Gipiyalan sa Maayong Balita
1 Pagkadako sa atong pribilehiyo nga piyalan sa maayong balita sa Diyos! (1 Tes. 2:4) Samtang isalikway tingali sa uban kining gamhanang mensahe, ang mga matinud-anog-kasingkasing madani niini ingong humot nga alimyon. (2 Cor. 2:14-16) Alang niadtong modawat ug motuman sa maayong balita, kini nagkahulogag kaluwasan. (Roma 1:16) Sa unsang paagi atong maampingan kining maayong balita nga gipiyal kanato?
2 Si Jesus ug ang mga Apostoles: Giuna ni Jesus ang pagwali sa maayong balita. (Luc. 4:18, 43) Bisan pag siya gikapoy ug gigutom, ang iyang gugma alang sa mga tawo ug ang iyang pagpabili alang sa mensahe nagtukmod kaniya sa pagpaambit niini ngadto sa uban. (Mar. 6:30-34) Pinaagi sa pulong ug buhat, iyang gisilsil sa mga hunahuna sa iyang mga tinun-an ang kahinungdanon sa buluhatong pagwali sa Gingharian.—Mat. 28:18-20; Mar. 13:10.
3 Sa pagsunod kang Jesus, ang mga apostoles masibotong nagpahayag sa mensahe sa Gingharian. Bisan pag sila gidagmalan ug gimandoan nga mohunong sa pagsangyaw, “sila wala mohunong sa pagpanudlo ug sa pagpahayag sa maayong balita.” (Buh. 5:40-42) Si apostol Pablo wala gayod moundang niining buluhatona. (1 Cor. 15:9, 10; Col. 1:29) Gipakasama niya ang pribilehiyo sa pagpaambit sa maayong balita nga usa ka utang ngadto sa iyang isigkatawo, ug kinabubut-on niyang gisakripisyo ang iyang personal nga kaharuhay aron matuman kana.—Buh. 20:24; Roma 1:14-16.
4 Atong Pribilehiyo Karong Adlawa: Ang pagpabili sa sagradong buluhaton nga gipiyal kanato motukmod nato sa pagpangitag mga paagi sa pagpalapad sa atong bahin diha sa buluhatong pagsangyaw. (Roma 15:16) Si Edward, kinsa anaa lang sa usa ka wheelchair, molingkod lang diha sa entrada sa hotel ug makig-estorya sa mga bisita bahin sa iyang pagtuo. Apan, tungod kay gusto niyang mohimo ug dugang pa, siya nagpahimo ug linaing luna sa iyang pickup nga trak, ug pinaagi niining sakyanana, siya nakapayunir sulod sa daghang katuigan, nga nagabiyahe ug libolibo ka kilometro alang sa maong buluhaton. Sama kang Edward, daghan karon ang nakapasibo sa ilang mga kahimtang aron mas pang makapakig-ambit sa pagpakaylap sa maayong balita.
5 Agig pagsunod kang Jesus ug sa iyang mga apostoles, hinaot kita karon magauna kanunay sa buluhatong pagsangyaw diha sa atong mga kinabuhi. Pinaagi sa pagbuhat niana, atong ginapasundayag ang atong gugma alang sa katawhan maingon man ang atong pagpabili sa maayong balita nga gipiyal kanato.