong gikan sa sangang buhatan o lokal nga mga igsoon sama sa magtatan-aw sa Kingdom Hall Construction Group kinsa gibansay sa pagtabang sa mga lawas sa mga ansiyano sa pagtino sa ilang panginahanglan alang sa bag-ong Kingdom Hall maingon man nasabtan ang nagpaluyong mga prinsipyo sa Bibliya nga naggiya niining buluhatona.
15 Hinungdanon usab nga mahibaloan ang bahin sa salapi nga mabatonan alang sa proyekto. Si Jesus nag-ingon diha sa Lucas 14:28: “Kinsa kaninyo nga buot magtukod ug torre nga dili una molingkod ug kuwentahon ang gasto, aron tan-awon kon siya aduna bay igo aron sa paghuman niini?” Ang Kingdom Hall Construction Desk nagalihok subay sa mao gihapong prinsipyo. Aron matino ang maarangan nga iamot sa kongregasyon ngadto sa proyekto sa Kingdom Hall, usa ka surbi ang gihimo pinaagi sa mga ansiyano. Ang mga pamilya ug mga indibiduwal kinahanglang magmarealistiko sa pagtino sa ilang maarangang ikahatag. Ang kantidad nga gibutyag angayng bahin sa normal nga galastohan sa pamilya.
16 Sa unsang paagi ang matag kontribusyon sa usa ikahatag ngadto sa kongregasyon? Ang 1 Corinto 16:1 ug 2 nag-ingon: “Karon mahitungod sa pagpangolekta alang sa mga balaan . . . Matag unang adlaw sa semana ang matag usa kaninyo diha sa iyang kaugalingong balay kinahanglang magagahin agig pagtigom sumala sa iyang pag-uswag, aron nga inig-abot nako dili na himoon ang pagpangolekta.” Nahiuyon niini, ang tanang kongregasyon nga buot makabaton ug bag-ong mga Kingdom Hall angayng magbaton ug kahon sa kontribusyon para sa ilang pondo sa pagtukod. Pinaagi sa maayong panig-ingnan sa mga ansiyano ug ministeryal nga mga alagad, makaseguro kita nga paluyohan gayod sa kongregasyon ang maong proyekto.
17 Sa dihang mosugod na paglihok ang Kingdom Hall Construction Group diha sa inyong dapit ug posible nga matagan-an ang inyong panginahanglan ug usa ka Kingdom Hall, ang dugang mga instruksiyon itagana ra nianang panahona.
Talagsaong mga Resulta Tungod sa Bag-ong Programa
18 Sa pagkakaron dunay unom ka Kingdom Hall Construction Group nga nagalihok dinhi sa Pilipinas. Hangtod sa Abril 2003, 13 ka bag-ong mga tinukod ang nahuman. Maayo kaayo kini nga pagsugod ug dahomon nato nga 24 pa ang makitang mahuman inigkatapos sa tuig. Bisan pa niana, tungod kay kapin pa sa 1,300 ka Kingdom Hall ang gikinahanglan, kita gipahinumdoman pag-usab nga ang tanan kinahanglang magpailob samtang naningkamot kita sa pagsulbad sa atong panginahanglan ug dugang pang mga Kingdom Hall.
19 Sukad nga ang programa sa konstruksiyon sa Kingdom Hall alang sa mga nasod nga may limitadong mga kahinguhaan nagsugod niadtong Nobyembre 1999, 5,542 ka bag-ong mga Kingdom Hall ang natukod na diha sa 88 ka nasod. Ang mahigugmaong mga amot sa atong tibuok-kalibotang panag-igsoonay mao ang nagpaposible sa maong “pag-angay-angay,” aron “ang [kongregasyon] nga adunay daghan wala makabaton ug sobra ka daghan, ug ang [kongregasyon] nga adunay diyutay wala makabaton ug labihan ka diyutay.” (2 Cor. 8:14, 15) Aduna pay daghang buluhaton nga pagahimoon ug mao pa lamay pagsugod niini dinhi sa Pilipinas. Kon unsa ka paspas ang kaugmaran ning maong programa magdepende gayod sa pinansiyal nga tabang ug sa kuwalipikadong pagdumala nga mabatonan. Laoman natong makita kon sa unsang paagi panalanginan ni Jehova kining maong programa dinhi sa Pilipinas.
[Hulagway sa panid 4]
Tigbalayon sa Kingdom Hall
[Hulagway sa panid 5]
Nahuman nga Kingdom Hall, Angat, Bulacan